Display Style:
Column Style
प्रा.डा. श्रेष्ठयात विश्वप्रसिद्ध ‘अनरेरी ओभरसिज फेलोसिप’पाखें सम्मानित
शोभा श्रेष्ठ | सिल्लागा द्धादशी ११४१, फागुन २६ बुधवाः
विश्वप्रसिद्ध मुटुल्वय् विशेषज्ञ प्राध्यापक डा. मलख लाल श्रेष्ठ ‘अनरेरी ओभरसिज फेलोसिप’पाखें सम्मानित जुगु दु।
डा. श्रेष्ठयात इन्डियन एशोसिएसन अफ कार्डोभास्कुलर–थोरासिस सर्जन्सं उगु सम्मानं यायेत्यःगु खः। थुगु सम्मान नाजांपिं विदेशी शल्यचिकित्सकपिन्त जक बिइगु याना वयाच्वंगु सम्मान कायेत्यम्ह वयकः न्हापांम्ह नेपाःमि खः। भारतया न्हूगु दिल्लीया एस्कोर्ट अस्पतालय् व चेन्नइलय् १२,१३ दँ न्हय् न्हापांखुसि एओर्टिक सर्जरी (मुटुया महाधमनीया शल्यक्रिया) शुरु यानादिगु व वलिसें सम्बन्धी तालिम बियादीगुलि उकियात हने कथं उगु सम्मान यायेत्यःगु खः।
प्रा.डा श्रेष्ठ जर्मनीया हानोभर मेडिकल स्कुलय् कार्डियाक, थोरासिस, ट्रान्सप्लान्टेसन एण्ड भास्कुलर सर्जरी विभागया उपाध्यक्ष, प्राध्यापकलिसें ‘डाइरेक्टर अफ एओर्टिक सर्जरी’ जुया ज्या याना च्वनादिम्ह खः। डा. श्रेष्ठं दँय् दंस नेपाल वया मनमोहन कार्डियोथोरासिस भास्कुलर एण्ड ट्रान्सप्लान्ट सेन्टरय् मुटुल्वगिपिनिगु थाकुगु शल्यक्रिया निःशुल्क यानाच्वनादिगु दु। वयकया थुगु योगदानया कदरस्वरूप सेन्टरं वयकःयात भिजिटिङ प्रोफेसरया दर्जा बियातगु दु ।
डा. श्रेष्ठं थ्व स्वया न्ह्यः गंगालाल हृदयरोग प्रतिष्ठानय् नं यक्व मुटुल्वगिपिन्त जटील शल्यक्रिया निःशुल्क यानादिइ धुकुगु दु । अथेहे वयकलं दँय् दसं भारतय् नं थथे जटील किसिमया मुटुय शल्यक्रिया निःशुल्क यानाच्वनादिम्ह खः। वयक नेपालभाषाया ख्यलय् तसकं हनेबहःम्ह प्रा. माणिक लाल श्रेष्ठ व नेपाःया न्हापांम्ह महिला न्यायधिश मदुम्ह शिलु सिंहया काय् खः।
थौं संसदया बैठक १ बजे च्वनिइगु
लहनान्युज | सिल्लागा द्धादशी ११४१, फागुन २६ बुधवाः
पुनःस्थापित संसदया बैठक थौं बुधवाः च्वनेत्यःगु दु । न्हिनसिया १ बजे च्वनेगु बैठकं सम्भावित कार्यसूचीइ न्ह्यय्गु अध्यादेश पेस याइगु व बहालवाला नाप पूर्वसांसदपि मदुगु शोक प्रस्ताव पेस याइगु उल्लेख दु ।
संसद सचिवालय कथं सोमवाः च्वनिइगु बैठकय् पेस जुया पारित मजुगु विधेयक बुधवाःया बैठकय् पेस यायेत्यःगु दु । सोमवाःया बैठकय् विपक्षी दलया विरोध बाबजुद संवैधानिक परिषद सम्बन्धी अध्यादेश पेस याःगु खः । उगु विधेयक संविधान नाप ल्वाःगु धाःसे संसदपाखे पारित मयागु रणनीति विपक्षी दलं दयेका तःगु दु।
नेपाली कांग्रेस, माओवादी केन्द्र, जसपा सांसदपिन्स अध्यादेश संविधान नाप ल्वागु धाःसे थ्व स्वया न्ह्यः विरोधया सूचं दर्ता याःगु खः। विरोधया सूचना दर्ता याम्ह नेकपा माओवादी केन्द्रया सांसद यशोदा सुवेदी गुरुङं प्रक्रिया कथं विरोध याये त्यःगु दु । गृहमन्त्री थापां सामाजिक सुरक्षा न्हापागु संशोधन अध्यादेश व तेजाब नाप मेमेगु घातक रासायनिक पदार्थ नियमन अध्यादेश पेस यायेत्यःगु दु। अथेहे स्वास्थ्य तथा जनसंख्या मन्त्री हृदयेश त्रिपाठीं औषधि तेस्रो संशोधन अध्यादेश २०७७ पेस यायेगु कार्यसूची दु ।
