स्वास्थ्य दर्पण टेलिभिजन टक शोया गुक्वःगु दँमुज्या छगु ज्याझ्वः दथुइ मूपाहाँ नेपाली कांग्रेसया नेता प्रकाशमान सिंहं उलेज्या यानादीगु दु ।उगु ज्याझ्वलय् चिकित्सक व पत्रकारपिन्त हना ज्याझ्वः न याःगु दु । उगु हना ज्याझ्वलय् स्वास्थ्य ख्यलय् योगदान बिउपि प्रदेश १ पाखे वरिष्ठ न्यूरोलोजिष्ट डा. वीरेन्द्रकुमार विष्ट, प्रदेश २ स्त्री तथा प्रसूति रोग विशेषज्ञ डा. लक्ष्मी थापा, वाग्मती प्रदेशपाखे वरिष्ठ रेडियोलोजिष्ट डा. पशुपति रेग्मी व वरिष्ठ अर्थोपेडिक सर्जन डा. सुदीपमान वैद्ययात न सम्मान याःगु खः।

अथेहे गण्डकी प्रदेशपाखे वरिष्ठ फिजिसियन डा. वसन्तकुमार ताम्राकार, लुम्बिनी प्रदेशपाखे वरिष्ठ अर्थोपेडिक सर्जन डा. प्रकाशबहादुर थापा, कर्णाली प्रदेशपाखे वरिष्ठ रेडियोलोजिष्ट डा. रविन खड्का व सुदूरपश्चिम प्रदेशपाखे वरिष्ठ स्त्री तथा प्रसूतिरोग विशेषज्ञ डा. खगेन्द्रराज भट्ट, स्वास्थ्यकर्मी कमल नारायण श्रेष्ठ, हरिकुमार शाही, अथेहे युवा चिकित्सक मुटुरोग विशेषज्ञ डा. शंकर लौडारी, फिजिसियन डा. निरजकुमार सिंह, जनरल ल्याप्रोस्कोपीक सर्जन डा. सूर्यज्योति श्रेष्ठ अथेहे विदेशी नागरीक डा. मेड रूथ गोन्सेटयात न अवार्ड लल्हागु खः । डा. रूथ वरिष्ठ छालारोग विशेषज्ञ तथा स्विट्जरल्याण्डया पूर्वसांसद तक जुयादीइ धुकुम्ह खः।

कोभिड–१९ व्यवस्थापनय् उल्लेखनीय ज्या याःगुलि लुम्बिनी प्रदेश बाँके जिल्लाया खजुरा गाउँपालिका व वाग्मती प्रदेश चितवन जिल्ला इच्छाकामना गाउँपालिकायात संस्थागत सम्मान याःगु खः । अथेतु, स्वास्थ्य पत्रकारिताया ख्यल् उल्लेखनीय योगदान बिउपि पोखरा टेलिभिजनया सुरज श्रेष्ठ, नेपाल समाचारपत्रया भगवती तिमल्सिना, रेडियो सगरमाथाया सम्झना महर्जन, गोरखापत्र दैनिकया सरोज ढुङ्गेल, अन्नपूर्ण पोष्ट दैनिकया दिनेश गौतम, इ–कान्तिपुर डटकमया बुनु थारू व हेल्थन्यूज डटकमया नमराज भट्टयात न सम्मान याःगु खः। उगु साधारणसभाय् ‘स्वास्थ्य दर्पण विशेष–४’ विमोचन मूपाहा सिहं यानादीगु खः।

उगुु ज्याझ्वलय् शहीद धर्मभक्त अङ्ग प्रत्यारोपण केन्द्रया पूर्व निर्देशक प्रा. डा. पुकारचन्द्र श्रेष्ठ, नेपाल पत्रकार महासंघया महासचिव रमेश विष्ट, चिकित्सा शास्त्र अध्ययन संस्थान महाराजगञ्जया डिन डा. दिव्या सिंह, कलेज अफ मास कम्युनिकेसन एण्ड जर्नालिज्मया प्राचार्य डा. मञ्जु मिश्रपिन्स भिंतुना बियादीगुु खः। ज्याझ्वलय् स्वास्थ्य दर्पण मिडिया नेटवर्क प्रालिया अध्यक्ष सन्दीपकुमार श्रेष्ठं झापानिसे कर्णाली तक ७०० म्ह चिकित्सा ख्यःया व्यक्तित्वपिन्त सम्मान याये धुकगु दु धका धयादीगु खः।

