Display Style:
Column Style
४गू दशक लिपा फेवातालया ड्याम भिंकेज्या
पोहेलागा द्धादशी ११४१, माघ २६ सोमवाः
छुं ई न्ह्यःनिसें फेवातालया लः म्हो जुयावंगु बुखँ फेसबुक, युट्युब व मेमेगु सामाजिक सञ्जालय् यक्व हे वयाच्वंगु खः । उगु बुखं दक्व मनुत अजु चायाच्वंगु खनेदत ।
लः सुनावंगु वास्तविकता छु ले धकाः सुनानं मस्यूगु जुयाच्वन । कारण खः फेवातालया लः बाः मवंक पनातःगु ड्याम मर्मत सम्हारया नितिं जुयाच्वन ।
फेवातालया ड्याम वंगु ४गू दशकनिसें भिंकेज्या जुईमापूmगु ड्याम आः धासा थुकियात मर्मत सम्हार जुइगु जूगु दु । ताःई तक्क ड्यामया भिंकेज्या मजुबलय् ल पिहाँवनिगु यक्व हे अप्वयावंगु खः ।
ड्याम मर्मत यायेत तालया लः निगू मिटर म्हो याःगु खः ।
थ्वसिबेंन्ह्यः ड्यामयात छुं छुं टालटुल जक याःगु खः धाःसा आःवया बाँलाक्क हे ड्यामयात दयेके ज्या जुइगु जलश्रोत लिसें सिंचाई विकास डिभिजन कास्कीया मू इन्जिनियर किरण आचार्यं जानकारी वियादिल ।
वय्कया कथं २०३५ लिपा फेवाताया ड्याम मर्मत जूगु मदुनि । जोखिम अप्वःया वसेंलि ड्याम मर्मत यायेत्यनागू आचार्यं धयादिल ।
ड्याम मर्मत यायेत छगू क्वति तक मालिगु न धयादिल । तालया ल म्हो यायेबले डुंगा व्यवसायी त धाःसा लिच्वलय् लाःगु दु । न्हापांखुसी २०१७ सालय् दयेकूगु ड्याम २०१९ सालय् क्वचागु खः ।
वयांलिपा २०३१ सालय बाँध स्यंगु खः । २०३५ सालय् हाकनं बाँध दयेकेधुंका हाकनं पुलाँगू स्वरुप हे वःगु खः ।
किपू नगरपालिकाय् न्यायिक इजलास स्थापना
लहनान्युज | पोहेलागा द्धादशी ११४१, माघ २६ सोमवाः
किपू नगरपालिकाय् न्यायिक इजलास व मेलमिलाप केन्द्रया छगु ज्याझ्वः दथुइ किपू नगरपालिकाया मेयर रमेश महर्जनं उलेज्या यानादीगु खः।
संविधान ब्यवस्गा कथं स्थानीय तहय् न्यायिक इजलास स्थापना यायेगु अधिकार कथं किपू नगरपालिकाय् नं इजलास व केन्द्र स्थापना याःगु खः।किपू नगरपालिकाया उपमेयरया संयोजकत्वय् न्यायिक इजलास गठन जुयाः कार्य सम्पादन याना वयाच्वंगु खःसा आः उगु कक्ष स्थापना यायेवं थप प्रभावकारी जुइगु विश्वास याःगु दु ।
नगरवासीपिनिगु छुं कथंया मुद्दा मामिला नगरपालिकाय् दर्ता जुलकि उमिगु उजुरीयात दकलय् न्हापां मेलमिलाप केन्द्रं स्वयेगु याइ । केन्द्रं उकिया समाधान माले मफुतकि स्थानीय तहपाखें हे निकास बीगु ल्याखं न्यायिक इजलासय् यकिइगु खः। स्थानीयस्तरय् स्थापना जूगु थज्याःगु केन्द्र व इजलासं चिचिधंगु ल्वापु, मुद्दा मामिलायात स्थानीय तहपाखें हे ज्यंकेगु व च्वय्या अदालत तक वने म्वाःलेमा धइगु ल्याखं स्थापना याःगु खः । अदालत सरह हे मान्यता दुगु न्यायिक इजलासया संयोजकय् नगरपालिकाया उपप्रमुख व कार्यपालिकाया निर्णयकथं निम्ह दुजः दइ ।
मुद्दया पक्ष व विपक्ष निखेरं बहस यायेधुंकाः उपप्रमुखया इजलासं फैसला न्यंकेगु ज्या जुइ । यदि न्यायिक इजलासं याःगु फैसला थःपिंत चित्त बुझे मजूसां अनंलिपा जिल्ला, उच्च, पुनरावेदन, सर्वोच्च नं वने फइ ।
लुँ तोला निसः क्वहावल
शोभा श्रेष्ठ | पोहेलागा द्धादशी ११४१, माघ २६ सोमवाः
लुँ तोलां थौं निसः क्वहा वःगु दु।
तोला निसः क्वहा वया लुँया भाः थौंया लागि ९० हजार ४ सय रुपैयाँ कायम जूगु दु धका नेपाल सुनचाँदी व्यवसायी महासङ्घ धाःगु दु।
