Display Style:
Column Style
कार्तिक ७ गते तक विदेशी च्यानल क्लिन फिड जुइमाः
लहानान्युज | अनलागा १२ ११४०,असोज २८ बुधवाः
सरकारं वइगु कार्तिक ७ गते तक विदेशी च्यानल क्लिन फिड (विज्ञापनमुक्त) जुइमाः धका धाःगु दु। विज्ञापन नियमन यायेगु सम्बन्धय् व्यवस्था यायेगु लागि दय्कुगु ऐन २०७६ विदेशी टेलिभिजन च्यानलयात कार्तिक ७ गतेतक क्लिन फिड जुइमाःगु दु।
सूचना तथा सञ्चार प्रविधि मन्त्रालयं छगु सूचं जारी यासे भारतीय ब्राडकाष्टर्स फोरम, डिस्कभरी नेटवर्क्स, बीबीसी न्युज, नेपाल केबल टेलिभिजन महासंघ थे जाःगु संघसंस्थापाखे क्लिन फिड प्रसारणया म्याद थपे यायेगु ध्यानाकर्षण याःगु दु।
मन्त्रालयं ऐनया मर्म व भावना कथं हे क्लिफिडसहितया च्यानल प्रसारण यायेत इनाप याःगु दु। अथे मजूसा कानून बमोजिम जुइ धका मन्त्रालयं धाःगु दु।
कात्तिक ७ गते लिपा नेपालय् प्रसारण जुइगु विदेशी च्यानलय् विज्ञापन क्यने दइ मखु। थुुकि अटेरी जूसा अज्यागु च्यानल बन्द यायेगु कानुनी व्यवस्था दु।
सूचना प्रविधि तथा सञ्चार मन्त्रालयं क्वछिगु इलय् तक क्लिन फिड लागू जुइ धका धाःगु दु। २०७५ कात्तिक ८ गते राजपत्रय् प्रकाशित ऐनं क्लिन फिडय् वनेगु सेवा प्रदायकपिन्त दच्छिया ई
बिःगु खः। उगु ऐनय् धाःगु दु ऐन लागु जुसानिसे विदेशी च्यानलनाप डाउनलिङ्क याना प्रसारण यायेगु सम्झौता याये धुकुगु संस्था तयेस ऐन प्रारम्भ जूगु दच्छिया दुने विज्ञापनरहित प्रसारण यायेमाः।
भारतीय प्रसारकं नेपालय् हे क्लिन फिड याइगु जुगुलि विज्ञापन क्यनेगु इल्य् स्क्रिन खाली जुइ उगु इलय् नेपालया हे विज्ञापन तये दये माःर्गु माग नेपाली टेलिभिजन सेवा प्रदायकपिन्स याःगु खः। तर संसदया विकास तथा प्रविधि समितिं नेपाली टेलिभिजनयात प्रवर्द्धन याये माःगु धाःसे क्लिन फिड याःगु विदेशी च्यानलय् नेपालया विज्ञापन क्यने दइ मखु कथं निर्देशन बिःगु दु।
क्लिन फिड लागू जुलकि नेपालय् प्रसारण जुइगु विदेशी च्यानल घटे जुइ। डाउनलिङ्क अनुमति कया जथाभावी च्यानल प्रसारण याना च्वंगुलि आः क्लिन फिड मयागु च्यानल स्वतः रोक याये त्यःगु दु। अप्वो भारतीय च्यानलपिन्स नेपालय् क्लिन फिडय् खर्च याये इच्छुक मदु।
येँ जिल्ला प्रशासन कार्यालय अत्यावश्यकबाहेक दक्को सेवा स्थगित
लहानान्युज | अनलागा १२ ११४०,असोज २८ बुधवाः
येँ जिल्ला प्रशासन कार्यालय न मेगु सूचं मवतले अत्यावश्यक बाहेकया दक्को सेवा स्थगित याःगु दु।
जिल्ला प्रशासन कार्यालयं मेगु सूचं जारी यासे, संक्रमणया जोखिम अप्वोया वःगुलि उगु ज्याकाथिइ ज्यायाइपि प्यम्ह कर्मचारीपिन्त तक कोरोना संक्रमणया पुष्टि जुगुलि नाप सेवाग्राहीपिनिगु
हुलमुल अप्वो याःगु ज्याकूपाखे हे कोभिड–१९ या संक्रमण सेवाग्राहीपिन्त तक फैलै जुइगु जोखिम दुगु कारण मेगु सूचं पिहा मवःतले जिल्ला प्रशासन कार्यालयं आः बियावया च्वंगु सेवा तपशिल बमोजिम जुइ धका सकसित जानकारीया लागि इनाप याःगु दु।
शान्ति सुरक्षा सम्बन्धी सेवा, तपिक निवेदन व उजुरी सम्बन्धी सेवा, मुद्दाया सुनुवाइ सम्बन्धी सेवा व विपद् व्यवस्थापन सम्बन्धी सेवा जक सञ्चालन जुइ धका धाःगु दु।
मनमोहन अस्पतालय् पिसिआर जाँच थौ निसे सुरु
नृपेन्द्रलाल श्रेष्ठ | अनलागा ११ ११४०,असोज २७ मंगलवाः
