मन्त्रिपरिषद् बैठक जुयाच्वंगु दु। प्रधानमन्त्री लिसे मन्त्रिपरिषदया कार्यालयय् छु ई न्ह्यःनिसे मन्त्रिपरिषद् बैठक जुयाच्वंगु दु।

थौ च्वंगु बैठकय् कर्मचारी सरुवा लगायत मन्त्रालयगत नियमित एजेण्डाय् सहलह यायेगु तयारीइ दु।

म्हिगः च्वनिइ धका धाःगु बैठकय् प्रधानमन्त्री केपी शर्मा ओली अस्वस्थ जुइवं स्थगित जुगु खः।

विस्थापित प्यालेस्टाइनीत दुगु शिविरय् इजरायलं याःगु आक्रमणय् १५ म्ह मनूत सीगु दु। शिविर दूगु निगू स्कूलय् जूगु आक्रमणय् लानाः मेपिं ३० म्ह घाःपाः जूगु दु।

अथे हे अन्तर्राष्ट्रिय समाचार संस्था अल जजीरां नं इजरायलं गाजा, राफाह, पश्चिमी तट लगायतया क्षेत्रय् निरन्तर आक्रमण यानाच्वंगु बुखँ पिथंगु दु। प्यालेस्टाइनय् नं राहत वितरणय् पंगः वयाच्वंगु दु।इजरायलयात आक्रमण मदिइ धुंकाः अन्तर्राष्ट्रिय ख्यलं व्यापक आक्रोश व आलोचना जूगु खः।

प्यालेस्टाइनय् राहत वितरणय् अवरोध जूगु सम्बन्धय् अन्तर्राष्ट्रिय न्यायालयया राय थुइकेगु पक्षय् संयुक्त राष्ट्र संघया महासभाय् मतदान जुइगु समाचारय् उल्लेख यानातःगु दु। अथे हे अमेरिकी विदेशमन्त्री एन्थोनी ब्लिंकेनं नं न्हूम्ह निर्वाचित राष्ट्रपति डोनाल्ड ट्रम्पं साउदी अरब व इजरायल दथुइ स्वापू सामान्य यायेगुलिइ रुचि तइगु आशा यानागु खँ धयादीगु दु।

इजरायलं थ्व आक्रमणयात निरन्तरता बियाच्वंगु इलय् स्पेनयात नं इजरायलयात प्रतिबन्ध तयेगु दबाब वयाच्वंगु दु। अनया मू प्यंगू दलं इजरायल विरुद्ध प्रतिबन्ध तयेगु निंतिं सरकारयात दबाब बिउगु दु।

थौं पुलांम्ह राष्ट्रपति विद्यादेवी भण्डारीयात स्याङ्जाया थीथी थासय् लसकुस याःगु दु।

कालीगण्डकी गाउँपालिकाय् च्वंगु लोकंह्वाःगु धार्मिक थाय् आलमदेवीया दर्शन व अवलोकनया निंतिं थौं स्याङ्जा थ्यंकादीम्ह पुलांम्ह राष्ट्रपति भण्डारीयात स्याङ्जा व कास्कीया सिमाना फेदीखोलानिसें पुतलीबजाः, भिरकोट, वालिङ, गल्याङ व कालीगण्डकीइ च्वंपिं स्थानीयतय्सं लसकुस याःगु खः। सतकमार्ग जुयाः थन झायादीम्ह पुलांम्ह राष्ट्रपति भण्डारीयात जिल्लाया थीथी थासय् मनुतय्सं स्वांमालं क्वखायेकाः बाजं थानाः लसकुस याःगु खः।

भण्डारीं थौ न्हिनय् शाह वंशया कुलदेवता दूगु आलमदेवी देगलय् पूजा यानाः अवलोकन यानादीगु ज्याझ्वः दु धकाः कालीगण्डकी गाउँपालिका स्याङ्जाया नायः खिमबहादुर थापां धयादिल।

“पुलांम्ह राष्ट्रपति भण्डारी आलमदेवी देगलय् पूजा यायेगु नापं थ्व थाय्या अवलोकन यायेया निंतिं झायादीगु खः”, वय्कलं धयादिल, “द्यः पूज्यायेगुया निंतिं जक झायादीगुलिं औपचारिक ज्याझ्वः ग्वसाः ग्वया तःगु मदु।”(रासस)

मध्यपुरथिमि नगरपालिका–७ नगदेशस्थित गणेश द्यःया थाय् नवदुर्गा प्याखँ क्यनिइगु जुगु दु।थौ बालकुमारीपाखे नगदेश दुकया नवदुर्गायात विशेष पूजा नापं द्यः ब्वोकेगु याइ।

नगदेशं बाजं थाना बासा लाना लसकुस याना नगदेशय् दुकायेगु याइ।

 सञ्चार लिसे सूचना प्रविधिमन्त्री पृथ्वीसुब्बा गुरुङं मन्त्रालयं देयन्यक इन्टरनेट व टेलिफोन सेवा विस्तार यायेगु अभियानय् वनाच्वनागु दु धका धयादीगु दु।

थौ लमजुङया मालिङय् क्व्होलासोथार गाउँपालिकाया प्रशासकीय भवन व मालिङ प्राथमिक अस्पतालय् न्हुगु भवनया उलेज्या यानादीसे मन्त्री गुरुङं नेपाल सरकारं डिजिटल फ्रेमवर्कया उद्देश्य पूरा यायेगु सुरुआती थाय् कथं लमजुङयात कयागु थन या छेँ छेँय् इन्टरनेट व टेलिफोन सेवा थ्यकिइगु जुइ धका धयादीगु खः।

जिल्लाय् थुगु दँय् दुने हे सूचना प्रविधिमैत्री दयकेगु जुइ धका धयादीगु खः। इन्टरनेट व टेलिफोन सेवा विस्तारलिपा थन याःगु सरकारी कार्यालयय् सूचना प्रविधिपाखे सेवा प्रदान यायेगु आधुनिक प्रशासन प्रणालीइ बःबिइगु धका मन्त्री गुरुङं धयादीगु खः।

आः याःगु ई सूचना प्रविधि जुगुलि विद्यालय शिक्षा प्रविधियुक्त दयकेत लमजुङय् दक्को समुदायिक विद्यालयय् कम्युटर ल्याब उपलब्ध यायेगु धका धयादीगु खः।आः झीगु १० सामुदायिक विद्यालयय् झीगः झीगः कम्पुटर उपलब्ध याके धुकगु दु धका वयकलं जानकारी बियादीगु खः।