Display Style:
Column Style
८३६ म्ह कोरोना भाइरस सङ्क्रमण पुष्टि
शोभा श्रेष्ठ | चौलाथ्व चौथी ११४१,बैसाख ३ शुक्रवाः
वःगु २४ घण्टाया दुने नेपालय् ८३६ म्ह कोरोना भाइरस सङ्क्रमण पुष्टि जुगु दु।
५५३७ म्हेसित पीसीआर परीक्षण यागुलि ८३६ म्हेसित कोरोना सङ्क्रमण पुष्टि जुगु दु धका स्वास्थ्य तथा जनसङ्ख्या मन्त्रालयं धाःगु दु ।
थ्व नाप आःतक परीक्षणय् १५ प्रतिशत स्वया अप्वोसित सङ्क्रमण पुष्टि जुगु खः। विश्व स्वास्थ्य सङ्गठन (डब्ल्यूएचओ) या कथं न्यागु परीक्षणय् न्यागु प्रतिशत स्वया अप्वो सङ्क्रमण पुष्टि जुलकि महामारीजुया जोखिमपूर्ण अवस्था माने यायेमाः धका धाइ। अथेहे वःगु २४ घण्टाय् ६२१ म्हेसित एन्टिजेन परीक्षण यागुलि ६४ म्हेसित सङ्क्रमण पुष्टि जुगु दु । थ्व नाप वःगु २४ घण्टाय् गुसःम्हेसित कोरोना सङ्क्रमण पुष्टि जुगु दु ।
थ्व ना नेपालय् आःतक निगु लाख ८२ हजार ८९० म्हेसित कोरोना सङ्क्रमण पुष्टि जुगु दु । अथेहे वःगु २४ घण्टाय् निसः व च्याम्ह सङ्क्रमणमुक्त जुगु दु । थ्व नाप आःतक निगु लाख ७४ हजार ८१२ म्ह थ्यःगु दु ।
आःतक नेपालय् ५००८ म्ह सक्रिय सङ्क्रमितपि दु । अथेह प्यम्ह कोरोनाया कारणं सी गु दु । थ्व नाप आःतक नेपालय् कोरोना सङ्क्रमणं सीपि ३०७० म्ह थ्यःगु दु ।
स्वास्थ्य तथा जनसंख्या मन्त्रालयं यात ब्वनेकू मवनेत अपिल
लहनान्युज | चौलाथ्व चौथी ११४१,बैसाख ३ शुक्रवाः
स्वास्थ्य तथा जनसंख्या मन्त्रालयं स्वनिगःनाप १४गु जिल्लाया विद्यार्थीतय्त ब्वनेकू मवनेत अपिल याःगु दु । आःतक सेवा बन्द यायेगु विषयलय् सरकारं औपचारिक निर्णय मयाःनीगु जूसां स्वास्थ्य मन्त्रालयं संक्रमणया जोखिम अप्वःगुलिं ब्वनेकू मवनेत सचेत याकूगु खः ।
मन्त्रालयया स्वास्थ्य आपत्कालीन तथा विपद व्यवस्थापन इकाई अले आपत्कालीन सञ्चालन केन्द्रं विहिवाः विज्ञप्ति पिथनाः अति प्रभावित १४गु जिल्लाय् उप्वः भीडभाड जुइगु फुक्क कथंया ज्यापहः अले सेवा बन्द यायेत धागु दु ।
स्वनिगःया येँ, ख्वप व यल, स्वनिगलं पिनेया कास्की, रुपन्देही, चितवन, बाँके, पर्सा, कैलाली, मोरङ, दाङ, सुर्खेत, बारा व बाग्लुङ जिल्लाया हकय् थन्यागु अपिल याःगु दु । निजी विद्यालय संचालकया दबाबय् सरकारं ब्वनेकू बन्द यायेमफयाच्वंगु ईलय् स्वास्थ्य मन्त्रालयं मस्तय्त ब्वनेकू मछ्वयेत इनाप याःगु खः ।
उल्लेखित १४गु जिल्लाय् ब्वनेकू, रात्री व्यवसाय, ७ताःईलिपा फुक्क कथंया रेष्टुराँ व क्लब, खेलकुद, जीम, पूजाआजा व जात्रा, सभा सम्मेलन मयायेत धागु दु । अथेहे सिनेमा हल, सपिङ मल, नाचघर, पार्टी प्यालेस, हेल्थ क्लब, स्विमिङ पुलय् मवनेत न धागु दु ।
