Display Style:
Column Style
प्रधानमन्त्री ओलीं हाकनं मन्त्रिमण्डल विस्तार यानादिल
राम डंगोल | कछलागा औंसी ११४१,जेष्ठ २७ बिहीवाः
प्रधानमन्त्री केपी शर्मा ओलीं थौं हाकनं मन्त्रिमण्डल विस्तार यानादिल । वंगु शुक्रबाः जसपाया महन्थ ठाकुर पक्षयात पुनर्गठन यानादिम्ह प्रधानमन्त्री ओलीं थौं न्हेम्ह मन्त्री व छम्ह राज्यमन्त्रीया मन्त्रीमण्डल विस्तार यानादिगु दु ।
२०७४ साल फागुनय् प्रधानमन्त्री जुइधुंका आःतक्क प्रधानमन्त्री ओलीं मन्त्रिमण्डलय् हिलासू हःगु थ्वः १८क्वःखुसी खः । थौं सत्तारुढ दल नेकपा एमालेपाखें ६म्ह मन्त्री, छम्ह राज्यमन्त्री व जसपापाखें छम्ह मन्त्री थपू याना ओलीया मन्त्रिमण्डल २५म्ह दुजःया जूगु दु ।
थौं नियुक्त जूपिंलय् गृहमन्त्रीमा खगराज अधिकारी, उद्योग, वाणिज्य तथा आपूर्तिमन्त्री राजकिशोर यादव, सञ्चार तथा सूचना प्रविधि मन्त्री नैनकला थापा व कृषि तथा पशुपन्छी विकास मन्त्री ज्वालाकुमारी साह जुयादि ।
अथेहे वन तथा वातावरण मन्त्री नारदमुनि राना, संघीय मामिला तथा सामान्य प्रशासनमन्त्री गणेश पहाडी, प्रधानमन्त्रीया ज्याकू स्वयेगु याना विना विभागीय मन्त्री मोहन बानियाँ व आशाकुमारी विकयात वन तथा वातावरण राज्यमन्त्रीइ नियुक्त याःगु दु । रक्षा मन्त्रालयया भाला धाःसा प्रधानमन्त्रीं थः हे काःगु दु ।
न्हूपिं मन्त्रीपिन्सं थौं हे पदभार ग्रहण यानादिगु दु । सञ्चारमन्त्री जुयादिम्ह नैनकला थापा पुलाँम्ह गृहमन्त्री रामबहादुर थापा वादलया तिरिमय्जु जुयादि । न्हूपिं मन्त्री लिसें राज्यमन्त्रीया पद लिसें गोपनियताया सपथ कयादिगु दु । वंगु वालय् मन्त्रिमण्डल पुनर्गठन विरुद्ध सर्वोच्च अदालतय् मुद्धा विचाराधीनय् लानाच्वंगु दु ।
नागरिकता अध्यादेश कार्यान्वयन मयायेत आदेश
कछलागा औंसी ११४१,जेष्ठ २७ बिहीवाः
सर्वोच्च अदालतं नागरिकता अध्यादेश कार्यान्वयन मयायेत अन्तरिम आदेश बिउगु दु ।
प्रधानन्यायाधिश चोलेन्द्र शमशेर राणासहितया सर्वोच्च अदालतया संवैधानिक इजलासं नागरिकता सम्बन्धि अध्यादेश कार्यान्वयन मयायेत व यथास्थिति हे तयातयेत अन्तरिम आदेश याःगु खः ।
प्रधान्यायाधिश चोलेन्द्र शमशेर राणा, न्यायाधिशपिं दिपककुमार कार्की, मिरा खड्का, हरिकृष्ण कार्की व इश्वर खतिवडा दूगु संवैधानिक इजलासं नागरिकता अध्यादेश थथें कार्यान्वयन मयायेत व यथास्थितिइ तयातयेत आदेश जारी याःगु खः ।
कानुन दयेकिगु संसदया अधिकार क्षेत्र जूगुलिं उकियात हाचांगाया अत्यावश्यक कथंया अध्यादेश जारी जुइमफइगु अदालतया धापू दु । आदेशय् धयातःगु दु, “नागरिकता बिइगु सम्बन्धय् नीतिगत व्यवस्था यायेगु विषय महत्वपूर्ण व संवेदनशील खँ खः । वास्तविक नेपाली नागरिकं नेपाली नागरिकताया प्रमाणपत्र देहेमा धाःसा गैरनेपालीपिन्त कानुनबमोजिम प्रक्रिया पूवंका अंगिकृत वा मानार्थ नागरिकता थें जाःगु बाहेक नेपाली नागरिकताया प्रमाणपत्र बिइ मिलेमजु । गैर नेपाली पिन्त नेपाली नागरिकताया प्रमाणपत्र बिइ मिलेमजू ।’
प्रतिनिधिसभा विघटनलिसें जनता समाजवादी पार्टी जसपाया महन्थ ठाकुर पक्षपिन्त सरकारय् सहभागी यायेत सरकारं अध्यादेश हःगु खः । अदालतया आदेशलिसें आः अध्यादेश बमोजिम नागरिकता बिइ दइमखु ।
सञ्चारमन्त्री नैनकला थापां पदभार ग्रहण यात
लहानान्युज | कछलागा औंसी ११४१,जेष्ठ २७ बिहीवाः
नवनियुक्त सञ्चार तथा सूचना प्रविधिमन्त्री नैनकला थापां थौं बिहीवाः पदभार ग्रहण यागु दु।
