वाङ्गमय शताब्दिपुरुष सत्यमोहन जोशीया छेँय् निर्माण जुयाच्वंगु सत्यमोहन लोकसाहित्य भवनया निर्माण ज्या क्वचायेत्यंगु अवस्थाय् थ्यंगु दु ।

उगु भवनया निर्माणया नितिं आर्थिक ग्वाहालि हलिं नेवाः दबू (वर्ल्ड नेवाः अर्गनाइजेशन)या कुतलं संकलन जूगु न्यागू लख व चयेप्यद्वःतका दांया चेक थौं छगु ज्याझ्वःया दथुइ लःल्हायेगु ज्या जुगु दु । शताब्दी पुरुष लोक साहित्य परिषदया संरक्षक सत्यमोहन जोशीया उपस्थितिइ हलिं नेवाः दबू नेपाः च्याप्टरपाखें थौं उगु आर्थिक ग्वाहालिया दां लःल्हागु खः।

थ्व स्वया न्ह्यः न दबूपाखें झिंप्यंगु लख तका दां लःल्हायेधुंकुगु खः । था जुगु ज्याझ्वलय् नेपाः च्याप्टरया अध्यक्ष शाक्य सुरेन, कोषाधक्ष्य सुरेन्द्रभक्त श्रेष्ठ, सह कोषाधक्ष्य सुदय शिलाकारया नापं नेपाः च्याप्टरया सचिवालय दुजःपिं रमेश मुनिकार व अन्जना ताम्राकारपिनिगु न उपस्थिति दूगु खःसा हलिं नेवाः दबूपाखें चेक लोक साहित्य परिषदया दांभरी वासुदेव श्रेष्ठं लःल्हानाः कयादीगु खः । परिषदपाखें तुलसीलाल सिंहं सुभाय् न्वचू तयादिसे दबूया ग्वाहालियात प्रशंसा यानादिलसा शताब्दी पुरुष सत्यमोहन जोशीं थ्व निर्माण जुयाच्वंगु लोक साहित्य भवन नेपाः सकतां कथंया लोक साहित्यया अध्ययन व अनुसन्धान याइपिनिगु निंतिं ग्वाहालि जुइगु भलसा दु धकाः धयादिल ।

थुगु भवन निर्माणया नितिं दबूया केन्द्रिय अधक्ष्य सिजन श्रेष्ठं क्वसायेकाः दीगु नुगःया नं भाजु जोशीं तारीफ यानादिल । ज्याझ्वलय् समाजसेवी भाषासेवी विजय अवालेपाखें न्ययेद्वः तका दां नं आर्थिक ग्वाहालि यानादीगु खः ।

मस्तयसं इन्टरनेट छ्यलीगु अप्वयावगुलिसें अनलाइन माध्मयं मचातयगु यौनशोषण नं अप्वयावःगु छगू अध्ययनं क्यंगु दु । मचातय् हक, अधिकारया ख्यलय् ज्या यानावःगु संस्था सिविनं ९दँनिसें १९दँ तक्क १७सः व १४ म्ह मचात व किशोर किशोरी दथुइ याःगु अध्ययनं अनलाइनय् नग्न किपा, अडियो लिसें भिडियो दयेका छ्वयेगु व क्यामरा न्ह्यःने मस्तयसं दबाब फयाच्वंगु खनेदुगु धाःगु दु ।

सिविनं थौं येँय् छगू ज्याझ्वः यासें प्रेमी, प्रेमिका, सतीपिं पासपिं व गुलिखे म्हमस्यूपिं मनूतयगुपाखें नं मचात अनलाइन यौन शोषणय् लानाच्वंगु तथ्य सार्वजनिक याःगु खः । सामाजिक संजालया साइटत, इमेल, अज्ञात लिंक व फोन आदिया माध्यमं थुकथंया यौन प्रेरित सामग्री छ्वयेगु यानाच्वंगु खनेदुगु सिविनं न्ह्यथन ।

ज्याझ्वलय् नेपाल प्रहरी साइवर ब्यूरोया प्रमुख प्रहरी नायव महानिरिक्षक विकास श्रेष्ठं थुकथंया अवस्थाय् अभिभावकत उतिकं हे जिम्मेवार दुगु धयादिल । अभिभावकतय्सं बजारय् वइगु न्हून्हूगु ग्याजेट मस्तयत न्यानाबीगु तर चाइल्ड मोड, सेफ नेट थेंजाःगु सावधानि तक नं मछ्यःगु धयादिल ।

अनलाइन यौन शोषणयात नियन्त्रण यायेत यायेत २२गू जिल्लाय् साइवर ब्यूरों ज्या यानाच्वंगु धयादिल ।

एन्टेना फाउण्डेशन नेपालया कार्यकारी निर्देशक विजयशेखर गुरागाईं नं संचार क्षेत्र नं मस्तय्गु बुखँ सम्प्रेषणय् उदासिन खनेदुगु धयादिल ।

बलात्कार, हत्या थज्याःगु ज्याखँ जूसा जक संचारक्षेत्रय् प्रेसित जुइगु गुरागाईंया धापू खः । मस्तयगु विषयवस्तुइ रिपोर्टिङ यायेबलय् तसकं संवेदनशिल जुइमाःगु छ्याता वयकलं बियादिल ।

सिविनया कार्यकारी निर्देशक सुम्निमा तुलाधरं अनलाइन यौन शोषणया हुनिं मस्त स्कूल तकं मवनीगु, परिवारलिसे खँ ल्हायेत नं ग्याइगु लिसें डिप्रेशनय्तकं वनेफइगु धयादिल ।

