Display Style:
Column Style
राष्ट्रपति कार्यालय न सांसदपिनिगु हस्ताक्षर अध्ययन याइगु
लहानान्युज | कछलाथ्व नवमी ११४१,जेष्ठ ७ शुक्रवाः
न्हुगु सरकार गठनया लागि प्रतिपक्षी गठबन्धन व सत्ता पक्षं दाबी यायेवं राष्ट्रपति कार्यालय न सांसदपिनिगु हस्ताक्षर अध्ययन याइगु जुगु दु।
नेपाली कांग्रेस, माओवादी केन्द्र, जसपाया बाबुराम–उपेन्द्र पक्ष व नेकपा एमालेया माधव नेपाल पक्षं १४९ म्ह सांसदपिनिगु हस्ताक्षर बुझे यागु दु।
अथेहे प्रधानमन्त्री नाप एमाले अध्यक्ष केपी शर्मा ओली न १५३ म्ह सांसदपिनिगु हस्ताक्षर बुझे यागु दु । तर निगु पक्षं बहुमत दाबी यायेव राष्ट्रपति कार्यालयं अध्ययन याना जक निर्णय याइगु जुगु दु ।
एमालेया छू सांसदपि व जसपाया सांसदपिन्स थःपिनिगु हस्ताक्षर दुरुपयोग जुगु दु धका धागु दु। निगु हे पक्षयापि सांसदपिन्स थःथःपिनिगु हस्ताक्षर दुरुपयोग जूगु आरोप बिया वयच्वंगु दु।
राष्ट्रपतिया प्रेस सल्लाहकार टीका ढकालं सांसदपिनिगु गुनासो वंगु दु, आवश्यक जुगु कथं कानुनी परामर्श कायेगु जुइ धका धागु दु ।
थौं हे निर्णय वइगु सम्भावना धासा कम जुइ धका वयकलं धयादीगु दु।
हस्ताक्षरय् योगेश भट्टराईं असहमति क्यन
लहानान्युज | कछलाथ्व नवमी ११४१,जेष्ठ ७ शुक्रवाः
नेकपा एमालेया नेता माधवकुमार नेपाल समूहय् दुम्ह नेतापिन्स योगेश भट्टराई न असहमति क्यंगुलि वयागु नां विपक्षी गठबन्धनया हस्ताक्षरय् हटे यागु दु।
नेता भट्टराई न थः थुगु प्रक्रियाय् सहभागी मजुइगु धासे नां दुमथ्याकेत इनाप यागु खः।
अथेहे नेपाल समूहय् दुपि सुरेन्द्र पाण्डे, घनश्याम भुसाल लगायत न्याम्ह नेतापिन्स थःपिनिगु सहमति मदु धका छम्ह एमालेया हे नेता धागु दु ।
थेरापिलिसेंया अक्सिजन केन्द्रया पलिस्था जुल
कछलाथ्व नवमी ११४१,जेष्ठ ७ शुक्रवाः
येँ महानरपालिकाया आर्थिक ग्वाहालिइ राधास्वामी सत्संग व्यास, नेपाली सेना, अमेरिका–नेपाल मेडिकल फाउन्डेशनया सहकार्यय् ८८गू बेडया थेरापीलिसेंया अक्सिजन केन्द्रया थौं उपप्रधानमन्त्री लिसें कोभिड–१९ संकट व्यवस्थापन केन्द्र(सिसिएमसी)या संयोजक ईश्वर पोखरेलं पलिस्था यानादिल ।
उगु झ्वलय् उपप्रधानमन्त्री ईश्वर पोखरेलं जःखः देय् भारत व चीनं नेपालय् अक्सिजन छ्वया हयाच्वंगु धासें अक्सिजन व भ्याक्सिनया लागि न्ह्याकू हे बजेट माःसां नं नेपालय् आयात यायेगु व नेपाली जनतापिनिगु जिवन रक्षा यायेत सरकार प्रतिबद्ध दूगु धयादिल ।
अक्सिजन केन्द्रं अस्पतालय् अक्सिजनया मगामचाः जूपिं ल्वगितय्त वासः यायेगु महासेनानी डा. सुमनलाल डंगोलं न्हयथनादिल । केन्द्रय् मेमेगु स्वास्थ्य अवस्था बालाँपिं तर अक्सिजन माःपिं ल्वगितय्त अस्पतालं रिफर याःकथं थेरापी पाखें अक्सिजन बिइगु नं वयकलं जानकारी बियादिल ।
प्रधानमन्त्री ओली न दाबी प्रस्तुत यात
लहानान्युज | कछलाथ्व नवमी ११४१,जेष्ठ ७ शुक्रवाः
नेकपा एमाले संसदीय दलया नेता केपी शर्मा ओली नं प्रधानमन्त्रीया लागि थःगु दाबी प्रस्तुत यागु दु।
ओली एमालेया १२१ व जनता समाजवादी पार्टी –जसपा)या १६ सांसदपिनिगु हस्ताक्षर ज्वना दाबी पेश यागु खः।
थ्व स्वया न्ह्यः नेपाली कांग्रेसया सभापति शेरबहादुर देउवाया पक्षय् १४९ सांसद मूकुगु खः ।
वया लिपा प्रधानमन्त्रीया दाबी यायेत विपक्षी गठबन्धनया नेतापि शीतल निवास वंगु खः ।
१४९ म्ह सांसदपिनिगु हस्ताक्षर ज्वना देउवा शीतलनिवासय्
लहानान्युज | कछलाथ्व नवमी ११४१,जेष्ठ ७ शुक्रवाः
संविधानया धारा ७६ (५) कथं सरकार गठनया लागि दावी पेश यायेत विपक्षी दलपि राष्ट्रपति कार्यालय शीतलनिवास थ्यंगु दु।
नेपाली कांग्रेसया सभापति शेरबहादुर देउवायात प्रधनमन्त्री दयकेगु माग यासे १४९ म्ह सांसदपिनिगु हस्ताक्षर ज्वना नेतापिनिगु शीतलनिवास थ्यंगु दु।
देउवायात प्रधानमन्त्री यायेगु लागि नेपाली कांग्रेस, नेकपा माओवादी केन्द्र, नेकपा एमालेया माधवकुमार नेपाल पक्ष व जनता समाजवादी पार्टीया बाबुराम भट्टराई उपेन्द्र यादव पक्षया सांसदपिनिगु समर्थन यागु दु।
