नेपाःया बरिष्ठ संगीतकःमि गोल्डेन भ्वाईस अफ नेपाल प्रेमध्वज प्रधान अस्पताल भर्ना जूगु धका बरिष्ठ संगीतकःमि योगेश वैद्यं थःगु फेसबुक पेजपाखें जानकारी बियादीगु दु ।

बरिष्ठ संगीतकःमि वैद्यं धयादीगु दु, बरिष्ठ गायक नाप संगीतकःमि प्रेमध्वज प्रधानजु कोभिड १९ पाखें संक्रमित जुयादीगु आशंकाय् तत्काल माःगु वासः यायेगु नितिं काठमाडौं न्यूरो व जनरल अस्पतालय् भर्ना जुयादीगु दु ।

वय्कःया शीघ्रातिशीघ्र स्वास्थ्य लाभया नितिं प्रार्थना यानाच्वना धका बैद्यं थःगु फेसबुक पेजपाखें कामना यानादीगु दु ।

स्वनिगः दुने छ झण्डै स्वद्धःसित कोरोना भाइरस संक्रमण पुष्टि जुगु दु ।

थौं येँ जक २४०४म्हेसित कोरोना पुष्टि जुगु दु ।

अथेहे यलय् ४१९ म्ह व ख्वपय् १३३ म्ह याना २९५६ म्ह संक्रमण पुष्टि जुगु दु धका स्वास्थ्य तथा जनसंख्या मन्त्रालयं धागु दु ।

वंगु २४ घण्टाया दुने थप ५,७२७ म्हेसित कोरोना भाइरस संक्रमण पुष्टि जुगु दु ।

स्वास्थ्य तथा जनसंख्या मन्त्रालयया कथं १५ हजार ३९१ म्हेसिगु पीसीआर परीक्षणय् ५,६५७ म्ह व ५२५ म्हेसित एन्टिजेन परीक्षणय् ७० म्ह याना ५७२७ म्हेसित संक्रमण पुष्टि जुगु दु ।

आःतक नेपालय् कोरोना भाइरस सक्रिय संक्रमितपि ३८ हजार ८१३ म्ह थ्यंगु दु ।

कोरोना भाइरस संक्रमणपाखे थप ३३ म्ह सी धुकुगु दु ।

खानेपानी तथा सरसफाइ मन्त्री मणिचन्द्र थापायात कोभिड–१९ या सङ्क्रमण जुगु दु ।

वयकःयात पीसीआर परीक्षण यागु इलय् थौं शुक्रवाः सुथय् सङ्क्रमण पुष्टि जुगु दु धका वयकःया स्वकीय सचिव राजेन्द्र गौतमं जानकारी बिगु दु ।

मन्त्री थापाया म्ह्याय् उष्णता श्रेष्ठ थापायात न सङ्क्रमण जुगु खःसा थौं वयकःयात बिहीवाः स्वाब सङ्कलन यागु खः। वयकःया म्ह्याय् प्यन्हु जक सङ्क्रमण जुगु खः ।

मन्त्री नाप झीम्ह सचिवालय ज्यायाइपिन्त पीसीआर परीक्षण यागुलि सुयात न सङ्क्रमण खने मदुगु खः ।

सङ्क्रमण पुष्टि जुइवं मन्त्री थापा आः यलय् मन्त्री निवास पुल्चोकय् आराम याना च्वंगु धका स्वकीय सचिवं जानकारी बिगु दु ।