नेपाली कांग्रेसया सभापति शेरबहादुर देउवां पार्टीया ज्येष्ठ राजनीतिज्ञ सभाया सदस्य रामचन्द्र रिजाल मदुगुलि दुःख प्वकादीगु दु।

तत्कालीन कांग्रेस गुल्मी क्षेत्र नं–३ या पूर्वसभापति रिजाल वःगु जेठ १ गते भैरहवाय् उपचारया झ्वलय् ८२ दँय् मदुगु खः ।

सभापति देउवां छगु शोक विज्ञप्तिपाखे इश्मा गाउँ कार्यसमितिया पूर्वसभापति रिजालं पार्टी व नेपालया लोकतान्त्रिक आन्दोलनय् यानादीगु सक्रिय योगदानया स्मरण यानादीसे बिचाः हायकादीगु दु ।

थौं मदन–आश्रित स्मृति दिवस ।

पार्टीया तत्कालीन एमाले महासचिव मदन भण्डारी व संगठन प्रमुख जीवराज आश्रितया लुमन्ति थौं एमाले न २८ क्वःगु स्मृति दिवस हने त्यंगु दु ।

तर, कोरोना सङक्रमण जोखिम व निषेधाज्ञाया कारण थौं औपचारिक ज्याझ्वः धासा मदु धका एमाले न धागु दु । नेपालया कम्युनिस्ट आन्दोलनय् जनताया बहुदलीय जनवाद जबजपाखे लोकतान्त्रिक लँय् यकेगुलि मदन भण्डारीया महत्वपूर्ण भूमिका दु । मदन भण्डारी व जीवराज आश्रितयात आदर्श नेता कथं म्हसिका दु ।

मदन–आश्रित स्मृति दिवसय् नेकपा एमालेया अध्यक्ष केपी शर्मा ओलीं श्रद्धाञ्जली व्यक्त यासे जनताया बहुदलीय जनवादया सिद्धान्त मार्गदर्शनया रुपं स्थापित जुगु धका धयादीगु दु । नाप वयकलं स्वदँ न्ह्यः एमाले व माओवादी केन्द्र दथुइ एकता समृद्ध नेपाल, सुखी नेपालीया राष्ट्रिय आकांक्षा पूरा यायेगु कुतः जुगु एकीकरणया अभियान निष्कर्षय् मथ्यंगु धका धयादीगु दु।

अध्यक्ष ओलीं कम्युनिष्ट आन्दोलनयात एकीकृत यायेगु अभियानय् निरन्तर लगे जुइगु प्रतिवद्धता न यानादीगु दु।

नेकपा एमालेया नेता माधव कुमार नेपालं दासढुंगा घटनाया यथार्थ पत्ता लगे यायेत सम्बन्धित पक्षयात इनाप यागु दु ।

एमालेया तत्कालीन महासचिव मदन भण्डारी व संगठन विभाग प्रमुख जीवराज आश्रितया २८ क्वःगु स्मृति दिवसया लसताय् नेता नेपालं छगु विज्ञप्ति जारी यासे अथे इनाप यानादीगु खः।

२०५० साल जेठ ३ गते चितवनया नारायणगढ–मुग्लिन सतक दासढुंगाय् जिप दुर्घटनाय् मदन–आश्रित मदुगु खः।नेता नेपालं धयादीगु दु, ‘जननेता कमरेड मदन भण्डारी व कमरेड जीवराज आश्रितया रहस्यमय दासढुंगा जीप दुर्घटनाय् मदुगु २८ दँ दय्धुका न उगु घटनाया रहस्य पिहामवः । घटनानाप स्वाम्ह अमर लामाया न रहस्यमय हत्या जुगुलिं थुगु घटनायात झनै रहस्यमय दयकल ।उकि दासढुंगा घटनाया यथार्थ पत्ता लगे यायेत सम्बन्धित पक्षयात इनाप याये चाहे जू ।’ 

नेपालय् कोरोना संक्रमणं सीपिनिगु ल्याः न्याद्धः थ्यंगु दु ।

वंगु २४ घण्टाय् कोरोना संक्रमणं १४५ म्हेसिगु ज्यान वंगु खः। थ्व नाप नेपालय् कोरोना संक्रमणं सीपि न्याद्धः थ्यंगु खः।

कोरोना भाइरस संक्रमणया निक्वःगु लहरय् सीपिनिगु ल्याः न अप्वोगु दु। आःतक हे दकलय् अप्वो छन्हु हे २२५म्ह सीगु खः।

वैशाख २६ गते ८८ म्ह, वैशाख २७ गते १३९म्ह, वैशाख २८ गते २२५ म्ह, वैशाख २९ गते १६८ म्ह, वैशाख ३० गते २१४ म्ह, वैशाख ३१ गते २०३ म्ह, जेठ १ गते १८७ म्ह व जेठ २ गते १४५ म्ह सीगु खः ।

नेपाल आयल निगमं थौंनिसे हाकनं  पेट्रोलियम पदार्थया भाः थकागु दु।

म्हिगः चान्ह्यनिसे लागू जुइकथं निगमं पेट्रोल, डिजल÷मचिकं व हवाई इन्धन (आन्तरिक उडान) य् लिटरय् नितकाया दरं थकागु खः।

आः पेट्रोल  छगु लिटरया १२३,  डिजल÷मचिकं छगु लिटरया १०६ व हवाई इन्धन लिटरया ७८ तका थ्यंगु दु।