नेकपा एमालेया नेपाल समूह सांसदपि पार्टी अध्यक्ष नाप संसदीय दलया नेता केपी शर्मा ओलीं बिहीवाः सःतूगु संसदीय बैठकय् मवनिइगु जुगु दु। बुधवाः सुरु जूगु राष्ट्रिय कार्यकर्ता भेलाय् व्यस्त जुगुलि बैठकय् वने फइ मखु धका सांसद नाप सचिव योगेश भट्टराई न धाःगु दु ।

थःपि राष्ट्रिय भेलाबारे प्रधानमन्त्री नाप संसदीय दलया सचिवालयय् जानकारी दुगुलि वयकलं धयादीगु दु, ‘दलया बैठकय् वनेत छु न समस्या मदु ।

तर भेलाय् व्यस्त जुगुलि कन्ह्यः जुइगु बैठकय् उपस्थित जुइ फइ मखु ।’ तर ७ चैतय् सःतूगु केन्द्रीय कमिटी बैठकय् वने फइ मखु धका नेपाल समूहया एमाले सचिव भट्टराई न धाःगु दु।

सर्वोच्च अदालतया आदेश कथं एमालेयात संगठन व विचारया रुपं २ जेठ २०७५ य् लिहा वःसा जक केन्द्रीय कमिटीया बैठकय् वनेयेगु धका धाःगु दु ।

सरकारं कोरोना भाइरसविरुद्धया खोप अभियान आःया लागि स्थगित याःगु दु ।

स्वास्थ्य मन्त्रालय अन्तर्गत इन्सिडेन्ट कमाण्ड सिस्टमया (आईसीएस) बैठकं खोप उपलब्ध मजू तलया लागि खोप अभियान स्थगित यायेगु निर्णय याःगु दु।

बुधवाः तक ५५ दँ स्वया अप्वोसिया नागरिकपिन्त खोप बिइगु ज्याझ्वः दुगु खःसा खोप उपलब्ध मजुतलया लागि स्थगित जूगु धका स्वास्थ्य मन्त्रालयया प्रवक्ता डाक्टर जागेश्वर गौतमं जानकारी बिःगु दु। स्वास्थ्य मन्त्रालयया नियमित प्रेस ब्रिफिङय् प्रवक्ता गौतमं खोप उपलब्ध जुइवं सूचं बिया हाकनं अभियान सुरु यायेगु धका धाःगु दु।

अग्रिम भुक्तानी याःगु खोप बच्छि जक वःगु व कोभ्याक्स सुविधाया खोप न लक्ष्य कथं मवःगु  नाप खोप वइगु सुनिश्चित मजूगुलि आःया लागि खोप अभियान स्थगित यायेगु निर्णयय् थ्यःगु धका स्वास्थ्य मन्त्रालयं धाःगु दु ।

प्रधानमन्त्री केपी शर्मा ओलीें नेकपा एमाले संसदीय दलया बैठक सःतूगु दु।

संसदीय दलया नेता हैसियतं प्रधानमन्त्री ओलीं बिहीवाः सुथय् ११ बजे प्रधानमन्त्री निवास बालुवाटारय् संसदीय दल बैठक सःतूगु दु धका एमाले नेता विशाल भट्टराई न जानकारी बिःगु दु ।

‘सूर्य चुनाव चि) ज्वना त्याःपि सकसित संसदीय दलया बैठकय् ब्वनागु दु ’ धका भट्टराई न धाःगु दु।

भट्टराईयात प्रधानमन्त्री ओलीं साविकया नेकपा संसदीय दलया नेता हैसियतं प्रमुख सचेतकयात जिम्मेवारी बिःगु दु ।

पूर्वमन्त्री नाप नेपाली कांग्रेसया नेता नवीन्द्रराज जोशीया अवस्था गम्भीर खनेदुगु दु।

