Display Style:
Column Style
संक्रमितपिन्त प्रोत्साहन बिःगु हे दकलय् तधःगु वासः खः मेयर विद्यासुन्दर शाक्य
नृपेन्द्रलाल श्रेष्ठ | कौलाथ्व पुन्हि ११४०,कार्तिक १५ शनिवाः
येँ महानगरपालिकाया मेयर विद्यासुन्दर शाक्यं कोरोना संक्रमणया कारण गम्भीर बिरामी जुपिन्त प्लाज्मा थेरापी मार्फत जीवन बचे यायेत ग्वाहालिया नितिं ‘प्लाज्मा दान’ बिइत इनाप याःगु दु।
छु ई न्ह्य जक कोरोनामुक्त जुया आः स्वस्थ जुम्ह मेयर शाक्यं कोरोनाया गम्भीर बिरामी जूपिन्त बचे यायेगु लागि थःम्हेसिया न प्लाज्मा दान बिइत तयार दुगु धका धयादिसे थज्यागु ज्या मेपिन्स न ग्वाहालि यायेत इनाप याःगु दु।
‘जितः कोरोना संक्रमण जुगु छु दिं लिपा हे थः जहान व म्ह्याय् यात न कोरोना पोजेटिभ खनेदुगु। आः जिपि दक्को स्वस्थ जुइ धुकूदु धका धयादिसे,’ मेयर शाक्यं ‘म्ह्याय् पलिस्था शाक्यं म्हिगः जक कान्तिपुर अस्पताल तीनकुनेय् वना ‘प्लाज्मा दान’ बिःगु दु धका धयादिगु दु।’
कोरोनाया कारण गम्भीर बिरामी जूपिनिगु जीवन बचे यायेत प्लाज्मा थेरापीं उपचारय् तधःगु ग्वाहालि जुइगु व संक्रमणमुक्त जुइ धुकूपिन्स ‘प्लाज्मा दान’ बिइत प्रोत्साहन यायेगु उदेश्यं परिवारपाखे हे प्जाज्मा बिइगु सुरुवात यानागु दु धका शाक्यं जानकारी बियादिगु दु।
पलिस्था शाक्यं दान याःगु प्लाज्मापाखे कोभिड व निमोनियाया कारण विरामी जूपि ओम नर्सिङ होमय् वासः याना वयाच्वम्ह येँ महानगरपालिका वडा–४ या ७६ दँ दुम्ह मिसायाःगु वासः जुयाच्वंगु दु।
‘स्वनिगः नाप येँ महानगरपालिका लिपागु इलय् वया कोरोनाया हटस्पट जुया वयाच्वंगु दु। थज्यागु इलय् संक्रमण लिपा स्वस्थ जीवनय् लिहावःपिन्स स्वस्थ मनू तयेगु प्जाज्मा दान बिउसा यक्कोसिया ज्यान बचे जुइ धका धयादिसे मेयर शाक्यं, ‘कोरोना संक्रमित धइगु सू सूयात न दुव्र्यवहार मयायेत इनाप याःगु दु। संक्रमितपिन्त सकसिया प्रोत्साहन बिःगु हे दकलय् तधःगु वासः खः।’
वयकलं आः महानगरपालिकाय् थीथी वडापाखे संक्रिमितपिन्त प्रोत्साहन बिइ कथं फलफुल, मास्क, आर्योवेदिक वासः लगायतया सामाग्री बिउ वनेत जनप्रतिनिधिपि होम आइसोलेसन व आइसोलेसनय् वनेगु जानकारी बियादिगु दु।
न्हुँ दँ हनेत सहलह
लहानान्युज | कौलाथ्व पुन्हि ११४०,कार्तिक १५ शनिवाः
कोरोना महामारीया हुनिं नेपाःया मौलिक राष्ट्रिय सम्बत् नेपाल सम्बत् ११४१ न्हूदँया लसताय् देय ्न्यंक तःजिक हना वयाच्वंगु साँस्कृतिक ¥याली व सभा समारोह ज्याझ्वः लिच्वः लाइगु खनेदुगु दु ।
थ्व हे झ्वलय् थुगुसिइया न्हूदँ देय् न्यंक छगू हे दिं छगू हे बिधि कथं छगू हे नारा व सन्देश ज्वनाः हनेगु लकस दयेकेगु नितिं सहलह जुइ त्यंगु खँ नेपाल संवत न्हूदँ राट्रिय समारोह समिति ११४१ ब्यबस्थापन समितिं ब्यूगु दु।
