Display Style:
Column Style
भिटामिन ए व किमिया वासः नकिगु
लहानान्युज | चौलाथ्व सप्तमी ११४१,बैसाख ६ सोमवाः
सरकारं ५दँ तक्कया मस्तयेत थौं भिटामिन ए व किमिया वासः नकाच्वंंगु दुु ।
थौं त्वफिउपिंमस्तयते कन्हय् नं भिटामिन ए व किमिया वासः नकेगु ज्याझ्व दु । ६ ला निसें ५ दँ तक्कया मस्तयेत भिटामिन ए व दच्छि निसें ५ दँ तक्कया मस्तयेत भिटामिन ए व किमि निगुलिं वासः नकेगु स्वास्थ्य मन्त्रालयं न्ह्यथंगु दु ।
राष्ट्रिय भिटामिन ए ज्याझ्वपाखें सरकारं दँय्दसं भिटामिन ए व किमिया वासः नकावःगु दु । थःपिन्त पायक जुइगु वितरण केन्द्रय् वना मस्तयेत भिटामिन ए व किमिया वासः नकेत मन्त्रालयं सकल अविभावकयात इनाप याःगु दु ।
थुगुसिइि कोरोना संक्रमणया जोखिम दूगुलिं वासः नकेगु थायेतक्क वनिबलय् स्वास्थ्य सुरक्षाया मापदण्ड पालना यायेत मन्त्रालयं इनाप नं याःगु दु ।
वितरण केन्द्रय् म्वःम्वः मयायेत , छम्ह मनू व मेम्ह मनू दथुइ म्होतिइ निगू मिटरया भौतिक दूरी कायम यायेत, अनिवार्य कथं मास्क छ्यलेत , साबुं लःखं तक्वःमछि ल्हा सिलेत व सेनिटाइजर छ्यलेत मन्त्रालयं इनाप याःगु दु ।
विद्यार्थीपिन्त छात्रवृत्ति लःल्हात
लहानान्युज | चौलाथ्व सप्तमी ११४१,बैसाख ६ सोमवाः
नन्दी विद्यार्थी कल्याण कोषपाखें विद्यार्थीपिन्त छात्रवृत्ति लःल्हाःगु दु ।
वंगु शनिबाः छगू ज्याझ्वः यासें किवानिज इन्टरनेशनलया नेपालया ग्वाहालिं कोषं विद्यार्थीपिन्त छात्रवृत्ति लःल्हाःगु खः ।
ज्याझ्वलय् कोषया न्वकू राजेन्द्रमान डंगोलं कोष व कोषं यानावःगु ज्याखँया बारे जानकारी याकादिल । अथे हे, कोषया नायः लक्ष्मण लमसालं सुं नं मचात कमजोर आर्थिक अवस्थाया हे हुनिं शिक्षां बन्चित जुइम्वाःलेमा धइगु थःपिनिगु आज्जु खःगु धयादिल ।
येँ महानगरपालिका वडा नम्बर १ या वडाध्यक्ष भरतलाल श्रेष्ठं समाजपाखें थज्याःगु ग्वाहालि दयाच्वन धाःसा देय् शिक्षाया जलं जहां थीगु धासें कोषया ज्याया प्रशंसा यानादिल ।
ज्याझ्वलय् नन्दी मा.वि.या प्रधानाध्यापक गीता काफ्ले, नन्दी रात्री मा.वि.या प्रधानाध्यापक मोहन प्रसाश शर्मा, कोषया सल्लाहकार लिसें संचालक समितिया नायः तुलसी साय्मि, किवानिज नेपालया डिस्ट्रिक गभर्नर मोहन लम्साल लिसेंया उपस्थिती दुगु खः ।
साहित्यकार लक्ष्मण राजवंशीया भिं उसाँयया कामनायात
लहानान्युज | चौलाथ्व सप्तमी ११४१,बैसाख ६ सोमवाः
नेपालभाषाया साहितयख्यलय् ‘बाखं दबू’ नांयागु संस्था निस्वनाः नेपालभाषा साहित्यया बाखं विधा च्वन्ह्याकेत, न्हू पुस्ताया च्वमिपिन्तथःगु प्रतिभा न्ह्यब्वयेगु ह्वःताः बिया वया च्वनादीम्ह संस्थापक नायः लक्ष्मण राजवंशी थांैकन्हें उसाँय् मदयाःच्वंगु सकसिन सिउहे जुइमा ।
थुगु ‘बाखं दबू’ ख्यःपाखें नेपालभाषा साहित्यय् बाखं च्वमिपिन्त सदां हःपाः बिया च्वना दीम्ह हनेबहःम्ह साहित्य व शिक्षा सेवी लक्ष्मण राजवंशीजुया प्रति सकल बाखं च्वमिपिनि नुगलय् सदां हनाबना दयाच्वंगु जुल ।
वय्कःया उसाँय् याकनं सुथां लायेमा धकाः ‘बाखं दबू’या सकलजःपाखें कामना याना च्वनां धका छगू विज्ञप्ति पिकागु दु ।