म्हिगः नेपालय् लिपांगु २४घौदुने ५सः व ३४म्हेसिके कोरोना संक्रमण पुष्टि जूगु दु । ३ हजार ५ सय ८८म्हसिके पीसीआर व ५ सय ६४सित एन्टिजिन परीक्षण याःगुलिइ १२ दशमलव ८६ प्रतिशत मनूतय्के संक्रमण जूगु स्वास्थ्य तथा जनसंख्या मन्त्रालयं धागु दु ।
मन्त्रालयं पिथंगु धलःकथं म्हिगः थप जूपिं संक्रमितत स्वनिगःया १ सय ९६म्ह दु । उकिइ मध्ये येँय् १ सय ४५म्ह, यलय् ४३ व ख्वपय् ८म्ह दु । थ्वनाप नेपालय् आःतक कोरोना संक्रमितया ल्या २गु लख ८२ हजार ५४म्ह थ्यंगु दु ।
लिपांगु २४घौदुने थप ५म्ह मनूत कोरोनाया हुनिं मन्त । थ्वनाप नेपालय् संक्रमणया हुनिं मदुपिनिगु ल्या ३ हजार ६६म्ह थ्यन । अथेहे थप १ सय ५७म्ह संक्रमणमुक्त जूगु दु । थ्वनाप देय्न्यंकं संक्रमणमुक्त जूपिनिगु ल्या २ लाख ७४ हजार ६ सय ४०म्ह थ्यंगु दु । देय्न्यंकं सक्रिय संक्रमितया ल्या ४ हजार ३ सय ८४म्ह दु ।
अथेहे स्वास्थ्य मन्त्रालयं सरकारी अस्पतालयात म्ह्वोतीं ५० प्रतिशत बेड कोभिड–१९ या संक्रमितया नितिं छुटे यानातयेत अले निःशुल्क उपचार सेवा बीत निर्देशन ब्यूगु दु ।
बसपार्कय् ११२ गु पसः महानगरपालिकां सिलयात
लहनान्युज | चौलाथ्व चौथी ११४१,बैसाख ३ शुक्रवाः
ताः ईनिसे विना सम्झौता सञ्चालन जुयाच्वंगु पुलागु बसपार्क न्ह्यने राष्ट्रिय सभागृहनाप स्वागु सिटी मार्केटय् ११२ गु पसः येँ महानगरपालिकां सिलयाना बिगु दु।
येँ महानगरपालिकाया प्रमुख प्रशासकीय अधिकृत राजेश्वर ज्ञवालीं ताः ईनिसे विना सम्झौता सञ्चालन जुयाच्वंगु व पटक–पटक ताकेता यास वास्था मयागुलि अथे शिलबन्दी यायेमाःगु धका जानकारी बियादीगु खः।
येँ महानगरपालिका राजश्व विभाग प्रमुख डाक्टर शिव अधिकारीं सिटी मार्केटय् व्यवसाय याइपि व्यवासायीपिन्स २०७६ चैत्र तक व्यवसायीपिनिगु संघ पाखे भचा बहाः पूगु खःसा वया लिपा पटक–पटक ताकेता यागु खःसा वास्था मयागुलि सिलबन्दी याये बाध्य जुगु धका जानकारी बियादीगु खः ।
वयकल धयादीगु दु येँ महानगरपालिकाया खरिद विभागं आय ठेक्का बियागु सार्वजनिक सूचना प्रकाशित याःसा तक छु न प्रस्ताव पेश मयागु धका न जानकारी बियादीगु दु ।
नगरप्रहरी प्रमुख धनपती सापकोटां पटक–पटक सूचं बिउसा हटे मयागुलि प्रहरी व नगरप्रहरीं सिल यानगु जानकारी बियादीगु खः ।
मध्यपुरथिमीइ हनिगु नखः “सिन्दुर जात्रा”
लहनान्युज | चौलाथ्व तृतीया ११४१,बैसाख २ बिहीवाः
थिमी लागाय् म्हिगः झःझः धायेका बालकुमारी, विष्णुकुमारी, विष्णुवीर, सिद्धिकालीलिसें ३२गू द्यःखः त्वाःत्वाः पतिकं चाःहिका सिन्दुर जात्रा हन । उगु झ्वलय् द्यः जात्रा यासें थःथम्ह सिन्दुर इला न्ह्यापुसेच्वंक जात्रा हंगु खः ।