समितिं ब्यूगु जानकारी कथं थ्व बिषययात कयाः कन्हय् कौलागा पारु आइतबाः नेवाः देय् दबू, नेपालभाषा मंका खलः येँ, नेपालभाषा मंका खलः यल, नेपाल संबत न्हूदँ राष्ट्रिय समारोह समिति, शंखधर साख्वा प्रतिष्ठान लगायतया खलः पुचः लिसें नेपाल संबत आन्दोलनया न्ह्यलुव पिनिगु दत्थुइ भर्चुअल सहलह मुँज्या च्वनाः मंकाः बक्यब्य पिथंनेगु तयारी यायेगु खँ धाःगु दु।
नेपाल संवत् ११४१ हनेत समारोह समिति नीस्वंगु दु
लहानान्युज | कौलाथ्व चतुर्दशी ११४०,कार्तिक १४ शुक्रवाः
नेपाल संवत् ११४१ या न्हूदँ दच्छियंकं थीथी ज्याझ्वः यानाः हनेत समारोह समिति नीस्वंगु दु ।
रमेश महर्जनया नायःसुइ ‘नेपाल संवत् न्हूदँ राष्ट्रिय समारोह समिति ११४१’ नीस्वंगु खँ समितिं शुक्रवाः छगू विज्ञप्ति पिथनाः समितिं जानकारी ब्यूगु दु ।
कोरोना संक्रमणया जोखिम दुगुलिं भेला सःतेगु अवस्था मदुगुलिं वंगु दँया न्हूदँ समारोह समितिया हे दुजः व प्रतिनिधितय्त दुथ्याकाः न्हूगु समितियात निरन्तरता बियागु खँ नायः महर्जनं जानकारी बियादीगु दु ।
नायः महर्जनं बियादीगु जानकारी कथं वंगु असोज १२ गते च्वंगु समितिया मुँज्यां समितिया सल्लाहकार एवं सांस्कृतिक, सम्पदा व सामाजिक अभियन्तापिनि सल्लाहकथं न्हूगु समिति नीस्वनेगु निर्णय याःगु खः । समितिइ दुथ्याःगु खलःपुचःतय्सं थःपिनि प्रतिनिधि हिलाबुला यायेफइगु व वंगु दँय् दुमथ्याःगु खलःपुचलं थुगुसी थःपिनि प्रतिनिधि दुथ्याकेफइगु निर्णय नं मुँज्याय् जूगु विज्ञप्तिइ न्ह्यथनातःगु दु ।
नेपाल संवत् उत्सव जक मखसे सांस्कृतिक जागरण नं जूगु विज्ञप्तिइ न्ह्यथनातःगु दु । विज्ञप्तिइ न्ह्यथनातःगु दु, “नेपाल संवत् हनेगु उत्सव जक मखसे सांस्कृतिक जागरण अभियान लिसें राज्यया सांस्कृतिक नीतिइ हस्तक्षेप यायेगु आन्दोलन नं खः । लिसें नेपाल संवत् आन्दोलनया प्रवर्तक मदुम्ह पद्मरत्न तुलाधरयात लुमंकुसे वय्कलं क्यंगु सांस्कृतिक एकता व राष्ट्रियता प्राप्तिया लँपुइ न्ह्याःवनेगु संकल्प यायेगु नं खः।”
देय्या हे नामय् नेपाल संवत् नीस्वनादीम्ह शंखधर साख्वाःयात राज्यं राष्ट्रिय विभूति घोषणा यायेधुंकूगु व नेपाल संवत्यात राष्ट्रिय संवत् घोषणा यायेधुंकूगु नेपाल संवत्या आन्दोलनया सफलता जूगु विज्ञप्तिइ न्ह्यथनातःगु दु । तर आः नं सरकारी ज्याखँय् नेपाल संवत्यात छ्ययेकेत, नेपाली राष्ट्रियता ल्वय्क संवत्यात कयाः माःकथंया नीति दयेकेत सरकारयात बाध्य यायेत, देय्या दक्व जनजातिया सांस्कृतिक नखःचखःतय्त समानताया आधारय् समान सरकारी व्यवहार याकेत थ्व आन्दोलनया औचित्य ल्यं दनीगु नं विज्ञप्तिइ न्ह्यथनातःगु दु ।
कोरोना महामारी ल्यना हे च्वंगु इलय् नेपाल संवत् ११४१ या न्हूदँया समारोह गुकथं हनेगु खः थ्वयात कयाः नेपाल संवत् आन्दोलनया न्ह्यलुवाःपिं व खलःपुचःनाप सहलह ब्याकाः याकनं हे निर्णय पितबीगु खँ नं समितिया नायः रमेश महर्जनं विज्ञप्तिइ न्ह्यथनादीगु दु।
देय् यकं ३५१७ म्हेसित कोरोना भाइरस संक्रमण पुष्टि
