नेकपा एमालेया माधवकुमार नेपाल समूह थःगु पक्षय् दुपि केन्द्रीय सदस्य व सांसदपिन्त बैठक सःतूगु दु ।

थौं सोमवाः पार्टी अध्यक्ष केपी शर्मा ओली समूह नाप जूगु सहलहया जानकारी बिइत थःगु समूहया नेतापिन्त सःतूगु खः। भेला सुरु जुगु दु।

थ्व स्वया न्ह्यः थौं सुथय् जुगु वाताय् थःथःगु पक्षया अडान कायम जुया च्वंगु खः ।

स्थिर लुँया भाः थौं स्थिर जुगु दु।

लुँ तोलाया थौं ८६ हजार ६ सय रुपैयाँय् हे कारोबार जूगु दु धका नेपाल सुनचाँदी व्यवसायी महासङ्घं  धाःगु दु ।

अथेहे थौं वहःया भाः न्यातका थहा वःगु दु। तोलाय् न्यातका थहा वना १२७५ रुपैयाँय् कारोवार जुगु दु धका महासङ्घं धाःगु दु ।

समाजसेवी मोतिलाल शिल्पकारं न्ह्याकावःगु मोति सहयोगी संस्थापाखें लय्पतिकं बियावःगु आर्थिक ग्वाहालि थुगु लाय् नं लःल्हाःगु दु ।

संस्थापाखें ७५ दँ वा व स्वयां च्वय्या ज्याथः नागरिकपिन्त वासः न्याय्त बियावःगु आर्थिक ग्वाहालि वंगु आइतबाः न्याक्वःगु खुसी लःल्हाःगु खः । संस्थां हरेक महिनाया १ गतेया दिनय् न्हिं सच्छिया ल्याखं लच्छिया स्वद्वः तकाया आर्थिक ग्वाहालि ज्याथः नागरिकपिन्त बियावःगु खः ।

सुं नं वासः नयाच्वनेमाःपिं ज्याथःपिनि आर्थिक समस्याया ल्याखं वासः त्वःमफीमा धइगु ल्याखं थम्हं आर्थिक ग्वाहालि बियावयागु संस्थाया नायः मोतिलाल शिल्पकारं धयादिल ।

आः ४६ म्ह ज्याथः नागरिकपिन्त ग्वाहालि बियावयागु व ५० म्हेसित ग्वाहालि याय्गु लक्ष्य दुगु नं शिल्पकारं कनादिल । शिल्पकारं वंगु मंसीरनिसें थुगु ग्वाहालि बीगु न्ह्याकूगु खः ।

समाजसेवी अजरमान जोशी प्रधान सेनापति प्रशंसा पदकपाखें सम्मानित जूगु दु ।

यलय् जनतालिसे सेनाया ज्याझ्वःयात प्रभावकारी दय्केत ब्यूगु महत्वपूर्ण योगदानयात च्वछासें नेपाली सेनां समाजसेवी जोशीयात उगु पदकपाखें सम्मानित याःगु खः ।

सेना दिवस– २०७७ या लसताय् जोशीयात नेपाली सेनां उगु पदक लःल्हाःगु खः । नेपाली सेनाया राजदल गणं जनतालिसे स्वापू थकाय्त ग्वसाः ग्वःगु थीथी ज्याझ्वः सुथां लाकेत जोशीं संयोजन यानादीगु खः ।

वय्कःया उगु हे संयोजनकारी भूमिका कदर यासें उगु पदक लःल्हाःगु खः ।

लहनान्युजलिसे खँ ल्हासें ललितपुर उद्योग वाणिज्य संघया पुलांम्ह नायः तकं खःम्ह समाजसेवी जोशीं थःगु योगदानया कदर याःगुलिइ नेपाली सेनाया प्रधानसेनापति पूर्णचन्द्र थापा, राजदल गणलिसें नेपाली सेनायात आभार प्वंकादिल ।

नेपाःया सर्वमान्य नेता लिसें लौहपुरुष गणेशमान सिंहया १०६ क्वःगु बुदिंया लसताय् नेपाल तरुण दल क्षेत्र न. १ या ग्वसालय् जूगु क्षेत्रिय कासाय् स्तरया कासाय् ल्यू लाःपिं कासामिपिन्त भिंतुना लिसें  हना ज्याझ्वः क्वचाःगु दु ।

एच डि थ्रितिनया ग्वसालय् जूगु ज्याझ्वलय् कासाय् ल्यू लाःगु नेपाल तरुण दल क्षेत्र न. ८ या कासामिपिन्त भिंतुना देछाय्गुलिसें हंगु खः । ज्याझ्वलय् सभासद राज्यलक्ष्मी श्रेष्ठं कासामिपिन्त हनापौ लःल्हानादीगु खः ।

नुगः खँ तय्गु झ्वलय् सभासद श्रेष्ठ देशया प्रतिष्ठा थकाय्त कामामिपिनिगु तःधंगु योगदान दुगुलिं कासामिपिन्त माःगु सुबिधा बीत राज्यं कंजुस्याईँ यायमज्यूगु धयादिल ।

ज्याझ्वलय् येँ महानगरपालिका २० वडाया वडाध्यक्ष राजेन्द्र मानन्धरया नं उपस्थिती दुगु खः ।