मकवानपुरया भीमफेदी कारागारय् ३५५ म्ह कैदीबन्दीपिन्त कोरोना संक्रमण पुष्टि जुगु दु।

उगु कारागारय् च्वपि ९७० म्ह कैदीबन्दीपिन्त एन्टिजेन परीक्षण यागुलि ३५५ म्ह संक्रमण पुष्टि जुगु खः। छू कैदीबन्दीपि सेँख चायेगु समस्या खनेदयवं परीक्षण यागु खः।

संक्रमितपि १४ म्ह लक्षण खनेदुगुलि उपचारया लागि साउन ११ गते येँ छ्वया हःगु खः। संक्रमित कैदीबन्दीपिन्त स्वास्थ सुरक्षाया मापदण्ड कथं आइसोलेसनय् तयातइगु दु धका जेलर नारायण पाण्डे धागु दु।

‘संक्रमण खने दुपिन्त प्रोटिनयुक्त नयेगु व्यवस्थापन यानागु दु धका न कयकलं धागु दु।

वर्तमान सरकार छु दलयागु खः ? प्रधानमन्त्री शेरबहादुर देउवा कांग्रेसया प्रधानमन्त्री खः कि निर्दलीय प्रधानमन्त्री खः ?

स्वनिगःया राजनीतिक चाकलय् नं थौंकन्हय् थ्व न्ह्यसः पिहां वःगु दु।येँ महानगरपालिकाया प्रमुख लिसें नेकपा (एमाले) या नेता विद्यासुन्दर शाक्यं थ्व न्ह्यसः तयादीवं स्वनिगःया राजनीतिइ नं थ्व विषय चर्चाय् वःगु खः ।

वंगु आइतवाः जूगु छगू सार्वजनिक ज्याझ्वलय् वय्कलं न्हापांखुसी थ्व बिचाः तयादीगु खः । वयां लिपा येँया थीथी दल आवद्ध स्थानीय नेतातय् दथुइ नं थुकियात कयाः चर्चा शुरु जूगु दु। वय्कलं धयादिल, ‘जिं थथे धयाबलय् प्रधानमन्त्री देउवाया विरोध यात धकाः नं मनूतय्सं धया हल ।

तर जिं प्रधानमन्त्रीया विरोध यानागु मखु । संविधानय् गनं नं निर्दलीय प्रधानमन्त्री दइ धकाः कल्पना तकं याना तःगु मदु । तर देउवायात न्ह्यागु पार्टीया सांसदं भोट बिउसां जिउ धाल, ह्वीप लगे जुइ मखु हं, धायेबलय् वय्कः गय् जुयाः बहुदलीय प्रधानमन्त्री जुल ?’ नेपाःया वर्तमान राज्य व्यवस्थाय् निर्दलीय प्रधानमन्त्री नं जुइ धकाः संविधानय् गनं नं च्वया मतःगु दावी वय्कलं यानादिल।

अबलय् संविधान च्वःपिं नेपाली कांग्रेसया सांसदपिं ध्यानगोविन्द रंजित, गगन थापा थेंज्याःपिंके थ्व न्ह्यसः न्यनेमाःगु बिचाः वय्कलं तयादिल । प्रधानमन्त्री केपी शर्मा ओलीयात क्वःथलाः प्रधानमन्त्री जूवःम्ह भाजु शेरबहादुर देउवाया नियुक्ति निर्दलीय खः लाकि बहुदलीय खः धइगु थ्व राजनीतिक विवाद केन्द्रीयस्तरय् जक कायम जुयाच्वंगु खःसा मेयर शाक्यया थ्व धापू लिपा थुकियात कयाः नगरस्तरय् नं चर्चा शुरु जूगु दु।

येँया ऐतिहासिक मरु सतः (काष्ठमण्डप) य् आः याकनं हे गजू छुनाः पुनर्निर्माण सम्पन्न याइगु जूगु दु।

मरु सतलय् गजू छुइगु लागिं म्हिगः विहीवाः गजूयात लसकुस यानाः सतलय् तये हःगु खः ।

आः छुं न्हि लिपा सतःया पलिइ गजू छुइगु खँ सीदुगु दु ।

लसकुस यानाः मरु सतलय् हये न्ह्यः थ्व गजूयात नापसं च्वंगु श्रीखण्डतरुमुल महाविहार सिँख्वःमू बहाः दुने निन्हु तक तयाः अनया गुर्जुपिंसं तान्त्रिक विधिं पूजा याःगु खः।

म्हिगः सिँख्वःमू बहाःनिसें नेपाली सेनाया जवानतय्त कुबिकाः मरु सतः दुने तये यंकूगु खः । मरु सतः दुने यंके न्ह्यः गजूयात मरु सतः लिसें नापसं च्वंगु सिँल्यं सतः तकं चाःहीकूगु खः ।

मरु सतलय् दिके धुंकाः नं सिँख्वःमू बहाःया गुर्जुपिंसं तान्त्रिक विधिं चचा हालाः गजूया पुजा याःगु खः ।

मरु सतःया पुनर्निर्माण ज्या आः निलाया दुने सम्पन्न यायेगु ताः तयागु खँ काष्ठमण्डप पुनर्निर्माण समितिया नायः राजेश शाक्यं कनादिल ।

जिल्ला प्रशासन कार्यालय चितवनं साउन २४ गते चान्ह्य १२ बजे तकया लागि निषेधाज्ञा थप यागु दु।

जिल्लाया कोभिड–१९ या संक्रमण जोखिम कायम हे दुगुलि व ‘डेल्टा भेरियन्ट’ तक पुष्टि जुगुलि प्रशासनं साउन २४ गत तके निशेधाज्ञा जारी यायेगु निर्णय यागु दु। न्हपा याना तःगु निशेधाज्ञा थौं चान्ह्य १२ बजे क्वाचाइगु दु।

प्रशासनं निशेधाज्ञायात छ्वासूका व स्वास्थ्य सुरक्षा मापदण्ड पालना याना व्यापार–व्यवसाय सञ्चालन यायेत इनाय यागु दु। प्रमुख जिल्ला अधिकारीं बिगु जारी निषेधाज्ञा सम्बन्धी आदेशय् भौतिक रूप उपस्थित जुया छु न प्रकारया सभा, सम्मेलन, सेमिनार, महोत्सव, धार्मिक संस्कारया ज्या सञ्चालन याये दइ मखु धका उल्लेख यागु दु।

वंगु २४ घण्टाय् देयन्यक ३,३६५ म्ह कोरोना संक्रमित पुष्टि जुगु दुु।

स्वास्थ्य तथा जनसंख्या मन्त्रालयया कथं ९ हजार ५५५ म्हेसिगु पीसीआर परीक्षण्य २३३५ म्ह व ४६८७ म्हेसिगु एन्टिजेन परीक्षणय् १०३० म्ह याना ३३६५ म्ह संक्रमण पुष्टि जुगु दु।

कोरोना संक्रमणया कारण वंगु २४ घण्टाया दुने १६ म्ह सीगु दु। अथेहे १३७३ म्ह संक्रमणमुक्त जुगु दु। बिहीबाः थपे जूगु नाप आःतक नेपालय् कोरोना संक्रमितपि ६ लाख ९० हजार ३४२ म्ह थ्यंगु दु।

कि मध्ये ९ हजार ८०७ म्ह सी धुकुसा ६ लाख ५० हजार ४४५ म्ह संक्रमणमुक्त जुइ धुकुगु दु।