ज्याझ्वलय् थःगु अध्ययन प्रतिवेदन सार्वजनिक यासें सिविनं अनलाइन यौन शोषणया सामना याःपिं ३४० म्हमध्ये २३३ म्हेसिनं जक थःगु परिवार, पासा व पुलिसयात थःत जूगु अनलाइन यौन शोषणया बारे कनेफुगु जानकारी बिल ।

अनलाइन माध्यमं न्ह्याइगु यौनशोषणया झ्वलय् लिपा अनलाइनय् जक सिमित मजुसे मस्तय्त शारिरीक यौन शोषण तकं जुयाच्वंगु नं उगु अध्ययनं क्यंगु दु ।

नेपालय् इन्टरनेटया प्रयोगकर्तामध्ये ३५ प्रतिशत मचात दुगु खनेदुगु सिविनं धाःगु दु । नेपालय् इन्टरनेट छ्यलीपिं २ करोड ८८ लाख ७ द्वः मध्ये १ करोड २१ लाख मस्त दुगु सिविनं धाल । कोरोना महामारीया हुनिं जूगु लकडाउनं इन्टरनेट अले सामाजिक संजालया प्रयोगकर्तात अझ अप्वःगु खनेदु । 

राष्ट्रिय युवा संघ (केपी ओली समूह)या अध्यक्षय् बचनबहादुर सिंह ल्यःगु दु।

तत्कालीन एमाले व माओवादी एकीकरण लिपा गठन जुगु राष्ट्रिय युवा संघया संयोजक रामप्रसाद सापकोटा ‘दीपशिखा’ प्रचण्ड–माधव पक्षय् वगुलि वयात हटे याना ओली पक्षं सिंहयात अध्यक्षय् ल्यःगु खः।

अध्यक्ष पदय् सिंह व रमेश पौडेलया दाबेदार दुगु खः। युवा संघ इञ्चार्ज महेश बस्नेतं सिंहयात अध्यक्षया लागि प्रस्ताव यायेवं केन्द्रीय समिति बैठकं उगु पारित याःगु खः। अथेहे सहअध्यक्षया जिम्मेवारी किरण पौडेल यात बिःगु दु । अथेहे रमेश आचार्य महासचिवय् ल्यःगु दु।

उपाध्यक्षय् सन्तोष रावल, रविन थापा, क्षितिज थेबे, अञ्जना अधिकारी, उर्मिला सुनुवार, नृपेन्द्र महत, सञ्जीव झा, रोशन बस्नेत, अमित लामा, गजेन्द्र शाही, अशोक चौलागाईं, किरण गौतम व सुमन पुरी च्वनादीगु दु । उपमहासचिवय् रामजी सापकोटा व रमेश तिवारी ल्यःगु खः।

कोषाध्यक्षया जिम्मेवारी मुकेश बुढाथोकीयात बिःगु दु । राकेश लामा व हिमेश केसी सहकोषाध्यक्ष ल्यःगु दु।

पुल्चोकय् बुंगः द्यःया रथ सालेयेगु झ्वलय् ज्वपि सकसिगु मुद्दा थौं क्वचाःगु दु। जिल्ला प्रशासन कार्यालय ललितपुरं पुल्चोक घटनाय् ज्वपि २४ म्हसिया विरुद्ध अभद्र व्यवहार अन्तर्गत मुद्दा चले याःगु खः ।

रिहा जूपि महेश बज्राचार्य, पृथविन्दु महर्जन, यादवलाल कायस्थ, ध्रुवराज बज्रचार्य, श्याम था, रवि शाक्य, असोज महर्जन, रविन शाक्य, सुविन शाक्यपि खः । प्रमुख जिल्ला अधिकारी ढुण्डीप्रसाद निरौलाया बयान आधारय् उमित कसुरया मात्रा स्वया न्यूनतम सजाय यासे त्वतेगु फैसला याःगु खः ।

राष्ट्रप ्रमुख उपस्थित जूया सम्पन्न याइगु बुंगः द्यःया रथ सालेयेगु बारेय् सरकारं अनिर्णयया बन्दी दयेकूगुली उमिस वःगु भदौ १८ य् स्वतःस्फुर्त रुपं रथ साःगु खः। झडप लिपा क्षमापूजा यासे भदौ २१ य् रथ तया पुल्चोकपाखे सोह्रखुट्टे फल्चाःतक साःगु खः। भदौ २६ य् बुंगः द्यःयात खटय् तया बुङमतीइ यकूगु खः ।

वःगु २४ घण्टाया दुने नेपालय् १३० म्हेसित कोरोना संक्रमितपि थपे जुगु दु ।

स्वास्थ्य तथा जनसंख्या मन्त्रालयया कथं सोमवाः न्हुपि थपे जुपि नाप याना आःतक संक्रमितपि नेपालय् २ लाख ७२ हजार ५५ म्ह थ्यःगु दु।

अथेहे, २४ घण्टाय् कोरोनामुक्त जूपि १९४ म्ह थ्यःगु दु । थ्व नाप आतक नेपालय् कोरोनामुक्त जूपि २ लाख ६८ हजार २६६ म्ह थ्यःगु दु ।

सोमवाः कोरोनाया कारण थप ७ म्हेसिगु ज्यान वगु दु । थ्व नाप आःतक नेपालय् कोरोनां सीपि २ हजार ४५ म्ह थ्यःगु दु ।