मिर्गौला रोग विशेषज्ञ डा. ऋषिकुमार काफ्ले, डा. इश्वरी लौडारी, स्वास्थ्य पत्रकार मञ्चया अध्यक्ष रामप्रसाद न्यौपाने, नेपाल आदिवासी जनजाति पत्रकार महासंघया अध्यक्ष डण्ड गुरुङ, नेवाः पत्रकार राष्ट्रिय दबुया अध्यक्ष सुरजवीर बज्राचार्य, नेपाल टेलिभिजनया पत्रकार गजुरधन राई, गैर आवासीय नेपाली संघ अन्तर्राष्ट्रिय परिषदया उपाध्यक्ष अर्जुनकुमार श्रेष्ठपिन्स चिकित्सकपिन्त सुरक्षाया लागि कानून निर्माण याये मागुलि बःबियादीगु खः।

पूर्णिमा शाक्य पामिलाया न्हापागु सफू नेपालभाषाया हाइकु मुना मतिनाया ख्वबि छगु ज्याझ्वः दथुइ पितब्बज्या जुगु दु।

उगु मतिनाया ख्वबिइ सफुतिइ १३० पू हाइकु दुथ्याकाःतगु दु। छगु ज्याझ्वः दथुइ ईलोहं प्रकाशनपाखें पिकागु हाइकु मुनाया बागमती प्रदेशया सांसद शोभा शाक्य, प्रज्ञा प्रतिष्ठानया प्राज्ञ ध्रुव मधिकर्मी, ईलोहं प्रकाशनया प्रबन्ध निर्देशक नरेश वीर शाक्य, च्वसापासाया अधक्ष्य भुषण प्रसाद श्रेष्ठ, नेपालभाषा मंकाः खलः यलया पूर्वनायः किरण शाक्य, नेवाः हाइकु ख्यःया कजि सुरेश प्रधानं यलया कनिबहालय् च्वंगु होटेल गुडिवलय् जुगु ज्याझ्वलय् मंकाःकथं मतिनाया ख्वबि पितब्वज्या यानादिगु खः।

ज्याझ्वलय् ईलोहंया प्रमुख व्यवस्थापक दर्शनवीर शाक्यं सफूया बारेय् जानकारी बियादिगु खः। अथेहे बागमती प्रदेशया सांसद शाक्य, प्रज्ञा प्रतिष्ठानया प्राज्ञ मधिकर्मी, ईलोहंया प्रबन्ध निर्देशक शाक्य, च्वसापासाया अधक्ष्य श्रेष्ठ, नेपालभाषा मंकाः खलः यलया पूर्व नायः किरण शाक्य, नेवाः हाइकु ख्यःया कजि प्रधानं पिहाँवगु सफूया समालोचना लिसें नेपालभाषाय् हाइकु लेखन, हाइकुया समालोचना लगायतया बारेय् थःथःगु बिचाः तयादीगु खः।

अथेहे उगु ज्याझ्वलय् न्हूगु प्रयोगया कथं प्रकाशित कृतिया बारेय् च्वमि शाक्य व पत्रकार सिल्भिया राजोपाध्याय दथुइया खंल्हाबल्हा नं तगु खः। उगु ज्याझ्वः सुनिल बज्राचार्यं न्ह्याकादिगु खः।

शान्ति सुरक्षा व अपराध न्यूनीकरणय् ल्याय्म्ह तयेगु महत्वपूर्ण भूमिका दइ धका धयादीगु दु।

