Display Style:
Column Style
लुँ तोलां निसः क्वहावल
शोभा श्रेष्ठ | कछलागा षष्ठी ११४१, मंसिर २१ आइतवाः
लुँया भाः थौं निसः तका क्वहा वःगु दु।
थौं लुँ छगु तोलाया ९२ हजार ७ सय रुपैयाँ कायम जुुगु दु धका नेपाल सुन चाँदी व्यवसायी महासङ्घं धाःगु दु।
वःगु वाः दुने लुँ तोलां २२ सय तक थहावःगु खः। अन्तर्राष्ट्रिय बजारय् लुँया भाः थहा क्वहा वःगुलि थुकिया प्रभाव नेपालय् न लागु दु धका महासङ्घं धाःगु खः।
वहः धाःसा थौ स्थिर जुग दु। शुक्रबार थे वहः थौं छगु तोलाया १२१० रुपैयाँ हे कारोबार जुगु दु।
किलागःया ह्याःगु किसिया देगः पुननिर्माण क्वचाल
लहानान्युज | कछलागा षष्ठी ११४१, मंसिर २१ आइतवाः
येँ महानगरपालिका १८ वडाय् च्व्ंगु किलागःया ह्याउँम्ह किसि निगु तल्लाया देगः पुन निर्माण क्वचाःगु दु ।
उगु ज्याझ्वलय् येँ महानगरपालिकाया मेयर विद्या सुन्दर शाक्यं छगु ज्याझ्वः दथुइ ह्याउँम्ह किसिया देगः यलेज्या यानादीगु खः। देगः उलेज्या यायेगु झ्वलय् ह्याउँम्ह किसियात लं छ्यानादीगु खः।
मेयर शाक्यं येँ महानगरय् गुलि न दुगु मूर्त व अमूर्त सम्पदायात पुननिर्माण यायेगु ज्या जुयावया च्वगु दु धका धयादीसे ल्यःदनीगु देगः, फल्चा द्यःछेँ, सतः दयेकेगु लागि येँ महानगर तयार दु थुकिया लागिु सकसिगु ग्वाहाली माः धका धयादीगु खः।
उगु देगः जिर्णाद्धारय् विशेष योगदान बियादीपि निम्ह नाति महर्जन व सुरेन्द्रमान श्रेष्ठयात न मेयर शाक्य दोसल्ला न्ययेका हनापौ लल्हान सम्मान यानादीगु खः ।
ह्याउम्ह किसि संरक्षण खलःया अध्यक्ष गोपाल कृष्ण महर्जनया सभाधक्ष्याताय् जुुगु उगु ज्याझ्वलय् १८ वडा अध्यक्ष ना येँ नगरपालिकाया सम्पदा व पर्यटन समितिया संयोजक न्हूच्छेकाजी महर्जन नं थःगु नुँगः खँ तयादीसे देगः दयेकेगु लागि १३ लाख ५० हजार खर्च जुगु धका धयादीसे खर्च जुगु फुकं वडाया कोषपाखे यानागु धका धयादीगु खः। थःगु वडाय् च्वंगु थीथी सम्पदा दयेकेगु झ्वलय् थुगु देगः न दयेकाःगु धका धयादीगु खः।
किपा नातिकाजी महर्जन
सम्पदा निर्माण–पुर्ननिर्माण महानगरया प्राथमिक योजनाः मेयर शाक्य
सुरेन्द्रभक्त श्रेष्ठ | कछलागा षष्ठी ११४१, मंसिर २१ आइतवाः
येँ महानगरपालिकाया मेयर विद्या सुन्दर शाक्यं संस्कृति व परम्परायात जगेर्ना यायेमाः धका धयादीसे येँ महानगरपालिकां दत्तचित्त जुया यायेगु जुइ धका धयादीगु दु। मेयर शाक्य सम्पदा संरक्षणयात महानगरपालिकां प्राथमिकताय् तया निर्माण–पुर्ननिर्माणया अभियान न्ह्यने वना च्वनागु दु धका धयादीगु खः ।
येँ महानगरया वडा २५ श्रीघगलय् धर्मकीर्ति विहारया विस्तारित भवनया शिलान्यास यासे अथे धयादीगु खः । ‘क्वाःपा, द्योःछेँ, बहाः, बही, सतः थे जाःगु सांस्कृतिक सम्पदाया निर्माण–पुर्ननिर्माणया अभियानय् महानगरपालिकां प्राथमिकताय्तया न्ह्यने वनाच्वनागु दु धका धयादीगु खः,’ मेयर शाक्य, ‘गुठी परम्परायात जीवन्त दयेकेत येँ महानगरपालिकां माःगु लगानी यासे न्ह्यने वनाच्वनागु दु ।’
