वंगु २४ घण्टाया दुने देयन्यक ३ हजार १२५ म्हेसित कोरोना भाइरस संक्रमण पुष्टि जुगु दु।

१० हजार ६१३ म्हेसिगु नमुना पीसीआर परीक्षणय् २ हजार २७९ म्ह व ३ हजार १९८ एन्टिजेन परीक्षण यागुलि ८४६ म्ह याना ३ हजार १२५ म्हेसित कोरोना संक्रमण खनेदुगु धका स्वास्थ्य तथा जनसंख्या मन्त्रालयं धागु दु।

अथेहे वंगु २४ घण्टाय् कोरोना संक्रमणपाखे २३ म्ह सीगु दु सा १ हजार ९२५ म्ह कोरोनामुक्त जुगु दु। थ्व नाप आःतक नेपालय् कोरोना संक्रमितपि ७ लाख ६२ हजार ४३२ म्ह थ्यंगु दु।

उकि मध्ये ९ हजार ८९८ म्ह सी धुकुगु दु सा आःतक ६ लाख ५८ हजार १२२ म्ह कोरोनामुक्त जुइ धुकुगु दु।

गणपति लघुवित्त वित्तीय संस्थाय् ३३ शाखा कार्यालयया प्रमुखपिन्स मंकाः राजीनामा बिगु दु।

चालु आर्थिक वर्षय् सेवा सुविधा थमकागु धासो शाखा प्रमुखपिन्स सोमबाः प्रमुख कार्यकारी अधिकृत किरण विष्ट समक्ष सामुहिक राजीनामा बिगु खः।

गणपति लघुवित्तं ३६ शाखा कार्याल दुगु खः। स्वगू बाहेक दक्को शाखाया प्रमुखपिन्स राजनीामा बिगु धका कास्कीया विजयपुर शाखाया प्रमुख रिजन लामिछाने न धागु दु।

लामिछानेया कथं साउन २५ गते तक ई बिया उमिसं राजीनामा बुझे यागु खः।

घोषणा स्वास्थ्य तथा जनसङ्ख्या राज्यमन्त्री उमेश श्रेष्ठं सुरक्षाकःमि बाहेक सरकारी सेवा सुविधा मकायेगु घोषणा यानादीगु दु।

मन्त्री श्रेष्ठं थौं थःगु १०० दिं कार्ययोजना सार्वजनिक यानादीसे सुरक्षाकःमि बाहेक गाडी, तलब भत्ता व आवासया सुविधा मकायेगु घोषणा यानादीगु खः।नाप वयकलं राज्यमन्त्री जुया च्वनागु इलय् थःगु छुु न व्यापारिक संस्थाया पदमा मच्वनेगु धका घोषणा न यानादीगु खः।

प्रधानमन्त्री शेरबहादुर देउवां वयकः यात साउन १० गते स्वास्थ्य राज्यमन्त्रीइ नियुक्त यागु खः। मन्त्री श्रेष्ठ लिटिल एञ्जेल्स स्कुलया सञ्चालक नाप मेमेगु क्षेत्रय् वयकःया लगानी दुगु दु।

लुँया भाः थौं तोलां सच्छि कुहावंगु दु।

म्हिगः लुँ तोलां ९२ हजार ४ सय रुपैयाँ जुगु थौं  ९२ हजार ३ सय रुपैयाँ तक थ्यंगु दु।

थौं वहःया भाः धासा स्थिर जुगु दु। वहः तोलां १२ सय ८५ रुपैयाँ हे कारोबार जुगु दु धका नेपाल सुनचाँदी व्यवसायी महासङ्घं धागु दु।