Display Style:
Column Style
दिल्ली लिगया क्वालिफायरय् थ्यन
कौलागा तृतिया ११४०,कार्तिक १८ मंगलवाः
दिल्ली क्यापीटल इन्डियन प्रिमियर लिग (आईपीएल)या क्वालिफायरय् थ्यःगु दु।
अबुधाबीया शेख जायद रंगशालाय् सोमवाः जूगु कासाय् रोयल च्यालेन्जर्स बैंगलौरयात खुगु विकेटं बूका १६ ल्याः हया दिल्लीं क्वालिफायर यात्रा सुनिश्चित याःगु दु।
बैंगलौरं बिःगु १५३ रनया लक्ष्य दिल्लीं प्यःगु विकेटया क्षतिइ १९ गू ओभरय् पुरा याःगु खः।
अंक तालिकाय् शीर्ष स्थानय् थ्यःगु मुम्बई इन्डियन्स व दिल्लीया दथुइ वइगु बिहीवाः दुबई अन्तराष्ट्रिय क्रिकेट मैदानय् क्वालिफायर–१ य् प्रतिस्पर्धा याइ। विजेता फाइनल प्रवेश याइसा बूगु टीमं इलिमिनिटर विजेताया दथुइ म्हितीइ।
दिल्ली नाप बूगु बैंगलौर न प्लेअफया थाय् सुरक्षित याःगु दु। कोलकाता नाइट राइडर्स नाप समान १४ अंक हया नेट रन रेटया आधारय् बैंगलोर स्वगू थासय् थ्यःगु दु।
बैंगलौरं शुक्रवाः कोलकाता व सनराइजर्स हैदरावाद मध्ये छगू टीम नाप अबुधाबीइ इलिमिनिटरय् म्हितीइ।
प्लेअफय् थ्यःगु मंगलवाः हैदरावादं शीर्षस्थानय् च्वंगु मुम्बईयात बुकेमाः। मुम्बई न हैदरावादयात बुकुगु अवस्थाय् धाःसा कोलकता प्लेअफय् थ्यनिइ।
१२–१२ अंक हया किंग्स इलाभेन पञ्जाब, चेन्नाई सुपर किंग्स व राजस्थान रोयल्स धाःसा प्लेअफं पिहा वने धुकुगु दु।
जित सफल व असफल दयेकेगु जिम्मा मिडिया जुइ :मन्त्री श्रेष्ठ
नृपेन्द्रलाल श्रेष्ठ | कौलागा द्धितिया ११४०,कार्तिक १७ सोमवाः
शहरी विकासमन्त्री कृष्णगोपाल श्रेष्ठं थतः सफल व असफल दयेकेलि महत्वपुर्ण जिम्मेवारी सञ्चारमाध्यम जुइ धका धयादिगु दु। मन्त्रालयया जिम्मेवारी कघाय् धुका थौं नेपाल मिडिया सोसाइटीया पदाधिकारीपि नाप भेटघाटय् वयकलं ज्याया आधारय् मुल्याकन यायेत इनाप याःगु दु।
‘जि व जि कःघायाःगु मन्त्रालयय् अधिकारीया ज्याया आधारय् जक मुल्याडकन याना सत्य तथ्य समाचार संप्रेषण यायेत इनाप याःगु दु– जिगु ज्याया बारेय् छिकपिनिगु जानकारी हे दु, सरकार व आम जनतां अपेक्षा याःगु कथं ज्या यायेगु बचं बियादिगु दु।
‘जि छिकपिनिगु बलय् दः वयाच्वनागु दु, जित थथे लगेजु कि आः मिं क्वब्वाना च्वनागु दु अन थहा वयेत स्वयाच्वनागु दु धका धयादिसे थुकि थकायेगु जिम्मा छिकपिनिगु न खः। जि थ्व धाय्
चाहे जुयागु दु आः छिकपिनिगु मतिनाया बलय् दनाच्वनागु दु, थ्व लुमकि कि जि छिकपिनिगु प्रतिनिधि खः–थीथी सञ्चारमाध्यमया प्रमुखपि नाप लायेगु झ्वलय् थथे धयादिगु खः।
उगु झ्वलय् नेपाल मिडिया सोसाइटीया अध्यक्ष शुभ शंकर कडेलं सकरात्मक ज्याय् मिडिया न्ह्यावलय् समर्थन दकइ धका धयादिसे आलोचनात्मक समाचारया विषयय् सरकारं तत्काल टिप्पणी याये मज्यु धका धयादिगु खः।
सोसाइटीया पुर्व अध्यक्ष कैलाश सिरोहियां आः नेपालयात न्हुगु नेपाःया रुपमा विकास यायेमाः धका धयादिगु खः। अथेहे सोसाइटीया महासचिव मदन लम्सालं न्हुगु देय् गये याना विकास
यायेगु, गये याना बालागु शहर दयेकेगु बिचाः याना न्ह्यने वने माःगु धका धयादिगु खः।
नेपाल समाचारपत्रया प्रबन्ध सम्पादक दिरेकलाल श्रेष्ठं जनतानाप तपिक सम्बन्ध स्थापित यायेगु मन्त्रालय जुगुलि जनताया हित अनुकुल ज्यायायेगु तधःगु अवसर खः धका धयादिगु खः। उगु ज्याझ्वलय् सोसाइटीया सचिव शुसिल भट्ट, जनकराज पन्त लगायतयापिनिगु उपस्थिति दुगु खः।
