वःगु २४ घण्टाया दुने थप ७७ म्हेसित कोरोना भाइरस (कोभिड १९) संक्रमण पुष्टि जुगु दु।

देयन्यक याःगु प्रयोगशालाय् ३ हजार १८१ म्हेसिगु नमुना परीक्षण याःगुलि ७७ म्हेसित संक्रमण पुष्टि जूगु दु।

थ्व नाप आःतक कुल संक्रमितपिनिगु ल्याः २ लाख ७५ हजार ९०६ म्ह थ्यःगु दु। उकि मध्ये २ लाख ७१ हजार ९२१ म्ह संक्रमणमुक्त जुइ धुकुगु दु ।

अथेहे ३०१६ म्ह सी धकुगु धका स्वास्थ्य तथा जनसंख्या मन्त्रालयंंं धाःगु दु।

बिरामी जुया नर्भिक अस्पतालय् उपचाररत नेपाली कांग्रेसया नेता नवीन्द्रराज जोशीया परिवारं सरकार बिइ धाःगु १० लाख रुपैयाँ ग्वाहालि मकाय्गु घोषणा याःगु दु।

नेता जोशीका स्वकीय सचिव पुष्कर पाण्डेया कथं जोशीया परिवारं उगु रकम मकायेगु धका जानकारी बिःगु दु।

वःगु फागुन १४ गते मष्तिस्कघात जुया नेता जोशीयात वीर अस्पताल जुया नर्भिकय् भर्ना जुयादीगु खः।

वयकः याःगु आःतक होस वःगु मदुनि भेन्टिलेटरय् तया उपचार जुयाच्वंगु खः।

चैत ६ गते जोशीया स्वास्थ्य अवस्था बुझ्mे यायेत अस्पताल वना उपप्रधानमन्त्री ईश्वर पोखरेलं सरकारपाखे उपचारया लागि १० लाख रुपैयाँ ग्वाहालि यायेगु घोषणा यानादीगु खः ।

अमेरिकी सेनाय् ज्या यानाच्वम्ह भरत सिंह पेलापाखें यल महानगरपालिकाया वडा ल्याः ९ वडा च्यासलय् च्वंगु श्री श्रमिक शान्ति माध्यमिक ब्वनेकुथिइ आखः ब्वनाच्वंपिं ब्वनामिपिन्त छगू ज्याझ्वः दथुइ थीथी सामाग्री बियाः ग्वाहालि याःगु दु ।

उगु ब्वनेकुथि जूगु ज्याझ्वलय् विद्यालय व्यवस्थापन दुजः राजु व्यञ्जनकारया मूपाहाँसुइ, प्रधानाध्यापक सानुलाल व्यञ्जनकार, सहायक प्रधानाध्यापक पवन विक्रम कार्की व शिक्षक प्रतिनिधि उद्धव प्रसाद तिमल्सिनाया सहभागी जूगु खः ।

ज्याझ्वलय् अनाथ, असहायलिसें आर्थिक स्थिति कमजोर जूपिं जेहेन्दार ब्वनामिपिं ल्यज्या यानाः छगू तगिंलिसें च्यागू तगिमय् आखः ब्वनाच्वंपिं मुक्कं नीन्याम्हेसित छगू छगू सेट स्कुल ड्रेस व दच्छितक गाक्क स्टेसनरी सामाग्री लःल्हाःगु खः।

ब्वनेकुथिइ च्यागू तगिंमय् आखः ब्वनाच्वंम्ह खुस्बु यादवया आर्थिक स्थिति अतिकं कमजोर जुगु हुनिं खुस्बुया हामापिसं आखः ब्वंकेगु त्वःतकेत्यंगु खबर सिया खुस्बुयात दच्छिया नितिं आखः ब्वंकेगु व्यवस्था लिसें मुक्कं नीखुम्ह विद्यार्थीपिन्त शैक्षिक सामाग्री लःल्हाःगु खः ।