Display Style:
Column Style
मंसिरं १ गते न्हुदँ हनेइगु
नृपेन्द्रलाल श्रेष्ठ | कौलागा पारु ११४०,कार्तिक १६ आइतवाः
थुगुसिइ ने.सं. ११४१ या न्हूदँ कछलाथ्व पारु मसिर १ गते हनेगु जूगु दु ।
नकतिनि हे जक नेपाल संबत् न्हूदँ राष्ट्रिय समारोह समिति ११४१ या ग्वसालय् नेवाः देय् दबूया संयोजनय् नेपाल भाषा मंका खलः येँ, नेपालभाषा मंका खलः यल, नेपाल संबत् न्हूदँ राष्ट्रिय समारोह समिति ११४१, राष्ट्रिय बिभुति शंखधर साख्वाः प्रतिष्ठान नेपाल, न्हूदँ समारोह समिति यलया मंका ग्वसालय् जूगु भर्चुअल मुँज्यां मंकाः इनाप कथं सकल नेपाःमिपिन्त इनाप यायेगु क्वःछ्यूगु दु ।
नेपाल संबत् न्हूदँ राष्ट्रिय समारोह समिति ११४१ या ग्वसालय् नायः रमेश महर्जनया नायोसुइ च्वंगु मुँज्याय् मंका ग्वसाः खलःया नायःपिं व प्रतिनिधिपिं नरेश ताम्रकार, रमेशमान पिया, ऋषि प्रसाद श्रेष्ठ, सुरेन्द्र बज्राचार्य, श्यामकृष्ण मानन्धरपिं लिसें नेवाः न्ह्यलुवापिं मल्ल के सुन्दर, डा. चुन्दा बज्राचार्य, डा. पुष्पराज राजकर्णिकार, नेवाः पत्रकार राष्ट्रिय दबूया नायः सुरजबीर बज्राचार्य, बरिष्ठ सञ्चारकःमि सुरेश किरणपिसं नुगः खँ तयादीगु खः ।
मंका अपिलय् नेपाल संबत् आन्दोलनया प्रवर्तक मदुम्ह पद्मरत्न तुलाधरया योगदानयात लुमंकुसें नेपाल संबत् उत्सब जक मखसे साँस्कृतिक आन्दोलन नं खः धासें राज्यं राष्ट्रिय संबत्या मान्यता बिइधुंका नं गनं सरकारी ज्याखँय् मछ्यलाच्वंगु खँय् आपति प्वंकिगु जूगु दु ।
मंकाः अपिलय् कोरोना महामारीया हुनिं न्हूदँया लसताय् देय्न्यंक तःजिक हनावयाच्वंगु साँस्कृतिक ¥याली व सभा समारोह भिडभाड मयासे हनेत नं इनाप याइगु जूगु दु व स्वन्तिया झ्वलय् तिथि मितिया गडबडिया खँयात नेवाःतय् साँस्कृतिक विबिधता कथं कायेगु व सुनां नं बिज्ञप्ति वा सूचं पिथनाः मेगु पुचःया तिथिमिति व तजिलजियात कुंमखिनेत नं इनाप याइगु जूगु दु।
न्हुदँया नारा पितबिल
नृपेन्द्रलाल श्रेष्ठ | कौलागा पारु ११४०,कार्तिक १६ आइतवाः
कोरोना महामारीया हुनिं नेपाःया मौलिक राष्ट्रिय सम्बत् नेपाल सम्बत् ११४१ न्हूदँया लसताय् समारोह समितिं थ्व दँया नारा ब्यूगु दु । थुगु नारा मंकाः नारा कथं पितब्यूगु खः ।
समारोह समितिं दँया नारा थुकथ दु “ न्हूदँया भिंतुना ।
न्हूदँ ११४१ कोरना मुक्त न्हूगु दँ जुइमा ।। ”
नेपाल संवत न्हूदँ राट्रिय समारोह समिति ११४१ ब्यबस्थापन समितिं ग्वसालय् थौं जुगु स्वनिगः न्यकंया न्हूदँ समारोह समितिया भर्चुल मुँज्या थथे नारा पारित याःगु खः ।
