प्रधानमन्त्री शेरबहादुर देउवां कोभिड–१९ युनिफाइड केन्द्रीय अस्पतालया प्रमुख कार्यकारी अधिकारी डा. जागेश्वर गौतम नाप प्यम्हसिगु जिम्मेवारी हेरफेर यायेगु राज्यमन्त्री स्तरीय निर्णय स्थगित यागु दु।

प्रधानमन्त्री देउवां स्वास्थ्यमन्त्रीया जिम्मेवारी थःनाप हे तया उमेश श्रेष्ठयात राज्यमन्त्री नियुक्त यागु खः। राज्यमन्त्री श्रेष्ठं डा. गौतमयात प्रसूति तथा स्त्रीरोग अस्पताल थापाथली सरुवा यागु खःसा युनिफाइड केन्द्रीय अस्पतालया प्रमुख कार्यकारी अधिकारीयात ट्रमा सेन्टरय डा. रुद्र मरासिनी यात छ्वंगु खः।

अथेहे स्वास्थ्य समन्वय महाशाखाया डा. विवेकलाल कर्ण व सार्क क्षयरोग केन्द्रय् डा. रिता भण्डारीयात छ्वंगु खः।  तर प्रधानमन्त्री देउवां राज्यमन्त्रीं निर्णय याये मिले मजु धासे कार्यान्वयन मयायेत धागु खः। स्वास्थ्य मन्त्रालयया छम्ह उच्च अधिकारीं पनि प्रधानमन्त्री कार्यालयपाखे निर्णय कार्यान्वयन मयायेत निर्देशन वंगु दु धका पुष्टि यागु दु।

मेलम्ची खुसि म्हिगः चान्ह्यः बाः वया मेलम्ची–११ य् न्ह्यखा छेँ चुइकूगु दु।

मेलम्ची–११ पिपलबोटया हरिशरण श्रेष्ठ नाप खुखा छेँ व पुलागु बजाःया छखाँ छेँ चुइकूगु धका  स्थानीयपिन्स धागु दु। शनिवाः निसे मेलम्ची खुसिइ आःतक ६७ गु छेँ व टहरा चुकेधुकुगु दु।

हेलम्बुया किउल, चनौटे, ग्याल्थुम लगायत थासय् जक ५५ व तालामाराङ व मेलम्चीइ १२ छेँ व टहरा चुके धुकुगु दु धका जिल्ला प्रहरी कार्यालय सिन्धुपाल्चोकया प्रहरी उपरीक्षक राजन अधिकारीं जानकारी बिगु दु।

वयकःया कथं चनौटे ग्याल्थुम व ढुङ्गे्र बजार, मेलम्ची–१२ दुगु मध्यपहाडी लोकमार्ग नाप मेलम्ची, इन्द्रावती, चौतारा व पाँचपोखरीयात स्वाइगु छगु जक बाहुनेपाटी ताँ जोखिमय् लागु दु।

थ्व स्वया न्ह्य वंगु असार १ गते खुसिइ बाः वया बचे जुगु बाहुनेपाटी बजाः आः न जोखिमय् दु।

सरकार सञ्चालनया लागि मंकाः न्यूनतम कार्यक्रमया मस्यौदा तयार जूगु दु। सत्तारुढ गठबन्धनया कार्यदलं बुँदागत रुप मस्यौदा तयार यागु दु।

उगु मस्यौदाय् थौं छलफल जुइगु धका कार्यदलया सदस्य केशवराज जोशीं जानकारी बिगु दु। मस्यौदा क्वछिइ धुकलकि जक सार्वजनिक यायेगु तयारी दु। गठबन्धनं कांग्रेस महामन्त्री पूर्णबहादुर खड्काया संयोजकत्वय् कार्यदल गठन याना सरकारया न्यूनतम मंकाः कार्यक्रम दयकूगु खः।

कार्यदलय् कांग्रेसया मिनेन्द्र रिजाल, रमेश लेखक, माओवादी केन्द्रया देव गुरुङ व वर्षमान पुन, जसपापाखे राजेन्द्र श्रेष्ठ व महेन्द्र राय यादवपिं च्वगु खः। सरकारया प्राथमिकता, सरकारया नीति व कार्यक्रम, सङ्घीयताया कार्यान्वयन लगायतया विषय कार्यदलं मागु खाका तय यागु खः। देउवा नेतृत्वया सरकार गठन जुगु स्वंगु वाः दुने तक न मन्त्रिपरिषद् विस्तार जुइ मफुनि।

बालुवाटारय् शीर्ष नेतापि म्हिगः जुगु छलफलय् मंकाः कार्यक्रम लिपा जक मन्त्रिपरिषद् विस्तार यायेगु सहमति जूगु खः। बैठकय् प्रधानमन्त्री शेरबहादुर देउवा, माओवादी केन्द्रया अध्यक्ष पुष्पकमल दाहाल प्रचण्ड व जसपा अध्यक्ष उपेन्द्र यादव सहभागी जूगु खः।

सभामुख अग्निप्रसाद सापकोटां भुखाचं क्षतिग्रस्त जूगु संसद् भवनयात सङ्ग्रहालय दयकेगु योजना दु धका धागु दु।

विसं २०७२ वैशाखय वंग भुखाचं क्षतिग्रस्त जुया आः जीर्ण अवस्थाय् दुगु सिंहदरबारया संसद् भवन अवलोकन यासे वयकलं पुरातात्विक महत्व दुगुलि संरचना यात संरक्षण यायेमाःगु धका धयादीगु खः। ‘संसद् भवनया संरक्षण आवश्यक दु, प्राविधिक टोली नाप छलफल याना आवश्यक पलाः ल्ह्वनेमाः’, अवलोकन लिपा वयकल धयादीगु दु, ‘सङ्ग्रहालय नाप थुकियात पुस्तकालयया रुपय् विकास यायेमाः।’

निदँ न्ह्यः प्रतिनिधिसभाया विकास व प्रविधि समितिं पुलागु संसद् भवनयात थुना ‘स्टेट गेस्ट हाउस’ दयकेत सरकारयात निर्देशन बियागु दु । वया यलिपा थुगु भवनबारे सरकारं छु न पलाः ल्ह्लंगु मदु। सभामुख सापकोटां अवलोकन भ्रमणलिपा जीर्ण भवनबारे धिसिलागु पलाः छिलिइगु भलसा कयादीगु दु।

वंगु २४ घण्टाया दुने स्वनिगलय् थप ७७० म्ह कोरोना सक्रमित जुगु दु।

उकि मध्ये येँ जक ५५६ म्हेसित कोरोना सक्रमित जूगु दु। अथेहे यलय् ११५ म्ह व ख्वपय् ९९ म्हेसित संक्रमित जूगु दु।

मन्त्रालयया कथं कास्कीइ १७४, मकवानपुरय् १३६, मोरङय् १३५, बागलुङय् १३२, व सुनसरीइ ११६ म्हेसित संक्रमित जूगु दु।

अथेहे काभ्रेय् १०७, चितवनय् ९०, झापाय् ४६, रामेछापय् ४५, रुपन्देहीइ ४२, दोलखा व धादिङय् ३६÷३६ म्ह व नुवाकोटय् ३४ म्हेसित कोरोना भाइरस संक्रमण जूगु दु।

कैलालीइ ३३, गोरखाय् २८, सिन्धुपाल्चोकय् २६ व धनकुटाय् २२ म्ह संक्रमितपि थपे जुगु दु।