वयकलं सम्पदा निर्माण यासे जनसमुदायया न अपनत्व जुइ कथं ज्या यायेत इनाप यानादीगु खः। ‘छिकपिन्स सम्पदा निर्माण–पुर्ननिर्माणया योजना ज्वना झाँस बजेटया अभाव मदु,’ धका धयादीसे, ‘सम्पदा निर्माण छम्हेसियाःगु कुतलं सम्भव जुइ मखु। सकसीगु ग्वाहालीया आवश्यक माः धका धयादीसे महानगरपालिका दुने सम्पदा निर्माणय् सकसीगु ग्वाहाली माःगु खँय् बः बियादील ।’
मेयर शाक्यं थःगु खँय् तयेगु झ्वलय् महानगरं थीथी थेरवादी व वज्रयानी विहारय् निर्माण यायेत माःगु ग्वाहाली याना वयाच्वनागु स्मरण यानादीगु खः । येँ नगर दुने बुद्ध विहारया मुल भवन, लुम्बिनीया वज्रयान महाविहार, जनबहाः द्यःया दिगीछेँ, स्वयम्भूया विहार, स्वयम्भया आनन्दकुटी विहार, किम्डोलय् आनन्दभुवन विहार, वानेश्वरय् अन्तर्राष्ट्रिय बौद्ध भावना केन्द्र निर्माण यायेत न ग्वाहालि यायनागु धका जानकारी बियादीगु खः।
उगु विहारया विस्तारित भवनया लागत ४ करोड २८ लाख रुपैयाँ खः । उकि मध्ये न्हापागु चरणय् करीब १ करोड लागतया ज्या जुइ । विस्तारित भवन निर्माण उपभोक्ता समितिया संयोृजक अभयरत्न कंसाकारं धयादीसे — ‘न्हापागु चरणय् माःगु कुल ९९ लाख ९९ हजार १६५ रुपैयाँया १५ प्रतिशत अर्थात् १४ लाख ९९ हजार ८७४ रुपैयाँ उपभोक्ता समितिं तइ। ल्यदनीगु ८५ प्रतिशत अर्थात् ८४ लाख ९९ हजार २९० रुपैयाँ महानगरं ग्वाहाली याइ ।’
नेपाः पार्टी न खोना व बालाजु सतक बिस्तारया बिरोध
लहानान्युज | कछलागा षष्ठी ११४१, मंसिर २१ आइतवाः
नेपाः राट्रिय पार्टीया अधक्ष्य डा. बिजय सैंजु न छगू प्रेस बक्तब्य बिउसे गैर न्यायीक कथं अतिक्रमण यानाः यल जिल्लाया खोकनाय् फास्त ट्रायक योजना नाप बालाजुइ सतक बिस्तारया बिरोध याःगु दु ।
अधक्ष्य डा. सैंजुं उगुु बक्तब्यय् खोकनावासी तय्गु फास्ट ट्रायक विरुद्ध प्रतिकार आन्दोलनयात नेपाः राष्ट्र्यि पार्टिपाखेँ समर्थन प्वंकाःगु खँ न्ह्यथंसें अथेहे बालाजु वाइपासय् सतक बिस्तारया लागि छेँ थुनेगु ज्या यानाच्वंगु खः उकियात कयाः नं बिरोध प्वंकुगु दु । उगु बक्तब्यय् तत्काल थज्यागु ज्या लित कायेत माग न याःगु दु ।
सतक विस्तारया विरुद्ध प्रदर्शन
लहानान्युज | कछलागा षष्ठी ११४१, मंसिर २१ आइतवाः
सतक विस्तारया नामय् नेवाः तय्गु छेँ बुँ अतिक्रमण यानाच्ंवगु धासें शनिवाः बालाजुइ बाइपासय् सरकार विरुद्ध प्रदर्शन जुगु दु ।
उपत्यकाव्यापी सतक विस्तार पीडित संघर्ष समितिया संयोजनय् व उपत्यका सतक विस्तार पीडित संघर्ष समिति बालाजु बाइसय् विरोध प्रदर्शन यासे छगु सभा न जुगु खः ।
प्रदर्शनकारीतय्सं सरकारया बिरुद्ध नाराबाजी न थ्यय् कुगु खः।