अथेहे महासङ्घं थौं वहः तोलां न्यातका थहावःगु दु धका धाःगु दु। आइतवाः १३१० रुपैयाँ कारोबार जुगु लुँ थौं वहः तोलाया १३१५ रुपैयाँ निर्धारण याःगु दु धका धाःगु दु।
निगूगु झ्वःया खोप अभियान न्ह्यात
पोहेलागा द्धादशी ११४१, माघ २६ सोमवाः
सरकारं थौंनिसें पत्रकार, युएन एजेन्सी, दूतावास लिसें कूटनीतिक नियोगया कर्मचारीयात कोरोना खोप बिइगु न्ह्याकेत्यंगु दु ।
भारत सरकारं अनुदानय् चूलाकुगु ‘कोभिशिल्ड’ खोप न्हापांगु झ्वलय् प्राथमिकताय् लाःपिं मनूयात बिइधुंका थौनिसें पत्रकार व कुटनीतिक नियोगया कर्मचारीयात खोप न्ह्याकूगु दु ।
११न्हूतक्क देय्यंकया थ्यंमथ्यं निसः केन्द्रपाखं छगू ८४द्वःम्हसिनं न्हापांगु मात्राया खोप तयेधुंका न्हापांगु झ्वया अभियान शनिवाः क्वचागु खः ।
न्हापांगु झ्वलय् स्वास्थ्यकर्मी लिसें कोरोनाभाइरस वासः यायेगु व व्यवस्थापनय् अग्रपङ्तिइ खटेजूपिन्त खोप बिउगु दु । थुगु झ्वलय् थ्यंमथ्यं ३गू लख मनूयात खोप बिइगु योजना दूगु मन्त्रालयं न्ह्यथंगु दु ।
निगूगु झ्व क्वचायेधुंका फागुनया निगूगु वालं निसें न्ह्याइगु धाःगु मेगु झ्वलं जक वैंश पुचःया मनूतयेत खोप बिइगु न्ह्याइ ।
थ्वहे दथुइ मन्त्रालयं खोपया नितिं तयार याःगु लक्षित पुचःया न्हापांगु झ्वया प्राथमिकताय् लाःपिन्त खोप मतसें प्राथमिकता हे मदूपिन्त खोप बिइगु न्ह्याकुगु धका कुँख्यना न्ह्यागु दु ।
मन्त्रालयं खोपया नितिं तयार याःगु लक्षित पुचःया न्हापांगु झ्वया प्राथमिकताय् पत्रकार व कूटनीतिक नियोगया कर्मचारी लाःगु मदु ।
लक्षित पुचःया प्राथमिकता कथं न्हापांगु् प्राथमिकताय् स्वास्थ्यकर्मी, सरसफाइकर्मी, एम्बुलेन्स लिसें शववाहन चालक, जेलया बन्दी व अन ज्या यानाच्वपिं सुरक्षाकर्मी, विमानस्थल व भन्सारया कर्मचारी, जेष्ठ नागरिकपिं व दीर्घल्वगियात तयातःगु खः । तर धलःखय् लाःपिं जेष्ठ नागरिक, दीर्घ ल्वगि लिसेंयापिन्सं खोप मकायेवं पत्रकार व कूटनीतिक नियोगया कर्मचारीयात बिइत्यंगु दु । थुगु निर्णययात जनस्वाथ्य विज्ञपिन्सं कुँख्यंगु दु ।
सक्व जेसिसया २१ क्वःगु पदस्थापना क्वचाल
किचः सिं | पोहेलागा द्धादशी ११४१, माघ २६ सोमवाः
सक्व जेसिजया २१ क्वःगु पदस्थापन व सिरपाः बीगु ज्याझ्वः क्वचाःगु दु । सक्व जेसिसया हरेक ज्याय् मदिक्क ग्वाहालि यानावःगु धासें प्रसन्न श्रेष्ठयात रबि अम्बे सिरपा ब्यूगु खःसा सक्व जेसिजया उत्कृष्ट सिरपाः चित्रकार कृष्ण गोपालयात लःल्हाःगु खः । धर्म नारायण गणेश माया सिरपाः जे सि राजेस श्रेष्ठयात बिल ।ज्याझ्वलय् २०२० या नायः सरोज कुँइकेलं २०२० या गतिविधि न्यंकुसें सक्व जेसिसया ज्याकू दय्केत शंखरापुर नगरपालिकाया मेयर सुबर्ण श्रेष्ठयात इनाप यानादिल ।
नेपाः देय्या थीथी लागाया थीथी थासं वःपिं जेसिज पदाधिकारी, सक्व जेसिसयात ग्वाहालि याःगु संघसंस्था, ब्यापारि, पत्रकारपिंत लिसें शंखरापुरया मेयर भाजु श्रेष्ठ, उपमेयर शुक्र लक्ष्मी श्रेष्ठ, सक्व प्रहरी प्रभागया प्रमुख जानुका खरेल, वडा नं ७ या नायः बिष्णु प्रसाद श्रेष्ठयात मतिनाया चिं नं लःल्हाःगु खः ।
ज्याझ्वलय् शंखरापुर नगरपालिकाया मेयर सुबर्ण श्रेष्ठ, उपमेयर शुक्रलक्ष्मी श्रेष्ठ, वडा नं ७ या वडाअध्यक्ष बिष्णु प्रसाद श्रेष्ठ, मातृसाखा येँ लेडि जेसिसया अध्यक्ष रिन्कु बज्राचार्य श्रेष्ठ व सक्व प्रहरी प्रभागया प्रमुख जानुका खरेलया उपस्थिती दुगु खः ।
