रुपन्देहीइ छम्ह कोरोना संक्रमितं आत्महत्या यागु दु ।

सैनामैना नगरपालिका–१ वनकट्टाया नगरपालिकाय् सञ्चालन जुयाच्वगु कोरोना अस्थायी अस्पतालय् भर्ना जुम्ह सैनामैना रानिबगियाया ४० दँ दुम्ह मिजम्ह शनिबार सुथय् चःबि आत्महत्या यागु दु।

वैशाख १६ गते कोरोना पोजेटिभ खनेदुगुलि उकुन्हु हे अस्पताल भर्ना जुगु खः।

वयागु स्वास्थ्य अवस्था सामान्य दु सा शनिबार सुथय् ४ बजे चःबि वनेगु बहाना याना झुण्डे जुया आत्महत्या यागु धका अस्पतालया स्वास्थ्यकर्मी दीपक पाण्डें जानकारी बिगु दु ।

वीरगञ्जय् यागु परीक्षणय् १९३ म्हेसित कोरोना संक्रमण पुष्टि जुगु दु ।

नारायणी अस्पतालय् पीसीआर प्रयोगशालाय् २८० म्हेसित शुक्रबार यागु परीक्षण १९३ म्हेसित संक्रमण खनेदुगु धका नारायणी अस्पतालं धागु दु 

पुष्टि जुपि संक्रमितपि मध्ये ५७ म्ह मिसापि खः । पर्साय् १५१म्ह, बाराय् ३०म्ह, रौतहटय् प्यम्ह, सर्लाहीइ स्वम्ह, चितवनय् निम्ह, धनुषा, बर्दिया व नवलपरासीइ छम्ह छम्हेसित संक्रमण पुष्टि जुगु दु ।

रुपन्देहीया बुटवलय् च्वंगु कोरोना विशेष अस्पतालय् थप निम्ह संक्रमित सीउगु दु ।

सीपि नवलपरासी व रुपन्देहीया छम्ह मिजं व छम्ह मिसा खः।

वंगु वैशाख १७ गते संक्रमण पुष्टि जुया अस्पताल भर्ना जुम्ह नवलपरासी रामग्राम–१० या ४५ दँ दुम्ह मिसाम्ह थौं शनिवाः सुथय् ४ बजे मदुगु धका अस्पतालया प्रवक्ता डा. विष्णु गौतमं धागु दु ।

अथेहे, रुपन्देही शुद्धोधन गाउँपालिका–५ या ५५ दँ दुम्ह मिजम्ह ५ बजे जुया४५ मिनेटय् मदुगु धका गौतमं जानकारी बिगु दु ।

थौं अन्तर्राष्ट्रिय श्रमिक दिवसया लसताय् नेपालय् थीथी ज्याझ्वःयासे हने त्यःगु दु।

अथेहे राष्ट्रपति विद्यादेवी भण्डारीं अन्तर्राष्ट्रिय श्रमिक दिवस (मे १) या लसताय् स्वदेश व विदेशय् च्वपि सकल नेपाःमि श्रमजीवीपिन्त सुख, शान्ति व समृद्धिया भिंतुना देछनादीगु दु।

थुगु दिवसं श्रमिक अधिकारया रक्षार्थ दक्को श्रमजीवीपिन्त छप्प छधीइ यायेगुलि ग्वाहालि याइगु भलसा कयादीगु द।

महामारीविरुद्ध अग्रपंक्ति च्वना ज्यायाइपि श्रमिकपिनिगु सुरक्षा नाप प्रोत्साहनया लागि मागु व्यवस्था यायेत व रोजगारी गुमे यापि श्रमिकपिनिगु जीविकोपार्जनया लागि मागु प्रबन्ध मिले यायेत राष्ट्रपतिं सम्बद्ध पक्षया ध्यान आकर्षण यानादीगु दु। 

नेपाल कम्युनिष्ट पाटीया महासचिव नेत्रविक्रम चन्दया दाजु चन्द्रबहादुर चन्द वीरजंग थुनामुक्त जुगु दु।

जिल्ला कारागार, चितवनय् च्वना च्वम्ह जिल्ला अदालत, नवलपरासी न धरौटी बुझे याना छुटे यागु दु। चन्दयात जिल्ला अदालत नवलपरासीं २२ भदौ २०७७ य् २५ हजार रुपैयाँ धरौटी त्वत्येत आदेश बिगु खः ।

तर, धरौटी बुझे मयासे जेलय् च्वना च्वंगु खः । स्वास्थ्यय् समस्या वयवं उपचारया लागि चितवन यकूगु दु । चन्द्रबहादुर ज्व न्ह्यः पार्टीया मध्यकमाण्ड इञ्चार्ज जुयादीगु खः। बिहीवाः धरौटी बुझे याना जिल्ला कारागार, संखुवासभापाखे नेता माइला लामा थुनामुक्त जुगु खः ।

विप्लवं निक्वतक प्रधानमन्त्री केपी शर्मा ओलीनाप भेटवार्ता याना नेता, कार्यकर्ता रिहाइया प्रक्रिया याकन टुंग्यं यायेत इनाप यागु खः।

विप्लवया दाजु वीरजंग रिहा जुइवं महासचिव विप्लव, प्रवक्ता खड्गबहादुर विश्वकर्मा प्रकाण्ड, सचिवालय सदस्य धर्मेन्द्र बाँस्तोला लगायतया केन्द्रीय नेतापिन्स लसकुस यानादीगु खः ।