येँ महानगरपालिकाया मेयर विद्यासुन्दर शाक्यं थौंनिसें ६०दँ निसें ६४दँ तक्कया नागरिकपिन्त न्ह्याकूगु चिनिया खोपया न्हापांगु डोज दक्वसित कायेत इनाप याःगु दु । खोप केन्द्रया अनुगमन यायेगु झ्वलय् उगु इनाप मेयर शाक्यं यानादिगु खः ।

मेयर शाक्यलिसें उपमेयर हरिप्रभा खड्गी श्रेष्ठ, प्रमुख प्रशासकिय अधिकृत राजेश्वर ज्ञवाली, वडाध्यक्ष लगायतपिं तकं अनुगमनय् ब्वति दूगु खः । “येँ महानगरपालिकां आः ३२गू वडा हे निस्वनातःगु खोप केन्द्रय् उगु उमेर समूहया थःयात अपुगु केन्द्रय् वना खोप काय्फइगु व्यवस्था यानातःगु शाक्यं धयादिल । शाक्यं खोप कायेत उगु हे वडाया नागरिक जुइ म्वागु व उमेर समूह ज्वः लात धाःसा महानगरं व्यवस्थापन यानातःगु ३२वटा केन्द्र मध्ये न्ह्यागु केन्द्रपाखें नं खोप कायेफइगु धयादिल ।

अथेहे वय्कलं थःगु दँ सिइदइगु म्हसिका ज्वना थःयात पायक थासय् वना खोप कायेत इनाप यानादिल । “उगु उमेर समूहया सुं नं खोप अभियानपाखें त्वःमफिइमा धकाः जनप्रतिनिधिपिनिगु न्ह्यःलुवाय् त्वाः त्वाः पतिकं माइकिंङया व्यवस्था नं यानागु दु”, शाक्य धयादिल, जिम्सं छेँ छेँ वना खोप अभियानय् ब्वति कायेत इनाप तकं यानागु दु । उकिं सुं नं त्वःफिइमखु धैगु जिमिगु भलसा दु ।” थ्व झ्वलय् जक छगू लखः मनुतय्गु ब्वति दयेकेगु आज्जु कयागु नं वय्कलं धयादिल ।

शाक्यं मंगलबाः वडा १३ या जनप्रभात मावि कालिमाटी, वडा २१ या यंगाल सामुदायिक सहरी स्वास्थ्य क्लिनिक, वडा २३ या ओम वहाल व वडा २५ या कन्या मन्दिर माध्यमिक विद्यालयस दूगु खोप केन्द्रया अनुगमन यानादिगु खः । उगु झ्वलय् मेयर शाक्यं थौं जक हे प्यंगु खोप केन्द्रया अनुगमन यानादिगु खः । दक्वः केन्द्रय् सहज रुपं खोप अभियान न्ह्यानाच्वंगु धयादिल । विगतय् थीथी अस्पतालया खोप केन्द्रय् खोप अभियान न्ह्याकुगु वलय् भिडभाड अप्वःगु, गुकिं संक्रमण न्यनेगु लगायतया गुनासो वसेंलि उकियात सम्बोधन यासें येँ महानगरपालिकां ३२गू वडाय् ३२गू केन्द्र निस्वना खोप अभियानयात व्यवस्थापन यानागु अनुगमनया वलय् मेयर शाक्यं धयादिल ।

वडाध्यक्ष, सदस्य, स्वयमसेवक, सामाजिक संस्थाया जनप्रतिनिधिपिनिगु ग्वहालिं अझ खोप ज्यावः न्ह्याकेपूmगु नं वय्कलं धयादिल । अथेहे ३२गू वडा व अझ उमेर समूह नं छुटेयाना खोप अभियान न्ह्याकुगुलिं खोप अभियान अपूक न्ह्यानाच्वंगु खः । वइगु दिंनय् नं थुकियात अझ बाँलाका यंकेगु व अनुगमनया वलय् याउँक याकनं सकसित खोपया व्यवस्थापन यायेत सुझाव नं बियादिल । उमिगु सुझावयात आत्मसाथ याना नेपाल सरकारलिसे अझ अप्वः समन्वय याना न्ह्यने वनेगु व याकनं हे दक्व महानगरवासीपिन्त खोपया व्यवस्था यायेगु बचं तकं मेयर शाक्यं उगु झ्वलय् बियादिल ।

युनाइटेड नेवाः युएसएपाखें म्हिगः छगू बःचाधंगु ज्याझ्वःया दथुइ चिकित्सालयया नायः डा. मनोजमान श्रेष्ठयात १५ लाख ६३ हजार ८७५ तका ९० पैसाया चेक लःल्हाःगु खः ।

अमेरिकाया टेक्सास राज्यया ड्यालस शहरय् च्वनाच्वंपिं नेवाःतय्सं नीस्वनातःगु ‘युनाइटेड नेवाः युएसए’ पाखें कोभिड विरामीया निःशुल्क सेवा यायेगु लागिं थनया छत्रपाटी निःशुल्क चिकित्सालययात आर्थिक ग्वाहालि लःल्हाःगु दु ।

थ्व झ्वलय् युनाइटेड नेवाः युएसएया नायः महेन्द्र मानन्धरं कोभिडया विरामीतय्त निःशुल्क सेवा बियाः सञ्चालन जुयाच्वंगु नेपाःया संस्थायात ग्वाहालि याये दयाः थःपिं लय्ताःगु खँ कनादिल ।

