Display Style:
Column Style
सरकार व नेपाल कम्युनिस्ट पार्टीदथुई स्वंगु बुँदे सहमतिइ ल्हाःचिं, नेपालय् आः हिंसात्मक द्वन्द्व मदु : प्रम ओली
राम डंगोल | सिल्लागा षष्ठी ११४१, फागुन २० बिहीवाः
नेत्रविक्रम चन्द ‘विप्लव’ नेतृत्वया नेपाल कम्युनिष्ट पार्टी व सरकार दथुई सहमति जूगु स्वंगु बुँदे सम्झौताय् थौं ल्हाःचिं तःगु दु ।
राष्ट्रिय सभागृहलय् थौं ग्वसाःग्वःगु ज्याझ्वलय प्रधानमन्त्री केपी शर्मा ओली व नेपाल कम्युनिस्ट पार्टीया महासचिव नेत्रविक्रम चन्दया न्ह्यलूवाय् सहमतिपत्रय् ल्हाःचिं तःगु खः ।
सरकारपाखें गृहमन्त्री रामबहादुर थापा व नेपाल कम्युनिष्ट पार्टी पाखें खड्ग विश्वकर्मां सहमतिपत्रय् ल्हाः चिं तयादीगु खः ।
ज्याझ्वःयात सम्बोधन यासें प्रधानमन्त्री केपी शर्मा ओलीं नेपालय् आः दक्वः धैथें हिंसात्मक द्वन्द्वया अन्त्य जूगु धयादिल ।
नेपालय् हिंसात्मक लँपू मन्त, हिंसात्मक कार्यदिशा वनिपिं सुं नं मन्त धासें शान्तिया न्हूगु लँपुइ झाःपिं नेपाल कम्युनिष्ट पार्टीया महासचिव नेत्रविक्रम चन्दयात सफलताया नितिं भिन्तुना देछानादिल ।
शान्तिया लँपुई वया विप्लबं साहसिक ज्या याःगु धासें थ्वः ‘फोर्सल्याण्डिङ मजुसे सेफ ल्यान्डिङ खः’ धयादिल ।
सुसुं मनुतय्सं चाःचाः सहलह जूगु धकाः प्रचार यागुलिइ प्रधानमन्त्री ओलीं कुँखिनादिल । वय्कलं धयादिल ‘थ्व सहमति यक्वः हे ताःहाकेक यानागु प्रयासया परिणाम खः’ वय्कया धापू खः ।
नेपाल कम्युनिस्ट पार्टीया महासचिव नेत्रविक्रम चन्द विप्लवं सरकारलिसे जूगु सहमति नालाकायेत थःगु पार्टी प्रतिबद्ध दूगु धयादिल ।
सहमति धुंका दूगु ह्वःतायात बाँलाका यंकेगु धासें थःपिन्सं दक्व शक्तिलिसें छप्पं जुया न्ह्यःने वनेत तयार जूगु धयादिल ।
नेपाःमिपिनिगु शान्ति व समृद्धिया भलसाय् सहमतिं ग्वःहालि याइगु महासचिव विप्लवं धयादिल ।
नेपाःमिपिन्सं आःतक्क नं स्वतन्त्र कथं क्वछिइगु अधिकारया अनुभव यायेमखंगु व उकिया नितिं थःपिं न्ह्यनाच्वनाु वय्कलं धयादिल ।
महासचिव विप्लवं हलिमय् कम्युनिस्टपिनिगु विजय जूसा जक युद्धया अन्त्य जुइगु जिकिर यानादिल ।
सहमतिइ पौखय् विप्लव नेकपां थःगु दक्वः राजनीतिक विषयया समाधान संवादपाखें हे क्वचायेकेगु, राजनीतिक गतिविधि शान्तिपूर्ण रुपं न्ह्याकेगु व नेपाल सरकारपाखें तयातःगु नेपाल कम्युनिष्ट पार्टीयात तयाःतगु प्रतिबन्ध लितकायेगु, दक्वः बन्दीत त्वःतेगु व मुद्दा नं खारेज यायेगु न्ह्यथनातःगु दु ।
हिंसात्मक गतिविधि न्ह्यानाच्वंगु धासें सरकारं २०७५ या फागुन २८ गते विप्लव नेतृत्वया नेकपायात प्रतिबन्ध तःगु खः ।
बिहीबारया मन्त्रिपरिषद् बैठकं सरकारी वार्ता टोली व विप्लव पुचः दथुई स्वंगु बुँदे सहमति अनुमोदन याःगु खः ।
लुँ तोला १००० क्वहावल
लहनान्युज | सिल्लागा षष्ठी ११४१, फागुन २० बिहीवाः
