Display Style:
Column Style
स्वनिगः दुने ८०९ म्हेसित कोरोना सक्रमित
शोभा श्रेष्ठ | कछलाथ्व पुन्हि ११४१, मंसिर १५ सोमवाः
स्वास्थ्य तथा जनसंख्या मन्त्रालयया कथं वःगु २४ घण्टाया दुने स्वनिलय् थप ८०९ म्हेसित कोरोना संक्रमण पुष्टि जूगु दु ।
थौं पुष्टि जूपि ३६१ म्ह मिसापि व ४४८ म्ह मिजंपि खः ।
अथेहे थौं येँ जक ६१५म्हेसित कोरोना सक्रमण पुष्टि जूगु धका मन्त्रालययं धाःगु दु।
अथेतु ख्वपय् ६९ म्ह व यलय् १२५ म्ह न्हुपि संक्रमितपि थपे जूगु दु धका धाःगु दु।
सहकारी बैंकया१६ क्वःगु वार्षिक साधारणसभा
लहानान्युज | कछलाथ्व पुन्हि ११४१, मंसिर १५ सोमवाः
राष्ट्रिय सहकारी बैंकं नवलपुरया निगु सहकारी संस्थायात पुरस्कृत याःगु दु। आर्थिक वर्ष २०७५÷०७६ य् उत्कृष्ट कारोबार याःगु व नियमित कारोबार याःगु सहकारी संस्थायात छगु ज्याझ्वः दथुइ पुरस्कृत याःगु खः ।
बैंकया कावासोती शाखाय् उत्कृष्ट कारोबार याःगु अमर बचत तथा ऋण सहकारी संस्था लिमिटेड व नियमित कारोबार याःगु नव त्रिवेणी बचत तथा ऋण सहकारी संस्था लिमिटेडयात पुरस्कृत याःगु खः।
सहकारी बैंकं केन्द्रीय स्तर, प्रदेश स्तर व शाखा स्तरय् उत्कृष्ट कारोबार याःगु संस्थायात पुरस्कृत याना वयाच्वंगु खः। १६ क्वःगु वार्षिक साधारणसभाय् शाखास्तरीय पुरस्कारया लागि छनोट जुगु संस्थायात कोरोना संक्रमणया कारण लिवाःगु धका बैंकं धाःगु खः ।
ज्याझ्वः बैंक समन्वय उपसमिति कावासोतीया संयोजक तिलक पराजुलीया अध्यक्षताय् व शाखा प्रमुख रुक्मत श्रेष्ठं न्ह्याकादीगु खः।
लुँ तोलां ७०० क्वहावल
शोभा श्रेष्ठ | कछलाथ्व पुन्हि ११४१, मंसिर १५ सोमवाः
लुँया भाः तोलां न्ह्यसः क्वहा वःगु दु।
म्हिगः आइतवाः छगु तोलाया ९० हजार ७ सय रुपैयाँय् कारोबार जूगु छापावाल लुँ थौं सोमवाः ९० हजार रुपैयाँ कायम जुगु दु धका नेपाल सुन चाँदी व्यवसायी महासंघं धाःगु दु।
थौं सोमवाः छापावाल लुँ तोलाया ९० हजार व तेजाबी लुँ ८९ हजार ५५० रुपैयाँ तोके याःगु दु।
अथेहे वहः तोला न स्वीतका क्वहा वःगु दु धका महासंघं धाःगु दु । वहः तोलां थौंया लागि ११२० तका कायम जूगु दु।
सुथया तापक्रम ५.४ डिग्री सेल्सियस
लहानान्युज | कछलाथ्व पुन्हि ११४१, मंसिर १५ सोमवाः
थौं येँय् सुथसियाःगु तापक्रम ५.४ डिग्री सेल्सियस दु । थ्व स्वया न्ह्यः आइतवाः सुथय् ४.८ डिग्री सेल्सियस तामक्रम मापन जुगु खः ।
सुथं ६ बजे येँ तापक्रम ५.४ डिग्री सेल्सियस मापन जुगु दु । न्हिनय् तापक्रम बढे जुया २०—२२ डिग्री सेल्सियस थ्यनिगु सम्भाना दु धका मौसमविद् न धाःगु दु। स्वनिगलय् थौं मौसम सफा जुइ धका धाःगु दु ।
पहाड व हिमाली क्षेत्रय् न थौं मौसम सफा जुइ । वाः वइगु व हिमपातया सम्भावना मदु। थौं वाःवइगु सम्भावना मदुसा कन्हय व कसं सुपाँय् भुनिइगु सम्भावना दु।
जल तथा मौसम विज्ञाव विभागया कथं वइगु २४ घण्टाय् देय् यक्को थासय् वायुया तापक्रमय् गिरावट वइ ।
तराई भू–भागय् सुथय् वायुया पारदर्शिताइ कमी जुया सडक व हवाई यातायात प्रभावित जुइगु सम्भावना दुगु धका धाःगु दु।
येँ महानगर व रामग्राम नगर दथुइ भगिनी सम्बन्ध स्थापना
लहानान्युज | कछलाथ्व चतुर्दशी ११४१, मंसिर १४ आइतवाः
येँ महानगरपालिका व रामग्राम नगरपालिका दथुइ अन्तरस्थानीय तह भगिनी सम्वन्ध स्थापना जुगु दु । समन्वय, सहकार्य व साझेदारीपाखे निगु नगर दथुइया अनुभव आदान–प्रदान यायेगु उदेश्यं निगु नगर दथुइ भगिनी सम्वन्ध स्थापना जुगु दु ।
