सोमवाः ३ हजार स्वया च्वय् थ्यंगु सेयर कारोबार मापक नेप्से परिसूचक थौं बुधवाः ३ हजार स्वया क्वहावःगु दु।

बुधवा प्रिओपन सेसनय् ३२ अंक क्वहावया नेप्से परिसूचक कारोबार खुला जुइवं हे क्वहावःगु दु। बजार बन्द जुगु इलय नेप्से परिसूचक ५२ दशमलव ४१ अंक क्वहा वया २ हजार ९ सय ६९ दशमलव ६९ अंकय् थ्यःगु दु।

आइतावाः २ हजार ९ सय ८३ अंकय् थ्यंगु नेप्से परिसूचक सोमवाः ३ हजार स्या अप्वो थ्यना रेकर्ड कायम जुगु खः। मंगलवाः भचा अंकं ‘करेक्सन’ खनेदुगु परिसूचक ३ हजार स्वया अप्वो थ्यंगु खः।

बुधवाः ३ हजार स्वया क्वहा वःगु खः। नेपाल धितोपत्र बोर्ड न मंगलवाः सूचीकृत कम्पनी मध्ये ५१ कम्पनीया नां हे तोके याना जोखिम युक्त धागुलि उकिया असर सेयर बजारय् खने दुगु खः।

बोर्डय् उल्लेख जुगु अधिकांश कम्पनीया सेयर भाः क्वहा वंगु दु। कारोबार रकम धासा १५ अर्ब ४८ करोड रुपैयाँ स्वया अप्वो जुगु दु।

येँय हरियाली व जैविक विविधतायात पुनस्र्थापना यायेगु कथ येँँ महानगरपालिका व राष्ट्रिय प्रकृति संरक्षण कोष दथुइ छगु सम्झौता जुगु दु।

महानगरया प्रमुख विद्यासुन्दर शाक्य व उपप्रमुख हरिप्रभा खड्गी श्रेष्ठया रोहवरय् जुगु उगु सम्झौताय् महानगरपाखे प्रमुख प्रशासकीय अधिकृत राजेश्वर ज्ञवाली व कोषपाखे सदस्य सचिव शरदचन्द्र अधिकारीं हस्ताक्षर यानादीगु खः।

येँ महानगर दुने सहरी हरियाली (पारिस्थितिकीय प्रणाली) व जैविक विविधताया विद्यमान अवस्थायात सुधार याना पुनस्र्थापना यायेगुे सम्झौता कथं उगु ज्या जुइ त्यंगु खः।

महानगरं निर्माण याइगु पार्क, वन खुसिइ सिथय् व सार्वजनिक थाय् याइगु हरियालीयात व्यवस्थित व बैज्ञानिक विकास यायेत मागु नीति, रणनीति नाप कार्ययोजना दयकयेगस व नीतिगत व्यवस्थायात कार्यान्वयन यायेगु उगु सम्झौताय् दुथ्याका तःगु दु।

येँ महानगरं कन्हयः गुक्वःगु अधिवेसनय् आ.व. येँ महानगरय् कन्ह्यः बार्षिक नीति प्रस्तुत याइगु७८÷०७९ या बार्षिक नीति प्रस्तुत याइगु जुगु दु।

म्हिगः च्वंगु कार्यपालिका बैठकय् चालु आर्थिक बषया समीक्षा यासे वइगु बर्षया नीति प्रस्तावय् छलफल जुगु दु। महानगरया प्रमुख विद्यासुन्दर शाक्यया अध्यक्षताय् च्वंगु बैठकय् वंगु दँया नीति व उकिइ कार्यान्वयनया विश्लेषण जुगु खः।

थुकिया आधारय् वइगु दँया नीति प्रस्ताव यागु खः। बैठकय् उपप्रमुख हरिप्रभा खड्गी श्रेष्ठ, सहरी योजना आयोगया उपाध्यक्ष सरोज बस्नेत, प्रमुख प्रशासकीय अधिकृत राजेश्वर ज्ञवालीनाप कार्यपालिका सदस्यपि न ब्बति कागु खः।

कार्यपालिका सदस्यपिके थौं तक वःगु सुझावयात ज्वना बार्षिक नीतिया प्रस्ताव अधिवेशनय् यायेगु धका बैठकया अध्यक्ष नाप महानगरया प्रमुख शाक्यं जानकारी बियादीगु खः।

अधिवेसनय् तःगु प्रस्तावय् नगर सभा सदस्यपिनिगु सुझाव वये धुका अधिवेशनया मेगु बैठकं नीति पारित याइ।

