Display Style:
Column Style
स्वनिगलय् ४४२ म्ह कोरोना सक्रमित
शोभा श्रेष्ठ | कछलागा सप्तमी ११४१, मंसिर २२ सोमवाः
वःगु २४ घण्टाया दुने स्वनिगलय् ४४२ म्हेसित कोरोना संक्रमित जुगु दु धका स्वास्थ्य तथा जनसंख्या मन्त्रालयं धाःगु दु।
थौं सोमवाः संक्रमित पुष्टि जुपि मिसापि १८८ म्ह व मिजंपि २५४ म्ह खः।
थौं येँ जक ३४४ म्हेसित पुष्टि जुगु दु धका मन्त्रालयं धाःगु दु ।
अथेहे ख्वपय् ३१ म्ह व यलय् ६७ म्हेसित कोरोना संक्रमित पुष्टि जुगु दु धका मन्त्रालयं धाःगु दु ।
थौ देयन्यक संक्रमित पुष्टि जुपि १ हजार १४ म्ह दु।
लुँ तोलां सच्छि क्वहा वल
लहानान्युज | कछलागा सप्तमी ११४१, मंसिर २२ सोमवाः
लुँया भाः थौ सच्छि क्वहा वःगु दु ।
थौं लुँ तोलाया ९२ हजार ६ सय रुपैयाँ कारोबार जुगु दु धका नेपाल सुनचाँदी व्यवसायी महासंघं धाःगु दु।
अथेहे वहः तोलाय् न्यातका कुुहा वःगु दु। वहलय् न्यातका कुहा वया १२०५ रुपैयाँ कायम जुगु दु धका महासंघं धाःगु दु।
न्हूदँ राष्ट्रिय समारोह समिति पदाधिकारिपाखे शंखधरपार्क अवलोकन
नृपेन्द्रलाल श्रेष्ठ | कछलागा सप्तमी ११४१, मंसिर २२ सोमवाः
नेपाल संवत् न्हूदँ राष्ट्रिय समारोह समितिया पदाधिकारीपिन्स मध्यपुर थिमिइ निर्माण जुयाच्वंगु शंखधर सामुदायिक भवनया अवलोकन याःगु दु ।
समारोह समितिया अधक्ष्य रमेश महर्जनं नेपाल संवतया प्रवर्तक राष्ट्रिय विभूति शंखधर साख्वाःया नामं चायेकातःगु राष्ट्रिय विभूति शंखधर साख्वाः प्रतिष्ठान, सामुदायिक भवनलिसें शंखधर पार्कया नं अवलोकन याःगु दु ।
मध्यपुर थिमि नगरपालिकाया मेयर मदनसुन्दर श्रेष्ठं शंखधर पार्क नाप थीथी थाय्या मौलिकता ल्यकेगु कथं विकास निर्माणया ज्या जुयावया च्वंगु दु धका धयादीगु खः। उगु ज्याझ्वलय्
प्रतिष्ठानया निवर्तमान अधक्ष श्यामकृष्ण मानन्धर, उपाधक्ष्य ज्ञानराम श्रेष्ठ नाप समारोह समितिया सल्लाहकार पुलांम्ह राज्यमन्त्रीपि तीर्थराम डंगोल व दिलीप महर्जनपिनिगु नं ब्बति दुगु खः।
प्रतिष्ठानया नायः चन्दनकृष्ण श्रेष्ठं समारोह समितिं प्रतिष्ठानया अवलोकन याःगु खँय् लसता प्वंकादीगु खः ।
अनलाइन डिसनरीया येँ महानगरया मेयरपाखे बिमोचन
नृपेन्द्रलाल श्रेष्ठ | कछलागा सप्तमी ११४१, मंसिर २२ सोमवाः
हलि नेवाः दबुया ग्वसालय् नेपालभाषायाःगु अनलाइन डिसनरि फेसबुक लाइभ ज्याझ्वःयासे बिमोचन जुगु दु ।
फेसबुक लाइभपाखे येँ महानगरपालिकाया मेयर बिद्यासुन्दर शाक्य उगु अनलाइन डिसनरिया बिमोचन यानादीगु खः। अमेरिकाय् च्वम्ह दिपेश शाक्य आःतक ५०७ शब्द दु थ्याका तयाःगु दु धका धयादिसे लिपा हाकन मेमेगु शब्द तनायकेगु जुइ धका धयादीगु खः।
येँ महानगरया मेयर शाक्य न्हापा हलि नेवाः दबूया तँमुज्याय् ग्वाहालि यानागु आः सहकार्य याना वनेत थः तयार दुगु । दबुया मेमेगु ज्याझ्वल् सहकार्य याना वनेत थः तयार दु धका धयादीगु खः।
दबुया नायः सिजन श्रेष्ठ दबुया कुतल थुगु डिसनरि पिकानःगु धका धयादीसे येँ महानगरपालिका थःगु महानगर दुने छगु निसे च्याःगु तःगि तक नेपालभाषा ब्बकेगु निर्णययात दबुपाखे लसकुसयासे मेमेगु स्थानीय सरकार न थुगु पलाः न्ह्याकि धयागु भलसा कयादीगु खः।
ज्याझ्वः रश्मीला प्रजापति न्ह्याकादीगु उगु ज्याझ्वलय् हलि यकं च्वपि नेवाः तयेगु ब्बति दुगु खः।
रामशेखर लुमन्ति सिरपाः महेन्द्रगोपाल कर्माचार्ययात लल्हात
लहानान्युज | कछलागा सप्तमी ११४१, मंसिर २२ सोमवाः
रामशेखर लुमन्ति दबूया ग्वसालय् ‘रामशेखर लुमन्ति सिरपाः’ ज्याझ्वः जुगु दु ।
छगु ज्याझ्वः दथुइ मूपाहाँ तिलक प्रकाश कायस्थं साहित्यकार महेन्द्र गोपाल कर्माचार्ययात नगद नापं हनापौ बिया हनेज्या याःगु दु।
उगु सिरपाया लागि ११३९ य् पिदंगु दबुलिइ झीगु कृति मध्ये च्वमि कर्माचार्यया ‘इलं न्यंगु न्ह्यसः’ दकलय् च्वछाये बहःजूगु ल्यज्या पुचःया दुजः मल्ल के सुन्दर व पूर्ण काजि ताम्राकारं धयादिगु खः।