येँ महानगरपालिका १५ वडा स्वयम्भु च्वंगु मनमोहन मेमोरियल अस्पतालय् थौं छगु ज्याझ्वः दथुइ संघीय सांसद राजेन्द्र पाण्डे पीसिआर चेक यायेगु उलेज्या यानादिगु दु। उगु ज्याझ्वलय् क्षत्रपाटी निःशुल्क चिकित्सालयया अधक्ष डा.मनोजमान श्रेष्ठया पाँहा कथं झायादिगु खः।
थौं कन्ह्ये हलियकं महामारी जुयाच्वंगु नाप येँ न महामारी जुगु कोरना भाइरसया सक्रमणं न्हिया न्हिथं येँ अप्वःया च्वंगुलिे पीसिआर जाँच यायेगु आः मनमोहन अस्पतालय् न न्हायके त्यःगु खः।
मनमोहन अस्पतालय् सरकारं क्वछिगु कथं नीद्धः ध्यवा हे जाँचे यायेगु धका धाःगु दु। अस्पतालं सर्वसाधारणया सुविधायात ध्यानय् तयाः अस्पताल तक वये मफुपिनिगु लागि छेँ छेँ वनाः हे स्वाब संकलन यायेगु तयारी यायेत्यःगु दु
मनमोहन अस्पताल प्रवन्ध निर्देशक धर्मदत्त सुवेदीं थःपिन्स यक्को कुतः लिपा थौं थुगु पिसिआर मेशिन संचालन यायेत ताःलागु दु। जिमिस सरकार क्वछिगु भाः कथं निद्धः ध्यवा सेवा बिइगु व न्हि न्यासः ल्याखं जाँच यायेगु क्षमता दुगु धका धाःगु खः।
किपा सन्देश मुनिकार
ख्वपय् कोरोना प्यम्ह मन्त
लहानान्युज | अनलागा ११ ११४०,असोज २७ मंगलवाः
ख्वपय् छन्हु हे प्यम्ह कोरोना भाइरस (कोभिड–१९) संक्रमितपि सीगु दु। महानगरीय प्रहरी परिसर ख्वपया प्रवक्ताया कथं कोरोना संक्रमण पुष्टि जुया होम आइसोलेसनय् च्वना च्वपि ख्वप नगरपालिका–२ ब्यासीया ९० दँ दुम्ह मदुगु खः।
स्वास्थ्यय् समस्या वया पीसीआर परीक्षण याःगु वयाके सोमवाः कोरोना संक्रमण पुष्टि जुगु खःसा सोमवाः हे चान्ह्य हे मदुगु खः।
केएमसी अस्पताल सिनामंगलय् वासः याका वयाच्वम्ह ख्वप नगरपालिका–१० कमलविनायकया ४५ दँ दुम्ह मिसाम्ह कोरोना संक्रमणं मदुगु दु। सासः ल्ह्यायेगु समस्या वयेवं अस्पताल भर्ना जुगु खः। सोमवाः कोरोना संक्रमण पुष्टि जुगु व मंगलवाः हे मदुगु खः।
अथेहे, सहिद धर्मभक्त राष्ट्रिय प्रत्यारोपण केन्द्र ख्वपय् वासः याका वयाच्वम्ह ख्वपय् मिर्गौला पीडितम्ह महोत्तरी पिपरा गाउँपालिका–५ या २५ दँ दुम्ह मिजंम्ह कोरोना संक्रमणं मदुगु खः। केन्द्रय् डायलसिस याना वयाच्वम्ह उम्ह मिजंम्ह मंगलवाः मदुगु धका प्रहरीं धाःगु दु।
आरोग्य अस्पताल मध्यपुर थिमिइ वासः याका वयाच्वम्ह येँया स्वयम्भूइ ७५ दँ दुम्ह कोरोना संक्रमणं सीगु दु। दमया ल्वय् दुम्ह उम्ह मनू आइतवाः कोरोना संक्रमण पुष्टि जुइवं अस्पताल भर्ना जुगु धका प्रहरीं धाःगु दु। म्यम्हेसिगु हे शव नेपाली सेनां शव व्यवस्थापन टोलीं व्यवस्थापन याःगु दु।
स्वनिगलय् थप २१२९म्ह कोरोना संक्रमित
लहानान्युज | अनलागा ११ ११४०,असोज २७ मंगलवाः
वःगु २४ घण्टाया दुने स्वनिगलय् थप २१२९म्हेसित कोरोना संक्रमित जूगु दु।
स्वास्थ्य तथा जनसंख्या मन्त्रालयं थौं मंगलवाः ग्वसाः ग्वःगु पत्रकार सम्मेलनय् येँ जक १७४६ म्हेसित कोरोना सक्रमण जुगु दु धका धाःगु दु।
अथेहे यलय् २१६ म्ह व ख्वपय् १६७ म्हेसित कोरोना सक्रमण जुगु दु धका जानकारी बिःगु दु।
वःगु २४ घण्टाया दुने १५५७७ म्हेसिगु पीसीआर परीक्षण याःगु खः।
म्हिगः सोमवाः १८८८, यलय् २७७ व ख्वपय् ११८ म्ह याना २२८३ म्ह संक्रमित पिहा वःगु खः।
अथेहे वःगु २४ घन्टाया दुने कोरोनामुक्त १५०३ म्ह छेँय् लिहा वःगु दु। थ्व नाप नेपालय् आःतक कोरोनामुक्त जूपि ७८७८० म्ह थ्यःगु दु।
