स्वनिगलय् ८३५ म्हेसित कोरोना संक्रमित पुष्टि जूगु दु।

स्वास्थ्य तथा जनसंख्या मन्त्रालयया कथं बिःगु जानकारी कथं संक्रमित जूपि ३५० म्ह मिसापि व ४८५ म्ह मिजंपि खः।

मन्त्रालयया कथं थौं येँ जक ६३५म्हेसित कोरोना सक्रमण जूगु दु।

अथेहे ख्वपय् ८७ म्ह व यलय् ११३ म्हेसित कोरोना सक्रमण जूगु दु।

देय् यकं बुधबार संक्रमित पुष्टि जूपि १ हजार ९४८ म्हेसित कोरोना सक्रमित जुगु दु। 

लुँ तोलां थौं द्धःछि क्वहा वःगु दु।

तोलां द्धःछि क्वहावया थौं ९१ हजार पाँच सय कायम जूगु दु धका नेपाल सुनचाँदी व्यवसायी महासंघं धाःगु दु।

अथेहे थौं तेजाबी लुँ ९१ हजार रुपैयाँ कायम जूगु दु। अथेहे वहः तोलाया न्यातका क्वहावःगु दु ।

थौं वहः न्यातका क्वहा वया तोलाया ११७५ रुपैयाँ कायम जूगु दु धका महासंघं धाःगु दु।

येँ महानगरपालिकां माइतीघरनिसें तीनकुने तकया सतक, आइल्याण्ड व मतया लठ्ठाया पोलय् नेपाल टेलिकम व कृषि विकास बैङ्कं तयातगु विज्ञापन बोर्ड लिकायेगु ज्या जूगु दु ।

ट्राफिक आइल्याण्ड मर्मत, सम्भार व व्यवस्थापन व हरियाली प्रबर्धनया लागि सामाजिक उत्तरदायित्व अन्तर्गत थीथी पक्षलिसें याःगु सहमति कार्यान्वयनय् मजुगु धासें येँ महानगरं ५१ गू बोर्ड लिकायेगु ज्या याःगु खः। माइतीघर मण्डलाया सौन्दर्यीकरण यायेगु भाला कृषि विकास बैंङ्कं कागु खः।

महानगरं थगुनेया ८ मंसिरय् मण्डला क्षेत्रया व्यवस्थापन यायेगु जिम्मा बैङ्कयात बिइगु निर्णय याःगु खः। माइतीघर मण्डलानिसें तीनकुने तकया सतक खण्डया डिभाइडरया व्यवस्थापन धासाः नेपाल टेलिकमं याना वयाच्वगु खः। बैङ्कं महानगरं उपलब्ध याकुगु डिजाइन कथं क्यबः दयेकेगु, माः पिइगु, मौसमकथंया स्वांमाः पिइगु, मर्मत सम्भार यायेगु, हेरचाह, रेखदेख यायेगु दायित्व पूरा यायेगु धागु खः।

माइतीघर मण्डलानिसें तीनकुने तकया सतक खण्डय् सम्झौताया पालना याना नेपाल टेलिकमं बिद्युतीय माध्यमपाखें थःगु सस्थाया पहिचान क्यनिगु कथंया सामान तयेगु याना सम्झौता जुगु खः । 

तर, निगुलिइ संस्थायात तकमछि इनाप यासाः नं सम्झौता कथं ज्या यायेत लिचिउगुलिइ बाध्य जुयाः साइनबोर्ड चिकागु महानपालिकाया प्रमुख प्रशासकीय अधिकृत राजेश्वर ज्ञवालीइ धयादिगु दः।

नेवाः समाज दुनेया थीथी जातीय संगठनयागु मंकाः संगठनया रुपं नेवाः जातीय महासंघ गठन जुइगु जूगु दु । थौं येँय् क्वचाःगु थीथी नेवाः जातीय संगठनतय् मुनां नेवाः जातीय महासंघ गठन यायेगु निर्णय याःगु खः ।

