राष्ट्रियसभा सदस्य कोमल वलीं नेकपा एमालेया नेता रघुजी पन्तविरुद्ध काठमाडौं जिल्ला अदालतय् मुद्दा दायर याःगु दु।

सार्वजनिक ज्याझ्वलय् थःगु इज्जतय् धक्का वनिइगु नियतं जानी जानी ब्बबिउगु व बेइज्जती जुइगु कथं व उकिया प्रचार प्रसार याःगु धाःसे ओली पन्तविरुद्ध प्यदँ कैद व ४० हजार रुपैयाँ जरिवानाया सजाय माग यासे मुद्दा दायर याःगु दु ।

ओलीं ब्बबिःगु बापत दच्छिया कैद व १० हजार जरिवाना नाप बेइज्जती याःगु बापत निदँया कैद व २० हजार रुपैयाँ जरिवाना व उकिया विद्युतीय माध्यमपाखे प्रचार प्रसार याःगु बापत थप दँच्छि कैद व १० हजार रुपैयाँ जरिवाना माग दावी याःगु खः। ओलीं पन्तया अभिव्यक्तिपाखे थःगु प्रतिष्ठाय् जुगु असर व विद्युतीय व मेमेगु माध्यमपाखे प्रचार प्रसार याना बेइज्जती यागुलि मनासिव क्षतिपूर्ति व मुद्दाय् लगे जुगु खर्च भरे यायेत माग याःगु खः ।

वःगु फागुन १५ गते नेता पन्तं पार्टीइ नीदँनिसे योगदान याना वयाच्वपि मिसापि दु सा कोमल वलीं राष्ट्रियसभाया टिकट बिःगु धाःसे लैंगिक हिंसाजन्य टिप्पणी याःगु खः ।

लुँया भाः थौं न क्वहावःगु दु । लुँ तोलां थौं खुसः क्वहावःगु दु।

लुँ तोलां खुसः क्वहावया ८५ हजार ६ सय रुपैयाँ थ्यःगु दु धका नेपाल सुनचाँदी व्यवसायी महासङ्घं धाःगु दु ।

म्हिगः लुँ तोलाया ८६ हजार २ सय रुपैयाँ कायम जुगु खः । महासङ्घया कथं अन्तर्राष्ट्रिय बजारय् लुँया भाः अस्थिरता वयेवं नेपाली बजारय् न प्रभाव लागु धका धाःगु दु।

अथेहे, थौं वहः न भाः क्वहावःगु दु । वहः तोलां थौं झीतका क्वहावःगु दु ।

वहः तोलां झीतका क्वहावया १२५५ रुपैयाँ थ्यःगु दु धका धाःगु दु ।

लुत कर्णाली खुसिइ बेपत्ता जूपि छगु हे परिवारया न्याम्ह मध्ये प्यम्हेसिगु शव लुगु दु । छम्ह आःतक न बेपत्ता जुयाच्वंगु दु ।

स्वम्ह म्ह्याय् व छम्ह काय् नाप कर्णालीइ बेपत्ता जुम्ह दैलेख आठबीस नगरपालिका–३ निमायलया ३५ दँ दुम्ह सुकी बडुवाल व वया काय् १० दँ दुम्ह ललितया शव लुगु दु धका जिल्ला प्रहरी कार्यालय दैलेखया सूचना अधिकारीं जानकारी बिःगु दु ।

मांम्ह व काय् म्हेसिगु शव अछामया पञ्चदेवल विनायक नगरपालिका–४ या कर्णाली खुसिइ थौं मंगलवाः न्हिन १२ बजे लुगु खः । १६ दँ दुम्ह म्ह्याय् व १२ दँ दुम्ह म्ह्याय् सरिता बडुवालया शव सोमवाः हे लुगु खः ।

प्रहरीया कथं मां, निम्ह म्ह्याय् व छम्ह काय् नाप हे लुगु खः। न्यादँ दुम्ह म्ह्याय् रजनी बडुवालया अवस्था आः न अज्ञात हे तिनि। वयात मालेयेगु ज्या जुयाच्वंगु दु धका प्रहरीं धाःगु दु ।

घटनास्थलय् दैलेख व अछामया प्रहरी व गोताखोरया टोली खटे जुयाच्वंगु दु ।

वःगु २४ घण्टाया दुने देयन्यक ८९ म्ह कोरोना संक्रमण पुष्टि जूगु दु ।

४ हजार ३९९ म्हेसित नमुना परीक्षण यागुलि ४० म्ह मिसा व ४९ म्ह मिजंपिन्त कोरोना भाइरसया संक्रमण खनेदुगु दु धका स्वास्थ्य तथा जनसंख्या मन्त्रालयं धाःगु दु ।

थ्व नाप नेपालय् कोरोना संक्रमितपि आःतक २ लाख ७४ हजार ८१० म्ह थ्यःगु दु । उकि मध्ये थप छम्ह सीउगु दु । थ्व नाप आःतक ३ हजार ११ म्ह सी धुकुगु दु ।

अथेहे वःगु २४ घण्टाय् ४२ म्ह कोरोनामुक्त जुगु दु । अथेहे थ्व नाप २ लाख ७० हजार ९२७ म्ह कोरोना संक्रमणमुक्त जुइ धुकुगु दु ।

नेकपा विप्लव समूहया महासचिव नेत्रविक्रम चन्द विप्लवं पुष्पकमल दाहाल प्रचण्ड व बाबुराम भट्टराई न मखुगु लँ ज्वःगु दु धका धयादीगु दु।

गृह जिल्ला कपिलवस्तुया शिवगढीइ पार्टी निकट महिला संघया राष्ट्रिय सम्मेलनय् सम्बोधन यासे वयकलं जनयुद्ध लिपा प्रचण्ड व बाबुरामं मखुगु लँ ज्वःगु व उकिया हे लिच्वः कथं थौया राजनीतिक परिस्थिति उत्पन्न जुगु धका धाःगु खः। माओवादी व एमालेया एकतापाखे झण्डै निगु तिहाइया सरकार दुगुलि प्रचण्ड मखुगु लँ लिगुया कारण नेकपा संकट वःगु दावी याःगु खः ।

बिप्लवं बाबुराम भट्टराई न मखुगु लँ लिगुलि मधेशवादी दलया नेता जुगु धका टिप्पणी यानादीगु खः। सरकारं थःगु पार्टीयात प्रतिवन्ध याःगु न गलत खः धका धयादीगु दु । विप्लवं पुँजीवादी व्यवस्था असफल जुगु धका धयादीसे वैज्ञानिक समाजवाद व पुँजीवादी व्यवस्था दथुइ ठीक जुगु धका जनमत संग्रह याये माःगु माग याःगु दु ।