गण्डकी प्रदेशया मुख्यमन्त्री कृष्णचन्द्र नेपाली पोखरेलं थौं सदनय् विश्वासया मत काइगु जुगु दु।

वंगु शनिवाः गठन जुगु नेपाली कांग्रेसया पोखरेल नेतृत्वय प्यंगु दलीय गठबन्धन सरकारं विश्वासया मत कायत्यंगु खः। थौं सुथय् ११ बजे च्वनिइगु प्रदेशसभा बैठकय् उगु प्रस्तावय् छलफल व मतदान जुइगु कार्यसूची दु धका संसद् सचिवालयं जानकारी बिगु दु।

गण्डकी सरकारया प्रवक्ता कुमार खड्काया कथं  विश्वासया मत कायेगु सूचं प्रदेशसभा सचिवालयय् मंगलवाः हे दर्ता यागु दु। संविधानया धारा १६८ (५) कथं दयकूगु सरकारं उपधारा ६ कथं ३० दिं दुने विश्वासया मत कायेमाःगु संवैधानिक प्रावधान दु।

स्वतन्त्र छम्ह नाप ३१ म्ह सांसदपिनिगु समर्थनय् सरकारं विश्वासया मत काये धुका जक बजेटय् छलफल सुरु यायेगु तयारी दु ।

मुक्क ६० म्ह सदस्यीय गण्डकी प्रदेशसभाय् राष्ट्रिय जनमोचाया कृष्ण थापा पदमुक्त जुगुलि सांसद ५९ म्ह जक आः कायम जुगु दु।

येँ महानगरपालिकां थौं प्रस्तुत यागु नीति तथा कार्यक्रमय् महानगरपालिका दुने दक्को विद्यालय गुणस्तर सुधार याना ई कथं हिइका शिक्षाविद् नाप संस्कृतिविद् सम्मिलित एकीकृत शिक्षा व्यवस्थापन योजना समिति गठन याना शिक्षा योजना तर्जुमा यायेगु नीति हःगु दु।

‘महानगरपालिका दुने दक्को विद्यालय पूर्व प्राथमिक तहनिसे कक्षा ८ तक स्थानीय विषय रूपय् नेपाल भाषाया पाठ्यक्रम अनुरूप पठनपाठन यायेत निरन्तरता बिःगु दु। नेपाल भाषाया विकास व प्रवद्र्धनया लागि नेपाल भाषा प्रवद्र्धन समितिपाखे कार्यक्रम यायेगु कथं व्यवस्था मिले यागु दु,’ नीति तथा कार्यक्रमय् धयातःगु दु, ‘सामुदायिक विद्यालयया प्रधानाध्यापकपिन्त जिम्मेवार नाप थप उत्प्रेरित यायेत नेपाल सरकारं प्रदान यानावयाच्वंगुे मासिक सुविधा अतिरिक्त प्रोत्साहन स्वरुप मासिक रु. १००० उपलब्ध यायेगु।’

अथेहे  महानगरपालिकां थःगु नीति तथा कार्यक्रमय् ‘छगु वडा छगु नमूना विद्यालय कार्यक्रम’ न्हयने हःगु दु ।उकिइ छनौट जुगु ३२ गु नमुना विद्यालययात नमुना सिकाई केन्द्र व तालिम हवया रूपं विकास यायेगु उल्लेख दु। ‘महानगर दुने प्रत्येक वडाय् कम्ति न छगु सुविधा सम्पन्न नाप उच्च प्रविधियुक्त पुस्तकालय स्थापना याना पुस्तकालयया प्रयोगमा सकसिगु पहुंच सुनिश्चित यायेगु,’ नीतिइ धयातःगु दु, ‘महानगर दुने प्रत्येक विद्यालय कक्षा ४ निसे नैतिक शिक्षायात समावेश याना पठनपाठन प्रारम्भ यायेगु।’ नीति तथा कार्यक्रम सार्वजनिक यानादीसे प्रमुख शाक्यं जोखिमपूर्ण परिस्थितिइ अग्रपंक्ति च्वना ज्यायाइपि महानगरपालिकाया वडाध्यक्षपि, कार्यपालिकाया सदस्यपि, वडा सदस्यपि, चिकित्सक, स्वास्थ्यकर्मी, महिला स्वास्थ्य स्वयंसेविका, कर्मचारी, नगर प्रहरी नाप सुरक्षाकर्मी, सफाईकर्मी, एम्बुलेन्स चालक, स्वयंसेवक,परोपकारी व सामाजिक संघ संस्था, निजी, व्यवसायिक व सञ्चारक्षेत्र, उपचार नाप राहत ज्याय् ग्वाहालि याइपि सकसित उच्च प्रशंसा यासे सुभाय् बिःगु दु।

वंगु २४ घण्टाय् २६०७ म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं ७७११ म्हेसिगु पीसीआर परीक्षणय् १७६८ म्ह व ४७७३ म्हेसिगु एन्टिजेन परीक्षणय् ८३९ म्ह याना २६०७ म्हेसित संक्रमण पुष्टि जुगु दु।