राष्ट्रपति कार्यालयं सपथ ग्रहण याये धुका सिंहदरवारं सञ्चार तथा सूचना प्रविधिमन्त्री मन्त्रालय वना पदभार ग्रहण यागु दु।
महिला आयोगया अध्यक्ष जुइ धुकुम्ह थापा लिपागु इलय् सक्रिय राजनीति मदुम्ह खः। तर पूर्व माओवादी कोटापाखे निम्ह मन्त्री दयकूगुलि नैनकला सञ्चारमन्त्री जुगु खः।
सञ्चारमन्त्री नैनकला एमाले नेता नाप पूर्वगृहमन्त्री रामबहादुर थापा बादल जहान खः।
५,२९३ म्ह संक्रमणमुक्त, ३७४९ संक्रमण पुष्टि नाप ५९म्ह सीत
शोभा श्रेष्ठ | कछलागा औंसी ११४१,जेष्ठ २७ बिहीवाः
वंगु २४ घण्टाया दुने थप ३ हजार ७४९ म्हेसित कोरोना भाइरसया संक्रमण पुष्टि जुगु दु।
स्वास्थ्य तथा जनसंख्या मन्त्रालयया कथं ९ हजार ९०१ म्हेसिगु नमुना पीसीआर परीक्षणय् २ हजार ८७४ म्ह व ५ हजार ३३७ म्हेसिगु एन्टिजेन परीक्षणय् ८७५ म्ह याना ३ हजार ७४९ म्हेसित संक्रमण पुष्टि जुगु दु।
अथेहे नेपालय् कोरोना भाइरस संक्रमितपिनिगु ल्याः ६ लाख १९ हजार ४०१ म्ह थ्यंगु दु। उकि मध्ये ५ लाख १५ हजार ५९१ म्ह संक्रमणमुक्त जुगु दु। अथेहे देयन्यक ७७ हजार ८५८ म्ह सक्रिय संक्रमित दु।
कोरोना संक्रमणया कारण वंगु २४ घण्टाय् ५९ म्ह सीगु दु। थ्व नाप आःतक सीपिनिगु ल्याः ८ हजार २३८ म्ह थ्यंगु दु। अथेहे वंगु २४ घण्टाय् ५,२९३ म्ह संक्रमणमुक्त जुगु दु धका मन्त्रालयं धागु दु।
येँ महानगरया खोप अभियानय् उत्साहजनक ब्वति
लहनान्यूज | कछलागा औंसी ११४१,जेष्ठ २७ बिहीवाः
येँ महानगरया ३२गू थासं ६०दँ निसें ६४दँया नागरिकपिन्त न्ह्याकूगु खोप अभियान ज्याझ्वलय् निन्हूया दिनय् १८द्वः व ११३म्हं ब्वति काःगु दु । न्हापांगु दिंया तुलनाय् निगूगु दिं द्वःछि व ९४म्ह अप्वःपिन्सं खोप काःगु महानगरपालिकां न्ह्यथंगु दु ।
खोप अभियानया न्हापांगु दिं ८द्वः व ७४७म्हेसियां ब्वति काःगु खः धाःसा निगूगु दिं ९द्वः व ३६६म्ह नागरिकपिन्सं खोप काःगु येँ महानगरपालिकाया शहरी स्वास्थ्य तथा खाद्य पदार्थ नियमन विभागया प्रमुख हरि कुँवरं जानकारी बियादिल ।
न्हापांगु दिं ४द्वः ४१९म्ह मिजं व ४द्वः ३२८म्ह मिसापिन्सं ब्वति काःगु खः । निगूगु दिं ४द्वः व ८९३म्ह मिजंपिं व ४द्वः व ९८४म्ह मिसापिन्सं ब्वति काःगु विभागं जानकारी बिउगु दु । “निगूगु दिं निगू डोज काये मखंपिं प्यस व ७५म्हलिसें ९द्वः व ८४१म्ह नागरिकपिं खोप अभियानय् ब्वति काःगु दु,” कुँवरं धयादिल, “यँ महानगरपालिकाया प्रमुख विद्यासुन्दर शाक्यया उजं कथं खोप अभियानयात अझ प्रभावकारी दयेकेत उगु उमेरया पुचःया सुनं नागरिकपिं खोप अभियानं छुटे मजुइमा धकाः जनप्रतिनिधिया न्ह्यलुवाय् त्वाःत्वाः व छेँय् छेँय् थ्यंका अभियानबारे जानकारी बिउगु ज्या जुयाच्वंगु दु ।” कुँवरं न्यान्हूया दिनय् १गू लखः अप्वःयात खोप ज्याझ्वलय् ब्वति कायेकेगु आज्जु कयागु धासें उगु उमेरया महानगरवासीपिन्त थःयात अपूगु केन्द्रय् वना खोप अभियानय् ब्वति कायेत नं इनाप यानादिल ।
येँ महानगरपालिकाया प्रमुख विद्यासुन्दर शाक्यं नं कोभिडविरुद्धया निचियाँ खोपया न्हापांगु मात्रा निसंकोच जुया कायेत नं इनाप यानादिल । “दक्वः ग्याचिकूपाखें तापायेका खोप अभियानय् सहभागि जुइत इनाप यानागु दु ।”
वय्कलं खोप कायेधुंकूपिन्सं व दक्व नागरिकपिन्सं खोप कायेत छुटेजूपिं नागरिकपिन्त खोप अभियानय् सहभागि जुइत छप्पं जुया न्ह्यायेमाःगु धयादिल ।
