बुद्ध धर्मसम्बन्धी उत्कृष्ट च्वसु च्वयादिउपिं च्वमि उपप्राध्यापक डा. त्रिरत्न मानन्धर, पत्रकार हिमेश रत्न बज्राचार्य व शोभानानी शाक्ययात शनिबाः पञ्चवीर सिंंह सिरपाः लःल्हायेगु ज्याः जुल ।

नेपाल भाषा टाइम्सय् दँ न्यंकं पिदंगु उत्कृष्ट बौद्ध च्वसुया लागि छम्ह मिजं व छम्ह मिसा च्वमियात युवा बौद्ध समूह, यँे पाखें थ्व सिरपाः लःल्हाना वया च्वंगु दु । लोचनतारा तुलाधर व सहप्राध्यापक मदन रत्न मानन्धर दुथ्यागु निर्णायक पुचलंं बुद्ध संवत २५६२ दँय् उपप्राध्यापक डा मानन्धरया ‘धर्म गुबले यायेगु ?’ शीर्षकया च्वसुयात उत्कृष्ट ठहर यागु खः ।

अथे हे डा. गौतमवीर बज्राचार्य व धर्मसुन्दर बज्राचार्य दुथ्यागु निर्णायक पुचलं बुद्ध संवत् २५६३ दँय् पत्रकार बज्राचार्यया ‘बुद्ध झीथाय् गुबले वल ?’ शीर्षकया च्वसु व शाक्यया ‘बुद्धधर्मया महायान चर्याय् चतुर्निंवृत्ति अभ्यासया महत्व’ शीर्षकया च्वसुयात उत्कृष्ट घोषणा यागु खः ।लेखनया माध्यमं नेपाल भाषा व साहित्यया श्रीवृद्धि व बुद्ध धर्मया प्रवद्र्धनय् उल्लेख्य योगदान बिउपिं च्वमितय्त पुरस्कृत यायेत पञ्चवीर सिंह तुलाधरं थ्व सिरपाः स्वनादिउगु खः ।

सिरपाया राशि रु ११,१११÷– तकाया खः । समूहया नायः मदन बहादुर तुलाधरया सभापतित्वय् थनया गणमहाविहरय् जुगु ज्याझ्वलय् अखिल नेपाल भिक्षु महासंघया मू छ्यान्जे भिक्षु कोण्डन्य महास्थविरंं सिरपाः लःल्हानाबिज्यागु खः । ज्याझ्वलय् ‘ईलोहँ पञ्चवीर परियत्ति सिरपा’ रुबी शाक्ययात लःल्हायेगु नं ज्याः जूगु खः।

वःगु २४ घण्टाया दुने कोरोना संक्रमणया कारण निम्ह सीउगु दु। थ्व नाप आःतक नेपालय् कोरोनाया कारण सीपि २ हजार ३८ म्ह थ्यःगु दु।

अथेहे वःगु चौबीस घण्टाय् २२५१ म्हेसित पीसीआर परीक्षण याःगुलि ११९ म्हसिगु रिपोर्ट पोजेटिभ वःगु दु । थ्व नाप नेपालय् कोरोना संक्रमितपि निगु लाख ७१ हजार ९२५ म्ह थ्यःगु दु ।

अथेहे वःगु २४ घण्टाय् २६० म्ह संक्रमणमुक्त जुगु दु । थ्व नाप आःतक देशय् कोरोनामुक्त जूपि निगु लाख ६८ हजार ७२ म्ह थ्यःगु दु ।

आःतक क्वारेन्टिनय् ९२ म्ह व आइसोलेसनय् १८१५ म्ह च्वना च्वंगु दु धका स्वास्थ्य तथा जनसंख्या मन्त्रालयं धाःगु दु ।

नेपाल स्टक एक्सचेन्ज (नेप्से)य् चन्द्रागिरि हिल्सया कारोबार सुरु जुगु दु।

वःगु शुक्रवाः नेप्सेय् सूचीकृत जुगु कम्पनीया सेयर थौं नेप्सेया स्पेसल–प्रि ओपन सेसनय् १६१ रुपैयाँय् न्हापागु कारोबार जुगु खः । नेप्सें कम्पनीया न्हापागु कारोबारया लागि प्रतिकित्ता ९६ रुपैयाँ ६९ पैसा निसे २९० रुपैयाँ ७ पैसा तक ओपनिङ रेन्ज तोके याःगु खः ।

नेप्सें सूचीकृत कम्पनीया न्हापागु कारोबारयो लागि लिपागु आर्थिक वर्षया अडिटेड वित्तीय विवरणया आधारय् नेटवर्थ निसे नेटवर्थ स्वगु गुणा तक ओपनिङ रेन्ज तोके याःगु खः। उगु कथं प्रिओपनिङ सेसनया कम्पनीे सेयर १६१ रुपैयाँ न्हापागु कारोबार जूगु खः ।

१६१ रुपैयाँय् न्हापागु कारोबार जुसा कम्पनी सेयर खरिद चाप दुसां मिइपि धाःसा शून्य दु ।

सरकारं कन्ह्यनिसे निगु चरणया खोप लगे यायेगु सुरु जुइगु दु । निगु चरण खोपया लागि दूतावास, यूएन एजेन्सीया कर्मचारी व पत्रकारपिन्त प्राथमिकताय् तःगु दु धका स्वास्थ्य मन्त्रालयाया प्रवक्ता डाक्टर जागेश्वर गौतमं धाःगु दु।

वयकःया कथं येँया सिभिल अस्पताल, शिक्षण अस्पताल, सहिद गंगालाल अस्पताल व यलया पाटन अस्पतालय् निगु चरणया खोप बिइगु ज्याझ्वः दु । प्रवक्ता गौतमया कथ सिभिल अस्पतालय् पत्रकारपिन्त, पाटन अस्पतालय् यूएन एजेन्सीइ ज्या याइपि व विदेशी कर्मचारीपिन्त, शिक्षण अस्पताल महाराजगञ्ज व बाँसबारी च्वंगु सहिद गंगालाल अस्पतालय् दूतावास व कूटनीतिक नियोगय् ज्या याइपि नाप विदेशी कर्मचारीया आश्रित मनूतयेत खोप बिइ त्यःगु खः ।

उमित कन्ह्य निसे शुक्रवाः तक खोप बिइगु धका मन्त्रालयं तयारी याःगु दु । खोप कायेत पत्रकारया लागि सूचना विभागपाखे जारी प्रेस प्रमाणपत्र अनिवार्य याःगु दु। खोपया लागि न्हापागु चरणया थे अनलाइनमार्फत सूचीकृत धाःसा यायेम्वाः धका मन्त्रालयं धाःगु दु । थ्व बाहेक मेपिन्त न खोप बिइत थौैं सहलह यायेगु निर्णय यायेत तयारी जुयाच्वंगु दु धका प्रवक्ता गौतमं धाःगु दु ।

थौं सुथय् येँया पुतलीसडकय् मिँ नःगु दु ।

येँया पुतलीसडक चोकय् विद्युतीय पोलय् मिँ च्याःगु धका प्रहरीं धाःगु दु। प्रहरीया कथं विद्युत सर्ट जुया अन मिँ च्याःगु धका धाःगु खः ।

मिँ च्याना मेगु छु न क्षति धाःसा मजुगु धका प्रहरीं धाःगु दु ।