नेपालय् कोरोना संक्रमणं सीपिनिगु ल्याः न्याद्धः थ्यंगु दु ।

वंगु २४ घण्टाय् कोरोना संक्रमणं १४५ म्हेसिगु ज्यान वंगु खः। थ्व नाप नेपालय् कोरोना संक्रमणं सीपि न्याद्धः थ्यंगु खः।

कोरोना भाइरस संक्रमणया निक्वःगु लहरय् सीपिनिगु ल्याः न अप्वोगु दु। आःतक हे दकलय् अप्वो छन्हु हे २२५म्ह सीगु खः।

वैशाख २६ गते ८८ म्ह, वैशाख २७ गते १३९म्ह, वैशाख २८ गते २२५ म्ह, वैशाख २९ गते १६८ म्ह, वैशाख ३० गते २१४ म्ह, वैशाख ३१ गते २०३ म्ह, जेठ १ गते १८७ म्ह व जेठ २ गते १४५ म्ह सीगु खः ।

नेपाल आयल निगमं थौंनिसे हाकनं  पेट्रोलियम पदार्थया भाः थकागु दु।

म्हिगः चान्ह्यनिसे लागू जुइकथं निगमं पेट्रोल, डिजल÷मचिकं व हवाई इन्धन (आन्तरिक उडान) य् लिटरय् नितकाया दरं थकागु खः।

आः पेट्रोल  छगु लिटरया १२३,  डिजल÷मचिकं छगु लिटरया १०६ व हवाई इन्धन लिटरया ७८ तका थ्यंगु दु।

येँ महानगरपालिकाय् थौंनिसे जिल्लाय् न्यक कोविड १९ विरुद्धया चिनियाँ खोप भेरो सेल निगुगु मात्रा लगे यायेगु सुरु जुगु दु ।

येँ महानगरं ३२ गु खोप केन्दपाखे ०७७ चैत २५, २६, २७ व २८ गते न्हापागु खोप कापिन्त निगुगुे डोज लगे यायेगु सुरु जुगु दु । थौं महानगरया प्रमुख विद्यासुन्दर शाक्य व उपप्रमुख हरिप्रभा खड्गी श्रेष्ठ, प्रमुख प्रशासकीय अधिकृत राजेश्वर ज्ञवाली नाप जनस्वास्थ्य विभागया अधिकारीपिन्स थीथी खोप केन्द्र वना व्यवस्थापनकीय पक्ष व सेवा अवस्थाय अवलोकन यानादीगु दु ।

अवलोकन लिपा अवस्थाया बारेय् जानकारी कयादीसे प्रमुख शाक्यं धयादीगु दु, ‘खोप केन्द्रयात व्यवस्थित यायेगु कुतः यानागु दु । लाइन च्वनेगु इलय् भौतिक दुरी कायम यायेगु, छेँ न पिहा वयेत कार्ड ज्वना व मास्क लगे याना जक खोप केन्दय् वयेगु, भीड मयायेगु थे आधारभूत खँ सकसिया पालना याये । गन गन केन्द्रय् भचा अप्वो लाइन दु ।’ अवलोकनया भ्वलय् खनेदुगु ताहाकगु लाइन घटे यायेगु विषयय् ल्हानादीसे वयकलं धयादीगु दु, ‘तोके यागु इलय् सुथय् १० बजेनिसे ४ बजे तक थःत पायक जुगु खोप केन्द्रय् न्ह्या थासय् न यायेगु खोप लगे काय दइगु व्यवस्था दु ।

उकि खोप कायगु इलय्, भीड व हुलमुल मयायेत वयकल इनाप यागु दु । कन्ह्यनिसे खोप कायेगु निति वनिगु इलय्, खोप केन्दय् सुरक्षित व व्यवस्थित खयकेत ग्वाहालि याइ धका भलसा कयागु दु।’ धका प्रमुख शाक्यं धयादीगु दु । निरीक्षणया झ्वलय् वयकलं वडा ११ या विश्व निकेतन स्कूल, वडा ३२ या वडा कार्यालय, वडा ७ या गुह्येश्वरी विद्यालय, वडा १० या म्याक डोनाल्ड पार्टी प्यालेस लगायतया खोप केन्द्रय् झायादीगु खः। थुगु खोप ११ गते तक जुइ ।

थकिइ वंगु (०७७) चैत २५ गतेनिसे बैशाख १५ गते तक न्हापागु मात्रा १८ दँ दुपि निसे ५९ दँ दुपिन्त खोप बिगु खः ।

खोप लगे यायेत पालना याये मागु सर्त

खोप कायत वनिइगु इलय् पालना याये मागु छु नियम व सर्त खोप केन्द पिने टिकातःगु दु। ज्वरो वःपि वा कोविड संक्रमणया लक्षण खनेदुपि व संक्रमण जूपि मनू तयेस खोप काये मज्यू । कार्ड मदुपिन्त खोप बिइ मखु। खोप केन्द्रय् वनेगु इलय् अनिवार्य मास्क तयेमाः । खोप केन्द्रय् आपसी दुरी कम्ती न २ मिटर कायम याये माः।

कोरोना भाइरस संक्रमणया कारण वंगु २४ घण्टाय् १४५ म्हेसिगु ज्यान वंगु दु।

अथेहे ७ हजार ३६८ म्हेसित संक्रमण पुष्टि जुगु दु धका स्वास्थ्य तथा जनसंख्या मन्त्रालयं धागु दु ।

१९ हजार पाँच सय ३९ म्हेसिगु पीसीआर परीक्षणय् ७३१६ म्ह व ३४४ एन्टिजेन परीक्षणय् ५२ म्हेसित कोरोना संक्रमण पुष्टि जूगु दु।

मन्त्रालयया कथं देयन्यक सक्रिय संक्रमितपि एक लाख १० हजार १६३ म्ह दु।

उकि मध्ये सात हजार ८०८ म्ह संस्थागत आइसोलेसनय् व एक लाख दुई हजार ४५५ म्ह होम आइसोलेसनय् च्वना च्वंगु दु।

वंगु २४ घण्टाया दुने स्वनिगः दुने २६०९ म्हेसित कोरोना भाइरस संक्रमण पुष्टि जूगु दु।

स्वास्थ्य तथा जनसंख्या मन्त्रालयया कथं येँ जक १८८१म्हेसित कोरोना सक्रमित जुगु दु ।

अथेहे यलय् ४३६ म्ह व ख्वपय् २९२ म्ह याना स्वनिगः दुने २ ६०९ म्हेसित कोरोना भाइरस संक्रमण पुष्टि जूगु दु ।

अथेहे देयन्यकं ७३६८ म्हेसित संक्रमण पुष्टि जुगु खः ।