भगवान गौतम बुद्धया अस्थिधातु दुगु प्राचिन नगर रामग्राम व संघीय राजधानी येँया ऐतिहासिक, धार्मिक व पुरातात्विक महत्व जाःथु येँ महानगरपालिका दथुइ निगु नगरया मेयरपिन्स ल्हाःचिं तया भगिनी सम्वन्ध स्थापना जूगु घोषणा याःगु खः।
येँ महानगरपालिकापाखे मेयर विद्यासुन्दर शाक्य व रामग्राम नगरपालिकाया पाखे मेयर नरेन्द्र कुमार गुप्तां उगु सहमति–पत्रय् ल्हाःचिं तया निगु नगर दथुइ भगिनी सम्वन्ध स्थापना यासे मैत्रीपूर्ण व दिगो संस्थागत सम्वन्ध स्थापना यासे, संस्थागत प्रणालीया क्वातुक्क व सवल दयेका, थःगु हित व सहकार्ययात न्ह्यने यकिइगु प्रतिवद्धता प्वकादीगु ख ।
नवलपरासी जिल्ला (बर्दघाट सुस्ता पश्चिम) अन्तर्गतया रामग्राम नगरपालिका नाप भगिनी सम्वन्ध स्थापित यासे येँँ महानगरपालिकां नगर–नगर साझेदारी ज्याझ्वः अन्तर्गत रामग्राम नगरपालिकायात धार्मिक व पर्यटकीय थाय्या रुपय् विकास यायेत ‘कोलिय शान्ति उद्यान’ निर्माणया लागि १ करोड ५० लाख रकम बिइगु घोषणा याःगु दु ।
उगु घोषणया सम्झौताय् निगु नगरया मेयरपिन्स ल्हाचिं तःगु खः। सम्झौता कथं निर्माण जूगु ऐतिहासिक व पर्यटकीय कोलीय शान्ति उद्यानय दुहावनिइगु व मेमेगु उपयुक्त थासय् ‘येँ महानगरपालिका व रामग्राम नगरपालिकाया मंका साझेदारी ज्याझ्वः कथं निर्मित उद्यान’ उल्लेख यायेमाःगु दु।
ल्हाचिं तये धुका न्ववासे येँ महानगरपालिकाया मेयर शाक्यं बौद्ध दर्शनया मिखां येँ व रामग्रामया दथुइ दुग्यकं सांस्कृतिक सम्बन्ध दुगु लुमकादीगु दु । वयकलं येँं न दक्षिण व उत्तर कोलियोग्राम दुगु धका धयादीसे थनयाःगु कोलियग्रामया दथुइ वःगु छु सम्बन्ध दयेफु धका धयादगिु खः।
‘उगु सम्बन्धं झीसं अध्ययन यायेगु चरणय् दु, निगु नगर दथुइ आः जक मखु न्हापानिसे सम्बन्ध दयेफु,’ धका धयादीसे,’ ‘बालागु अभ्यास व अनुभवया आदान प्रदान यासे स्थानीय स्वायत्त शासन, स्वशासन व समृद्ध नगर निर्माणया अभियानय् थः व थः समन्वय, मंकाः कुतः व सहकार्य यायेगु उद्देश्यं थुगु भगिनी सम्वन्ध स्थापना यानागु खः।’
मेयर शाक्यं निगु नगरया सांगठनिक स्वरुप, संस्थागत संरचना व शासकीय भूमिकायात सवल, सुदृढ व प्रभावकारी दयेकेत थःथःगु अनुभव, ज्यायायेगु तरिका, बालागु अभ्यास व
महत्वपूर्ण उपलब्धिया आदान प्रदान यायेगु प्रतिवद्धता प्वकादीगु खः। ‘मूर्त व अमूर्त संस्कृति, सम्पदा व पर्यटनयात स्थानीय सरकारया समृद्धिया आधारय् माने यासे निगु नगर दुने जिवन्त संस्कृति, सम्पदा व पर्यटकीय थाय् या संरक्षण, प्रवद्र्धन, विकास व प्रचार प्रसारय् सहकार्य यायेगु जुइ’।
येँ महानगरपालिकां थ्व स्वया न्ह्यः अमेरिका, चीन, भारत, दक्षिण कोरिया लगायत विश्वया थीथी १७ गु नगरनाप भगिनी सम्वन्ध स्थापना याये धुकुगु दु। अथेहे नेपालया जुम्लाय् च्वंगु चन्दननाथ नगरपालिका नाप न थ्व स्वया न्ह्यः भगिनी सम्वन्ध स्थापना याये धुकुगु दु ।
उगु ज्याझ्वलय् रामग्रामया मेयर गुप्तां विदेशी सहर नाप स्वया थःगु देय्या सहर नाप सम्भावना व चुनौती निगुलि दुगुलि विदेशी नगर नाप स्वया देय् दुने याःगु नगरनाप स्थापना जुइगु भगिनी सम्बन्ध बालाइ धका बिचाः तयादीगु खः। वयकलं येँ महानगरपालिका नाप भगिनी सम्वन्ध स्थापित यायेगु ह्वता चुलागुलि लय्तादीगु खः ।
ज्याझ्वलय् येँ महानगरया उपप्रमुख हरिप्रभा खड्गी श्रेष्ठया न उपस्थिति दुगु खः।