थौं सिथि नखः ।नेवाःपिनिगु छगू तःधंगु नखः मध्ये छगू नखः खः । सिनाज्यात उर्जा बिइगु नखः कथ काइगु थ्व नखः नेवाः समुदायपिन्सं झःझः धायेक हनाच्वंगु दु।

जेष्ठ शुक्ल पक्ष षष्ठी अर्थात् कुमार षष्ठीया दिं हनिगु थ्व नखःयात नेवाः समुदायं वर्षा न्ह्यःया लिपांगु नखःया कथं हनेगु याः । भगवान कुमारया जन्म दिं तकं जूगुलिं थ्व दिंया कुमार द्यःया त पूज्याना माय् वः मू वः नयाँ हनिगु याई । अथेहे छेँ दुथ्यंगु न्हूगु छ्वया म्हुछ्या मरी नं नयेगु चलन दु । नेवाः समुदायय् ऋतुकथं नखःचखः हनिगु व थीथी परिकार नं नयेगु चलन दयावयाच्वंगु दु।

गुकिइं याना नेवाः समुदाय नखःचखः नयेगु परिकारपाखें नं म्हसिका दु । अथेहे नखःया दिं नेवाःपिन्सं मुहान, तुं, कुवाः पुखू, हिति आदि लःया स्रोत तकं सुचुकुचु यायेगु याई । वर्षात्या ईलय् बाः वइगु फोहर लखं त्वनेगु लःया मुहानय् लाना लः दुषित मजुइमा धकाः लःया मुहान व स्रोत जःखः तकं सुचुकुचु याना निकास चाकेकेगु थुकिया मू विशेषता खः । अथेहे हिउँदया ईलय् बन्द जूगु, गनावंगु मूलयात बर्षाया लःखं तछ्याय् फइगु जूगुलिं सिथि नखःया दिं लःया मूलयात सफा यायेगु खः।

धार्मिक कथं नं थ्व नखःया विशेषता दु । महादेव व पार्वतिया तःधिकम्ह काय् कुमारया बुँदि जूगुलिं नं धार्मिक महत्व दु । गणेश द्यःपिनिया गणनायक खः धाःसा कुमार देवगणया सेनापति खः । द्यः पुज्याय् बलय् दकले न्हापां कुमारयात पुज्यात धाःसा बर्षाया ईलय् सिनाज्या यायेत बल व शक्ति दइगु जनविश्वास दु । थौं हे दिं न्हू घःलय् च्वंगु सिथि द्यःयात पुज्याना नखः हनिगु चलन नं दु।

प्यन्हू न्ह्यः न्हवं याम्ह द्यःयात थौं सुथय्निसें दर्शन व पूजआजाया नितिं द्यःगलय् विराजमान याई । नेवाः समुदाय कला संस्कृति व सांस्कृतिक मनोरन्जनया पारखी नं खः । उपिं दँयंक थीथी कला, सांस्कृतिक झाँकी व नखःचखः हनिगु याई तर वर्षालिसें दक्वः तजिलजियात थाँती तया सिनाज्याय् लिमलाइगु जुई ।

उकिं नेवाः तय्गु छगू धापू नं दु, “मनु स्यूसां लप्ते कुसां कुयासां न्हापां सिना ज्या सिद्यके माः” धैगु धापू नं सिनाज्याया महत्व व प्राथमिकतायात न्ह्यब्वः । थुजागु अवस्थाय बुँज्यामिपिन्त ज्या यायेत तागत व शक्ति बिइकथंया नसाः ज्वलं नयेगु दिं जूगुलिं सिथि नखःया महत्व यक्वः हे दूगु खनेदु ।

नेकपा एमालेया नेता लिसें पुलाँम्ह प्रधानमन्त्री झलनाथ खनालयात वासः यायेत भारतया नयाँदिल्ली यंकुगु दु । ज्वरो व हिइ हेमोग्लोबिन म्हो जूगु समस्या खनेदसें येँया नर्भिक अस्पतालय् भर्ना जुयादिम्ह खनाल थप वासःया नितिं थौं जहाज पाखें डिल्ल यंकेगु वय्कया सचिवालयं जानकारी बिउगु दु । खनाललिसे वय्कया तिरिमय्जु, काय् व छम्ह चिकित्सक नं दिल्ली झाःगु दु । दिल्ली यंका अनया एपोलो अस्पालय् वय्कया वासः यायेगु तयारी खः । खनालयात गुन्हू तक ज्वरो वसेंलि नर्भिक अस्पतालय् भर्ना याःगु खः । खनाल थ्वयांन्ह्यः नं कोरोना संक्रमित जुइधुंकूगु खः ।