Display Style:
Column Style
सर्वोच्च अदालतं संसद विघटनं बदरयात
लहानान्युज | सिल्लाथ्व एकादशी ११४१, फागुन ११ मंगलवाः
सर्वोच्च अदालतं संसद विघटन बदर याःगु दु।
प्रधानन्यायाधीश चोलेन्द्रशम्शेर जबरा, न्यायाधीशपि विश्वम्भरप्रसाद श्रेष्ठ, अनिलकुमार सिन्हा, सपना प्रधान मल्ल व तेजबहादुर केसीया संवैधानिक इजलासं प्रधानमन्त्री केपी शर्मा ओलीं याःगु संसद विघटन बदर यायेगु फैसला न्यकूगु दु।
प्रधानमन्त्री केपी शर्मा ओलीें सिफारिसय् राष्ट्रपति विद्यादेवी भण्डारीं वःगु पुस ५ गते संसद विघटन यासे वैशाख १७ व २७ गते निर्वाचन घोषणा याःगु खः।
उकिया विरुद्ध १३ गु रिट सर्वोच्चय् दर्ता जुग्ु खः।
सर्वोच्च अदालतं १३ दिं दुने संसद बैठक सत्ययेगु लागि आदेश
लहानान्युज | सिल्लाथ्व एकादशी ११४१, फागुन ११ मंगलवाः
विघटन जुगु संसद सर्वोच्च अदालतंसंसद पुनंस्थापना यायेत आदेश बिःगु दु ।
थौं मंगलवाः याःगु आदेशय् १३ दिं दुने संसद बैठक सतिइगु लागि धाःगु दु ।
नेवाः तजिलजिकथं प्रधानमन्त्रीया बुदिं
सिल्लाथ्व एकादशी ११४१, फागुन ११ मंगलवाः
२००८ साल फागुन ११ गते तेह्रथुमय् जन्म जुयादीम्ह प्रधानमन्त्री ओलीं थौं ७०दँया बुदिं हनः ।
ओलीं बालुवाटारय् थः छेँजपिंलिसें नेवाः तजिलजिकथं हंगु खः । बुँदि हनेगु झ्वलय् तिरिमय्जु राधिका शाक्यया छेँजपाखें हःगु खँय्, न्याः व अय्ला सगं काःगु खः ।
अथेहे ओलीया अबू मोहनप्रसाद ओलीपाखें नं सिनं तियादिल ।
थःगु बुँदिं हनेत सीमित मनुत अबु मोहनप्रसाद, तिरिमय्जु राधिका शाक्यलिसें छुं छुं छेँजःपि जक निजी सचिवलालय् उपस्थित दूगु खः ।
तातोपानी नाका १०न्हूलिपा संचालनय्
सिल्लाथ्व एकादशी ११४१, फागुन ११ मंगलवाः
छुं दिं निसें बन्द जूगु तातोपानी नाका १०न्हूलिपा हाकनं संचालनय् वःगु दु । चिनियाँ न्हूँ दँया इलय् र्छुंं दिं बन्द जूगु नाका हाकनं संचालनय् वःगु नापं तातोपानी भन्सारय् न्हूगु व्यवस्था तकं जूगु धाःगु दु ।
उगु कथं आः भन्सारया वार्डय् ज्वलं तयेगु व्यवस्था जूगु खः । थुगु व्यवस्था जूगु ना पं चिनियाँ पक्षं उगु हे कथं ज्वलंत छ्वयाहइगु जूगु दु ।
न्हूगु व्यवस्था लिपा तातोपानी नाकाय् आवलिं सिन्डिकेट लागु मजुइगु तातोपानी भन्सार ज्याकुया प्रमुख लालबहादुर खत्रीं दावी यानादील ।
आः हरेक दिं थुगु नाकापाखें १६गः निसें २०गः तक्क नेपाली कन्टेनर दुहाँवयेफइगु वयेकलं जानकारी बियादील । १०न्हू लिपा चाःगु थुगु नाकापाखें म्हिगः सिसाबुसाया ८गः कन्टेनर दुहाँवःगु दु ।
उगु मध्ये ६गःलय् स्याउ व निगःलय् ख्वसिं दूगु भन्सार ज्याकुथिं जानकारी बिउगु दु ।
