वःगु २४ घण्टाया दुने देयन्यक ५९ म्हेसित कोरोना संक्रमण पुष्टि जुगु दु ।

२ हजार ७१५ म्हेसित नमुना परीक्षण यागुलि २५ म्ह मिसा व ३४ म्ह मिजंपिन्त कोरोना भाइरसया संक्रमण खनेलगु दु धका स्वास्थ्य तथा जनसंख्या मन्त्रालयं धाःगु दु ।

थ्व नाप नेपालय् कोरोना संक्रमितपि आःतक २ लाख ७४ हजार ८६९ म्ह थ्यःगु दु । उकि मध्ये मंगलवाः थप छम्ह सीगु दु । अथेहे ३ हजार १२ म्ह सी धुकुगु दु ।अथेहे वःगु २४ घण्टाय् ६० म्ह कोरोनामुक्त जुइ धुकुगु दु । थ्व नाप आःतक कोरोनामुक्त जुपि २ लाख ७० हजार ९८७ म्ह कोरोना संक्रमणमुक्त जुइ धुकुगु दु। आःतक देयन्यकसक्रिय संक्रमितपि ८७० म्ह दु धका मन्त्रालयं धाःगु दु । 

निर्वाचन आयोगं गोपाल किराती अध्यक्ष दुगु नेकपा माओवादी केन्द्र व सन्ध्या तिवारी अध्यक्ष दुगु नेकपा एमालेयात खारेज याःगु दु ।

साविकया नेकपा एमाले व नेकपा माओवादी केन्द्र दथुइ एकीकरणयात सर्वोच्च अदालतं मान्यता मबिगुलि पूर्वपार्टीया हे हैसियतमा कायम याना बिगुलि लिपा दर्ता जुगु किराती व तिवारीया पार्टीयार्त खारेज याना बिःगु खः।

मंगलवाः च्वंगु आयोगया बैठकं किरातीया पार्टीया नां व चुनाव चिं मदुगु धाःसे १५ दिं दुने न्हुगु पार्टीया न्हुगु नां व चुनाव चिं पेश यायेत इनाप याःगु दु ।

तिवारीयात धाःसा आयोगं पार्टीया नां पेश यायेत धाःगु दु व वयागु पार्टीया चुनाव चिं कायम याःगु दु ।

निर्वाचन आयोगं नेकपा एमाले व नेकपा माओवादी केन्द्रयात एकीकरण यायेगु खःसा १५ दिं दुने निवेदन बिइत इनाप याःगु दु ।

मंगलवाः च्वंगु आयोगया बैठकं थ्व स्वया न्ह्यः एकता जुगु पार्टी बदर जुगुलि हाकनं एकीकरण यायेगु खःसा दलया न्हुगु नां व चिंया प्रस्ताव यासे १५ दिं दुने निवेदन बिइत एमाले व माओवादी केन्द्रयात जानकारी यायेत निर्णय याःगु दु । थ्व स्वया न्ह्यः नेकपा एमाले व नेकपा माओवादी केन्द्र दथुइ एकता जुया बने जुगु न्हुगु पार्टीयात निर्वाचन आयोगं २०७५ जेठ २३ गते नेपाल कम्युनिस्ट पार्टी (ने क पा) नामय् दर्ता याःगु खः ।

तर सर्वोच्च अदालतं वःगु आइतवाः ने क पाया नामय् निर्वाचन आयोगय् न्हापा हे दर्ता दुगु पार्टी नाप मिले जुगुलि खारेज याना बिःगु खः। सर्वोच्चया फैसलाबारे सहलह यायेत च्वंगु आयोगया बैठकं आः एकीकरण यायेगु खःसा राजनीतिक दल सम्बन्धी ऐन, २०७३ व राजनीतिक दल सम्बन्धी नियमावली, २०७४ विपरीत मजुइगुलि निगु हे दलया थःथःगु केन्द्रीय समितिपाखे दल एकीकरण यायेगु निर्णय याना उगु निर्णय नाप न्हुगु दलया नां व चिंया प्रस्ताव याना १५ (झीन्यान्हु) दिं दुने आयोगय् निवेदन नाप उपस्थित जुइत  एमाले व माओवादी केन्द्रयात जानकारी बिइगु निर्णय याःगु दु।

मस्तिष्कघात जुया नर्भिक अस्पतालय् उपचार याना वयाच्वम्ह नेपाली कांग्रेसया नेता नविन्द्रराज जोशीयात शनिवाः निसे हाकनं भेन्टिलेटरय् तःगु दु ।

वःगु फागुन १३ गते निसे अस्पताल भर्ना जुयाच्वम्ह जोशी स्वास्थ्यय् क्रमिक सुधार जुया वःगुलि भेन्टिलेटरं लिकाःगु खः ।

तर शनिबार सुथय् हाकनं छक्वल सासः ल्ह्यायेगु समस्या वयेवं भेन्टिलेटरय् तया उपचार याना च्वनागु दु धका डा. राजीव झा न धाःगु दु ।

‘भेन्टिलेटर लिकाःगु २४ घण्टा लिपा हे छक्वल समास्या वःगु हाकन शनिवाः सुथय् हे समस्या वल,’ वयकलं धयादीगु दु, ‘आः ब्लड प्रेसर, हर्ट विट लगायत नर्मल हे खनेदु ।’ जोशी आःतक कोमाय् हे दु धका डा. झा न धाःगु दु ।

कक्षा १२ या परीक्षा जेठ २६ गतेनिसे जुइ त्यःगु दु । थौं मंगलवाः च्वंगु राष्ट्रिय परीक्षा बोर्डया बैठकं कक्षा १२ या परीक्षा जेठ २६ गतेनिसे यायेगु निर्णय जुगु दु धका बोर्डया अध्यक्ष प्रा.डा.चन्द्रमणि पौडेलं धाःगु दु ।

परीक्षा जेठ २६ निसे असार ४ गते तक जुइ । कोभिड–१९ महामारीया कारण सरकारं थुगु वर्षया शैक्षिक सत्र निला लिपा यकूगु खः।

जेठ मसान्त तक व न्हुगु शैक्षिक सत्र असारनिसे सुरु यायेगु निर्णय याये धुकुगु दु । थ्व स्वया न्ह्य वैशाखनिसे चैत तक शैक्षिक सत्र सञ्चालन जुयाच्वंगु खः ।

मन्त्रिपरिषदया बैठकं शिक्षा नियमावली संशोधन यासे निला शैक्षिक सत्र थप यायेगु अधिकार मन्त्रालययात बिःगु खः ।