Display Style:
Column Style
प्रतिनिधिसभा विघटन, कात्तिक २६ व मंसिर ३ गते निगु चरणय् निर्वाचनया घोषणा
लहानान्युज | कछलाथ्व एकादशी ११४१,जेष्ठ ८ सनिवाः
मन्त्रिपरिषदया सिफारिशं राष्ट्रपति विद्यादेवी भण्डारीं चान्ह्यः प्रतिनिधिसभा विघटन याना मध्यावधि चुनाव घोषणा यागु दु।
प्रतिनिधिसभा सदस्यया लागि चुनाव कात्तिक २६ व मंसिर ३ गते याना निगु चरणय् यायेत्यंगु खः। व स्वया न्ह्यः चान्ह्यः मन्त्रिपरिषदया बैठकं संविधानया धारा ७६(७) कथं प्रतिनिधिसभा भंग याना मध्यावधि घोषणा यायेगु राष्ट्रपतिसमक्ष सिफारिश यायेगु निर्णय यागु खः ।
धारा ७६(७) य् धयातःगु दु, उपधारा (५) बमोजिम नियुक्त प्रधानमन्त्रीं विश्वासको मत काये मफुगु वा प्रधानमन्त्री नियुक्त जुइ मफुसा प्रधानमन्त्रीे सिफारिशय् राष्ट्रपतिं प्रतिनिधिसभा विघटन याना खुलाया दुने मेगु प्रतिनिधिसभाया निर्वाचन सम्पन्न यायेगु निर्वाचनया तिथि क्वछिइ।’
प्रधानमन्त्रीइ ओली व देउवाया दाबी मगाः
संसद भंग याये न्ह्यः राष्ट्रपति भण्डारीं प्रधानमन्त्री नियुक्तिया लागि ओली व नेपाली कांग्रेसया सभापति शेरबहादुर देउवां यानादीगु दाबी अस्वीकार यानादीगु खः।
नरदेवी आयुर्वेदिक अस्पतालय् ५०गू वेडया आइसोलेसन न्ह्यात
लहानान्युज | कछलाथ्व नवमी ११४१,जेष्ठ ७ शुक्रवाः
येँ महानगरया अनुदान ग्वहालिं थौंनिसें नरदेवी आयुर्वेदिक अस्पतालय् ५०गू वेड क्षमताया आइसोलेसन न्ह्याःगु दु ।
सहरी विकास राज्यमन्त्री रामवीर मानन्धर, महानगरया प्रमुख विद्यासुन्दर शााक्य व उपप्रमुख हरिप्रभा खड्गी श्रेष्ठं आइसोलेसनया शुभारम्भ यानादिगु खः । आइसोलेसन न्ह्याकेत येँ महानगर व अस्पताल दथुई वंगु वैशाख २७ गते सम्झौता जूगु खः ।
छक्व जक न्याना गाइगु उपकरण व सामाग्रीया लागि व नियमित खर्च यायेमाःगु ज्याय् महानगरं अनुदान बिइगु धाःगु दु । अस्पतालया क्षमता ११८ वेड खः । २५ वेडया एचडीयू व २५ वेडया आइसोलेसनं सेवा न्ह्याकूगु खः ।
उगु झ्वलय् थःगु धापू तसें राज्यमन्त्री मानन्धरं धयादिल, “अस्पताल न्ह्याकेत अक्सिजन अनिवार्य खः । विगतय् जूगु कमीकमजोरीं अक्सिजनय् मगामचाः जुल । थुकियात सरकारं सुधार याई” ।
अथेहे आइसोलसेन न्ह्याकेधुंका महानगर प्रमुख विद्यासुन्दर शाक्यं धयादिल, “जनतापिनिगु जीवन रक्षा नितिं महानगरपालिकां स्वास्थ्य लागाय् लगानी अप्वेकाःगु दु ।”
ज्याझ्वलय् जनतापिनिगु जीवन रक्षा यायेगु स्थानीय सरकारया जिम्मेवारी खः । थुगु भालायात पूवंकेत विकास खर्चयात दिकाः नं स्वास्थ्य क्षेत्रय् खर्च अप्वेकाःगु उपप्रमुख हरिप्रभा खड्गी श्रेष्ठ धयादिल ।
