प्रधानमन्त्री केपी शर्मा ओलीं भ्रष्ट तयेगु ख्वाः स्वया मखु अपराध स्वया कारबाही जुइ धका दाबी यानादीगु दु।

मंगलवाः थौ यल महानगरया स्थापना दिवसया लसताय् जुगु ज्याझ्वलय् सम्बोधन यायेगु झ्वलय् प्रधानमन्त्री ओली अथे धयादीगु खः। ‘देय् याःगु अवस्था सचे यायेमाःगु दु। सुधार जुइ। देय् यात गरिबीपाखे च्वये यकेमाःगु दु।

सुशासन बिइमाःगु दु। भ्रष्टाचार नियन्त्रण यायेमाःगु दु,’ प्रधानमन्त्री ओलीं धयादीगु दु, ‘भ्रष्ट तयेगु ख्वाः स्वया मखु, अपराध स्वया कारबाही जुइ। देशय् सुशासन जुइ। जनतातय्त दुःख बिइपि कर्मचारी तयेसं न याये दइमखु। याये मज्यु।’ ओली धयादीगु दु जनप्रतिनिधि वा कर्मचारी न्ह्याम्हय् जूसा न जनताया सेवा यायेमाः।

‘झीपि जनताया सेवक खः, झीसं घमण्ड याये मज्यु,’ प्रधानमन्त्री ओलीं धयादीगु दु।

सञ्चार लिसे सूचना प्रविधिमन्त्री पृथ्वीसुब्बा गुरुङपाखे सार्वजनिक सेवा प्रसारण संस्थय् न्हुम्ह कार्यकारी अध्यक्ष डा. महेन्द्र विष्टययात पद व गोपनीयताया शपथ काःगु दु।

वंगु शुक्रवाः मन्त्रीपरिषदया बैठकं डा. विष्टयात उगु संस्थाया कार्यकारी अध्यक्षय् नियुक्त यायेगु निर्णय याःगु खः। डा. विष्ट थ्व स्वया न्ह्यः नेपाल टेलिभिजनया कार्यकारी अध्यक्ष जुयादीगु धुकुगु दु।

नेपाल टेलिभिजन व रेडियो नेपाल व्यवस्थापन यायेत सरकारं छु दिं न्ह्यः जक सार्वजनिक सेवा प्रसारण ऐन हःगु खः। उगु ऐनबमोजिम सार्वजनिक सेवा प्रसारण संस्थाया कार्यकारी अध्यक्षय् डा. विष्ट नियुक्ति जुयादीगु खः।

सार्वजनिक सेवा प्रसारण संस्थाया सञ्चालक समिति याःगु अध्यक्षय् डा. महेन्द्र विष्ट नियुक्त याःगु दु। अध्यक्षया निति स्वीकृत जूपि झीम्ह उम्मेदवारमध्येय् विष्टयात नियुक्त याःगु दु धका प्रधानमन्त्रीया सचिवालयं धाःगु दु।

डा. विष्ट नेपाल पत्रकार महासंघया पूर्वअध्यक्ष न जुयादी। डा.बिष्टं नेपाल टेलिभिजनया अध्यक्ष व न्यूनतम पारिश्रमिक निर्धारण समितिया अध्यक्ष याःगु जिम्मेवारी कया ज्या याये धुकुम्ह खः।

नियुक्ति सिफारिस यायेत गठन जुगु सिफारिस समितिं विष्ट नाप दीपक पाठक, चिन्तामणि बराल, केदारनाथ कोइराला, सुवोध गौतम, शालिग्राम सुवेदी, रमेशकुमार खड्का, लक्ष्मण हुमागाईं, भुवनराज भट्ट व अच्युतमकुमार पोखरेलयात सिफारिस याःगु खः।

येँ महानगरपालिकाया पूर्वमेयर पीएल सिंह थौ मन्त। पूर्वमन्त्री तक जूयादीम्ह सिंह थौ सुथय् मदुगु खः।

८५ दँ दुम्ह सिंह ताः ईनिसे म्ह मफयाच्वंगु खः।

प्रधानमन्त्री केपी शर्मा ओलीं राजनीतिक अस्थिरता अन्त्य यायेगु निति देशय् जुयाच्वंगु विकृतियात चिइकेगु निति वर्तमान मंकाः सरकार दयकाःगु खः धका धयादीगु खः।

थौ ज्यापु संस्कृति विकास कोषं याःगु वसन्तपुरय् २१ क्वःगु राष्ट्रिय ज्यापु दिवसय् न्ववानादीसे प्रधानमन्त्री ओलीं देशय् राजनीतिक ह्यूपाः हयेगुलि निति निगु तधःगु दल दथुइ सरकार दयकेगुलि सहकार्य जुगु धका धयादीगु खः।

थ्व सरकार केवल सरकार दयकेगु निति मखु देशय् समृद्धि हयेगु व स्थिरताया यात्रा न्ह्याकेगु निति गठन जूगु खः धका धयादीगु खः। “गुठीयात संरक्षण यायेत कानुन दयकेमाल धका धयागु इलय् जिगु विरुद्ध भ्रम फैलै याना विरोध यायेत स्वत। प्रहार यात। भ्रष्टाचारय् उजुरी लानाच्वपिन्त नीदँ दुने मखु न्यादँ दुने याकन छिनोफानो जुइमाः धका धयागु इलय् भ्रष्टाचार याःपिन्त बचे यायेत स्वत धका मखुगु प्रचार यात ।

थज्यागु हल्लायाना नेपालय् भाँडभैलो हयेगु कुतःया उपज खः।”, प्रधानमन्त्री ओलीं धयादीगु दु, “नेपाः स्यकेगु व झीगु दथुइ च्वगु एकता स्यकेगु निति गुलिसिया हल्ला याःगु दु अय्न झीपि साम्प्रदायिक विद्षया लिउने मखु, सामाजिक सद्भावपाखे राष्ट्रिय एकता हयेत स्वया च्वनागु दु। थ्व जात मज्यु, मेगु जात ज्यु धका धाये मखु। बैँकय् त्यासा पुलेम्वाः धका धाये मखु। न्हुगु नेपाः दयकेगु महान अभियानय् जिपि दु। नेपाःयात गरिबीपाखे समृद्धि व सुखी दयेका हे त्वःते।” धका थौ जुगु २१ क्वःगु राष्ट्रिय ज्यापु दिवसय् प्रधानमन्त्री ओलीं धयादीगु खः।