अथे हे उपाध्यक्ष शैलेन्द्र मानन्धरं अमेरिकाय् च्वंपिं नेपाःमितय्सं थःगु देश लुमंकाः गच्छे कथं बिउगु ध्यबा मुंकाः नेपाः छ्वया हयागु सन्देश बिसें भविष्यय् नं माल धाःसा थुकथंया ग्वाहालि यायेगु बचं बियादिल ।

लिसें वय्कलं थुगु चन्दा मुनेज्याय्  ग्वाहालि यानादीपिं संस्था दुजःपिं सचिन्द्र शाक्य, रवि महर्जन, प्रज्वल महर्जन व नरेश महर्जनयात नं सुभाय् देछानादिल ।

वंगु २४ घण्टाय् दुने येँ ८३६ म्हेसित कोरोना संक्रमित थपे जुगु खः।

अथेहे ख्वपय् १२१ व यलय् २६९ म्हेसित कोरोना संक्रमित पुष्टि जुगु दु। वंगु २४ घण्टाय् स्वनिगु धुका दकलय् अप्वो झापाय् ३१८ म्ह, कास्कीइ २२० म्ह, मोरङय् १९१म्ह, सुनसरीइ १७१म्ह, कैलालीइ १२०म्ह, मकवानपुरय् १०६ म्ह व सुर्खेतय् १०२ म्हेसित संक्रमितपि थपे जुगु दु।

थौं ताप्लेजुङ्ग, पाँचथर, इलाम लगायतया २४ जिल्लाय् झीम्ह स्वया कम संक्रमितपि थपे जुगु दु। थौं तक देयन्यक सक्रिय संक्रमितपि ८२ हजार ७३६म्ह दु।

उकि मध्ये ७६ हजार ५५० म्ह होम आइसोलेसनय्, ६ हजार १८६ म्ह संस्थागत आइसोलेसनय्, १ हजार ३२१ म्ह आईसीयूलय् व ३७२ म्ह भेन्टिलेटरय् दुगु धका स्वास्थ्य तथा जनसंख्या मन्त्रालय धागु दु।

लिपागु २४ घण्टाय् थप ५१५३ म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं कोरोना संक्रमणया कारण १०८ म्हेसिगु सीगु दु सा ६५७० म्ह संक्रमणमुक्त जुगु दु।

लिपागु २४ घण्टाय् १२ हजार ६५ म्हेसिगु पीसीआर परीक्षणय् ३८७० व ५६११ एन्टिजेन परीक्षणय् १२८३ म्ह याना ५१५३ म्हेसित संक्रमण पुष्टि जुगु खः।

थ्व नाप नेपालय् कोरोना संक्रमितपि आःतक ६ लाख ११ हजार ३०८ म्ह थ्यंगु दु। उकि मध्ये ५ लाख ४५ हजार ३० म्ह कोरोनामुक्त जुगु दु। देयन्यक सक्रिय संक्रमितपि ८२ हजार ७३६ म्ह थ्यंगु दु।

कोरोना भाइरस संक्रमणं आःतक ८०९८ म्ह सी धुकुगु दु।

आइतवाः सेयर कारोबार मापक नेप्से परिसूचक थहा वना न्हुगु रेकर्ड हे कायम जुग खः।

सोमवाः स्थिर खनेदुगु सेयर बजाः मंगलवा हाकन न्हुगु रेकर्ड कायम यायेत सफल जुगु दु। थौं मंगलवाः नेप्से परिसूचक ५३ दशमलव ४४ अंक थहावना २ हजार ९ सय ६० दशमलव १४ अंकय् थ्यंगु दु।

थ्व आःतक हे दकलय् अप्वो खः। नेप्सेया परिसूचकय् न्हुगु रेकर्ड तया कारोबार रकम करिब १७ अर्ब रुपैयाँ थ्यंगु दु। १ लाख ४९ हजार ७०८ कारोबारपखे ३ करोड ५७ लाख कित्ता सेयर किनबेच जुया कारोबार रकम १६ अर्ब ९५ करोड १२ लाख ९९ हजार रुपैयाँ स्वया अप्वो थ्यंगु दु।

‘क’ वर्गया कम्पनी कारोबार मापन यायगु सेन्सेटिभ इन्डेक्स ७ दशमलव ४७ अंक थहावंगु दु। नेप्से कारोबार जुइगु अधिकांश समूह थहावंगुलि होटल व पर्यटन नाप लघुवित्त समूहया लगानीकर्तापिन्स यक्को कमे याये मखन।

बजारय् उल्लास जुया थुगु समूह न सबइन्डेक्स न घटे जुगु खः। लघुवित्त समूह २४ दशमलव २१ अंक क्वहा वगुलि होटल १६ दशमलव ४६ अंक घटे जुगु खः। लगानी समूह नज ०.८८ प्रतिशत घटे जुगु दु सा बाँकी दुगु दक्को समूह थहावंगु दु।

दकलय् अप्वो विकास बैंक ९ प्रतिशत स्वया अप्वो थहा वंगु दु सा फाइनान्स समूह ८ दशमलव ७१ प्रतिशत क्वहा वंगु दु।