अथेहे सकल साहित्यकार व साहित्यह्यमिपिन्त नं वयकया भिं उसाँयया कामना यानादीत इनाप नं यानातःगु दु ।
हलियंक “विश्व सम्पदा दिवश” तःजिक्क हनं
लहानान्युज | चौलाथ्व सप्तमी ११४१,बैसाख ६ सोमवाः
नेपाः लिसें हलियंक विश्व सम्पदा दिवश म्हिगः तःजिक्क हनं । सम्पदाप्रेमीपिनिगु विशेष दिंया कथं काइगु थुगु दिं दँय्दसं अप्रिल १८ विशेष कथं हनावयाच्वंगु दु ।
सम्पदा संरक्षण नितिं सचेतना बिइगु हाथ्याकथं थ्व दिं थीथी ज्याझ्व याना हलिंयंक तःजिक्क हंगु खः । थी थी थासय् सम्पदा संरक्षण यायेगु सन्देश लिसें अन्तरक्रिया, गोष्ठी, ¥यालीया ज्याझ्वः हन ।
विश्व सम्पदा सूची लाःगु नेपाःया सम्पदामध्ये यँे स्वनिगःया न्हेगु थाय् लाः । पर्यटकपिन्त नेपालय् आकर्षित याइगु माध्यम नं थ्वहे सम्पदा जुयाच्वंगु दु ।
२०७२ सालया भुखाचं थीथी धार्मिक, सांस्कृति सम्पदा त क्षतिग्रस्त जूगु खः । गुकिइ क्षतिग्रस्त सम्पदाया पुर्ननिर्माण जुइधुंकुगु दुसाः गुलिखय् जुयाच्वंगु दु ।
थ्वेहझ्वलय् वैशाख ११य् धरहराया उलेज्या जुइगु तिथि क्वजिउगु दु । काष्ठमण्डपया पुनर्निमाणया लिपांगु झ्वलय् थ्यंगु दु ।
सन् १९८२ निसें हलियंक विश्व सम्पदा दिवस हनावयाच्वंगु दु ।
कोरोना संक्रमणया ल्याः अप्वेगु झ्वलय्
लहानान्युज | चौलाथ्व सप्तमी ११४१,बैसाख ६ सोमवाः
नेपालय न्हियान्हिथं कोरोना संक्रमितया ल्या अप्वया वंगु दु । म्हिगः प्यला दुनेया हे दकले अप्वः संक्रमित थपू जूगु दु । लिपांगु २४घौलय् द्वछि व ९६म्ह कोरोना संक्रमण पुष्टि जूगु दु ।
स्वास्थ्य तथा जनसंख्या मन्त्रालयं याःगु प्रेस व्रिफिङ्य् मन्त्रालयया प्रवक्ता डा.जागेश्वर गौतमं ५द्व व ८४म्हसित याःगु पीसीआर व खुसः व ९९म्ह सित याःगु एन्टिजिन परीक्षणय् १९ प्रतिशत मनुतय्के संक्रमण खनेदूगु जानकारी बियादिगु खः ।
थ्वया न्ह्यः बैशाख ३ गते ९सः म्हेसिके संक्रमण खनेदूगु खः । मन्त्रालयया कथं थपू जूूपिं संक्रमित मध्ये स्वनिगःया प्यसः व ३५म्ह खः । गुकिइ येँया स्वसः व २६म्ह, यलःया ६४म्ह व ख्वपःया ४५म्ह जूगु धाःगु दु । थ्वलिसें नेपालय् मुक्क कोरोना संक्रमितया ल्या निगू लखः ८४द्व ७सः व ५४म्ह थ्यंगु दु । अथेहे लिपांगु २४घौ दुने च्याम्ह कोरोनाया हुनिं सीगु दु । आः नेपालय् संक्रमण जुया सीगु ल्या स्वद्व व ८३म्ह थ्यंगु दु ।
अथेहे थप २सः व ६२म्ह संक्रमणमुक्त जूगु दु । थ्वलिसें देशयंक संक्रमणमुक्त जुपिनिगु ल्याः निगू लखः ७५द्वः व ३सः थ्यंगु दु । देय्यंक सक्रिय संक्रमितया ल्याः खुद्वः २सः व ९०म्ह थ्यंगु दु ।
लिपांगु धलः कथं थपू जूपिं संक्रमित मध्ये २०दँ क्वयेया सच्छि व १२म्ह दु धाःसा सक्रिय संक्रमित मध्ये ५१म्ह ५द्व क्वयेया मस्त खः । संक्रमित मध्ये ५द्व ७सः व १४म्ह होम आइसोलेसन व ५सः व ७६म्ह विरामी त संस्थागत आइसोलेसनय् च्वनाच्वंगु स्वास्थ्य मन्त्रालयं न्ह्यथंगु दु ।
उपिंमध्ये सच्छि व १६म्हेसित आइसियू व ४६म्हेसित भेन्टिलेटरय् उपचार यानाच्वंगु दु ।