कोरोना संक्रमणं वंगु २४ घण्टाय् ३९ म्ह सीगु दु सा २१४१ म्ह संक्रमणमुक्त जुगु दु।

वाःया लिपागु दिं थौं बिहीवाः कारोबार मापक नेप्से परिसूचक भचा कुहावःगु दु।

बुधवाः ५२ अंक घटे जुगुलि नेप्से परिसूचक थौं बिहीवाः १ दशमलव ३ अंक घटे जुया २ हजार ९ सय ६८ दशमल ४२ अंकय् कुहावःगु दु। नेपाल धितोपत्र बोर्डं जोखिमयुक्त धासे वःगु मंगलवाः ५१ कम्पनीया नां हे तोके याना सूची सार्वजनिक यागु खः।

बोर्डया उगु पला लिप बुधवाः सेयर बजारय् प्रभाव खनेदुगु खः। तर बिहीवाः धासा तधःगु प्रभाव खने मदुगु दु। नेप्सेय् कारोबार जुगु समूहगत सवइन्डेक्स मध्ये खुगु थहावःगु दु। नेप्से परिसूचकय् खासै प्रभाव मदुगु सा कारोबार रकम धासा थहावःगु मदु।

बिहीवाः १० अर्ब ९० करोड ४९ लाख ५८ हजार ९३५ रुपैयाँया सेयर कारोबार जुगु दु।

येँ महानगरपालिकां ज्येष्ठ नागरिकपिनिगु उपचार यायेत विशिष्टिकृत सेवानाप सुविधा सम्पन्न १ सय बेडया ‘काठमाडौँ महानगर विशेष अस्पताल’ निर्माण याइगु जुगु दु।

येँ महानगरपालिकाया मेयर विद्यासुन्दर शाक्यं आर्थिक बर्ष २०७८÷२०७९ या नीति तथा कार्यक्रम सार्वजनिक यासे अथे धयादीगु खः। नीति तथा कार्यक्रमय् कोभिड–१९ पाखे प्रभावित महानगरपिनिगु लागि माःगु आधारय् प्रतिकार्य, स्वास्थ्य उपचार व मानवीय ग्वाहालि लागि यायेगु धका उल्लेख यागु दु।

‘कोभिड–१९ पाखे संक्रमित जूपि विरामीपिनिगु स्वास्थ्य अवस्थायात निरन्तर निगरानी, परामर्श व उपचारया लागि कल सेन्टर सञ्चालन, मनोसामाजिक परामर्श, टेलिमेडिसिन सेवा, कोभिड परीक्षण, एम्बुलेन्स सेवा, आइसोलेसन सेवा, कोभिड विशेष अस्पताल सेवा व अक्सिजन सपोर्ट लगायतया सेवा निःशुल्क उपलब्ध यायेगु,’ नीति तथा कार्यक्रमय धयातःगु दु, ‘ज्येष्ठ नागरिकया उपचार यायेत विशिष्टीकृत सेवा सहितया सुविधा सम्पन्न १०० बेडया येँं महानगर विशेष अस्पताल निर्माण यायेगु, अस्पताल सञ्चालन व व्यवस्थापन छगु स्वायत्त संरचना वा सहकार्यपाखे यायेगु।’

महानगरं दक्को वडा कार्यालयय् सञ्चालित शहरी स्वास्थ्य क्लिनिकयात स्तरोन्नति यासे महानगरवासीपिन्त आधारभूत स्वास्थ्य सेवाया प्रत्याभूत यायेगु व विशेषज्ञ चिकित्सकपाखे महानगरय् च्वपिन्त निःशुल्क स्वास्थ्य परीक्षण यायेगु प्रबन्ध मिले यायेगु नीति व कार्यक्रमय् उल्लेख दु।

महानगर दुने सुलभ फार्मेसी सञ्चालन यायेत प्रोत्साहन यायेगु, अज्यागु फार्मेसी सञ्चालकपिन्त महानगरपालिकाय् बुझे यायेगु  कर, शुल्क, दस्तुरय् सहुलियत प्रदान यायेगु, नेपाल सरकारया स्वास्थ्य बिमा कार्यक्रम अन्तर्गत महानगरपिनिगु स्वास्थ्य बिमा यायेगु, महानगर च्वपिनिगु लागि बिमा शुल्कय् ५० प्रतिशत अनुदान उपलब्ध यायेगु महानगपालिकाया नीति काःगु दु।

‘महानगर दुने होटल, रेष्टुरेन्ट, खाजाघर, अनलाइन खाद्य वितरकया उत्पादन थाय्, खाद्य उत्पादन गुणस्तर, पद्दति, प्रक्रिया, संलग्न जनशक्तिया सरसफाई व सेवाग्राहीपिन्स नयेगु त्वनेगु उपभोग यायेत थाय् तक समग्र मुल्यांकन याना अज्यागु सेवा प्रदायकपिनिगु सेवाया गुणस्तर सुनिश्चित यायेत सूचिकृत नाप वर्गिकरण याना महानगरपालिकां प्रमाणपत्र जारी याय,’ नीति–कार्यक्रमय् धयातःगु दु,’ ‘नेपाल एम्बुलेन्स सेवां प्रदान याना वयाच्वंगु सेवाया प्रभावकारिता अध्ययन याना एम्बुलेन्स सेवायात निशुल्क, सरल व पहुँचयोग्य दयकेगु।’