अस्पतालय् भर्ना जूपिं ल्वःगिपिन्त रोग प्रतिरोधात्मक क्षमता अप्वेकिगु आयुर्वेदिक वासः इनेगु, अक्सिजन थेरापी यायेगु, ध्यान योग व मनोसामाजिक परामर्श बिइगु, श्वाशप्रश्वाश अभ्यास व छातीया थेरापी यायेगु, चिकित्सा एवं मानसिक स्वास्थ्य प्रर्वधनया लागि सत्वावजय (आध्यात्मिक प्रवचन, उत्प्रेरणामूलक प्रवचन, हास्यासन) लगायत विधि नालाः वासः यानावयाच्वंगु दु ।
७८दँय् थेरवाद बुद्धिजमय् एम.ए याम्ह रेग्मी मन्त
कछलाथ्व नवमी ११४१,जेष्ठ ७ शुक्रवाः
नेपालय् न्हापांखुसी ७८दँय् थेरवाद बुद्धिजमय् एम.ए यानादिम्ह दुर्गा देवी मानन्धर रेग्मी मन्त ।
८३ दँय् शिक्षाविद् मानन्धरया स्टार हस्पिटल यलय् वासः यायेगु झ्वलय् मदूगु खः ।
वय्क ताः ईनिसें नशा सम्बन्धी ल्वचं पीडित जुयादिगु खः । रेग्मीं लुम्बिनी बौद्ध विश्वविद्यालयपाखें फस्ट व्याचय् वि.सं. २०७२ सालय् थेरवाद बुद्धिजमय् एम.ए यानादिगु खः ।
पूर्व सहसचिव तक्कं जुयादिम्ह वय्कया शिक्षा लागाय् यक्वः हे योगदान दूगु खः । वरिष्ठ पत्रकार रामकृष्ण रेग्मीया जहान जुयादिम्ह रेग्मीया थौं हे पशुपतिइ अन्त्येष्टि याःगु दु ।
येँ जक १,७५२ म्ह कोरोना संक्रमण पुष्टि
लहानान्युज | कछलाथ्व नवमी ११४१,जेष्ठ ७ शुक्रवाः
वंगु २४ घण्टाय् स्वनिगः दुने २ हजार ४ सय ११ म्हेसित कोरोना संक्रमण पुष्टि जूगु दु।
स्वास्थ्य मन्त्रालयया कथं थौं येँ जक १,७५२ म्हेसित कोरोना संक्रमण पुष्टि जुगु दु।
अथेहे ख्वपय् २५९ म्ह व यलय् ४०० म्हेसित कोरोना संक्रमित पुष्टि जूगु दु।
देयन्यक थप ८६०७ म्हेसित कोरोना संक्रमण पुष्टि जुगु खः।
७८९० कोरोना संक्रमणमुक्त, ८४०७ म्हेसित पुष्टि, १७७ म्ह मन्त
लहानान्युज | कछलाथ्व नवमी ११४१,जेष्ठ ७ शुक्रवाः
वंगु २४ घण्टाय् दुने देयन्यक ८ हजार ४०७ म्हेसित कोरोना संक्रमण पुष्टि जूगु दु।
स्वास्थ्य तथा जनसंख्या मन्त्रालयं बिगु जानकारी कथं थौं थी जिल्लाय् २२ हजार ३५३ पीसीआर परीक्षणय् ८ हजार ४०७ म्हेसित कोरोना पुष्टि जुगु दु।
थ्व नाप आःतक नेपाल् कोरोना संक्रमित जूपि ४ लाख ९७ हजार ५२ म्ह थ्यंगु दु।
अथेहे वंगु २४ घण्टाय् ७ हजार ८९० म्ह कोरोना संक्रमणमुक्त जूगु दु।
थ्व नाप कोरोना संक्रमणमुक्त जूपि ३ लाख ७४ हजार ८३६ म्ह थ्यंगु दु। अथेहे नेपालय् सक्रिय संक्रमितपि १ लाख १६ हजार १९२ म्ह थ्यंगु दु ।
वंगु २४ घण्टाय् थप १७७ म्हेसिगु ज्यान वंगु दु। थ्व नाप आःतक नेपालय् कोरोनां सीपि ६ हजार २४ म्ह थ्यंगु दु।
