Display Style:
Column Style
कोरोनायात हल्का मकायेत वरिष्ठ क्याप्टेन विजय लामाया इनाप
लहानान्युज | अनलाथ्व षष्ठी ११४०,असोज ६ मंगलवाः
नेपाल एयरलाइन्सया वरिष्ठ क्याप्टेन विजय लामां कोरोना संक्रमणयात सामान्य कथं मकायेत इनाप याःगु दु । थःगु स्वास्थ्यय् उल्लेख्य सुधार जुया वःगु जानकारी बियादिसे थः याकन हे उडान भरे याना बिदेशय् च्वपि नेपालीपिन्त लिह हयेगु जुइ धका धाःगु दु ।
कोरोना संक्रमित क्याप्टेन लामा स्टार अस्पताल यलय् वासः याका वयाच्वंगु खः । कोरोनाविरुद्ध निवाः न्ह्यनिसे लडाइँलय् थःगु स्वास्थ्यय् यक्को सुधार वःगु जानकारी बियादिगु खः ।
क्याप्टेन लामा फेसबुकय् एकदम जटिल अवस्थापाखे पार याना पुनः स्वस्थ जुयाच्वनागु दु धका धाःसे आः छु ई लिपा थः डिस्चार्ज जुइगु आशा यानागु दु धका धाःगु दु ।
लामा च्वंगु दु हिया नमूना यकूगु मदुनि, नँसाः न नयेगु यः, कमजोरीपनया लक्षण मदु, चान्ह्यः न्ह्यः न वः, डाक्टर या कथं जिगु इन्फेक्सन लेभल घटे जुगु धका धाःगु दु ।
‘थ्व सामान्य ल्वय् मखु’
क्याप्टेन लामां थ्व सम्भव जुइगुया लिउने अस्पतालया दक्को टोलीया योगदान दुगुलि थःगु उपचारय् खटे जुपिन्त सकसित सुभाय् देछागु दु ।
कोरोनायात हल्का रुपं मकायेत व थःगु सुरक्षाय् चुके मजुइत इनाप याःगु दु । क्याप्टेन लामा ‘सकसित इनापयासे थ्व कोविडयात हल्का मकाये धाःगु दु । थःगु सुरक्षाय् गन न चुके मजुइत धाःगु खः । थ्व सामान्य ल्वय् मखु । थुकिइ ज्यान तक काये फइ धका धाःगु दु ।
क्याप्टेन लामा च्वंगु दु सुभाय् दु छिकपिनिगु मतिना व हःपा न थःत थिक जुल । याकन हे उडान भरे याना विदेशय् च्वपि नेपालिपिन्त नेपाल लित हया राष्ट्रप्रति समर्पित जुइ।
लुँया तोलां थौं १७ सय कुहा वल
शोभा श्रेष्ठ | अनलाथ्व षष्ठी ११४०,असोज ६ मंगलवाः
लुँया भाः थौं मंगलवाः तोला झीन्ह्यसः क्वहा वःगु दु।
थौं छगु तोलाया १७ रुपैयाँ क्वहा वया छापावाल लुँ ९५ हजार ५ सय रुपैयाँ कायम जूगु दु।
नेपाल सुनचाँदी व्यवसायी महासंघया कथं म्हिगः सोमवाः छापावाल लुँ ९७ हजार २ सय रुपैयाँ कारोबार जुगु खः।
अथेहे तेजाबी लुँ न छगु तोला १७ सय रुपैयाँ क्वहा बःगु दु। थौं छगु तोलाया ९५ हजार रुपैयाँ कायम जुुगु दु।
अथेहे वहः तोलां ९० रुपैयाँ क्वहा वया १२ सय रुपैयाँ कायम जुगु दु धका महासंघं धाःगु दु।
कोरोनां काभ्रेय् छम्ह मन्त
