ग्रिनलाइफ हाइड्रोपावरया प्रारम्भिक सार्वजनिक निष्कासन (आईपीओ) थौंनिसे बिक्री जुगु दु । ग्रिनलाइफ हाइड्रोपावरं प्रतिकित्ता १०० रुपैयाँ अंकित मुल्यया ३४ करोड ९६ लाख ४० हजार रुपैयाँ बराबरया ३४ लाख ९६ हजार ४०० कित्ता आईपीओ निष्कासन याःगु दु । ग्रिनलाइफ हाइड्रोपावरं थ्व स्वयान्ह्यः आयोजना प्रभावित स्थानीयया लागि निष्कासन याःगु १८ लाख कित्ता मध्ये बिक्री मजुगु १६ लाख ९६ हजार ४०० कित्ता सहित कुल ३४ लाख ९६ हजार ४०० कित्ता सेयर सर्वसाधारणया लागि बिक्री खुला याःगु खः ।

उकि मध्ये ५ प्रतिशत अर्थात् १ लाख ७४ हजार ८२० कित्ता सेयर सामुहिक लगानीकोष व २ प्रतिशत अर्थात ६९ हजार ९२८ कित्ता कर्मचारीयात सुरक्षित याःगु दु । बाँकी दुगु ३२ लाख ५१ हजार ६५२ कित्ता सेयर सर्वसाधारणपिन्स आवेदन बिइ फइ । कम्पनीं नेपाल धितोपत्र बोर्डपाखे जारी पुँजी १ अर्ब ८० करोड रुपैयाँ २० प्रतिशत अर्थात् ३६ लाख कित्ता आईपीओ निष्कासन यायेगु अनुमति दुगु खः । उकि मध्ये १८ लाख कित्ता आयोजना प्रभावित स्थानीय व १८ लाख कित्ता सर्वसाधराणया लागि छुटे यागुलि आयोजना प्रभावित जुगु थासय् खरिद मजुगुलि व नाप ३४ लाख ९६ हजार ४०० कित्ता यआईपीओ सर्वसाधारणपिन्त बिक्री सुरु याये त्यःगु खः ।

कम्पनीया आईपीओ याकन माघ २७ गते तक व उगु इलय् माग जुगु कथं आवेदन मवसा लिबाक्क फागुन ७ गते तक आवेदन बिइ फइ । थुगु कम्पनीं दोलखा जिल्लाया खानीखोला, हनापु खोला व नाप्के खोलाया लखय् ४० मेगावाट क्षमताया खानिखोला १ जलविद्युत आयोजना निर्माण याःगु खः ।

कम्पनीं आईपीओ निष्कासन तथा बिक्री प्रबन्धकया निति बि.ओ.के. क्पापिटल मार्केट याःगु दु।  सर्वसाधारणयात ग्रिनलाइफ हाइड्रोपावरय् ३२ लाख ५१ हजार ६५२ कित्ताया लागि आवेदन बिइ फइइ । धितोपत्र निष्कासन तथा बाँडफाँड नियमावली कथं दक्को आवेदकपिन्त थइकथं १० कित्ता मखुसा गोलाप्रथापाखे गुलि थः उलियात १० कित्ता दरं बाँडफाड याये मालिइगु खनेदु ।

येँया तारकेश्वर नगरपालिका बाहेक मेगु थासय् बर्ड फ्लूया सङ्क्रमण खने मदुगु धका पशुसेवा विभागं धाःगु दु।

थ्व स्वया न्ह्यः माघ १६ गते तारकेश्वरय् बर्ड फ्लू सङ्क्रमण खने दुगु खःसा अन झण्डै २५ सय पक्षी नष्ट याःगु खः । आःतक सङ्क्रमण खने दुगु थासय् सिल याःगु दु धका विभागं दैनिक निरीक्षण याना च्वनागु दु धका पशुसेवा विभागया प्रवक्तां धाःगु दु । सङ्क्रमण खने दयेवं अन न्हि न्हि विज्ञपिनिगु टोलीं अनुगमन याना वयाच्वंगु दु ।

नियमित रुपं अनुगमन यायेगु, शङ्कास्पद नमुना परीक्षण यायेगु व अध्ययन यायेगु ज्या जुया च्वंगु दु । सङ्क्रमण खनेदुगु फार्मय् ४२ दिं तक खा तये दये दइ मखु धका प्रवक्ता धयादीसे पीडित व्यवसायीपिन्स सरकारं २२ लाख रुपैयाँ राहत कथं बिइत्यःगु दु । पशुसेवा विभागं विज्ञ केन्द्र व नगरपालिकाय् सङ्क्रमण मजुइकेत सहकार्य याना च्वनागु दु धका धाःगु दु ।

थौं सुथय् हे मौसमय् ह्यूपाः वःगु दु । पश्चिमी न्यून चापीय प्रणाली प्रभावया कारण मौसमय् ह्यूपाः वःगु दु धका मौसम पूर्वानुमान महाशाखां धाःगु दु ।

आःतक सुदूर पश्चिम, कर्णाली, गण्डकी व लुम्बिनी प्रदेशय् सामान्य व बागमती प्रदेशय् आंशिक बदली जुइ धुकुगु दु। महाशाखाया कथं थौं सुथय् हे पश्चिम नेपालय् गन गन वाः वयेगु सुरु जुइ धुकुगु दु  उच्च हिमाली क्षेत्रय् हिमपात जुइगु अनुमान याःगु दु ।

थौं न्हिनय् व चान्ह्य सुदूर पश्चिम, कर्णाली, गण्डकी प्रदेश, लुम्बिनी प्रदेशया यक्को थासय् व प्रदेश १ नाप बागमती प्रदेशया गन गन थाय् हल्का वाः वइ।

आइतवाः तक मौसम खुले जुइग्ु महाशाखाया पूर्वानुमान दु ।

सत्तारुढ नेपाल कम्युनिस्ट पार्टी (नेकपा) केपी ओली समूह न थौं शक्ति प्रदर्शन यायेत्यःगु दु ।

थ्व स्वया न्ह्यः प्रचण्ड–माधव समूह न येँया शक्ति प्रदर्शन यायेवं ओली समूह न थौं प्रदर्शन नाप नारायणहिटी न्ह्यने आमसभा याये त्यःगु खः। थ्व समूह न शक्ति प्रदर्शनया लागि थीथी जिल्लापाखे कार्यकर्ता येँ क्वत हयेत्यःगु खः। थौं याःगु सभाय् स्वगू ३ लाख कार्यकर्ता क्वत हयेगु धका दाबी ओली समूहया नेतापिन्स याःगु दु ।

सभायात कामचलाउ सरकारया प्रधानमन्त्री केपी शर्मा ओली लगायत मन्त्री व नेतापिन्स सम्बोधन यायेगु ज्याझ्वः दु । ज्याझ्वलय् प्रचारया लागि युवा संगठनं म्हिगः बिहीवाः बहनि मार्चपास याःगु खः । येँ जम्मा जूपि कार्यकर्तापिन्स थीथी १३ थासय् प्रदर्शन नाप पिहावयेत्यःगु खः । वया लिपा मध्याह्न १२ बजे नारायणहिटीइ थ्यका आमसभा यायेत्यःगु दु।

प्रधानमन्त्रीया सिफारिसय् राषट्रपति विद्या भण्डारीं संसद विघटन यायेव नेकपा निगु टुक्रा जुगु खः ।  वया लिपा निगु समूह न सतकय् प्रदर्शन व भेलाय् तीव्रता बिःगु खः।