प्रधानमन्त्री शेरबहादुर देउवायात नेपालया लागि अमेरिकी राजदूत ¥याण्डी बेरीं भिंतुना बिगु दु।

म्हिगः मंगलबाः बहनि प्रधानमन्त्री देउवां पदभार ग्रहण यायेवं अमेरिकी राजदूत बेरीं सामाजिक सन्जालपाखे भिंतुना बिगु खः।

वयकलं ७५ दँ निसे मित्रताय् थप विस्तार यायेत देउवा सरकार नाप ज्यायेत थःपि पियाच्वनागु दु धका धयादीगु खः।

निवर्तमान प्रधानमन्त्री नाप एमाले अध्यक्ष केपी शर्मा ओलीें थौं सरकारी निवास त्वतिइगु जुगु दु।

थौं सुथय् ११ बजे लिपा बालुवाटारयागु सरकारी निवासपाखे निजी निवास बालकोट वनिइगु धका प्रेस संयोजक सूर्य थापां जानकारी बिगु दु।

ओलीयात बालुवाटारनिसे निजी निवास तक नेता कार्यकर्तापिन्स स्कर्टिङ व लसकुस याना यकेगु तयारी दु धका धागु दु। मोटरसाइकल व गाडीं स्कर्टिङ व लसकुस यासे ख्वपयागु कौशलटार निसे बालकोट निवास तक नागरिक अभिनन्दन याइगु धका एमाले नेता महेश बस्नेतं धागु दु।

कानून, न्याय व संसदीय मामिलामन्त्री ज्ञानेन्द्र बहादुर कार्कीयात सरकारं प्रवक्ताया जिम्मेवारी बिगु दु।

नवनियुक्त प्रधानमन्त्री शेरबहादुर देउवा नेतृत्वया मन्त्रिमण्डलय् न्हापागु बैठकं मन्त्री कार्कीयात सरकारया प्रवक्ता यागु जिम्मेवारी बिगु खः। मंगलबाः बहनि प्रधानमन्त्री कार्यालय सिंहदरवारय् मन्त्रिपरिषदया बैठक च्वंगु खः।

प्रधानमन्त्री देउवा नाप प्यम्ह मन्त्रीं म्हिगः हे पद तथा गोपनीयताया सपथ कागु खः।

प्रधानमन्त्री नाप न्यागु सदस्यीय मन्त्रिमण्डलय् गृहमन्त्री बालकृष्ण खाँण, कानून, न्याय व संसदीय मामिला मन्त्री ज्ञानेन्द्रबहादुर कार्की, उर्जामन्त्री पम्फा भुसाल व अर्थमन्त्रीइ जनार्दन शर्मा च्वंगु खः।

प्रधानमन्त्री शेरबहादुर देउवां म्हिगः मंगलबाः हे पदभार ग्रहण यागु दु।

राष्ट्रपति कार्यालय शीतल निवासय् पद व गोपनीयताया शपथ काये धुका नवनियुक्त मन्त्रीपि नाप हे सिंहदरबार वना प्रधानमन्त्री व मन्त्रिपरिषद कार्यालय वंगु खः।

वया झ्वलय् कर्मचारी व सुरक्षाकर्मीपिन्स प्रधानमन्त्री व मन्त्रीपिन्त लसकुस यागु खः। प्रधानमन्त्री तथा मन्त्रिपरिषद कार्यालयय् मन्त्रिपरिषद बैठक मंगलबाः हे च्वंगु दु।

राष्ट्रपति कार्यालयं थःगु नियुक्तबारे भिंकूलि नवनियुक्त प्रधानमन्त्री शेरबहादुर देउवां पद व गोपनीयताया शपथ कागु दु।

अथेहे प्यम्ह मन्त्री नियुक्त याना मन्त्रिपरिषद् गठन यागु दु। म्हिगः मंगलबाः है देउवां नेपाली कांग्रेसपाखे बालकृष्ण खाँणयात गृह व ज्ञानेन्द्रबहादुर कार्की कानुन न्याय व संसदीय मामिलामन्त्री नियुक्त यागु दु।

सत्ता साझेदार नेकपा माओवादी केन्द्रपाखे जनार्दन शर्मायात अर्थ व पम्फा भुसालयात ऊर्जा, जलस्रोत तथा सिञ्चाइ मन्त्री नियुक्त यागु दु। प्यम्ह मन्त्रीं राष्ट्रपति लिसे म्हिगः शपथ कागु दु ।