लहानान्युज | अनलाथ्व षष्ठी ११४०,असोज ६ मंगलवाः
कोरोना संक्रमणया कारण काभ्रे पनौती नगरपालिका–५ चौकोटया छम्ह मिसा धुलिखेल अस्पतालय् सोमवाः चान्ह्य सीगु दु । थ्व नाप काभ्रेपलाञ्चोकय् स्वम्ह मिसा व निम्ह मिजं कोरोना संक्रमणया मदुगु खः ।
न्यय् दँ दुम्ह उम्ह मिसा कोरोना संक्रमण जुइवं धुलिखेल अस्पतालया भेन्टिलेटरय् वासः याकेगु झ्वलय् १९ दिं लिपा मदुगु धका कोभिड–१९ रोकथाम तथा नियन्त्रण कमाण्ड पोष्टया सदस्य सचिव नाप जिल्ला स्वास्थ्य कार्यालय प्रमुखं धाःगु दु ।
वयागु आमाशयया क्यान्सर ल्वय् दुम्ह खःसा धुलिखेलय् वासः याये न्ह्यः यलया मेडिसिटी अस्पतालय् ‘केमो’ कया वयाच्वम्ह खः ।
आःतक काभ्रेपलाञ्चोकय् ४६९म्ह कोरोना संक्रमण खने दुगु दु । संक्रमितपि मध्ये न्याम्ह सी धुकुगु दु । ३१२म्ह वासः याना छेँ लिहा वन धुकुगु दु । १५३म्ह सक्रिय संक्रमितपि मध्ये ९४ म्ह अस्पताल आइसोलेसनय् व ६७ म्ह होम आइसोलेसनय् च्वना च्वंगु दु ।
राज सायमिया ‘पामिला’या अडियो बुक पिदन
लहनान्युज | अनलाथ्व षष्ठी ने.सं. ११४० (असाेज ६, २०७७) मंगलवाः
नेपालभाषाया लोकंह्वाःम्ह उपन्यासकार राज सायमिया सामाजिक उपन्यास ‘पामिला’या अडियो बुक पिदंगु दु । कुतः पिकाकःया २३८ गुगू पिथना थुगु उपन्यास निदँ न्ह्यः पिदंगु खः ।
समाजया कारुणिक चित्रण दुगु उपन्यास ‘पामिला’या अडियो भर्सजन रेडियोकर्मी सुरजवीर बज्राचार्यं दयेकादीगु खःसा सः नं वयकलं बियादीगु खः ।
जासुसी उपन्यासया ख्यलय् स्थापित सायमिया ‘योम्ह शत्रु’, ‘मखुगु रहस्य’, ‘ग्यानापुगु छेँ’, ‘कनेमज्यूगु बाखं’, ‘मुसुकाःगु ख्वबि’, ‘न्ह्यायेदुगु सर्गः’, ‘मृत्यु महल’ व खस नेपाली भाषाया ‘पर्दाभित्रको रहस्य’ पिदने धुंकूगु दु ।
न्यनेत क्वय् क्लिक यानादिसँ ।
नेपालय् थप ११५४म्ह कोरोना संक्रमण पुष्टि
शोभा श्रेष्ठ | अनलाथ्व ४ ११४०, असोज ५ सोमवाः
वःगु २४ घन्टाया दुने नेपालय् थप ११५४म्ह कोरोना संक्रमण पुष्टि जुगु दु धका स्वास्थ्य तथा जनसंख्या मन्त्रालयं धाःगु दु ।
मन्त्रालयया नियमित प्रेस ब्रिफिङया झ्वलय् सोमवाः प्रवक्ता डा जागेश्वर गौतमया कथं आःतक कोरोना संक्रमितपि नेपालय् आःतक ६५ हजार २७६ म्ह थ्यःगु दु ।
अथेहे वःगु २४ घन्टाय् कोरोनामुक्त जूपि १ हजार ५म्ह डिस्चार्ज जुगु दु ।
थ्व नाप नेपालय् आःतक कोरोनामुक्त जूपि ४७ हजार २३८ म्ह थ्यःगु दु।
