Display Style:
Column Style
कुलमान घिसिङया पक्षमा प्रदर्शनय् मनिष श्रेष्ठ घाइते
लहनान्युज | अनलाथ्व १ ११४०, असोज २ शुक्रवाः
नेपाल विद्युत प्राधिकरणया निवर्तमान कार्यकारी निर्देशक कुलमान घिसिङया पक्षमा प्रदर्शनयापि मनूत घाइते जूगु दु ।
उगु प्रदर्शनया झ्वलय् येँया मनिष श्रेष्ठ माइतीघरय् प्रहरीं दाया घाःपाः जुगु दु ।
थ्व स्वया न्ह्यः म्हिगः बिहीवाः न प्रहरीं माइतीघरय् सच्छितिम्हति युवा अभियन्ता बब्लु गुप्तायात दाःगु खः ।
नेपालय् आःतक हे दकलय् अप्वो २ हजार २० म्हेसित संक्रमण पुष्टि
लहनान्युज | अनलाथ्व १ ११४०, असोज २ शुक्रवाः
नेपालय् २४ घन्टाय् दुने हे आःतक मध्ये दकलय् अप्वो कोरोना संक्रमितपि २ हजार २० म्हेसित संक्रमण पुष्टि जुगु दु धका स्वास्थ्य तथा जनसंख्या मन्त्रालयं धाःगु दु ।
मन्त्रालयया नियमित प्रेस ब्रिफिङया झ्वलय् थौं शुक्रवाः प्रवक्ता डा जागेश्वर गौतमया कथं न्हुपि कोरोनाया संक्रमितपि नेपालय् कोरोना संक्रमितपि आः ६१ हजार ५९३म्ह थ्यःगु दु ।
वःगु २४ घन्टाय् कोरोनामुक्त जूपि ८७१म्ह डिस्चार्ज जूगु दु । थ्व नाप नेपालय् आःतक कोरोनामुक्त जूपि ४३ हजार ८२०म्ह थ्यःगु दु ।
वःगु २४ घन्टाय् जक नेपालय् थप ७म्हेसित कोरोना संक्रमित सी गु दु धका मन्त्रालयं धाःगु दु । थ्व नाप नेपालय् कोरोना संक्रमणपाखे सीपि ३९०म्ह थ्यःगु दु ।
मन्त्रालयया कथं आःतक पीसीआर विधि पाखे ८ लाख ९४ हजार ३७३म्हेसिगु परीक्षण याःगु खः । थ्व नाप २४ घण्टाय् जम्मा ११ हजार ४५८म्हेसिगु पीसीआर परीक्षण याःगु खः ।
आःतक क्वारेन्टाइनय् च्वना च्वपि ७ हजार ७३७ म्ह दु । अथेहे सकृय संक्रमितपि १७ हजार ३८३म्ह थ्यःगु दु ।
येँ ६९८म्ह नाप स्वनिगलय् ८५९म् कोरोना संक्रमित
लहनान्युज | अनलाथ्व १ ११४०, असोज २ शुक्रवाः
वःगु २४ घण्टाय् स्वनिगः दुने ८५९म्ह कोरोना संक्रमित थपे जुगु दु ।
स्वास्थ्य तथा जनसंख्या मन्त्रालयया कथं वःगु २४ घण्टाय् येँ जक ६९८म्हेसित कोरोना सक्रमण जुगु दु
अथेहे ख्वपय् ८२म्ह व यलय् ७९म्हेसित कोरोना संक्रमित थपे जुगु दु ।
उकि मध्ये येँ २१६म्ह मिसा व ४८२म्ह मिजंम्ह, ख्वपय् ४८म्ह मिसा व ३४म्ह मिजं, यलय् ३२म्ह मिसा व व ४७म्ह मिजंपिन्त कोरोना संक्रमण खने दुगु खः ।
उपसमितिया संयोजक जीवन राम श्रेष्ठया पुचलं थीथी थासय् अनुगमन
लहनान्युज | अनलाथ्व १ ११४०, असोज २ शुक्रवाः
