सन्तानया माया अनलाईन फोटो कासा २०७८ य् त्यापिन्त छगु ज्याझ्वः दथुइ पुरस्कार वितरण यागु दु।

येँ महानगरपालिका वडा नं.२० चिकँमूः त्वाः, हलेसी महाःद्यः चुकय् जुगु ज्याझ्वलय् हरिबंश आचार्य पाँहापि स्वस्थ्य सेवा बिभागया निर्देशक, डाक्टर मनिता राजकर्णिकार, महानगरीय प्रहरी वृत्त जनसेवाया प्रहरी प्रमुख डिलबहादुर मल्लपिन्स ब्बति कागु खः।

उगु ज्याझ्वलय् मूपाहा हरिबंश आचार्यं समाजसेवी नाप जेष्ठ नागरिक केदारमान रञ्जित व नेपाल स्वयंसेवी रक्तदाता समाजका केन्द्रिय अध्यक्ष प्रेम सागर कर्माचार्ययात न दोसल्ला न्ययका हंगु खः।

कासाय् १९७ म्हेसियात ब्बति कागु फोटो प्रतिस्पर्धाय् न्हापलाम्ह अर्घाखाँचीया रुपा पोखरेल (मा) कृष्टी पौडेल –म्ह्याय्) ल्यू कालिमाटीया निरु महर्जन (मा) अजु डंगोल –म्ह्याय् ) व लियाल्यू मखं त्वाःया सपना शिलाकार (मा) सौगात शिलाकार (काय्) जुगु खः। अथेहे उत्कृष्ट फोटो बुगंमती कि शान्ता राई (मा) कियान्स (काय्) चागःया बिजयकुमार कार्की (अबु) बिन्द्रा कार्की (म्ह्याय्) व धापाखेलया सुचिता के.सी. (मा) समृद्धि के.सी. (म्ह्याय्) पिन्त  मूपाहाँ न सिरपा लल्हागु खः।

 येँ महानगरपालिकां काष्ठमण्डप पुनर्निर्माणया लागि थप छगु करोड अनुदान बिगु दु।

उपभोक्ता समितिपाखे पुलागु शैलीं पुनर्निर्माण जुयाच्वंगु काष्ठमण्डप पुनर्निर्माणया जुयाच्वंगु दु। ७२ सालया तःभुखाचं क्षतिग्रस्त जुगु काष्ठमण्डया ज्या समितिं ०७५ य् वैशाखपाखे सुरु जुगु खः । सुरु हे येँ महानगरं ५० लाख बिगु खः।

अन लिपा ५–५ करोड बिगु खःसा आःतक अनुदान नाप ११ करोड ५० लाख थ्यने धुकुगु दु धका काष्ठमण्डप पुनर्निर्माण समितिया संयोजक नाप प्रदेश सांसद राजेश शाक्यं जानकारी बिगु दु। ऐतिहासिक सम्पदा काष्ठमण्डपया पुनर्निर्माणया लागि बजेट अभाव याये मखु धासे येँ महानगरपालिकाया मेयर विद्या सुन्दर शाक्यं इलय् हे ज्याक्वचाइ धका भलसा कयादीगु दु।

‘येँ महानगरं काष्ठमण्डप पुनर्निर्माण समितियात प्यंगु चरणय् याना ११ करोड ५० लाख उपलब्ध याये धुकुगु दु,’ पुनर्निर्माण समितिया संयोजक राजेश शाक्यं धयादीगु दु, ‘जिमिसं करीब १२ करोडय् ज्या सम्पन्न यायेगु लक्ष्य कयागु धका धयादीगु दु। काष्ठमण्डप पुनर्निर्माणया लागि मागु ध्यवा ग्वाहालि यागुलि येँ महानगरपालिकाया मेयर विद्यासुन्दर शाक्यया सकल टिमयात सुभाय् दु।’ संयोजक शाक्यं पुनर्निर्माणया ज्या काम ९० प्रतिशत क्वचागु दु आः याकन हे उलेज्या जुइ धका धयादीगु दु।