थ्वयान्ह्यः कोभिडया हुनिं क्यना चिनियाँ पक्षं तातोपानी नाकापाखें न्हिं ५दँ निसें १८ गः तक्क कन्टेनर पास जुयाच्वंगु खः ।
नाकाय् दच्छिनिसें दिनाच्वंगु ज्वलंत भन्सारय् हया जक चिनियाँ न्हूँ ँदँया इलय् नाका बन्द याःगु खः ।
वयान्ह्यः माघय् मितेरी ता निर्माणया नितिं धासें नाका २० न्हूया नितिं बन्द याःगु खः । ता दयेकेधुंका सञ्चालनय् वःगु छवा मबिवं चिनियाँ न्हूँ दँ न्ह्यायेधुंका तातोपानी नाकां ज्वलंत वयेगु बन्द जूगु खः ।
स्वनिगःया अस्पतालय् ज्यायाइपि ४५ प्रतिशत स्वास्थ्यकर्मीपिन्त कोरोनाया एन्टीबडी खनेदु
लहानान्युज | सिल्लाथ्व एकादशी ११४१, फागुन ११ मंगलवाः
स्वनिगः दुनेया अस्पतालय् ज्यायाइपि ४५ प्रतिशत स्वास्थ्यकर्मीपिन्त कोरोनाया एन्टीबडी खने दुगु दु धका नेपाल स्वास्थ्य अनुसन्धान परिषद् या अध्ययनं क्यःगु दु। स्वनिगःया २० गु अस्पतालया स्वास्थ्यकर्मी नाप कर्मचारीपिनिगु याःगु सेरोइपिडिमियोलोजी अध्ययनं अस्पतालय् ज्यायाइपि कर्मचारी मध्ये दकलय् अप्वो ३६ प्रतिशत नर्सपिन्त कोरोना संक्रमित जुगु धका धाःगु दु।
उगु अध्ययनया कथं नर्सलिपा प्रशासन च्वपिके २२ प्रतिशत कर्मचारी संक्रमित जुगु दु धका धाःगु दु । अथेहे १८ प्रतिशत चिकित्सक, ७ प्रतिशत ल्याव व वासः पसलय् ज्यायाइर्पि फर्मासिस्टपिन्त संक्रमण खनेदुगु दु । अथेहे १७ प्रतिशत मेमेपि कर्मचारीपिन्त कोभिड–१९ पुष्टि जुगु दु । स्वनिगलय् कोभिड–१९ या सेरोइपिडिमियोलोजी अध्ययनया कथं स्वनिगः दुनेया अस्पतालय् ज्यायाइपि स्वास्थ्यकर्मीपिन्त कोभिड–१९ या संक्रमण अवस्था अध्ययनया लागि याःगु सर्वेक्षणय् अथे लिच्वः खनेदुगु धका धाःगु दु । उगु अध्ययन कथं २० गु अस्पतालय् ३२ प्रतिशत निसे ५६ प्रतिशत तक एन्टीबडीया संयोजित व्यापकता दुगु अनुसन्धानं खनेदुगु दु ।
अनुसन्धानय् अन्नपुर्ण न्यूरो इन्स्टिच्युट, बीर अस्पताल, नेपाल आँखा अस्पताल, प्रसुति गृह, ह्यामस अस्पताल, निजामती कर्मचारी अस्पताल, भेनस अस्पताल, मेडिसिटी अस्पताल, अल्का अस्पताल, नेपाल कोरिया मैत्री अस्पताल, किस्ट अस्पताल, नेपाल क्यान्सर अस्पताल, स्टार अस्पताल, त्रिवि शिक्षण अस्पताल, ग्राण्डी अस्पताल, कान्तिवाल अस्पताल, नेपाल मेडिकल कलेज, ओम अस्पताल, नेपाल सशस्त्र प्रहरी बल व मोडेल अस्पताल कीर्तिपुरय् ज्या याइपि नर्स डाक्टर प्रशासन ल्याव लगायतया कर्मचारी सहभागी दुगु खः । उमिके कोभिड–१९ जुगु मजुगु स्वयेत एन्टीबडी व्यापकता जाँच याःगु खः ।
उकिया प्रमाणीकरणया लागि त्रिवि शिक्षण अस्पतालया वायोमेट्रिक विभागया ल्यावय् परीक्षण याःगु खः । अध्ययनय् एनएचआरसीया सदस्य सचिव डाक्टर प्रदिप ज्ञवाली व कन्सल्टेन्ट फिजिसियन डा. किरण राज पाण्डे सहभागी दुगु खः।