न्हुदँया लसताय् जनकवि दुर्गालालया म्ये पिदनीगु
नृपेन्द्रलाल श्रेष्ठ | कौलागा द्धितिया ११४०,कार्तिक १७ सोमवाः
नेपाल संवत राष्ट्रिय न्हूदँ समारोह समिति ११४१ या ग्वसालय् नेपालभाषा मंकाः खलःया नायःलिसें जनकवि दुर्गालाल श्रेष्ठया भिंतुना म्ये पिदनीगु जूगु दु।
न्हूदँया लसताय् हलिंन्यंकं न्हूदँ हनेत व भिंतुना देछायेगु कथं थथे जनकवि श्रेष्ठया म्ये पिदनेत्यंगु खँ समारोह समितिं धाःगु दु।
उगु म्ये मंकाःम्ये जुइगु कथं समारोह समितिं तयारी यानाच्वंगु जानकारी ब्यूगु दुसा लिसें म्यूजिक भिडियो दयेकेगु ज्या नं जुइगु जानकारी ब्यूगु दु।
थुगु दँया न्हूदँ कोरोना भाइरसया महामारीया हुनिं सामाजिक संजालपाखें भिंतुना देछायेगु कथं थथे भिंतुना म्ये दयेकेगु ज्या जूगु खः।
कान्ति अस्पतालय् येँ महानगरं छगः पीसीआर मेसिन बिल
नृपेन्द्रलाल श्रेष्ठ | कौलागा द्धितिया ११४०,कार्तिक १७ सोमवाः
येँ महानगरपालिकां कान्ति बाल अस्पतालय् छगः पीसीआर मेसिन हस्तान्तरण याःगु दु। येँ महानगरपालिकानाप भगिनी सम्वन्ध स्थापित चीनया नानजिङ सहरं बिःगु निगः मध्ये छगः पीसीआर मेसिन कान्ति बाल अस्पतालयात लःल्हागु दु।
येँ महानगरपालिकाया मेयर विद्यासुन्दर शाक्यया उपस्थितिइ प्रमुख प्रशासकीय अधिकृत राजेश्वर ज्ञवाली व अस्पतालया पाखे निर्देशक डाक्टर कृष्ण पौडेलं सम्झौतापत्रय् हस्ताक्षरय् उगु मेसिन हस्तान्तरण याःगु खः। करीब १६ लाख तूगु मेसिन हस्तान्तरण लिपा सम्वोधन यासे मेयर शाक्यं गुलि फु उलि हे याकन मेसिन जडान याना सेवा सुरु यायेत अस्पतालयात इनाप याःगु दु। ‘भगिनी सम्वन्ध स्थापित दुगु थीथी नगरपिन्सि येँ महानगरपालिकायात कोभिड–१९ रोकथाम व नियन्त्रणया लागि बिःगु छु अत्यावश्यक स्वास्थ्य सामाग्री चरणबद्ध रुपं झीसं सरकारी अस्पतालयात लःल्हाना वया च्वनागु दु धका धाःगु खः।
मेयर शाक्यं, ‘सेवा सू बिःगु स्वया दक्को मिले जुया सेवा बिइमाः धइगु मान्यतां झीपिन्स अत्यावश्यक सामग्री विरामीया अप्वो चाप दुगु अस्पतालयात हस्तान्तरण याना वयाच्वनागु धका धाःगु खः। थ्व स्वगू चरणया हस्तान्तरण ज्याझ्वः खः।
शाक्यं थ्व स्वया येँ महानगरपालिकां थापाथली च्वंगु परोपकार प्रसूति तथा स्त्री रोग अस्पतालय् कोरोना (कोभिड १९) परीक्षणया लागि पीसीआर मेसिन नाप अत्यावश्यक सामग्री हस्तान्तरण यानागु जानकारी बिःगु खः।
‘कान्ति बाल अस्पतालयात न पीसीआर मेसिन हस्तान्तरण यानागु थ्व प्रारम्भिक चरण खः,’ वयकलं, ‘छिकपिन्स वासः याना च्वपि मस्तय्त बालाक्क सेवा बियादिसँ धका धयादिसे येँ महानगरं मेगु हाकन ग्वाहालि यायेत तयार दु धका धयादिगु खः। महानगरपालिकायात अनुदान कथं वःगु सामाग्री मध्ये छु सामाग्री निगु अस्पतालय् बिःगु खः।
कोरोना २४म्ह मन्त
लहानान्युज | कौलागा द्धितिया ११४०,कार्तिक १७ सोमवाः
नेपालय् कोरोना संक्रमणं २४ घण्टाया दुने थप २४ म्ह सीगु दु धका स्वास्थ्य तथा जनसंख्या मन्त्रालयं औपचारिक रुपं पुष्टि जूगु दु।
थ्व नाप कोरोना संक्रमणं सीपि ९८४ म्ह थ्यःगु दु धका धाःगु दु।
