खोनाय् समाजसेवी देवबहादुर डंगोलया प्यक्वःगु पुण्य तिथिया झ्वलय् छगू ज्याझ्वः जूुगु दु।

देवबहादुर डंगोल स्मृति कोषया ग्वसालय् जूगु उगु ज्याझ्वलय् खोनाया धार्मिक व सामाजिक ख्यलय् थीथी कथं योगदान बिउपिन्त सम्मान नं देछाःगु खः। कोषया नायः पद्म बहादुर डंगोलया सभाध्यक्षताय् जूगु उगु ज्याझ्वलय् बागमति प्रदेशया श्रम, रोजगार व यातायातमन्त्री प्रेमभक्त महर्जन मूपाहाँ कथं झायादीगु खः।

ज्याझ्वलय् भन्ते सुधिरों च्वयाः बिज्याःगु “त्रिरत्न वन्दना परित सुत्त र असल सम्पत्ति पहिचान” सफूया नं पितब्वज्या जूगु खः। खोनाया कान्छा कृष्ण डंगोल, लःमुना पुचः लगायतयात सम्मान याःगु उगु ज्याझ्वलय् सांस्कृतिक सम्पदाया बारे छगू वक्तृत्व कला कासा नं जूगु खः। उगु कासाय् सुभा श्रेष्ठं सर्वोत्कृष्ट सिरपाः त्याकुगु खःसा सुबि मल्ल व सरल दुलालपिन्त हःपाः सिरपाः बिउगु खः।

ज्याझ्वलय् मूपाहाँ प्रेमभक्त महर्जन व पाहाँपिं सांसद रघुनाथ महर्जन व लोककवि राजभाई जकःमि, संस्कृतिकःमि बदन लाल ङ्याछ्योंपिन्सं खोनाया सांस्कृतिक पक्ष व समाजसेवी देवबहादुर डंगोलया योगदानयात कया नुगःखँ तयादीगु खः।

नेपालभाषा एकेदेमिया ग्वसालय् नेपालभाषा वाङ्गमय, संगीत व विज्ञान ख्यःया प्रतिष्ठित सिरपाः दान्यहिरा सिरपाःया साहित्य विधाय् थुगुसिइ नांजाःम्ह साहित्यकार राजा शाक्ययात लःल्हाइगु जूगु दु।

एकेदेमिया दान्यहिरा क्वछिना कवःया शनिवाः च्वंगु मुँज्यां क्वःछिउगु खः। दँय् दसं बियाः वयाच्वंगु दान्यहिरा सिरपाः दाता यज्ञरत्न धाख्वाः न नीस्वनादीगु कोषपाखें नेपालभाषा एकेदेमिया ग्वसालय् लःल्हाइगु जूगु दु सा संगीत विधाय् मीरा राणा व विज्ञान प्रविधि विधाय् बालसुन्दर मल्लयात दान्यहिरा सिरपाः नाप म्हतिं न्येयद्वः तका लःल्हाइगु जुगु दु।

प्रधानमन्त्री केपी शर्मा ओलीयात नेपाल भ्रमणय् वयाच्वंम्ह बंगलादेशया वन, वातावरण, जलवायु परिवर्तन लिसे जलस्रोत मन्त्री सैयदा रिजवाना हसनं नापलागु दु।

बिहीवाः प्रधानमन्त्री निवास बालुवाटारय् नापलायेगु झ्वलय् नेपाः व बंगलादेश दथुइ निगु पक्षीय सम्बन्धयात बालाकेगु व ऊर्जालगायत क्षेत्रय् सहकार्य यायेगु विषय सहलह जूगु दु धका धाःगु दु।

उगु ज्याझ्वलय् प्रधानमन्त्री ओलीया मुख्य सल्लाहकार विष्णुप्रसाद रिमाल, परराष्ट्र मन्त्रालयया सहसचिव भृगु ढुंगाना, बंगलादेशया निति नेपाःया राजदूत घनश्याम भण्डारी, नेपाःया निति बंगलादेशया राजदूत सलाहुद्धिन नोमन चौधरीपिनिगु ब्बति दुगु खः।

बुधवाः थौ सेयर बजाः परिसूचक नेप्से २६ सय स्वया क्वय् कुहावःगु दु। म्हिगः स्वया थौ नेप्से २६.०७ ल्याखं कुहावया नेप्से २५९७ ल्याखय् कायम जूगु दु।

कारोबार रकम न कुहावःगु दु। म्हिगः ७ अर्ब ६१ करोडया कारोबार जूगुलि थौ ६ अर्ब ७७ करोडय् जक सीमित जूगु दु। ५४ कम्पनीया भाः थहावःगु दु सा १८७ या भाः कुहावःगुलि स्वगू स्थिर जुगु दु। फाइनान्स बाहेक दक्को क्षेत्रगत सूचक कुहावःगु दु।

फाइनान्स १.७५ प्रतिशतं थहावःगुलि बैंकिङ ०.७१, विकास बैंक १.३८, होटल व पर्यटन १.७९, हाइड्रोपावर १.७४, लगानी १.५२, जीवन बीमा ०.४०, उत्पादन १.७९, माइक्रोफाइनान्स १.१२, निर्जीवन बीमा १.८२, व्यापार १.१८ प्रतिशत कुहावःगु दु। थ्रीस्टार हाइड्रोपावर व स्वरोजगार लघुवित्तया भाः १० प्रतिशतं थहावंगु दु।

इस्टर्न हाइड्रोपावरया ९.४५, अपरहेवाखोलाया ८.०२, नेपाल वेयरहाउजिङया ७.७, उपकार लघुवित्तया ७.६, गुडविल फाइनान्सया ७.१ तथा गुराँस लघुवित्तया ४.२ प्रतिशतं थहावःगु दु। विन नेपाल लघुवित्तया १० व न्यादी हाइड्रोपावरया ९.२ प्रतिशतं कुहावःगु दु।

कारोबार रकमया आधारय् नेपाल फाइनान्स, हिमालयन रिइन्स्योरेन्स, गुडविल फाइनान्स, नेपाल बैंक व शिवम् सिमेन्ट न्ह्यने खनेदुगु दु।

संसदीय सुनुवाइ समितिं अष्ट्रेलियाया निति नेपाःया राजदूतय् चित्रलेखा यादवया नां अनुमोदन याःगु दु।

बुधवाः च्वंगु संसदीय सुनुवाइ समितिया बैठकं यादवया नां अनुमोदन याःगु खः। यादवयात समितिं बुधवाः हे सुनुवाइ याःगु खः।

सुनुवाइ क्वचायेव समितिं अष्ट्रेलियाया निति नेपाःया राजदूतय् चित्रलेखा यादवया नां अनुमोदन यायेगु निर्णय याःगु खः।