नागरिक अगुवापिन्स सांसदपिन्त खबरदारी याःगु दु।

सांसदपिन्त खबरदारी यासे प्रतिगमन विरुद्ध बृहत नागरिक आन्दोलनया ब्यानरय् आइतवाः येँया माइतीघर मण्डला निसे बानेश्वर तक नागरिक अगुवापिन्स लोकतन्त्र मार्च याःगु दु।

लोकतन्त्र मार्चय् सहभागीपिन्स ‘सांसदपि खबरदार, सत्ताया मोहय् फसे जुइमते, स्वार्थया कासाय् फसे जुइ मते, संसदया गरिमा कायम याः, न्यायया लडाइँ जारी दु,’ लगायत प्लेकार्ड ज्वना वःगु खः ।

उकिया झ्वलय् कलाकारपिन्स नाट्य प्रस्तुति तक बिःगु खः।

सरकारं संवैधानिक परिषद सम्बन्धी अध्यादेश हःगु विरोधय् नेपाली कांग्रेसं संसदया रोस्टम घेराउ याःगु दु।

कांग्रेस संसदीय दलया प्रमुख सचेतक बालकृष्ण खाँडं संवैधानिक परिषद सम्बन्धी सरकारं हःगु अध्यादेश संवैधानिक परिषदया मान्यता प्रतिकुल जुगु धाःसे उगु याकन हे लित यके माःगु माग याःगु खः।

तर सभामुख अग्निप्रसाद सापकोटां कानुन न्याय तथा संसदीय मामिलामन्त्री लीलानाथ श्रेष्ठयात अध्यादेश पेश यायेत अनुमति बिइवं कांग्रेसं रोष्टम घेराउ याना नाराबाजी सुरु याःगु खः ।

नेकपा प्रचण्ड माधव समूह नं थौं आइतवाः प्रतिनिधिसभा बैठक बहिस्कार याःगु दु । आइतवाः प्रतिनिधिसभाया बैठकय् सरकारं संसद मजुगु इलय् हःगु अध्यादेश पेश यायेगु कार्यसूची तःगुया विरोधय् उमिसं संसद बैठक बहिस्कार याःगु दु।

बैठक लिपा सुरु जुगु प्रचण्ड माधव समूहया सांसद भीम रावलं प्रतिनिधिसभाय् शोक प्रस्ताव पारित यायेगु दिं कार्यसूचीइ मेगु विषय तये मज्युगु प्रचलन जुगु धाःसे अध्यादेश पेश यायेगु कार्यसूची तःगुया विरोध याःगु खः।

तर सभामुख अग्निप्रसाद सापकोटां सरकारं हःगु अध्यादेश संसद बैठक सुरु जुगु दिं पेश यायेमाःगु कानुनी बाध्यता दुगुलि अध्यादेशयात कार्यसूचीइ तःगु प्रष्टिकरण बिःगु खः । तर भीम रावलं थःपिन्स विरोध यानागु दु धका धाःगु खः ।

सभामुख सापकोटां विरोध लिपा संसद बैठक न्ह्यने यकेत्यःगुलि प्रचण्ड माधव समूह न बैठक बहिस्कार याःगु खः।

पार्टी एकता प्रक्रिया हे अस्वीकार याःगु सर्वोच्च अदालतया फैसला लिपा प्रधानमन्त्री नाप नेकपा ओली समूहया अध्यक्ष केपी शर्मा ओलीं संसदीय दलया बैठक सःतूगु दु। सरकारी निवास बालुवाटारय् दलया बैठक सःतूगु धका प्रमुख सचेतक विशाल भट्टराई न धाःगु दु ।

‘एमाले धका मखु, दक्को सांसदपिन्त सूचना छ्वःगु दु । छु ई लिपा बालुवाटारय् दलया बैठक च्वनेत्यःगु दु’, धका भट्टराई न धाःगु दु ।

संसद् बैठक इलय् सुरु मजुगु धाःसे ओली बालुवाटार लिहावःगु खः । ओली लिहा वयेवं दलया बैठक सःतुगु दु।

नेकपा ओली समूहया महासचिव नाप अर्थमन्त्री विष्णुप्रसाद पौडेलं नेकपा पार्टीबारे सर्वोच्च अदालतं बिःगु फैसलायात सम्मान यायेगु धका धयादीगु खः ।

‘जिमिस बूसा न अदालतया निर्णययाःगु सम्मान याये । कानुनी व संवैधानिक आधार माने याना सर्वोच्च अदालतं फैसला बिःगु दु’, पौडेलं धयादीगु दु ।

वयकलं अदालतया फैसला कथं न्ह्यावनेयेगु धका धयादीगु दु । ‘सर्वोच्च अदालतयागु न्ह्यावलय् सम्मान यासे वयाच्वनागु दु ।

स्वतन्त्र न्यायालयय् विश्वास याइपि राजनीतिक शक्ति खः’, पौडेल धयादीगु खः । तर, गये न्ह्या वनेगु धका सहलह याना न्ह्यावनेगु जुइ।