साल्ट ट्रेडिङं मंगलवाः निसे स्वनिगः दुने छगु दर्जन थासय् डेलिभरी भ्यानपाखे खाद्यान्न बिक्री याये त्यंगु दु।

स्वंगः डेलिभरी भ्यानपाखे येँ व ख्वपय् थौं मंगलवाः खाद्यान्न बिक्री यायेत्यंगु दु धका कम्पनीं धागु दु। उपभोक्तापिन्स फोन याना माग यागु आधाय् १२ गु त्वालय् भ्यानपाखे माइकिङ यासे खाद्यान्न बिक्री याइगु धका कर्पोरेसनया सूचना अधिकारी कुमार राजभण्डारीं जानकारी बिगु खः।

मंगलवाः खाद्यान्न ज्वना भ्यान सेगल, क्षेत्रपाटी, थहिटी, बाङ्गेमुडा, ठमेल व सञ्चयकोष भवन जःखः खाद्यान्न बिक्री याइ धका धागु दु। अथेहे मेगु भ्यानं सितापाइला, रामकोट, भीमढुंगा व काभ्रेस्थलीइ खाद्यान्न बिक्री याइ । अथेके मेगुे डेलिभरी भ्यान ठिमी, बालकोट, लोकन्थली, कौशलटार व गोलमढीइ खाद्यान्न बिक्री याइ।

छगः भ्यानय् करिब ५० निसे ६० छेँखाय् गाक्क दइ धका खाद्यान्न कर्पोरेसनं बिक्रीया लागि छ्वइगु धका राजभण्डारीं धागु दु। कर्पोरेसनं दाल, जाकी, चिं, चिनी, चिकं, मैदा, छूचू, बजि व मस्यौरा बिक्रीया लागि भ्यानय् छ्वयागु दु धका धागु दु । कर्पोरेसनं बिक्री याइगु एसटीसी ग्यास धासा डिलरपाखे कायेमा धका  कर्पोरेसनं धागु दु।

लुँ तोलाया ९४ हजार पाँच सय रुपैयाँ थ्यंगु दु।

थौं मंगलवाः लुँ तोलां स्वसः थहावंगु दु धका नेपाल सुनचाँदी व्यवसायी महासंघं धागु दु।

अथेहे थौं तेजावी लुँया भाः तोलां ९४ हजार रुपैयाँ कायम जुगु दु । सोमवाः तेजावी लुँया भाः ९३ हजार सात सय रुपैयाँ थ्यंगु दु।

थौं वहः तोलां झीतका थहावना १३७० रुपैयाँ थ्यंगु दु।

प्रधानन्यायाधीश चोलेन्द्र शमसेर जबरां संवैधानिक इजलासय् पुलापि हे न्यायाधीशपिन्त निरन्तरता बिगु दु।

न्यायाधीशपि बमकुमार श्रेष्ठ व तेजबहादुर केसीयात संवैधानिक इजलासय् मतयेत अधिवक्तापिन्स माग यासे मंगलवाः इजलासय् न्यायाधीशपि मह्यूगु खः। नेकपा विभाजन सम्बन्धी फैसला याम्ह न्यायाधीश श्रेष्ठ व पुनरावलोकनयो माग अस्वीकार याम्ह केसीयात इजलासय् तया थुकिइ निष्पक्ष फैसलाय् असर जुइ धका अधिवक्तापिन्स उमिगु विकल्प मालेत इनाप यागु खः।

थुगु विषय न्ह्यसः वगुलि शुक्रवा व आइतवाः सुनुवाइ प्रभावित जुगु खः। सर्वोच्च बारया प्रतिनिधिपिन्स थौं मंगलवाः प्रधानन्यायाधीश जबरायात नाप लाना इजलास पुनर्गठनया विषय सुझाव बिगु खः ।

प्रतिनिधिसभा विघटनविरुद्ध रिटय् सुनुवाइया लागि १४ जेठय् प्रधानन्यायाधीश चोलेन्द्र शमशेर जबराया नेतृत्वय् दीपककुमार कार्की, आनन्दमोहन भट्टराई, तेजबहादुर केसी व बमकुमार श्रेष्ठपिनिगु संवैधानिक इजलास गठन यागु खः।

प्रधानन्यायाधीश चोलेन्द्र शमसेर जबरानाप सर्वोच्च बारया प्रतिनिधिपन्स भेटवार्ता यागु दु। संवैधानिक इजलास पुनर्गठनया सुझाव बिइत सर्वोच्च बारया प्रतिनिधिपि प्रधानन्यायाधीश जबरायात नाप लागु खः।

सर्वोच्च अदालत बार एशोसिएसनया अध्यक्ष पूर्णमान शाक्यं थौं सुथय् ११ बजे प्रधानन्यायाधीश जबरायात नापलागु खः । संसद विघटनविरुद्धया मुद्दा स्वइम्ह प्रधानन्यायाधीश जबरां थःगु नेतृत्वय् न्याम्ह सदस्यीय संवैधानिक इजलास गठन यागु खः। तर न्यायाधीशपिनिगु वरिष्ठताया मिचे याना इजलास गठन यागुलि उकिया पुनर्गठनया माग यागु खः।

इजलासय् एमाले व माओवादीया एकता रद्द यायेगु आदेश बिउम्ह बमकुमार श्रेष्ठ व उगु आदेश पुनरावलोकन जुइ मखुगु फैसला याम्ह तेजबहादुर केसीयात तगुलि कानुन व्यवसायीपिन्स विरोध यागु खः। रिटय् बहस ययोगु झ्वलय् कानुन व्यवसायीपिन्स श्रेष्ठ व केसीयात इजलासपाखे हटे यायेत मागुलि प्रधानन्यायाधीश जबरा उकिया अस्वीकार यागु खः।

 विश्व स्वास्थ्य संगठनं हलियक थीथी देशय् पिहावंगु कोरोना भाइरसया न्हुगु भेरियन्टयात बिस्क बिस्क हे नां बिगु दु।

विश्व स्वास्थ्य संगठनं बेलायतय् पिहावंगु  भेरियन्टयात ‘अल्फा’, ब्राजिलय् खनेदुगु भेरियन्टयात ‘गामा’, दक्षिण अफ्रिकाय खनेदुगु भेरियन्टयात ‘बेटा’, भारतय् खनेदुगु भेरियन्ट B.1.617.2) यात ‘डेल्टा’ नां बिगु दु।

भारतय् मेगु भेरियन्ट (B.1.617.1) यात ‘कप्पा’ नां बिगु दु। भारतय् पिहावंगु ( B.1.617.2)) व ( B.1.617.1) भेरियन्ट नेपालय् पुष्टि जुगु खः। अथेहे नेपालय् खनेदुगु भेरियन्टयात न डेल्टा व कप्पा धायेमाः धका शुक्रराज ट्रपिकल तथा सरुवा रोग अस्पतालया निर्देशकं धागु दु।

तसक संक्रामक माने यानातःगु भारतय् पिहावंगु ‘डेल्टा’ भेरियन्ट हलियक ५० गु स्वया अप्वो देशय् फैलै जुइ धुकुगु दु। थ्व स्या न्ह्यः गन देशय् पिहावंगु, उगु देशया नामं भेरियन्टयात म्हसिका वयाच्वंगु खः। भारतं ‘भारतीय भेरियन्ट’ धागुलि आपत्ती न यागु खः। भारतया सन्चार मन्त्रालयं ‘भारतीय भेरियन्ट’ च्वंगु दक्को पोष्ट हटे यायेत सामाजिक सन्जाल कम्पनीयात निर्देशन हे बिगु दु।