राष्ट्रिय युवा महासंघ नेपाल यलं थौं शनिवाः मंगलबजारया पाटन संग्रहालय् ग्वसाः ग्वःगु शान्ति सुरक्षा व अपराध मुक्त समाज निर्माणय् ल्याय्म्हपिनिगु भूमिका विषयक अन्र्तक्रिया ज्याझ्वलय् अथे धयादीगु खः। उगु ज्याझ्वलय् ललितपुरया प्रमुख जिल्ला अधिकारी ढुण्डीप्रसाद निरौलां ल्याय्म्हपि धइगु ह्यूपा हइपि खः उल्लेख यानादीसे इमिके सकारात्मक सोच, सामाजिक मूल्य व मान्यताप्रति संवेदनशीलता व रचनात्मक क्रियाकलापय् सहभागी याके फतकि अपराधया दरय् कमी वइगु विश्वास यानादीगु दु ।

उगु ज्याझ्वलय् महानगरीय प्रहरी परिसर ललितपुरया प्रमुख नाप प्रहरी वरिष्ठ उपरीक्षक किरण बज्राचार्यं ल्याय्म्हपि अपराधिक ज्याय् संलग्न जुगु धइगु सामाजिक, आर्थिक, मनोवैज्ञानिक तत्वया प्रभावबारे थीथी अनुभवया दृष्टान्त बियादीसे बालागु संस्कार, सामाजिकरणं अपराध न्यूनीकरणय् ग्वाहालि जुइगु बिचाः प्वकादीगु खः ।

अरनिको सांस्कृतिक तथा व्यावसायिक समाजया अध्यक्ष अजरमान जोशीं प्रहरी प्रशासनयात स्वयेगु सामाजिक दृष्टिइ ह्यूपा कयेत ल्याय्म्हपिनिगु अभियानं बालागु भूमिका निर्वाह याःगु दु धक धयादीगु दु। उगु ज्याझ्वलय् युवा महासंघ नेपालया सल्लाहकार नाप नेवाः पत्रकार राष्ट्रिय दबूया महासचिव सुनील महर्जनं समाजय् ज्याय्म्हपिनिगु ज्ञान, बिचाः व न्ह्यसः यायेगु स्वभावयात स्वीकार यायेमाः उमिके दुगु क्षमता व प्रतिभायात सामाजिक रुपान्तरणय् हये फयेकेमाः धका धयादीगु दु। वयकलं अपराधय् ल्याय्म्हपिनिगु संलग्नता समाज व परिवेशया उपज खः धका धयादीगु खः।

उगु ज्याझ्वलय् बौद्ध अध्ययेता अनिल शाक्यं सारा अपराधया जग हे मनू तयेके सुलाच्वंगु अतिशय लोभ, द्वेष व मोह खः धका धयादीसे उकियात हटे याना बालागु परिवेश, शिक्षा संस्कारसहित आध्यात्मिक शिक्षा माःग् धका बिचाः तयादीगु खः। उगु ज्याझ्वलय् महासंघया अध्यक्ष राजन महर्जनं थौं कन्ह्यया प्रशासन युवामैत्री मजुगुलि यक्को दुःख जुगु । उकि सार्वजनिक प्रशासन ल्याय्म्ह प्रति संवेदनाशील जुइ माःगुलि बः बियादीगु दु। उगु ज्याझ्वलय् महासंघया उपाध्यक्ष प्रणीता शाक्य, समाजसेवी हसिना शाक्य, महासंघया सचिव सुरज खड्का, प्रहरी उपरीक्षक प्रज्वल महर्जन, प्रहरी नायब उपरीक्षक रमेश बोहोरापिनिगु न  उपस्थिति दुगु खः ।

