यल महानगरपालिका– १६ वडाया ग्वसालय् व गर्जियस इन्ष्टिच्यूसन अफ फेशन टेक्नोलोजी (गिफ्ट) या संयोजनय् फेसन डिजाईन व सिलाई तालिम मंगलवाः क्वचाःगु दु।

शोभा महर्जनं बियादीगु उगु तालिम स्वला तक न्ह्यागु खः। बजारया चाहना व माग कथं न्हुगु न्हुगु डिजाईनया पहिरन तयार यायेगु मिसापिन्त दक्षता यायेगु उद्देश्यं उगु तालिम ग्वयागु खः धका १६ वडाया वडाअध्यक्ष निर्मलरत्न शाक्यं धयादीगु खः ।

‘सीप सयका मिसापिन्त आत्मनिर्भर व सिलाईलय् अझ दक्ष दयकेत थुगु तालिम सञ्चालन यानागु खः ।’ धका वडाअध्यक्ष शाक्यं धयादीगु खः ।

उगु तालिमय् सिलाई सम्बन्धी आधारभुत ज्ञान व सीप दुपि ३० म्ह मिसापि सहभागी जुगु खः।

फेशन डिजाईन नाप नेपालया सांस्कृतिक पहिचान झल्के जुइगु थीथी डिजाईन अनुरुप लं सूइगु ज्ञान व सीप स्यनागु खः धका टेक्नोलोजीया निर्देशक शोभा महर्जनं धयादीगु खः ।

यलया चापागाउँलय् ५२ दँ न्ह्यः खुया यकूगु बज्रबाराही द्यःया मूर्ति चापागाउँलय् हे प्रतिस्थापन याःगु दु ।

येँया छाउनीया राष्ट्रिय सङ्ग्रहालय तया तःगु मूर्ति म्हिगः सोमवाः सिन्दुर जात्रा याना चापागाउँ बसपार्कया आगँछेय् प्रतिस्थापन याःगु दु। गोदावरी नगरपालिका व बज्रबाराही खः गुठीया मंकाः कुतलं मूर्ति थःगु हे थासय् प्रतिस्थापन याःगु खः।

२०२५ सालय् बज्रबाराही माईया मूर्ति आगछेँयं हे खुया यकूगु खः। लिपा त्रिभुवन विमानस्थलय् वांछ्या तःगु अवस्थाय् लुगु खः धका नगरपालिकाया मेयर गजेन्द्र महर्जनं धयादीगु दु।

कानुनी प्रक्रिया पूरा याना पुरातत्व विभागया निर्णय कथं गोदावरी नगरपालिकाया मेयर, उपमेयर, जिल्ला प्रशासन कार्यालय ललितपुरया प्रतिनिधि, पुरातत्व विभागया प्रतिनिधि व स्थानीय खः गुठीयारया गुठीयारपिनिगु उपस्थितिइ म्हिगः सङ्ग्रहालय प्रमुख जयराम श्रेष्ठं खः गुठीयात मूर्ति विधिवत रुपं हस्तान्तरण याःगु खः।

थ्व हे वइगु वैशाख १३ गते चैत शुक्ल पूर्णिमाया दिं बज्रबाराही माईया जात्रा यायेगु परम्परा दु ।