सर्वोच्च अदालतं पूर्वमन्त्री युवराज कार्कीयात राजदूतय् सिफारिसया सरकार यागु निर्णय कार्यान्वयन मयायेत अन्तरिम आदेश बिगु दु।

मन्त्रिपरिषद बैठकं वैशाख २५ गते बहराइनयन राजदूतय नियुक्ति सिफारिस यागु खः। तर न्यायाधीश सपना प्रधान मल्ल व प्रकाशकुमार ढुंगानाया इजलासं सर्वोच्च अदालतं थ्व स्वया न्ह्य सरकारं हःगु राजदूत नियुक्ति सम्बन्धी निर्देशिका २०७५ कार्यान्वयन मयोर्त आदेश बिइ धुकुकुगु धासे कार्कीयात नियुक्ति मबिइत आदेश बिगु दु।

राजदूत नियुक्तिसम्बन्धी निर्देशिका २०७५ य् राजदूतया लागि स्नातक उतीर्ण जुइ माःगु व्यवस्था दु । तर सरकारं वैशाख २५ गते उगु निर्देशिका संशोधन याना मन्त्रीया रुपय् सेवा याये धुकुम्ह मनूया हकय् उगु दफा लागू जुइमखु धका  व्यवस्थाय् दु धका धागु दु।

सर्वोच्च अदालतं निर्देशिकाया संशोधन तत्काल कार्यान्वयन मयायेत अन्तरिम आदेश जारी यागु दु।

थौं स्वनिगः दुने जक संक्रमित जूपि ४२४ म्ह दु।

उकि मध्ये येँ जक २९२ म्हेसित कोरोना सक्रमण जुगु दु।

अथेहे यलय् १०० म्ह व ख्वपय् ३२ म्हेसित पुष्टि जुगु दु।

२४ घण्टाया दुने थप १९२० म्हेसित कोरोना भाइरस संक्रमित पुष्टि जुगु दु।

स्वास्थ्य तथा जनसंख्या मन्त्रालयया कथं ६००० म्हेसिगु पीसीआर परीक्षणय् १३५३ म्ह व ३८३६ म्हेसिगु एन्टिजेन परीक्षणय् ५६७ म्ह याना १९२० म्हेसित संक्रमण पुष्टि जुगु दु।

थ्व नाप आःतक नेपालय् कोरोना सक्रमित जुपि ६ लाख ६५ हजार ७७७ म्ह थ्यंगु दु सा ५ लाख ८४ हजार ३३४ म्ह संक्रमणमुक्त जुगु दु। वंगुु २४ घण्टाय् ३००७ म्ह कोरोना भाइरस संक्रमणमुक्त जुगु दु। अथेहे संक्रमणं ३४ म्ह सीगु दु।

अथेहे आःतक ९००९ म्ह सी धुकुगु दु।

वंगु बुधवाः व बिहीवाः घटे जुगु शेयर बजार थौं आइतवाः २७ अङ्क स्वया अप्वो थहावंगु दु। नेप्से थौं २७ दशमलव ३८ अङ्क थहावन २८७० दशमलव ३८ अङ्क थ्यंगु दु।

थौं धासा हाइड्रोपावर समूहको शेयर ७६ दशमलव १ अङ्क, व्यापारय् ४७ दशमलव २ अङ्क, बैंकिङ समूहय् ३८ दशमलव २६ अङ्क थहावंगु दु।

विकास बैंक समूह शेयर धासा अझ न ६० अङ्कं घटे जुगु दु। २२७ कम्पनीं २ करोड ९ लाख ७४ हजार ३७७ कित्ता शेयरय् ७ अर्ब १६ करोड ७४ लाख रुपैयाँ कारोबार जुगु दु।

थौं नेपाल हाइड्रो पावर कम्पनीइ दकलय् अप्वो ४० करोड रुपैयाँ बराबरया शेयर कारोबार जुगु दु। अथेहे सेन्चुरी कमर्सियल बैंक व माथिल्लो तामाकोशी हाइड्रोपावर कम्पनीया शेयर भाः झन्डै १० प्रतिशत थहावंगु दु।

गोर्खाज फाइनान्स कम्पनीया शेयर भाः झन्डै ४.५ प्रतिशत क्वहावंगु दु।

स्वनिगलय् मेगु छवाः निषेधाज्ञा यायेगु तयारी यायेत्यंगु दु। कोरोना भाइरस सङ्क्रमण छु भचा म्हो जूसा जोखिम अझ न दुगुलि थप छवाः तयेगु तयारी दु धका काठमाण्डौया प्रमुख जिल्ला अधिकारी कालीप्रसाद पराजुलीं जानकारी बिगु दु।

निषेधाज्ञाया बारेय् निर्णय यायेत थौं न्हिनय् स्वंगु हे जिल्लाया प्रमुख जिल्ला अधिकारीपिनगु बैठक च्वनेत्यंगु दु। निषेधाज्ञा थप छ्वासूकेगुलि छलफल जुइ धका काठमाण्डौया प्रमुख जिल्ला अधिकारी पराजुलीं धागु दु।

आः निजी गाडी व ट्याक्सी जोर–बिजोर प्रणाली लागू याना तरकारी व फलफूल पसः सुथय् ११ बजे तक चायकाबिगु खः।