न्हूदँ राट्रिय समारोह समिति ११४१ या नायः रमेश महर्जनया सभापतित्वय् जुगु उगु ज्याझ्वलय् नेवाः न्ह्यलुवाः मल्लं के.सुन्दर लिसें थीथी संस्थाया प्रतिनिधिपिन्सं थःथःगु नुगः खँ तयादिगु जानकारी समारोह समितिंं ब्यूगु दु ।
समितिं ब्यूगु जानकारी कथं आः थुगु नारायात देय् न्यकं थ्यकेगु व सकस्यां थुगु नारा छ्यलेत इनाप नं यायेगु खँ धाःगु दु।
स्वास्थ्य मन्त्रालयं धरौटी मकास्ये वासः यायेत निर्देशन
लहानान्युज | कौलागा पारु ११४०,कार्तिक १६ आइतवाः
स्वास्थ्य तथा जनसंख्या मन्त्रालयं सरकारी अस्पतालय् धरौटी शुल्क मकायेत कोभिड १९ या बिरामीपिन्त वासः यायेत निर्देशन बिःगु खः।
आइतवाः मन्त्रालयं ग्वसाः ग्वगु कोरोना मिडिया ब्रिफिङय् मन्त्रालयया प्रवक्ता डा. जागेश्वर गौतमं धरौटी सम्बन्धी सूचं पिकागु अस्पतालयात स्पष्टिकरण न्यंगु दु।
डा.गौतमं फुपिन्त शुल्क कायेगु व मफुपिन्त निःशुल्क उपचार यायेगु निर्णय यथावत दुगु दाबी याःगु दु।
सरकारं कात्तिक २ गते निसे लागू जुइ कथं कोरोना उपचार व परीक्षणया लागि थःम्हेसिया हे शुल्क फुलेमाःगु निर्णय सार्वजनिक याःगु दु। थुगु निर्णय लिपा सरकारी अस्पतालं धरौटी शुल्क नाप सूचं प्रकाशित याःगु खः।
आर्थिक रुपं विपन्न, अशक्त व असहाय अवस्थाय् नागरिक, असहाय याक मिसा, अति अपांग जूपि नागरिक, जेष्ठ नागरिक, न्ह्यने खटे जूपि स्वास्थ्यकर्मी, सरसफाई कर्मचारी, सुरक्षाकर्मी लगायतयापिन्त जक सरकारं परीक्षण व उपचार यायेगु धका धाःगु दु।
देय् यकं २८२४ म्हेसित कोरोना संक्रमण पुष्टि
लहानान्युज | कौलागा पारु ११४०,कार्तिक १६ आइतवाः
देय् यकं थप २८२४ म्हेसित कोरोना संक्रमण पुष्टि जूगु धका स्वास्थ्य तथा जनसंख्या मन्त्रालयं धाःगु दु।
मन्त्रालयं थौं आइतवाः ग्वसाः ग्वगु कोरोना ब्रिफिङय् मन्त्रालयया प्रवक्ता डा जागेश्वर गौतमं वःगु २४ घण्टाय् २८२४ म्हेसित कोरोना संक्रमण खनेदुगु धका जानकारी बिःगु दु।
थ्व नाप देय् यकं सक्रिय संक्रमितपि ३७ हजार ७६५ म्ह थ्यःगु दु।
आःतक क्वारेन्टाइनय् २३८६ म्ह च्वना च्वंगु दु।
कोरोना २३ म्ह मन्त
लहानान्युज | कौलागा पारु ११४०,कार्तिक १६ आइतवाः
कोरोना संक्रमणं २४ घण्टाया दुने थप २३ म्ह सीगु दु।
स्वास्थ्य तथा जनसंख्या मन्त्रालयं थौं आइतवाः औपचारिक रुपं पुष्टि याःगु दु। आःतक कोरोना संक्रमणं सीपि ९६० म्ह थ्यःगु दु।
मन्त्रालयं २४ घण्टाय् ३६२० म्ह कोरोना संक्रमणपाखे डिस्चार्ज जूगु दु धका जानकारी बिःगु दु। थ्व नाप वासः याना छेँ वःपि १ लाख ३४ हजार ८४२ म्ह थ्यःगु दु। देय् यकं सक्रिय संक्रमितपि आःतक ३७ हजार ७६५ म्ह दु।
मन्त्रालयया कथं आःतक पीसीआर विधिपाखे १४ लाख ५६ हजार ३६६म्हेसित परीक्षण याये धुकुगु दु। २४ घण्टाय् जम्मा १३ हजार २३ म्हेसिगु पीसीआर परीक्षण याःगु दु।