येँ महानगरपालिकाया मेयर विद्यासुन्दर शाक्यं थौं शनिवाः छगु ज्याझ्वलय् युनेस्कोया सम्पदा धलखय् दुगु इतुम्बहालय् च्वंगु श्री भाष्करदेव संस्कारित केशचन्द्रकृत पारावत् महाविहारया कूलद्यः छेँया पुननिर्माण लिपा उलेज्या यानादीगु दु । मेयर शाक्यं उलेज्या ज्याझ्वलय् थःगु नुँगः खँ तयेगु झ्वलय् मूर्त÷अमूर्त अभियान अन्तर्गत थःगु कार्यकालय् येँ दुने दुगु दक्को कुलद्यः छेँ, आगः छेँ नाप बहाः व बिहार पुननिर्माण याये धुकागु दु धका धयादीग् दु ।

मेयर शाक्यं मूर्त जक मखु अमूर्त सम्पदाया संरक्षणया ज्या न जुइ धुकुगु दु धका धयादीगु दु । मेयर शाक्यया कथं पुननिर्माण याना कूलद्यः छेँ श्री भाष्करदेव संस्कारित केशचन्द्रकृत पारावत् महाविहार संरक्षण समाजयात थौं लल्हागु खः । वयकलं धयादीगु दु, आः थुकिइ महानगरपालिकां छु न हस्तक्षेप याइ मखु। आःव निसे थुकियाःगु संरक्षणर्या जिम्मेवारी केशचन्द्रकृत पारावत् महाविहार संरक्षण समाज याइ धका धयादीगु दु ।

येँ मुटुइ च्वःगु इतुम्बहाः येँ महानगपालिकाया ग्वाहालि कूलद्यः छेँया पुननिर्माण याःगु खः । उगु छेँ इतुम्बहालय् च्वपि करीब १५० म्ह स्वया अप्वोसिगु इस्ट द्यःया छेँ खः । उगु कूलद्यः छेँया पुननिर्माण निदँ न्ह्य शिलान्यास याःगु खः। केशचन्द्रवृmत पारावत् महाविहार संरक्षण समाजया अध्यक्ष क्याप्टेन चन्द्रबहादर शाक्यं इतुम्बहाःया गौरव व प्रतिष्ठाया रुपय् दुगु थुगु कूलद्यः छेँया पुननिर्माणय् ग्वाहालि यापि सकसित सुभाय् लल्हानादीगु खः ।

वयकल धयादीगु दु श्री भाष्करदेव संस्कारित केशचन्द्रवृmत पारावत् महाविहार नेपाल मण्डलया हे समृद्ध व सुविधायुक्त महाविहार खः, धका धयादीगु खः । अथेहे, महाविहार संरक्षण समाजया महासचिव प्रज्ञारत्न शाक्यं मूर्त सम्पदाया रुपय् दुगु कूलद्यः छेँया पुननिर्माण क्वचाःगु दुसा  थुगु समाजय् अझ् न यक्को अमूर्त सम्पदाया संरक्षण व जगेर्णा याये ल्यःदनि धका धयादीगु खः।

वःगु २४ घण्टाया दुने देयन्यक ११२ म्हेसित कोरोना संक्रमण पुष्टि जुगु दु ।

३ हजार ९४४ म्हेसिगु नमुना परीक्षण यागुलि ४४ म्ह मिसा व ६८ म्ह मिजंपिन्त कोरोना भाइरसया संक्रमण पुष्टि जुगु दु धका स्वास्थ्य तथा जनसंख्या मन्त्रालयं धाःगु दु ।

थ्व नाप आःतक नेपालय् कोरोना संक्रमितपि २ लाख ७३ हजार ९८४ म्ह थ्यःगु दु। उकि मध्ये थौं प्यम्ह सीगु दु । थ्व नाप सीपिनिगु ल्याः २ हजार ७७१ म्ह थ्यःगु दु। अथेहे वःगु २४ घण्टाय् थप ५४ म्ह डिस्चाजं जुया छेँय् लिहा वःगु दु ।

थ्व नाप आःतक २ लाख ७० हजार २७७ म्ह संक्रमणमुक्त जुइ धुकुगु दु । आःतक देयन्यक सक्रिय संक्रमितपि ९३६ म्ह थ्यःगु दु धका  मन्त्रालयं धाःगु दु।