थौं लुँ वहःया भाः क्वहा वःगु दु। थौं लुँ तोलाय् न्यासः क्वहावःगु दु धका नेपाल सुनचाँदी व्यवसायी महासङ्घं धाःगु दु ।

तोलाय् न्यास क्वहा वया थां लुँ तोलाया ८८३०० तका थ्यःगु दु । थ्व स्वया न्ह्यः वःगु शुक्रवाः लुँ तोलाया न्यास क्वहा वःगु खः।

अथेहे, थौं वहः न झीतका क्वहा वःगु दु । तोलाय् झीतका क्वहावया १३२५ रुपैयाँ थ्यःगु दु धका महासङ्घं धाःगु दु ।

प्रहरी चौकीइ नेपालभासं खँ ल्हात धकाः जूगु विवादया झ्वलय् ज्वनातःपिं उपत्यका सतक विस्तार पीडित संघर्ष समितिया अध्यक्ष सुमन साय्मि नाप महेश्वर मानन्धर, मीन शाही, भिमदेव श्रेष्ठ,रुक्षित श्रेष्ठ, दिपेन श्रेष्ठ, विरोचन श्रेष्ठ, संजय तामाङयात वंगु बुधवाः निसें ज्वनाः कुनातःगु खः।

उकिया विरोधय् माग यासें थौं आइतवाः कालिमातिइ स्वतःस्फूर्त पसः बन्दया आह्वन याःगु खः । थौं कालिमाती चित्तधरया सालिक निसें सोल्टीमोडतकया फुक्क पसः बन्द यासे साय्मि लगायतयात तुरुन्त त्वःतेत माग याःगु खः । पसः बन्द यायेत स्वतःस्फूर्त रुपं चाःहिलाच्वंपिं स्थानीयतय्त तकं प्रहरीं छझाः पनेगु ज्या याःगु खः। प्रहरीं बन्द यानातःगु पसः चायेकेत नं दबाब बीगु लिसें प्रहरीं थःम्हं हे चायेकेगु ज्या नं याःगु खः।

बालाजुइ सतक विस्तारया निंतिं छेँ थुनातःथाय् जूगु विवादया झ्वलय् ज्वनायंकूपिं त्वःतकेगु निंतिं बालाजु प्रहरी चौकीइ वंम्ह साय्मियात चौकी दुने नेपालभासं खँ ल्हात धकाः जूगु विवादया झ्वलय् ज्वंगु खः । साय्मि लगायत मेपिन्त फौजदारी मुद्दाय् ज्वनीपिं अपराधीतय्त थें हतकडी तया बालाजु चौकीं सोह्रखुट्टे चौकीइ स्थान्तरण याःगु खः । साय्मि कालिमातिया स्थानीय वासिन्दा न खः ।

अथेहे वंगु शुक्रवाः माइतघर मण्डलाय् नं प्रदर्शन याःगु खः।