लुँया भाः थौं न क्वहावःगु दु । म्हिगः तोलां द्धःछि क्वहा वःगु खःसा थौं गुसः कुहावःगु दु।
थौं लुँ तोला गुसः क्वहावया तोलाय् ८५ हजार ६ सय रुपैयाँ कायम जुगु दु धका नेपाल सुनचाँदी व्यवसायी महासङ्घं धाःगु दु ।
अन्तर्राष्ट्रिय बजारय् लुँया बजार अस्थिर जुगुलि लुँया भाः च्वय् क्वय् वनाच्वंगु दु धका महासङ्घं धाःगु दु ।
अथेहे, थौं वहःया भाः न क्वहावःगु दु ।
वहः तोला स्वीन्यातका क्वहावःगु दु । वहः तोलां १२५० रुपैयाँ कारोबार जुगु दु धका महासङ्घं धाःगु दु ।
लायन्स क्लब अफ खुसिबुं चितवनय् विद्यार्थीपित थीथी सामाग्री ग्वाहालि
लहनान्युज | सिल्लागा षष्ठी ११४१, फागुन २० बिहीवाः
लायन्स क्लब अफ काठमाडौं इन्द्रायणी खुसिबुं चितवन जिल्लाया कालि खोलाय् लाःगु श्री देवीभञ्ज्याङ राष्ट्रिय आधारभूत स्कूलय् वनाः अनया विद्यार्थीपितं टेलिभिजन, स्टेशनरी ज्वलं, मोजा लाकां, तपुली वितरण याःगु दु ।
स्कूलय् वइपिं मस्त लाकां तकं मन्ह्यासे वःगु खनाः लाकां वितरण यानागु खँ क्लबया अध्यक्ष सागर डंगोलं धयादीगु दु । ‘स्कूलय् आखः ब्वनेत वइपिं मस्तय् तुतिइ घाःघाः जुइक लाकां तकं मन्ह्यासे वइगु जुयाच्वन । थगुने स्कूलय् ब्याग वितरण याः वनाबलय् जिमिसं मस्तय् थज्याःगु हालत खनाः तसकं म्हाइपुल, अले मस्तय्त लाकां न्ह्याकेगु क्वःछिनाः’ क्लबया अध्यक्ष सागर डंगोलं कनादिल ।
क्लबं न्हापा हे लाकां वितरण यायेगु योजना तयातःगु खःसां कोरोना महामारीया कारणं भचा लिपा लाःगु खँ वय्कलं कनादीगु दु ।लायन्स क्लब अफ इन्टरनेशनल ३२५ बी १या एलसीआइएफ लायन बालकृष्ण बुर्लाकोटी मू पाहाँ कथं झायादीगु वितरण ज्याझ्वलय् डिस्ट्रिक गभर्नर मानबहादुर रोकाया, अध्यक्ष डंगोल, सचिव निर्मल महर्जन, दुजः अमर सुवालपिंसं टेलिभिजन लिसें मोजा लाकां, स्टेशनरी ज्वलं, तपुली लःल्हानादीगु खःसा क्लबया दुजःपिंसं मस्तय्त जूस, चकलेट इनाबिउगु खः ।
ज्याझ्वलय् न्ववासें स्कूलया प्रधानाध्यापिका ज्ञानुदेवी पाण्डें थन स्कूलय् दुपिं १३४ म्ह विद्यार्थीपिं मध्ये १३३ म्ह चेपाङ जूगु व छम्ह जक गुरुङ विद्यार्थी दुगु खँ कनादिल । घौछि व बाघौ तक न्यासि वनाः मस्तय् स्कूलय् वइगु खँ कनादिसें वय्कलं थन ब्वंवइपिं अधिकांश विद्यार्थीतय् अभिभावकपिनि बांलाःगु रोजगार मदुगुलिं लाकां न्ह्यायेत तकं समस्या दुगु खँ कनादिल ।
क्लबया सचिव निर्मल महर्जनं थ्व स्कूलया अवस्था स्वयाः लिपाथ्यंकं निरन्तर ग्वाहालि याना वनेगु खँ कनादिल ।
नेपालभाषाः प्रयोगात्मक परीक्षाया धलः पिहाँवल, परीक्षा थ्वहे शनिबाः निसें न्ह्याइगु
लहनान्युज | सिल्लागाः षष्ठी ११४१, फागुन २० बिहीवाः
येँ महानगरपालिकां महानगर दुने ९६गू सामुदायिक ब्वनेकुथिया लागि १७०म्ह शिक्षक भर्ना यायेत नियमकथं आवेदन बिउपिं ५सः व १६म्ह आवेदक पिनिगु परीक्षा कायेगु सूचं पिकाःगु दु ।