कानुन मन्त्री लिलानाथ श्रेष्ठं फौजदारी कसूर तथा फौजदारी कार्यविधि सम्बन्धी छु ऐन संशोधन यायेगु अध्यादेश, यौन हिंसाविरुद्धया छु ऐनयात संशोधन यायेगु अध्यादेश व वेपत्ता यानातःपि मनू तयेगु छानबिन, सत्य निरुपण व मेलमिलाप आयोग स्वक्वःगु संशोधन अध्यादेश पेस यायेगु सम्भावित कार्यसूचीइ उल्लेख दु ।
एसईई परीक्षा वइगु जेठ १३ गतेनिसे
लहनान्युज | सिल्लागा द्धादशी ११४१, फागुन २६ बुधवाः
राष्ट्रिय परीक्षा बोर्डं २०७७ सालया माध्यमिक शिक्षा परीक्षा (एसईई)या तालिका सार्वजनिक याःगु दु।
एसईई परीक्षा वइगु जेठ १३ गते निसे २४ गते तक सन्चालन यायेगु निर्णय मंगलवाः बोर्डं बुधवाः परीक्षा तालिका तक सार्वजनिक याःगु दु । जेठ १३ गते न्हापागु दिं अनिवार्य अँग्रेजी विषयया परीक्षा जुइ।
उगु दिं वेदविद्याश्रमपाखे अनिवार्य सँस्कृत भाषा व साहित्य÷अनिवार्य अँग्रेजी विषयया परीक्षा जुइ। जेठ १४ गते अनिवार्य नेपालीया परीक्षा जुइ। जेठ १६ गते अनिवार्य गणित व जेठ १७ गते अनिवार्य विज्ञान विषयया परीक्षा जुइ धका राष्ट्रिय परीक्षा बोर्डं धाःगु दु ।
जेठ १८ गते सामाजिक व जेठ १९ गते स्वास्थ्य, जनसंख्या तथा वातावरण शिक्षाया परीक्षा जुइ। २० गते ऐच्छिक गणितया परीक्षा जुइ ।
उगु दिं ऐच्छिक न्हापागु पत्रया दक्को विषयया परीक्षा जुइ। परीक्षा सुथय् ८ बजेनिसे ११ बजेतक सन्चालन जुइ।
१२ या परीक्षा तालिका सार्वजनिक
लहनान्युज | सिल्लागा द्धादशी ११४१, फागुन २६ बुधवाः
राष्ट्रिय परीक्षा बोर्डं कक्षा १२ या परीक्षा तालिका सार्वजनिक याःगु दु । परीक्षा वइगु २६ गतेनिसे सुरु जुइ ।
तालिका कथं न्हापागु दिं अनिवार्य अँग्रेजी विषयया परीक्षा जुइ। जेठ २७ गते ऐच्छिक नेपाली, भूगोल, कम्प्युटर साइन्स लगायतया विषयया परीक्षा जुइ।
फिजिक्स, पोलिटिकल साइन्स, होम साइन्स, होटल म्यानेजमेन्ट लगायतया विषय परीक्षा जेठ २८ गते जुइ धका राष्ट्रिय परीक्षा बोर्डं प्रकाशित याःगु परीक्षा तालिकाय् उल्लेख याःगु दु ।
मंगलवाः च्वंगु राष्ट्रिय परीक्षा बोर्डया बैठकं कक्षा १२ या परीक्षा वइगु जेठ २६ निसे असार ४ गते तक सन्चालन यायेगु निर्णय याःगु दु ।
यलःया कुमारी छें व कुमारी निवासया पुनर्निमाण जुइगु
लहनान्यूज | सिल्लागा एकादशी ११४१, फागुन २५ मंगलवाः
यलःया कुमारी छें व कुमारी निवासया पुनर्निमाण जुइगु जूगु दु । ०७२ सालया भुखाचं क्षतीग्रस्त जूगु यलःया कुमारी छेँ व कुमारी निवास भारत सरकारया अनुदानय् पुनर्निमाण जुइत्यंगु खः ।
थौं भारतीय राजदुत विनय मोहन क्वात्रां यलः महानगरपालि वडा नं. १६ य् च्वंगु कुमारी छेँ व कुमारी निवासया शिलान्यास यानादिगु खः ।
भारत सरकारया आर्थिक अनुदानय् राष्ट्रिय पुनर्निमाण प्राधिकरणं प्यंगु क्वति ५५गू लखःया लागतय् भौतिक संरचनाया पुनर्निमाण व न्हूगु कुमारी निवास दयेकेत्यनागु प्राधिकरण केन्द्रीय आयोजना इकाइ भवन आयोजना निर्देशक श्याम किशोर सिंहं धयादिल ।
भौतिक संरचनात पुलाँगु हे मौलिक स्वरुपय् दयेकेगु व सिमेन्ट डन्डी मछ्यलेगु वय्कलं धयादिल । छगूत्या दँय् क्वचायेकिगु उगु छेँ व निवास भुकम्प प्रतिरोधी जुइगु धाःगु दु ।
