येँ महानगर दुने थीथी थासय् फोहोर उत्पादनया मात्रा ३० निसे ५० प्रतिशत तक घटे जुगु धका वातावरण व्यवस्थापन विभागं धागु दु ।

सामान्य इलय महानगरय् न्हि २५ गः गाडी तक फोहोर ल्याण्डफिल साइटय् वना च्वंगु खः । थौं १३ गः गाडी उखे पाखे वनेगु तयारी दु ।

वातावरण व्यवस्थापन विभागया प्रमुख हरिकुमार श्रेष्ठया कथं व्यवसायिक क्षेत्रय्  यक्को कम जुगु दु सा छेँखापति न कम जुगु दु, सतकय् जम्मा जुइगु फोहोर ५० प्रतिशत क्वहा वंगु दु धका धयादीगु दु ।

अथेहे फोहोरमैला व्यवस्थापन संघया अनुमान भचा फरक खनेदु । संघया महासचिव मीत्र घिमिरेया कथं पिने बन्द जुगुलि मनू तयस छेँ सफा यागु इलय् फोहोर पिहावंगु खः । थ्व न्ह्यागु इलय् न जुइ मखु । उकि आः  फोहोरया मात्रा अझ न घटे जुइगु सम्भावना दु ।

वयकलं उदाहरण बिया धयादीगु दु, वडा ३, ४ व ७ पाखे न्हापा स्वया न्हि ८ ट्रिपर फोहोर संकलन जुइ थाय् आः ६ ट्रिपर जक संकलन जुया च्वंगु दु ।

होटल, रेष्टुरेन्ट, पार्टी प्यालेस बन्द जुगुलि फोहोर उत्पादन जुइगु कम जुगु दु ।

सरकारं राष्ट्रिय जनगणना सम्बन्धी तालिम स्थगित यागु दु ।

कोरोना संक्रमण अप्वोया वंगुुलि थ्व हे वैशाख १६ गतेनिसे सुरु यायेत्यंगु गणक व सुपरिवेक्षकपिनिगु तालिम स्थगित यागु दु।

केन्द्रीय तथ्यांक विभागयया सूचना अधिकारी तिर्थ चौलागाई न जनगणना प्रयोजनया लागि जुया वयाच्वंगु तालिम स्थगित जुगु दु धका जानकारी बिगु दु ।

जनगणना नाप सम्बन्धी थप निर्णय यायेत राष्ट्रिय योजना आयोगया तथ्यांक परिषदया बैठक थौं च्वने त्यंगु दु । सरकारं वइगु आगामी जेठ २५ निसे असार ७ गते तक झीनिक्वंगु राष्ट्रिय जनगणना याये त्यंगु खः ।

जनगणनाया स्थलगत तथ्यांक संकलन यायेत ३९ हजार गणक व आठ हजार सुपरिवेक्षक परिचालन यायेगु योजना दु ।

बाँकेय् आइतवाः चान्ह्य व सोमवाः सुथय् तक दुने कोरोना सक्रमणं खुम्ह सी धुकुगु दु ।

सीपि न्याम्ह बाँके जिल्लाय् व छम्ह बर्दिया जिल्लाय् संक्रमितपि खः। उकि मध्ये नेपालगञ्ज मेडिकल कलेज कोलहपुरय् निम्ह व भेरी अस्पताल नेपालगञ्जय् प्यम्ह सीउगु धका बाँकेया कोरोना संक्रमण सम्बन्धी फोकल पर्सनं धागु दु ।

सीम्ह नेपालगञ्ज उपमहानगरपालिका ३ या ५१ दँ दुम्ह मिजंम्ह, नेपालगञ्ज उमनपा १ या ६६ दँ दुम्ह मिजंम्ह सोमवाः सुथय् मदुुगु खः।

भेरी अस्पताल बर्दियाया बढैयातालय् ४७ दँ दुम्ह मिजंम्ह मदुगु खः। वैशाख १७ गते कोरोना पोजिटिभ वंम्ह वयात १८ गते अस्पताल भर्ना यागु खः।

थौें सोमवाः सथय् ६ः३० बजे मदुगु खः। अथेहे, नेपालगञ्ज मेडिकल कलेजय् ४८ दँ दुम्ह मिजंम्ह व ६० दँ दुम्ह मदुगु खः ।

सीम्ह  नेपालगञ्ज उमनपा ५ या स्थायी वासिन्दा खः। वयात वैशाख ८ गते कोरोना पोजिटिभ खनेदुगु खः। १४ गते अस्पताल भर्ना जुम्ह आइतवाः चान्ह्य ९ बजे जुया १० मिनेटय् मदुगु खः।

अथेहे मेम्ह ३२ दँ दुम्ह खजुरा गाउँपालिका २ या संक्रमित जुम्ह थौं सुथय् ८ः३० बजे मदुगु खः । वैशाख ५ गते कोरोना परीक्षण यागुलि ७ गतेनिसे अस्पतालय् भर्ना जुगु खः ।

बैजनाथ गाउँपालिका ८ या स्थायी वासिन्दा दुम्ह १९ गते कोरोना पोजिटिभ वंगु खः। उम्ह मिसाम्ह १ः३० बजे मदुगु खः ।

कोरोना संक्रमणया ‘चेन ब्रेक’ यायेगु उद्देश्यं पूर्ण व आंशिक निषेधाज्ञा जारी यागु जिल्ला ४२ गु थ्यंगु दु।

कोरोना संक्रमण अप्वोया वंगुलि स्थानीय प्रशासनं ३१ जिल्लाय् पूर्ण व ११ गु जिल्लाय् निश्चित थाय् तोके याना आंशिक निषेधाज्ञा जारी यागु दु।

थौं सथय् बर्दियाय् पूर्ण निषेधाज्ञा जारी यागु दु । अथेहे बझाङ व बैतडीइ न थौं सुथंनिसे निषेधाज्ञा लागू यागु दु अर्घाखाँचीइ थौं चान्ह्य १२ बजेनिसे वैशाख ३१ गते चान्ह्यया १२ बजे तक निषेधाज्ञा जारी यागु दु ।