‘जिमिसं याकन हे ज्या सम्पन्न यायेत स्वयागु खःसा लकडाउन व निषेधाज्ञा नाप स्वास्थ्य मापदण्ड याना ज्या याये मागुलि भचा लिबागु खः,’ शाक्यं धयादीगु दु, ‘सिँ अभावया कारण न भचा लिबागु खः। आ उगु समस्या न समाधान जुइ धुकुगु दु। जिमिसं रौतहट लगायतया जिल्लापाखे सिँ हया हेटौडा सिँ फाना हयाच्वनागु दु। आः सिँ अभावं ज्या ढिल्ला जुगु मखु। जिपि याकन हे उलेज्या यायेगु तयारीइ लगे जुयागु दु।’

२४ घण्टाया दुने २,६३६ म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं ७,२५९ म्हेसिगु पीसीआर परीक्षणय् १,७२८ म्ह व ४४८९ म्हेसिगु एन्टिजेन परीक्षणय् ९०८ म्ह याना २,६३६ म्हेसित संक्रमण पुष्टि जुगु दु।

सोमवाः ११,६४० म्हेसिगु परीक्षण यागुलि २,४४४ म्हेसित संक्रमण खनेदुगु खःसा मंगलवाः ११,७४८ म्हेसित परीक्षण यागुलि निसः म्ह वया अप्वोसित संक्रमित जुगु दु। वंगु २४ घण्टाया दुने कोरोना संक्रमणमुक्त जूपि ४,४८९ म्ह दु।

अथेहे कोरोना संक्रमणं २० म्ह सीगु दु। आःतक देशय् सक्रिय संक्रमितपि ३५ हजार ३१० म्ह दु।

नेकपा एमालेया झीक्वःगु राष्ट्रिय महाधिवेशन आयोजक कमिटीया बैठकय् वरिष्ठ नेता माधवकुमार नेपाल समूहया नेतापिन्त न सःतूगु दु।

कन्ह्य बुधवाः सुथय् ११ बजे च्निइगु महाधिवेशन आयोजक कमिटीया बैठकय् माधव नेपाल समूहया केन्द्रीय सदस्यपिन्त न सःतूगगु दु धका केन्द्रीय कार्यालय सचिव शेरबहादुर तामाङं धागु दु।

तर वरिष्ठ नेता झलनाथ खनाल, नेता नेपाल, भीम रावल, रामकुमारी झाँक्री, कल्याणी खड्का लगायत झीछम्हेसित धासा सःतुगु मदु। अध्यक्ष केपी शर्मा ओलीं जेठ १० गते नेता खनाल, नेपालपिन्त पार्टीपाखे निष्कासन यागु खः।

कारबाही मजूपि सकसित बैठकय् सःतूगु दु। थुगु बैठकं झीक्वःगु राष्ट्रिय महाधिवेशन आयोजक कमिटी विघटन यायेगु तयारी दु। वंगु २८  गते फागुनय् अध्यक्ष केपी शर्मा ओलीं झीक्वःगु महाधिवेशन आयोजक कमिटी दयकगु खःसा सर्वोच्च अदालतं मान्यता मबिगु खः ।

वयालिपा जेठ २ गते २०७५ या एमाले पार्टी कमिटी, विधान व नेतृत्व कायम यायेगु तयारी अध्यक्ष ओलीं यागु खः।

सेयर कारोबार मापक नेप्से परिसूचक ४७ दशमलव ४९ अंक थौं कुहावंगु दु।

थौं मंगलवाः बजारय् खनेदुगु उताचढाव लिपा नेप्से परिसूचक ४७ दशमलव ५० अंक घटे जुया २ हजार ८२८ अंकय् कुहावंगु खः।

‘क’ वर्गया कम्पनीपिनिगु कारोबार मापन याइगु सेन्सेटिभ इन्डेक्स न ९ दशमलव ८७ अंक घटे जुगु खः। कारोबार रकम ७ अर्ब न मथ्यगु दु

न्हिच्छियकं जुगु ७५ हजार ८ सय ८० गु कारोबारपाखे २३ कम्पनीया १ करोड ४० लाख ४४ हजार ३ सय ८१ कित्ता सेयर किनबेच जुगु खः। उकि मध्ये कारोबार रकम ६ अर्ब ७२ करोड ६३ लाख ६१ हजार ८ सय ६९ रुपैयाँ थ्यंगु खः।

नेप्से कारोबार जुइगु लघुवित्त समूहपाखे दक्को सवइन्डेक्स घटे जुया ह्यागुसे च्वंगु दु। दक्को समूह घटे जुया लघुवित्त समूह २६ दशमलव ४ अंक थहावंगु दु।