सरकारं घ्यः चाकू सल्हू कुन्हु सार्वजनिक बिदा बिइगु जुग दु। राष्ट्रिय सभाय् आइतवाः सम्बोधनया झ्वलय् प्रधानमन्त्री केपी शर्मा ओलीं माघी पर्वया लसताय् सरकारं माघ १ गते बिदा बिइगु निर्णय यानागु जानकारी बिःगु दु।

माघीया दिं राष्ट्रिय उत्सवया रुपय् हनिइगु जुगुलि सार्वजनिक बिदा बिइगु निर्णय यानागु खः धक धाःगु खः।

थ्व बिदा थारु जातीया लागि जक मखु, मेगु जातीपिन्स न हना वयाच्वंगु खः। जनताया भावना,आस्थायात कदर यासे बिदा बिइगु निर्णय यानागु खः धका प्रम ओलीं धयादीगु खः। 

यलया कर्मनासा खुसिइ याःगु जग्गा हाउजिङया नामय् दर्ता याःगु द्धपनय् अख्तियार दुरुपयोग अनुसन्धान आयोगं १८ म्हेसित भ्रष्टाचार मुद्दा दायर याःगु दु।

अख्तियारं उमित निगु दुई करोड निगु लाख रुपैयाँया दरं जरिवाना माग दाबी याःगु दु। अख्तियारं नापी कार्यालय यलया प्रमुख बुद्धिमान जैसी, नापी अधिकृत बालेश्वर यादव, सर्वेक्षक केशव थापा मगर, मालपोत कार्यालयया प्रमुख बाबुराम खनाल, नासुपि ख्याम नारायण पौडेल, दिनेश न्यौपाने व खरिदार आत्माराम लुइँटेलयात भ्रष्टाचार मुद्दा तःगु दु ।

अथेहे युरो हाउजिङ प्राली, यूरो ल्याण्ड डेभलपर्स प्रालीया सञ्चालकपि गुणीकाजी मानन्धर, योगेश्वर कृष्ण पराजुली, कृष्ण पराजुली, कृष्णराज श्रेष्ठ, टंक बहादुर श्रेष्ठ, गोपालदास मानन्धर, बविन मानन्धर व उज्जल मानन्धरयात भ्रष्टाचार मुद्दा न्ह्याकुगु खः ।

अख्तियारं काठमाडौं अस्पताल प्रालीया सञ्चालकपि डा. ईश्वरलाल आचार्य व डा. दुर्गामान जोशी नाप मय्जु श्रीमती दुर्गेश नन्दिनी भट्टचनयात न भ्रष्टाचारया आरोप मुद्दा न्ह्याकूगु दु। कर्मनासा खुसिइ व वया जःखः सार्वजनिक जग्गायात मिलेयाना हाउजिङया नामय् दर्ता याःगु आरोप उमित ज्वःगु खः। अख्तियारया दाबी कथं, उगु जग्गा २०२२ सालया नापीइ सार्वजनिक धका च्वयातःगु खः। मिचे याःगु जग्गा करिब ८ रोपनी १२ आना दु।

अख्तियारं सार्वजनिक जग्गा पटक पटक न्यायेगु मिइगु याना च्वपि ३३ म्हेसित न मुद्दा दायर याःगु दु। 

वःगु २४ घण्टाया दुने थप २५९ म्हेसित कोरोना संक्रमण पुष्टि जुगु दु धका स्वास्थ्य तथा जनसंख्या मन्त्रालयं धाःगु दु।

थ्व नाप आःतक नेपालय् २ लाख ६४ हजार ७८० म्हेसित संक्रमित जुइ धुकुगु दु। अथेहे वःगु २४ घण्टाय् ५१३ म्ह कोरोना संक्रमण मुक्त जुया छेँय् लिहावःगु दु। थ्व नाप आःतक २ लाख ५८ हजार ४४१ म्ह थ्यःगु दु ।

देयन्यक सक्रिय संक्रमितपि ४ हजार ४४२ म्ह दु। मन्त्रालयया कथं आःतक पीसीआर विधिपाखे १९ लाख ८२ हजार २४६ म्हेसित परीक्षण याये धुकुगु दु ।

अथेहे वःगु २४ घण्टाया दुने कोरोना संक्रमणं न्याम्ह मन्त । थ्व नाप आःतक कोरोना संक्रमणं सीपि १ हजार ९१७ म्ह थ्यःगु दु।

मध्यपुर थिमिइ निगः मोटरसाइकल थवंथवय् न्यानाः जूगु दुर्घटनाय छम्ह सीगु दु ।

गठ्ठाघरय् प्रदेश ३–०२–०४ प ७३२४ नम्बरया मोटरसाइकल व बा.५३ प ९८६४ नम्बरया थवंथवय् न्याःबलय् छम्ह सीगु खः ।

दुर्घटनाय् प्रदेश ३–०२–०४ प ७३२४ नम्बरया मोटरसाइकल चालक ख्वपय् च्वनाच्वंम्ह उदयपुरया २२ दँया मनराज राईया मदुगु खः । 

दुर्घटनाय् घाःपाः जूम्ह राईयात वासः यायेत केएमसी अस्पताल सिनामंगल यंकूगु खःसा वासः यायेगु झ्वलय् अन हे वयकः मदुगु खः ।

दुर्घटनाय् घाःपाः जूम्ह छम्हेसित व हे अस्पतालय् वासः यानाच्वंगु दु ।

मोटरसाइकल व चालकयात प्रहरीं नियन्त्रणय् काःगु दु ।

नागरिक समाजया न्ह्यलुवा डा. देवेन्द्रराज पाण्डे व कृष्ण पहाडीें संसद विघटन गैरराजनीतिक, गैरसवैधानिक, जनआकांक्षा विरोधी पला खः धका धयादीगु दु। थुकिइ प्रतिगमनया हे अंश तक खने दुगु धका धाःगु दु ।

डा. पाण्डे व पहाडीं आइतवाः मंका कथं वक्तव्य जारी यासे, ‘अमुक पार्टीया आन्तरिक ल्वापुर्इ  सम्बोधन याइगु स्वेच्छाचारी तवरं याःगु प्रतिनिधिसभा विघटन गैरराजनीतिक, गैरसंवैधानिक, जनआकांक्षा विरोधी व देय्या हित विपरीत खः । प्रतिगमनया हे अंश तक खनेदुगु थुगु ज्या अमान्य खः।’ धाःसे, ‘थ्व गलत पलाः सचे यायेमाःगु धाःसे प्रतिनिधिसभा पुनः सुचारु जुइगु व्यवस्था यायेत आहृवान याःगु दु।’

नाप  उमिसं थःपि लोकतान्त्रिक मूल्य मान्यताया धरोहर दाबी याइपि प्रमुख प्रतिपक्ष नेपाली काँग्रेसया सभापति शेरबहादुर देउवाया सदाबहार ढुलमुलया चरित्र थप च्यूताःया बिषय जुगु उल्लेख याःगु दु। भविष्यय् थ ज्याःगु गल्ति मयायेत प्रतिबद्धता सहित सुशासनया प्रत्याभूति ययोगु व सक्षम, सवल लोकतान्त्रिक प्रणालीें विकास व देय्या सर्वाङ्गीण उन्नतिया लागि मार्गचित्र तय यायेगु प्रतिनिधिसभा दुने व पिने राजनीतिक शक्ति व नागरिक समाज छप्व जुइत उमिसं आह्वान याःगु खः।