लहानान्युज | कौलाथ्व चतुर्दशी ११४०,कार्तिक १४ शुक्रवाः
वःगु २४ घण्टाया दुने देय् यकं ३५१७ म्हेसित कोरोना भाइरस संक्रमण पुष्टि जूगु दु।
स्वास्थ्य तथा जनसंख्या मन्त्रालयया कथं १४ हजार ९८९ म्हेसिगु परीक्षण याःगुलि २१५६ म्ह मिजंपि व १३६१ म्ह मिसापियाना ३५१७ म्हेसित संक्रमण पुष्टि जूगु दु धका धाःगु दु। थ्व नाप नेपालय् कोरोना भाइरस संक्रमितपि आःतक १ लाख ६८ हजार २३५ म्ह थ्यःगु दु।
थौं सक्रमित जूपि येँ १५०८म्ह, यलय् २४९ म्ह व ख्वपय् १३१ म्हेसित संक्रमण पुष्टि जूगु दु धका मन्त्रालय् धाःगु दु।
अथेहे मोरङय् २५५म्ह, सुनसरी १३७म्ह, चितवनय् १२३म्ह, रुपन्देही १२०म्ह, कास्की ११२म्ह, मकवानपुरय् ८०म्ह, काभेय् ७३म्ह, दाङय् ५१म्ह, बाँकेय् ४१म्ह व नुवाकोटय् ३३ म्हेसित कोरोना सक्रमण पुष्टि जुगु दु।
नवलपरासी पूर्वय् २९म्ह, कैलाली २८ म्ह, दोलखाय् २७म्ह, तनहुँ २५म्ह, सिराहा २४म्ह, धादिङ व बर्दियाय् १९÷१९ म्ह, पसाय् १७म्ह, सप्तरी १६म्ह, धनुषा व रौतहटय् १५म्ह, कञ्चनपुरय् १४म्ह, उदयपुर, गोरखा, स्याङ्जा व दैलेखय् १३, १३ म्हेसित संक्रमण जुगु दु।
सिन्धुपाल्चोक व पर्वतय् १२, १२ म्ह, बाराय् १०म्ह, लमजुङय् ९म्ह, महोत्तरी, गुल्मी व नवलपरासी ८, ८ म्ह, बाग्लुङ, पाल्पा, सुर्खेतय् ७, ७ म्ह, रामेछाप, कपिलवस्तु व जुम्लाय् ६, ६ म्ह, धनकुटा, सर्लाही, सिन्धुली, डडेल्धुराय् ५, ५ म्हेसित संक्रमण पुष्टि जूगु दु।
अथेहे इलाम, खोटाङ, भोजपुर व म्याग्दीइ ४, ४ म्ह, ओखलढुंगा, तेह्रथुम, संखुवासभा, अर्घाखाँची व जाजरकोटय् ३, ३ म्ह, सोलुखुम्बु, कालीकोट व डोटी निम्ह निम्ह, पाँचथर, रोल्पा, रुकुम पूर्व, हुम्ला, सल्यान, हुम्ला, दार्चुला व बझाङय ्छम्ह छम्हेसित संक्रमण पुष्टि जुगु दु।
येँ १५०८ म्ह नाप स्वनिगलय् १८८८म्ह सक्रमित जुगु दु
लहानान्युज | कौलाथ्व चतुर्दशी ११४०,कार्तिक १४ शुक्रवाः
वःगु २४ घण्टाया दुने स्वनिगलय् १८८८ म्हेसित कोरोना भाइरस संक्रमण पुष्टि जूगु दु।
स्वास्थ्य तथा जनसंख्या मन्त्रालयया कथं थौं येँ जक १५०८म्हेसित कोरोना सक्रमण जूगु दु धका धाःगु दु।
अथेहे यलय् २४९ म्ह व ख्वपय् १३१ म्हेसित कोरोना संक्रमण पुष्टि जूगु दु।
थौं शुक्रवाः देय् यकं ३५१७ म्हेसित कोरोना संक्रमण पुष्टि जूगु दु।
थ्व नाप येँ दुने जक संक्रमितपि ६० हजार ७४२ म्ह थ्यःगु दु। उकि मध्ये ४४ हजार २८८ म्ह छेँय् लिहा वने धुकुगु दु। अथेहे २१२ म्ह सी धुकुगु दु। सक्रिय संक्रमितपि १६ हजार २४२ म्ह दु धका धाःगु दु।
अथेतु यलय् कुल संक्रमितपि ८५९९ म्ह थ्यःगु दु। उकि मध्ये ६१९६ म्ह छेँय् लिहा वनेधुकुगु दु। अन सीपि ५८ म्ह थ्यःगु दु। सक्रिय संक्रमितपि २३४५ म्ह दु।
ख्वपय् ५६५० म्ह संक्रमित जुगु दु सा ४ हजार ४२२ म्ह छेँय् लिहा वने धुकुगु दु। अन ६३ म्ह सी धुकुगु दु। सक्रिय संक्रमितपि आःतक ११६५ म्ह दु धका मन्त्रालयय् धाःगु दु।