विस्केट जात्राया झ्वलय् मध्यपुर थिमीइ जक थुगू नखः नेवाःतय्सं हनावयाच्वंगु दु ।
मू द्यःयात खःतय् तया धिमेबाजं लिसें सिन्दुर जात्रा याइगु चलन दु । जात्रा दक्व चोक, त्वाःत्वालय् थ्यंकी अल भ्mयालं कःसि च्वना सिन्दुर, स्वाँ ह्वःला लसकुस याईगु चलन दु ।
जात्राय् क्वँय् बाजं, भुस्या, धिमे थाना द्यःयात खटय् तयाः थाय् थासय् थ्यंकी अले थःथम्ह सिन्दुर इला न्ह्यापुसेच्वंगु हनिगु नखः जूगुलिं थुगु जात्राया सिन्दर जात्रा धाइगु याः ।
बालकुमारी, विष्णुकुमारी, विष्णुवीर, सिद्धिकालीलिसें द्यःयात थीथी थासय् चाहिका, सिन्दुर ह्वलाः अले धिमेया तालय् प्याखँ हुला जात्रा न्ह्याइपुसेच्वंक हनिगु खः ।
च्याचाः गुन्हूतक्क हनिगु ऐतिहासिक लिसें प्रसिद्ध बिस्का जात्राया ईलय् ख्वःपय् दूगु अष्टमात्रिका, गणेश व भैरवया द्यः लागाय् थीथी जात्रा त जुई उपिं दक्व जात्रा थःथवें स्वापू दूगु जात्रा खः ।
दुमाजुया जात्रा मसिधतले यःसिं थने मज्यूगु परम्परा दूगु स्थानीयपिनिगु धापू दु ।
च्याक्वःखुसी मे प्वाः खनादिल बुद्धकृष्ण श्रेष्ठं
लहनान्युज | चौलाथ्व तृतीया ११४१,बैसाख २ बिहीवाः
बिस्का जात्रा अन्तरगत ख्वपःया बोडे थौं मे प्वा खनिउ जात्रा जुल । थुगुसी बुद्धकृष्ण बाग श्रेष्ठं च्याक्वःखुसी मे प्वा खना जात्रा न्ह्याकल ।
गुकिया नितिं चैतया लिपांगु वा निसें निराहार च्वनादीगु खः । वय्कलं लः जक त्वना च्वनादीगु खः । निरआहार च्वनेबलय् मे छुं नं कथंया स्वाद मदइगु व मे नाइसे च्वनिगु जूगुलिं उपवास च्वनागु श्रेष्ठं धयादिल ।
थुगुसीया जात्राया नितिं बोेडेया नकःमिपिन्सं दयेकूगु ११ इन्चया नटुचा बुद्धकृष्णं मे प्वाः खनादिगु खः । पेशां एम्बुलेन्स चालक जुयादीम्ह बुद्धकृष्णं वंगु दँय् कोरोनाया हुनिं मे प्वाः खनामदिउगु खः ।
थ्वहे दथुई बिस्काः जात्राय् म्हिगः यःसिँ थना म्हिगः हे क्वथल । परम्पराकथं यःसिं दँया लिपांगु दिं थनेमाःगु खः तर म्हिगः यक्वः हे प्रयास याना मंगलबाः चान्ह्य् १२ बजे थंगु यःसिं ग्वतुसेंलि म्हिगः हाकनं थंगु खः ।
यःसिं थनेगु तःक्वमछि प्रयास यासां नं सनिलय्या ६ः३० बजे थनेता ताःलागु खः । वयांलिपाः थ्यंमथ्यं निघौ तक्क तया बहनि ८ः३० क्वथूगु खः ।
ख्वपःय् बिस्काः जात्राया झ्वलय् चैत्र मसान्तया दिं यःसिं थनिइ धाःसा वैशाख संक्रान्तिया दिन क्वथलेगु चलन दु । चैत्र मसान्तया दिं छुं कारण यःसिं थने मफत धाःसा वैशाख संक्रान्तिया हे दिं थना उगु हे दिं क्वथलिगु चलन दु ।
उगु हे तलिलजिकथं म्हिगः थने मफयाच्वंगु यःसिं निघौ तक्क थना क्वथुगु खः । बिस्का जात्रा टौमढीया भैरवनाथया खः साला वैशाख ५ गते क्वचाई ।
