प्रधानन्यायाधीशय् प्रकाशमानसिंह राउतया नां अनुमोदन जूगु दु।

बुधवाः च्वंगु संसदीय सुनुवाइ समितिया बैठकय् राउतया नां अनुमोदन जूगु खः। राउतया समितिं बुधवाः हे सुनुवाइ याःगु खः।

सुनुवाइ क्वचाय्वं समितिं प्रधानन्यायाधीशय् राउतया नां अनुमोदन यायेगु निर्णय याःगु खः।

मंगलवाः थौ सेयर बजाः थहावंगु दु। म्हिगः स्वया थौ ११४.७० ल्याखं थहावना ४.५७ प्रतिशतं बजाः थहावंगु दु। थ्व नापा नेप्से परिसूचक २६२३ ल्याखय् थ्यःगु दु। कारोबार रकम न दोब्बर थहावंगु दु।

म्हिगः जम्मा ३ अर्ब ७१ करोडया कारोबार जूगु खःसा थौ ७ अर्ब ६१ करोडया कारोवार जूगु दु। २४३ गु कम्पनीया भाः थहावंगुलि छगु जक कुहावःगु दु सा छगु स्थिर जूगु दु। दक्को क्षेत्रया सूचक थहावःगु दु।

बैंकिङ ३.८२, विकास बैंक ५.४८, फाइनान्स ९.७४, होटल लिसे पर्यटन ५.९७, हाइड्रोपावर ५.९८, लगानी ६.१०, जीवन बीमा ४.१२, उत्पादन २.१९, माइक्रोफाइनान्स ३.९८, निर्जीवन बीमा ३.०९, मेमेगु ४.६७ व व्यापार ३.९९ प्रतिशतं थहावःगु दु।थौ निगु दर्जन कम्पनीया भाः १० प्रतिशतं थहावःगु दु।

बुटवल पावर, गोर्खाज फाइनान्स, गुडविल फाइनान्स, श्रीइन्भेस्टमेन्ट फाइनान्स, सेन्ट्रल फाइनान्स, जानाकी फाइनान्स, गुहेश्वरी फाइनान्स, आईसीएफसी फाइनान्स, प्रोग्रेसिभ फाइनान्स, मल्टिपर्पस फाइनान्स, रिलायन्स फाइनान्स, अरुणकाबेली पावर, दोर्दीखोला हाइड्रोपावर, इस्टर्न हाइड्रोपावर, सिटी होटल, थ्रीस्टार हाइड्रोपावर, नेपाल वेयरहाउजिङ कम्पनी, हिमाल दोलखा हाइड्रोपावर, मञ्जुश्री फाइनान्स, नेपाल फाइनान्स, बेस्ट फाइनान्स, एक्सल डेभलपमेन्ट बैंक, युनियन हाइड्रोपावर, मिडसोलु हाइड्रोपावर व पोखरा फाइनान्सया भाः १० प्रतिशतं थहावःगु दु।

कारोबार रकमया आधारय् थौ एनएलजी इन्स्योरेन्स, हिमालयन रिइन्स्योरेन्स, नेपाल फाइनान्स, सीईडीबी हाइड्रोपावर व अपी पावर न्ह्यने खने दु।

प्रधानमन्त्री केपी शर्मा ओलीं नेकपा (एमाले) या यलया स्थित च्यासलय् पार्टी केन्द्रीय कार्यालय छु दिं न्ह्यः खुसि बा वया क्षति जूगु स्थलगत अवलोकन यानादीगु दु।

एमालेया अध्यक्ष तक जुयादीम्ह प्रधानमन्त्री ओलीं थौ सिंहदबारय् दलया संसदीय दलया बैठक लिपा पार्टी केन्द्रीय कार्यालय वना अवलोकन यानादीगु दु। मदिक्क वा वया खुसि बा वया छगु तल्ला डुबे जुगु खः।

खुसि दुहावया उपकरण व महत्वपूर्ण सामग्री ध्वस्त जूगु खः। दलया कार्यालयय् सरसफाइ यायेगु ज्या न्ह्यागू दु।

प्रधानमन्त्री नाप अध्यक्ष ओलीयात महासचिव शङ्कर पोखरेल, केन्द्रीय कार्यालयया सचिव डा भीष्म अधिकारी पिन्स कार्यालयया अवस्थाबारे जानकारी बियादीगु खः।

थ्यन यल जिल्लाय् असोज १२ गते खुसि बा वया व चलखं याना सीपिनिगु ल्याः ४० म्ह थ्यःगु दु। थौ सुथय् खुम्ह सीपि लुइवं सीपिनिगु ल्याः ४० म्ह थ्यःगु दु।

यल प्रहरीया कथं माहाँकाल गाउँपालिका–२ ठोस्ने खोला ४० दँया राममाया स्याङ्तान, वया काय् १४ दँ दुम्ह अजय, ११ दँ दुम्ह सुवास व गु दँ दुम्ह म्हाय् सलिना मदुगु खः।

माहांकाल गाउँपालिका वडा नम्बर २ लक्ष्यबासय् गुदँ दुम्ह आयुष स्याङ्तान मदुगु खः।अथेहे माहाँकाल गाउँपालिका वडा नम्बर ३ गोटीखेल च्वम्ह ईश्वर तिमल्सिना न सीना च्वंगु लुगु खः।

वःगु असोज १२ गतेनिसे तनाच्वंगु खः।वया मां व जहान न सम्पर्कविहीन जूया च्वंगु खः।प्रहरीया कथं यल जिल्लाय् अझ न झीम्ह सम्पर्कविहीन जूयाच्वंगु दु। थ्व स्वया न्ह्यः न्ह्यय्म्ह जक सम्पर्कविहीन जुयाच्वंगु खः।

सरकारं खुसि बा वया व चलः वया यक्कोे धनजनया क्षति जुगुलि स्वन्हु तक राष्ट्रिय शोक घोषणा याःगु दु।

सोमवाः सरकारी निवास बालुवाटारय् च्वंगु बैठकं थौ मंगलवाःनिसे स्वन्हु तक राष्ट्रिय शोक घोषणा यायेगु निर्णय जूगु दु धका सरकारया प्रवक्ता सञ्चार लिसे सूचना प्रविधिमन्त्री पृथ्वी सुब्बा गुरुङं जानकारी बिउगु दु।

राष्ट्रिय शोकया इलय् सरकारी कार्यालयय् बच्छि ध्वाँय् क्वछुकेगु जुइसा सार्वजनिक बिदा धाःसा जुइमखु। प्रधानमन्त्री ओली म्हिगः सोमवाः बहसन जक अमेरिका भ्रमण सिधय्का लिहावःगु खः।

ओली लिहावयेवं च्वंगु मन्त्रिपरिषद बैठकं प्रधानमन्त्री दैवीप्रकोप राहत कोषय् सरकारं १ अर्ब रुपैयाँ बिइगु निर्णय याःगु दु। उगु कोषय् प्रधानमन्त्री व मन्त्रीतय्स लच्छिया तलब बिइगु जुगु दु।