मुनां जातीय संगठनतय्सं ताः इलंनिसें थीथी समस्या फयावःगु व अज्याःगु समस्या ज्यंकेत दक्वं छधी जुयाः न्ह्याःवनेमाःगु लिच्वः पिकासें महासंघ गठन यायेगु निर्णय याःगु खः ।

ज्याझ्वलय् गोष्ठी कजि लिसें नेपाल खड्गी सेवा समितिया संरक्षक मनोज नेवाः खड्गीं नेवाः जातीय संगठनया एकता व सहकार्यया विषयस अवधारणा पौ न्ह्यब्वयादिल । व झ्वलय् कजि खड्गीं न्हूदँया र्‍याली, नेवाः एकता दिवस, गुथि विधेयकया आन्दोलन लिसें थीथी अभियानय् जातीय संगठनया महत्वपूर्ण भूमिका दइगु तर उगु भूमिकाया मूल्याङ्कन धाःसा पाय्छि कथं गबलें हे मजूगु धयादिल ।

‘थीथी नेवाः गतिविधि व अभियानय् जातीय संगठनं हे बाजं थानाबीमाःगु, ब्वति क्यनाबीमाःगु, तर झी न्ह्याब्लें छ्यंग्वलय् हे जक सिमित जुल,’ खड्गीं धािदिल । ‘जातीय संगठनयात नेतृत्व धाःसा गबलें हे मबिल ।’

अवधारणा पतिइ जातीय महासंघ गठन यासें नेवाः समाजया परम्परागत पेशाया आधुनिकीकरण यासें समाजया आर्थिक उन्नतीइ योगदान बीगुया लिसें जातीय समाजतय् भवन दयेकेगु तक्कया उद्देश्य प्रस्ताव यानातःगु दु ।

येँ महानगरपालिकाया प्रमुख विद्यासुन्दर शाक्यं जातीय संगठनया एकताया विषय लसतां जाःगु धासें समाज, सम्पदा, संस्कृतिया संरक्षणय् सकलें जायेत इनाप यानादिल । स्थानीय भाषा, कला, संस्कृति, सम्पदाया संरक्षणय् येँ महानगरपालिकाया न्ह्याबलें साथ दइगु प्रतिवद्धता महानगर प्रमुख शाक्यं प्वंकादिल ।

येँ महानगरपालिका सम्पदा तथा पर्यटन समितिया कजि लिसें येँ महानगरपालिका १८ वडाया वडाध्यक्ष न्हुछेँकाजी महर्जनं नेवाः जातीय संगठनयात नेतृत्व वर्गं प्रयोग जक यानावःगु धयादिल । गुथिया स्वामित्व कयातःगु जातीय संगठनं हे गुथि विधेयकया आन्दोलनया नेतृत्व याःगु खःसा आन्दोलन निष्कर्षय् थ्यनीगु महर्जनया दावी खः ।

थुगु हे मुनां महासंघ गठनया आवश्यक तयारीया ज्या न्ह्याकावनेत मनोज नेवाःया कजिसुइ न्हय्म्ह दुजःया नेवाः जातीय महासंघ तयारी समिति नं गठन याःगु दु । लिसें, नखःचखलय् नेवाः समाज दुने एकरुपता हयेत थुगु हे तयारी समितिपाखें नेपाल पंंचाङ्ग निर्णायक समितिलिसे सहलह तच्वयेकेगु निर्णय नं मुनां याःगु दु ।

देय् यकं थौं मंगलवाः संक्रमित पुष्टि जूपि १ हजार ७९० म्ह दु।

थ्व नाप आःतक नेपालय् कोरोना संक्रमित जूपि २ लाख २४ हजार ७८ म्ह थ्यःगु दु।

२४ घण्टाया  दुने २ हजार ७९१ म्ह कोरोना संक्रमणपि डिस्चार्ज जूगु दु। नेपालय् थ्व नाप डिस्चार्ज जूपि २ लाख ४ हजार ८५८ म्ह थ्यःगु दु।

अथेहे २४ घण्टाया दुने कोरोना संक्रमणं २४ म्ह मन्त।

थ्व नाप आःतक सीपिनिगु ल्याः १ हजार ३६१ म्ह थ्यःगु दु।