Display Style:
Column Style
कोरोना संक्रमणया ल्याः अप्वेगु झ्वलय्
लहानान्युज | चौलाथ्व सप्तमी ११४१,बैसाख ६ सोमवाः
नेपालय न्हियान्हिथं कोरोना संक्रमितया ल्या अप्वया वंगु दु । म्हिगः प्यला दुनेया हे दकले अप्वः संक्रमित थपू जूगु दु । लिपांगु २४घौलय् द्वछि व ९६म्ह कोरोना संक्रमण पुष्टि जूगु दु ।
स्वास्थ्य तथा जनसंख्या मन्त्रालयं याःगु प्रेस व्रिफिङ्य् मन्त्रालयया प्रवक्ता डा.जागेश्वर गौतमं ५द्व व ८४म्हसित याःगु पीसीआर व खुसः व ९९म्ह सित याःगु एन्टिजिन परीक्षणय् १९ प्रतिशत मनुतय्के संक्रमण खनेदूगु जानकारी बियादिगु खः ।
थ्वया न्ह्यः बैशाख ३ गते ९सः म्हेसिके संक्रमण खनेदूगु खः । मन्त्रालयया कथं थपू जूूपिं संक्रमित मध्ये स्वनिगःया प्यसः व ३५म्ह खः । गुकिइ येँया स्वसः व २६म्ह, यलःया ६४म्ह व ख्वपःया ४५म्ह जूगु धाःगु दु । थ्वलिसें नेपालय् मुक्क कोरोना संक्रमितया ल्या निगू लखः ८४द्व ७सः व ५४म्ह थ्यंगु दु । अथेहे लिपांगु २४घौ दुने च्याम्ह कोरोनाया हुनिं सीगु दु । आः नेपालय् संक्रमण जुया सीगु ल्या स्वद्व व ८३म्ह थ्यंगु दु ।
अथेहे थप २सः व ६२म्ह संक्रमणमुक्त जूगु दु । थ्वलिसें देशयंक संक्रमणमुक्त जुपिनिगु ल्याः निगू लखः ७५द्वः व ३सः थ्यंगु दु । देय्यंक सक्रिय संक्रमितया ल्याः खुद्वः २सः व ९०म्ह थ्यंगु दु ।
लिपांगु धलः कथं थपू जूपिं संक्रमित मध्ये २०दँ क्वयेया सच्छि व १२म्ह दु धाःसा सक्रिय संक्रमित मध्ये ५१म्ह ५द्व क्वयेया मस्त खः । संक्रमित मध्ये ५द्व ७सः व १४म्ह होम आइसोलेसन व ५सः व ७६म्ह विरामी त संस्थागत आइसोलेसनय् च्वनाच्वंगु स्वास्थ्य मन्त्रालयं न्ह्यथंगु दु ।
उपिंमध्ये सच्छि व १६म्हेसित आइसियू व ४६म्हेसित भेन्टिलेटरय् उपचार यानाच्वंगु दु ।
प्रयागराज सिंह सुवाल मन्त
लहानान्युज | चौलाथ्व सप्तमी ११४१,बैसाख ६ सोमवाः
नेपाली काँग्रेसया पुलांम्ह नेता नाप पूर्वमन्त्री प्रयागराज सिंह सुवाल ९३ दँय् म्हिगः मन्त।
वयकः येँ महानगरपालिकाया पूर्व मेयर न जुयादी धुकुम्ह खः। वयकः म्हिगः ं सनिलया ७ः५५ ताईलय् थःगु हे छेँय् ओमबहालय् मदुगु खः। वयकयात ताइलंनिसें उच्च रक्तचाप व जलास्येँय् सम्वन्धि समस्या जुयाच्वंगु खः।
२०१० सालय् जूगु येँय् नगरपालिकाया न्हापांगु निर्वाचनय् वय्कः नगरउपसभापति (उपमेयर) य् निर्वाचित जुयादिगु खःसाः येँय् नगरपालिकाया निगूगु निर्वाचनय् वय्क मेयरय् निर्वाचित जुयादिगु खः।
सुवाल वि स २०३० सालय् नगेन्द्रप्रसाद रिजाल प्रधानमन्त्री जुयादिगु इलय् यातायातमन्त्री जुयादिगु खः। थौं १० बजे तक छेँ तया वयालिपा टेकुइ यकिइगु धका परिवारपाखे धाःगु दु ।