मष्तिष्कघात जुया नर्भिक इन्टरनेशनल हस्पिटलय् उपचाररत जोशीया अवस्था गम्भीर दुगु व वयागु भेन्टिलेटरय् तया उपचार जुयाच्वंगु दु धका अस्पतालं धाःगु दु 

जोशीयात मष्तिष्कघात जुया वःगु फागुन १४ गते नर्भिकय् भर्ना जूगु खः ।

छु दिं उपचार लिपा वयागु अवस्था सुधार जुया वःगु खःसा लिपा हाकनं गम्भीर जुया वःगु धका अस्पतालं विज्ञप्तिपाखे जानकारी बिःगु दु ।

काभ्रेपलाञ्चोकया पाँचखाल नगरपालिकां अन च्वपि नागरिकयात मदिरा उत्पादन व सेवन यायेत अनुमति काये माःगु व्यवस्था याःगु दु ।

‘मदिरा नियमन तथा व्यवस्थापन ऐन २०७७’ कथं नागरपालिकां मदिरा उत्पादन व सेवन यायेत अनुमति काये माःगु व्यवस्था कार्यान्वयनय् हःगु दु । नगर दुने सदाचार, स्वास्थ्य, सुविधा व आर्थिक हित कायम तया सभ्य, शान्त व सकारात्मक लँय् समुदाययात न्ह्यने यकेत व घरेलु हिंसा न्यूनीकरणया लागि नगरपालिका दुने मदिरा उत्पादन, बिक्री वितरण व सेवन ज्याय् नियमन नाप व्यवस्थापन यायेगु लागि थःथे व्यवस्था लागू यायेत्यनागु दु धका नगरपालिकां धाःगु दु।

ऐन विपरित मदिरा सेवन याना समुदायय् होहल्ला, शान्ति भङ्ग जुइगु क्रियाकलाप नाप ल्वापू याइपिन्त न्हापागु पटकया लागि रु ५०० जरिवाना नाप उम्ह मनूखं पटक पटक अथेहे लिसा कया यातकि २० प्रतिशतया दरं जरिवाना याना वनिइगुे प्रावधान याःगु दु । मदिरा उत्पादन, बिक्री वितरण व सेवनया लागि अनुमति काये माःगु व मदिरा सेवनकर्तां वार्षिक शुल्क पुलां जक ‘सेवन कार्ड’ काये माःगु व्यवस्था नगरपालिकां याःगु दु।

उगु ऐनं १८ दँ स्वया कम जूपिन्त मदिरा बिक्री वितरण याये मदइगु व्यवस्था याःगु दु। छगु वडाय् छगु जक अय्ला पसः व न्यागु ओसारपसार मदिरा पसःयात जक अनुमति बिइगु ऐनय् उल्लेख दु । जाती विशेषया नखः चखः नाप परम्परा व संस्कृतिया इलय् नगरपालिका नाप पूर्वस्वीकृति कया क्वछिगु इलय्, थासय् व उगु ल्याखं अय्ला यके दइगु व्यवस्था ऐनय् दु ।

सेवनकर्तां नगरपालिकापाखे सेवन कार्ड काये माःगु व उगु वापत वार्षिक छक्वलं ५०० तका व नवीकरण नाप कार्डबापत ५०० तका बुझेयाये माःगु व्यवस्था दु। अतिथि कार्डबापत न्हि १०० तकां पुलेमाःगु व्यवस्था ऐनय् याःगु दु ।

अथेहे ऐन विपरित ज्या यागु ध्यवां २५ प्रतिशत सुरक्षा व्यवस्थापनय्, २५ प्रतिशत शिक्षा व स्वास्थ्य क्षेत्रय्, १५ प्रतिशत सुराकीयात, १५ प्रतिशत सूचना व २० प्रतिशत ध्यवा नगरपालिकाया सञ्चित कोषय् जम्मा यायेगु व्यवस्था याःगु दु धका नगरपालिकां धाःगु दु।