महानगरपालिकाया शिक्षा विभागया सूचं कथं थ्वहे शनिबाः २२ गतेनिसें २९ गते शनिबाः तक्क ६०म्हसिया पुचः दयेका जाँच कायेत्यंगु खः ।
वइगु २२ गते शनिबाः सि. नं. ०१ निसें ६० तक्क न्हिनसिया १ ताः ईलय,
२३ गते आइतबाः सि.नं. ६१ निसें १२० तक्क सुथसिया ७ताः ईलय्,
२४ गते सोमबाः सि.नं. १२१ निसें १८० तक्क सुथसिया ७ताः ईलय्,
२४ गते सोमबाः सि.नं. १८१ निसें २४० तक्क न्हिनसिया १ ताः ईलय,
२५ गते मंगलबाः सि.नं. २४१ निसें ३०० तक्क सुथसिया ७ताः ईलय्,
२६ गते बुधबाः सि.नं. ३०१ निसें ३६० तक्क सुथसिया ७ताः ईलय्,
२८ गते शुक्रबाः सि.नं. ३६१ निसें ४२० तक्क सुथसिया ७ताः ईलय्,
२९ गते शनिबाः सि.नं. ४२१ निसें ४८० तक्क सुथसिया ७ताः ईलय् व
ल्यं दुपिं सि. नं. ४८१ निसें ५१६ तक्कया २९ गते शनिबाः हे न्हिनसिया १ ताः ईलय् जुइगु सूचंलय् धयातःगु दु ।
येँ महानगरपालिकां थःगु महानगर दुनेया सरकारी व निजी ब्वनेकुथिइ ब्वंकेया नितिं तयार याःगु सपूm ‘झीगु येँ देय्’ कक्षा १ निसें ८ तक्क अनिवार्य रुपं ब्वंकेगु क्वजिनाकथं शिक्षक भर्नाया नितिं उगु जाँच कायेत्यंगु खः । जाँच कामपा, शिक्षा विभाग, चागलय् ज्याकुथिइ जुइगु शिक्षा विभागं न्ह्यथंगु दु ।
थुगु जानकारी येँ महानगरपालिकाया वेभसाइटपाखें नं काय्फई ।
पूर्वप्रधानन्यायाधीश सिंह मदुगुलिं थौं देय्न्यंकया अदालत बन्द
लहनान्युज | सिल्लागाः षष्ठी ११४१, फागुन २० बिहीवाः
पूर्वप्रधानन्यायाधीश सुरेन्द्रप्रसाद सिंह मदुगुलिं सर्वोच्च अदालतं थौं देय्न्यंकया अदालतय् शोक बिदा बीगु निर्णय याःगु दु ।
म्हिगः च्वंगु सर्वोच्च अदालतया आकस्मिक पूर्ण मुँज्यां थौं देय्न्यंकया अदालतय् शोक बिदा बीगु निर्णय याःगु खः ।
थौं सर्वोच्च अदालत, उच्च अदालत, जिल्ला अदालत, विशेष अदालत अले मेगु अदालत व न्यायाधीकरणयात शोक बिदा बीगु निर्णय जूगु सर्वोच्च अदालतं धाःगु दु ।
पूर्वप्रधानन्यायाधीश सिंह फागुन १८ गते सनिलय् मदुगु खः । सर्लाही जिल्लाय् वि सं. १९८८ साल फागुन ३ गते बूम्ह सिंह २०५२ साल असोज १० गते प्रधानन्यायाधीश नियुक्त जूगु खः ।
थ्व हे दथुइ, सर्वोच्च अदालतं नेकपाया नांया विवादय् निर्णय न्यंकेगु मिति हाकनं लिछ्याःगु दु । सर्वोच्चं वंगु विहिबाः उगु विवादबारेया फैसला न्यंकेत थौंया मिति क्वःछ्यूगु खः ।
तर थौं शोक बिदा लाःगुलिं नांया विवादबारे फैसला यायेगु मिति नं लिज्याःगु खः ।
तत्कालीन नेकपा एमाले व नेकपा माओवादी केन्द्र दथुइ एकता जुइधुंकाः आःया सत्तारुढ दल निर्वाचन आयोगय् नेपाल कम्युनिष्ट पार्टी (नेकपा) नामय् दर्ता जूगु खः ।
तर निर्वाचन आयोगय् वयां न्ह्यः हे ऋषिराम कट्टेल नेतृत्वया नेपाल कम्युनिष्ट पार्टी दर्ता दुगु खः ।
कट्टेलं थःगु पार्टीया नांलिसे ज्वःलाःगु नां तःगु धासें निर्वाचन आयोगविरुद्ध २०७५ मंसिर ५ गर्ते सर्वोच्चय् रिट निवेदन दर्ता याकादीगु खः ।