उद्योगपति गणेशभक्त शाखः मन्त
लहनान्युज | चौलाथ्व पंचमी ११४१,बैसाख सनिवाः
उद्योगपति गणेशभक्त शाखः मन्त।
प्रसिद्ध उद्योग शाखः ग्रुपया अध्यक्ष गणेशभक्त शाखःया ९४ दँय् मन्त ।
नेपाली कांग्रेस ज्येष्ठ राजनीतिज्ञ सभाया सदस्य, नेपाली कांग्रेस जिल्ला कार्यसमिति भक्तपुरया पूर्व कोषाध्यक्ष तक जुयादीम्ह मदुम्ह शाखः नेपालया लोकतान्त्रिक आन्दोलनय्न सक्रिय भूमिका म्हितादीम्ह खः ।
वयकःया प्रति नेपाली कांग्रेसया सभापति शेरबहादुर देउवां दुःख व्यक्त यानादीगु दु ।
भारतं लिहावःपि ५९ म्हेसित कोरोना सङ्क्रमण पुष्टि
लहनान्युज | चौलाथ्व पंचमी ११४१,बैसाख सनिवाः
भारतं रोजगारीया लागि छेँ लिहावःपि नेपालीपि सुदूरपश्चिमय् च्वपि ५९ म्हेसित कोरोना सङ्क्रमण पुष्टि जुगु दु।
प्रदेश स्वास्थ्य निर्देशनालय दिपायल राजपुरया कथं गौरीफन्टा नाका जुया शुक्रवा जक लिहावःपि १०४५ म्ह मध्ये ४७५ म्हेसित एन्टिजेन परीक्षण यागुलिल ५९ म्हेसित कोरोना सङ्क्रमण पुष्टि जुग खः ।
लिपागु इलय भारतय् रोजगारी याना लिहावःपि सुदूरपश्चिम प्रदेशया नागरिकपिकें कोरोना सङ्क्रमण अप्वो खने दुगु खः।
भारतं लिहावःपि तपिकं छेँ लिहावःगुलि अन कोरोना सङ्क्रमण अप्वोया वनेवं कोरोनाया महामारी रुप काये फइगु धइ भका धाःगु दु । अन स्थानीय प्रशासनं भारतं लिहावःपिन्त अनिवार्य १५ दिं क्वरेण्टिनय् च्वनेमाः धका धाःगु दु सा उकिया पालना जुयाच्वंगु मदु।
वसन्त ऋतुइ हिमाल आरोहण याइपिं ६२६म्ह थ्यन
लहनान्यूज | चौलाथ्व पञ्चमी ११४१, वैशाख ४ शनिबाः
थीथी हिमाल आरोहणया नितिं मञ्जुरी काःपिं आरोहीपाखें ४५ क्वःति ध्येबा सिबें अप्वः राजस्व मूंगु पर्यटन विभागं न्ह्यथंगु दु ।
१६गू हिमाल आरोहणया नितिं ७१गू पुचःया सच्छि व ४५म्ह मिसापिं व प्यस व ९३म्ह मिजंपिं पाखें ४५ क्वःति १९गू लखः ५५द्वः व ४९४ ध्येबाया आरोहीपाखें मूंगु खः ।
हिमाल आरोहणया नितिं वसन्त ऋतुया ईलय् आःतकया दुने ६२६म्हेसियां मञ्जुरी काःगु दु । सरगमाथा, अन्नपूर्ण, धौलागिरी व ल्होत्सेलिसें थीथी १६गू हिमाल आरोहणया नितिं मञ्जुरी काःगु दु ।
पर्यटन विभागया कथं दक्वले अप्व सगरमाथा आरोहण नितिं ३३८म्हेसियां अनुमति काःगु दु ।
३६गू टोलीया २६६म्ह मिज व ६४म्ह मिसां सगरमाथा आरोहणया नितिं अनुमति काःगु खः । अथेहे ल्होत्से हिमाल आरोहणया नितिं आःतक १९म्ह आरोहीपिन्सं अनुमनति काःगु दु ।
अथेहे अन्नुपूर्ण हिमालयात नितिं ४४म्ह, धौगागिरी हिमालया नितिं ३०म्ह, आम दब्लम हिमालया नितिं २७म्ह, नुप्से हिमालया नितिं २३म्ह व मकाल हिमालया नितिं २०म्ह आरोहीपिन्सं अनुमति काःगु दु ।
