पत्रकारिताया माध्यमपाखे लोपोन्मुख संस्कृति, सम्पदा संरक्षण यायेगुलि नेवाः पत्रकार राष्ट्रिय दबू यल शाखाया महत्वपूर्ण भूमिका निर्वाह याःगु दु धका पत्रकार दबूया च्याक्वःगु साधारणसभाय् भिंतुना न्वचु बियादीपिन्स धयादीगु दु।

पत्रकार दबू यल शाखां यलय् जुगु च्याक्वःगु वार्षिक साधारण सभाया वक्तापिन्स संस्कृति सम्पदा संरक्षणयात अझ प्रभावकारी दयेकेगुलि पत्रकारपिन्स सांस्कृतिक संवेदनशीलता बारे अझ सचेतना अभियान याये माःगुलि बःबियादीगु दु। उगु सभाय् दबूया केन्द्रीय अध्यक्ष सुरजवीर बज्राचार्यं शाखां यलय् ठोस, सामाजिक सांस्कृतिक परिवेशय् लोपोन्मुख नवदुर्गा नाच गथु प्याखं व पायाः (खड्ग) जात्रा सञ्चालनया लागि याःगु कुतः व संयोजनकारी भूमिका निर्वाह यायगुलि च्वछायादीगु दु।

उगु ज्याझ्वलय् ताम्रकार समाजया अध्यक्ष रवीन्द्रराज ताम्रकारं यलय् जातीय समाज व पत्रकारपि छप्प जुया यलयात सांस्कृतिक नगरीया रुपं विकास याना न्ह्यने वनेमाःगुलि बः बियादीगु खः।

अथेहे दबूया वरिष्ठ उपाध्यक्ष नृपेन्द्रलाल श्रेष्ठं नेपाःया न्हापाम्ह मातृभाषा पत्रकार धर्मादित्य धर्माचार्यया योगदानयात जनजनय् थ्यकेत व मातृभाषाया पत्रकारिता विकासया लागि स्थानीय तह नाप मिले जुया ज्या याना वनेमाःगुलि बःबियादीगु दु । उपाध्यक्ष रचना श्रेष्ठ मिसा पत्रकारपिनिगु ल्याः अप्वोके माः धका धयादीगु दु ।

अथेहे उगु ज्याझ्वलय् केन्द्रीय महासचिव सुनील महर्जनं स्थानीय तह जनप्रतिनिधिविहीन जुगु इलय् स्थानीय सरोकारया विषय प्रहरी प्रशासन नाप  स्थानीय निकाय ध्यानाकृष्ट यायेत शाखां निर्वाह याःगु भूमिकाया चर्चा यानादीगु खः। सभाय् कोषाध्यक्ष सुरेन्द्रभक्त श्रेष्ठं पत्रकारपि बिरामी व दीर्घ रोग जुपिन्त आर्थिक सहयोगया लागि दयेकाःगु अक्षयकोष रकम १५ लाख थपे याना ५० लाख रुपैयाँ थ्यकेयेगु प्रतिबद्धता क्यनादीगु खः । उगु ज्याझ्वलय् सचिव विकास मालीं प्रगति प्रतिवेदन व कोेषाध्यक्ष सुनील बज्रचार्यं आर्थिक प्रतिवेदन प्रस्तुत यानादीगु खः ।

मदुम्ह अग्रज पत्रकार विक्रम शाक्यया लुमन्ति छगु मिनेट मौन धारण यासे शुरु यागु उगु सभाय शाखाया अध्यक्ष सागर महर्जन, उपाध्यक्ष प्रशान्त माली व सहसचिव मञ्जु बज्राचार्य लगायत पिन्स प्रेस नाप अभिव्यक्ति स्वतन्त्रताया रक्षा यायेमाःगु धाःसे पत्रकारितायात आवाजविहीनया आवाज दयेकेत शाखां वःगु च्यादंनिसे निर्वाह याःगु भूमिकाया बारे चर्चा यानादीगु खः । 

वःगु २४ घण्टाया दुने देयन्यक ९७ म्ह कोरोना भाइरस (कोभिड–१९) संक्रमण पुष्टि जूगु दु।

४ हजार ४८४ म्हेसिगु नमुना परीक्षण यागुलि ९७ म्ह कोरोना भाइरसया संक्रमण खनेदुगु धका स्वास्थ्य तथा जनसंख्या मन्त्रालयं धाःगु दु ।

थ्व नाप आःतक नेपालय् कोरोना संक्रमितपि २ लाख ७५ हजार ७० म्ह थ्यःगु दु । उकि मध्ये ३ हजार १२ म्ह सी धुकुगु दु ।

वःगु २४ घण्टाय् कोरोना संक्रमणं सू न सीइगु मदु । अथेहे थप ६६ म्ह कोरोनामुक्त जूगु दु । थ्व नाप आःतक २ लाख ७१ हजार ११६ म्ह कोरोना संक्रमणमुक्त जुइ धुकुगु दु। आःतक देयन्यक सक्रिय संक्रमितपि ९४२ म्ह दु धका मन्त्रालयं धाःगु दु ।

भारतया पश्चिम बंगालया मुख्यमन्त्री ममता बनर्जीयात बुधवाः आक्रमण याःगु दु ।

पश्चिम बंगालया पूर्वी मोदिनीपुर जिल्लाया अधिकारी व प्रहरी अधिक्षकं नन्दीग्रामया बिरुलिया बजारया भ्रमण यायेगु झ्वलय् छु अज्ञात मनू तयसे वयात धक्का बिःगु धका धाःगु दु।

अथेहे ममता बनर्जीया पार्टी तृणमूल कांग्रेसं थःपिनिगु नेतायात जुगु आक्रमणया विरोधय् थःगु घोषणापत्र सार्वजनिक यायेगु ज्याझ्वः स्थगित याःगु दु। बुधवाः उगु घटनाबारे प्रहरीें अनुसन्धान सुरु याःगु दु।

तृणमूल कांग्रेसं थुगु घटनाय् विपक्षीया ल्हाः दु धका धाःगु दु । भारतीय जनता पार्टीं धाःसा थुगु आक्रमणयात नौटंकीया संज्ञा बिउसे थुकिया अनुसन्धान याये माःगु माग याःगु दु ।

मुख्यमन्त्रीया उपचारय् खटे जुपि डाक्टरपिन्स वयागु देपा टुटिइ गम्भीर घाःपाः जुगु धका धाःगु दु।