यल महानगरपालिका– १६ वडां अरनिको समाजलिसे जानाः न्ह्याकावःगु निःशुल्क स्वास्थ्य शिविरया झ्वलय् वंगु शनिबाः यलया बालिफलय् मचा, छ्यंगू व मिखा ल्वय् सम्वन्धि शिविर क्वचाःगु दु ।

शिविरपाखें ११४ म्हेसिनं थःगु स्वास्थ्य परिक्षण याकूगु समाजया महासचिव डा. सुशील प्रजापतिं कनादीगु दु । उपिं मध्ये ८ मस्त दुगु खः । ४४म्हेसिनं मिखा व ६०म्हेसिनं छ्यंगू ल्वय्या परिक्षण याकूगु नं प्रजापतिं कनादिल ।  स्वास्थ्य सेवाय् सकसिगु पहुँच अःपुक दय्क्गु व आर्थिकस्तर कमजोपिंथाय् तक्क स्वास्थ्य सेवा थ्यंकेगु आज्जुं अभियानया हे रुपं शिविरया ग्वसाः ग्वयागु वडाअध्यक्ष निर्मलरत्न शाक्यं धयादिल ।

वडाअध्यक्ष शाक्यया कथं शिविरपाखें १६ वडालिसें जःखःया वडाया मनूत तकं लाभान्वित जुयाच्वंगु दु । परीक्षण याकूपिंमध्ये आपाः धइथें कोरोना संक्रमणया जोखिमया हुनिं अस्पताल वनेमखंपिं वा मवंपिं ५० दँ पुलेधुंकूपिं मनूत दुगु खः । शिविरय् वासः नं सितिकं इंगु खः । यल महानगरपालिका १६ वडां वंगु माघ १७ गतेनिसें शनिबाः पतिकं निशुल्क स्वास्थ्य शिविर यानावःगु दु ।

शिविरया झ्वलय् वइगु शनिबाः नागबहालय् मिसा ल्वय् सम्बन्धी, फागुण १५ गते दौबहालय् प्वाः अले कलेजो सम्बन्धी, फागुण २२ गते मंगलबजारय् ज्येष्ठ नागरिकतय् लागिं नशा, युरोलोजी, मधुमेह व जनरल सम्बन्धी शिविर जुइ ।

भुखाचं क्षतिग्रस्त सिंहदरबारया पूर्व, उत्तर व दक्षिणी भागया पुनर्निर्माण क्वचाःगु दु। आन्तरिक साजसजावट तक क्वचावं प्रधानमन्त्री केपी शर्मा ओलीं थौं उलेज्या यायेगु तयारी दु ।

उलेज्या लिपा प्रधानमन्त्री तथा मन्त्रिपरिषदया कार्यालय सरे यायेगु तयारी धका राष्ट्रिय पुनःनिर्माण प्राधिकरणं धाःगु दु। सिंहदरबारया मूल भवनय् ७० महिना लिपा प्रधानमन्त्री व  मन्त्रिपरिषद् कार्यालय सरे जुइ त्यःगु खः । करीब खुदँ न्ह्यः भुखाय् ब्बया क्षतिग्रस्त जुगुलि ७२ वैशाख १२ गते लिपा प्रधानमन्त्री व मन्त्रिपरिषद् कार्यालय सिंहदरबार दुने हे स्थानीय विकास मन्त्रालयया भवनय् सरे जुगु खः।

सिंहदरबारया स्वगु भाग प्रबलीकरणया लागि फागुन मसान्त तक ई तया तःगु खःसा न्हापागु वाः दुने हे क्वचाय्कूगु खः । िसंहदरबार राणा प्रधानमन्त्री चन्द्रशम्शेर जबराया पालाय् निर्माण जुगु खः। 

चःमति नेवाः खलःया ग्वसालय् छगु लसता तुच्चा ज्याझ्वः नाप चःमति ज्याथ क्यबः  नां या म्येचाया उलेज्या जूगु दु ।

खलःया नायः नाप कलाकार पूर्णकाजी ज्यापुया च्वसां पिदंगु चःमति ज्या क्यब नांया म्येचाया मू पाहाँ येँ महानगरपालिकाया मेयर विद्यासुन्दर शाक्यं व विशेष पाहाँ शहरी विकास राज्यमन्त्री रामबीर मानन्धरपिन्स पितब्वज्या यानादीगु खः । उगु ज्याझ्वलय् मूपाहाँ मेयर शाक्यं येँ महानगरपालिकाया विकास थःपिं मेयर जुइधुंका छसी कथं जुया च्वंगु दु धका धयादिसे लानिपुखु, कमलपूखु लगायतया महानगरपालिकां संरक्षण व जिर्णोद्धार यायेत स्वबले छथ्व मनूतसें विरोधया सः थ्वयेकुगुयात कुंखिना दिगु दु। विशेष पाहाँ मन्त्री मानन्धरं थःम्हेसिनं संगीतख्यःया नांया विश्व रेकर्ड दयेके खँगुलिं लसता प्वंकादिगु खः ।

अथेहे सिनेपत्रकार विजयरत्न असंबरें संगीतकःमि कलाकार पूर्णकाजि ज्यापुया कारणं चःमति त्वाःया नां सगीत व संकिपा ख्यलय् नं थ्वया वःगु खँ उल्लेख यानादीगु खः । ज्याझ्वलय् वहालवाला मन्त्रीपाखें म्येहाला विश्व रेकर्ड तायेत तालानादीम्ह शहरी विकास राज्य मन्त्री रामबीर मानन्धरयात ग्वसाः खलःपाखें मूपाहाँ मेयर शाक्यं हनापौ लःल्हानादीगु खः ।

ग्वसाः खलःया कजि ज्यापुया सभाधक्ष्यताय् जुगु उगु ज्याझ्वलय् खलःया छ्यान्जे राजेन्द्र महर्जनं लसकुस न्वचु तयादीगु खःसा नांजाम्ह म्येहालामि जुजुकाजी रन्जितं पितब्वज्या जूगु म्येचाया समीक्षा याना दिल । थीथी साँगितिक व साँस्कृतिक न्ह्यब्वया नं न्ह्यब्वःगु उगु ज्याझ्वलय् म्येहालामिपिं सतिश महर्जन, कल्पना श्रेष्ठ व पूर्णकाजी ज्यापु लगायतं म्येहाला न्यंकादीगु खःसा नेपाः डान्स एकेडेमीपाखें थीथी हुलाप्याखँ नं न्ह्यब्वःगु खः ।