संघीय संसद, शिक्षा तथा स्वास्थ्य समिति अन्तर्गत कोभिड १९ या सम्बन्धय् सरकारं याःगु ज्याया अनुगमन याइगु उपसमितिं माननीय जीवन राम श्रेष्ठया संयोजकत्वय् दुवाकोट अस्पताल (के.एम.सि), भक्तपुर अस्पताल, सहिद धर्मभक्त राष्ट्रीय प्रत्यारोपन केन्द्र भक्तपुर, काठमाडौ बिश्वबिद्धालय धुलिखेल अस्पताल, धुलिखेल नगरपालिका कोभिड १९ क्वारेन्टाइन व बागमती प्रदेश अन्तर्गत जनस्वास्थ्य प्रयोगशाला धुलिखेलय् अनुगमन याःगु दु ।
उपसमितिया संयोजक माननीयपि जीवन राम श्रेष्ठ, अन्जना बिशन्खे, सरिता न्यौपाने, एकबाल मिया, नमिता चौधरी, उपसमितिया सचिव अमित कुमार यादव, सचिवालयया कर्मचारी नारायण बस्नेतपिन्स स्थलगत अनुगमन याःगु खः ।
अनुगमनय् सहजीकरणया लागि संसदीय टोलि नाप भक्तपुरया प्रमुख जिल्ला अधिकारी हुमकला पाण्डे, काभ्रेया प्रमुख जिल्ला अधिकारी शिवराम पोखरेल, जिल्ला प्रहरी कार्यालय भक्तपुरया प्रमुख एसपी तारा देवि थापा, धुलिखेल नगरपालिकाया प्रमुख अशोक ब्यन्जू, सुर्यविनायक नगरपालिकाया उपप्रमुख जुना बस्नेतपिनिगु ब्बति दुगु खः ।
अनुगमन याःगु थासय् दुगु कमिकमजोरीयात तुरुन्त सच्चे यायेत उगु पुच्वलं निर्देशन बिउसे अन समस्या व सुझावय् संयोजक जीवन राम श्रेष्ठं तुरुन्त सरकार नाप खँ ल्हायेगु धका धयादिगु खः।
सर्वोच्च कमाण्डर गणेशमान सिंहया २३ क्वःगु स्मृति दिं
लहनान्युज | अनलाथ्व १ ११४०, असोज २ शुक्रवाः
नेपालय् प्रजातन्त्र पुनः स्थापनाया नितिं विसं २०४६ या जनआन्दोलनया सर्वोच्च कमाण्डर गणेशमान सिंहया थौं २३ क्वःगु स्मृति दिवस ं थी थी ज्याझ्वः यानाः न्यायेकुगु दु ।
नेपाःया राजनीति त्याग व साहसी कथं ब्यक्तित्व दुम्ह सिंह निष्ठाया केन्द्र जुइत ताः लाःगु दु ।
सिंहया नेतृत्वय् विसं २०४६ या जनआन्दोलन सफल जुगु खः । लिपा तत्कालीन जुजु वीरेन्द्र प्रधानमन्त्री जुइत सिहयात इनाप याःगु खःसा वयकलं थः समकक्षी नेता कृष्णप्रसाद भट्टराईयात न्ह्यःने तयाः नेपाःया राजनीतिइ त्यागया तःधंगु दसि न्ह्यब्वःयादिगु खः ।
विसं १९७२ कात्तिक २४ गते येँया थःबहीलय् जन्म जुयादिम्ह नेता सिंह वःगु २०५४ साल असोज २ गते मदु्गु खः ।
वयकःया थौं २३ क्वःगु स्मृति दिवस न्हिं वयकः छेँय् थःबही चाकुसिबारीं वयकःया काय् लिसें नेपाली काग्रेसया महामन्त्री प्रकाशमान सिंह बयकःयात लुमंका श्रद्धा प्वंकादिगु दु ।
