Display Style:
Column Style
नेपाली सेना् ४१७ म्हेसित कोरोना संक्रमण
लहनान्युज | ञंलाथ्व १२ ११४०,भाद्र १४ आइतवाः
नेपाली सेनाय् ४१७म्हेसित कोरोना भाइरसया संक्रमण खने दय धुकुगु दु ।
देय् या थीथी थासय् खटे जुपि सेनापि ४१७ म्हेसित कोरोना संक्रमण खने दुगु दु ।
नेपाली सेनाया प्रवक्ताया कथं आःतक ११८ म्ह डिस्चार्ज जुइ धुकुगु दु । संक्रमित जूपि कर्णाली प्रदेश व प्रदेश २ लय् यक्को सैनिकपि दु ।
सेनाया प्रवक्ताया कथं होल्डिङ सेन्टर, क्वारेन्टिनर, आइसोलेसन व कारागारया सुरक्षाय् खटे जूपिके अप्व संक्रमित जूगु खः । सेनां कोरोना संक्रमणं सीपिनिगु शव व्यवस्थापनय् ज्या याना वयाच्वंगु खः ।
लुँ तोलां स्वसः थहा वन
लहनान्युज | ञंलाथ्व १२ ११४०,भाद्र १४ आइतवाः
छु दिं न्ह्यः क्वहा वःगु लुँया भाः थौं हाकन थहा वःगु दु । वःगु शुक्रवाःया तुलनाय् थौं तोलाय् स्वसः थहा वःगु दु ।
नेपाल सुनचाँदी व्यवसायी महासंघं थौं छापावाल लुँ तोलां ९७ हजार निसः थ्यःगु दु । शुक्रवाः तोलाय् ९६ हजार गुसः न कारोबार जूगु खः ।
अथेहे तेजाबी लुँया भाः छगुु तोलाय् ९६ हजार व न्ह्यसः थ्यःगु दु। शुक्रवाः छगु तोलाय् ९६ हजार व प्यसः थ्यःगु खः ।
थौं वहःया भा तोलाया १३४० तकां हे जुगु महासंघं धाःगु दु ।
ख्वपय् आइसोलेसनय् च्वानाच्वम्ह संक्रमित मन्त
लहनान्युज | ञंलाथ्व १२ ११४०,भाद्र १४ आइतवाः
ख्वपय् आइसोलेसनय् च्वनाच्वम्ह ६५ दँया कोरोना संक्रमित मिजंम्ह छम्ह मन्त ।
भक्तपुर जिल्ला स्वास्थ्य कार्यालय प्रमुखं मदुम्ह भक्तपुर नगरपालिका १, दूधपाटीया होम आइसोलेनय् च्वनाच्वम्ह ६५ दँया मिजंम्ह वःगु चान्ह्य मदुगु धका जानकारी बिःगु खः ।
प्रमुखया कथं उम्ह मनू उच्च रक्तचाप व चिनीया ल्वय् दुम्ह धका धाःगु दु ।
वयात भदौ १२ गते कोरोना पुष्टि जूगु खः । थ्व नाप ख्वपय् कोरोनां सीपि न्ह्यम्ह थ्यःगु दु ।
निम्ह चिकित्सक नाप गुम्हेसित कोरोना संक्रमण पुष्टि
लहनान्युज | ञंलाथ्व १२ ११४०,भाद्र १४ आइतवाः
निम्ह चिकित्सक नाप गुम्हेसित कोरोना संक्रमण पुष्टि जुइवं दाङ तुलसीपुरया राप्ती प्रादेशिक अस्पताल अनिश्चितकालया लागि सिल याःगु दु ।
अस्पताल विकास समितिया अध्यक्षं म्हिगः शनिवाः बहनि ६ बजे निसे मेगु सूचं पिहा मवःतले अस्पताल व अस्पतालया ५० मिटर दुने सिल याःगु दु ।
प्रादेशिक अस्पतालया निम्ह चिकित्सक, स्वम्ह स्वास्थ्यकःमि व स्वम्ह कार्यालय सहयोगीयात कोरोना पुष्टि जुगु दु ।
उमिगु कन्ट्याक्ट ट्रेसिङया ज्या न जुया च्वंगु दु ।
२२म्ह कोरोना संक्रमित भेन्टिलेटरय्, १७५म्ह आईसीयूलय्
लहनान्युज | ञंलाथ्व ११ ११४०,भाद्र १३ सनिवाः
कोरोना संक्रमितपि थौंकन्ह्य अप्वया वनच्वंगुलि गम्भीर प्रकारया विरामीपि अप्वया वःगु दु । स्वास्थ्य तथा जनसंख्या मन्त्रालयया कथं आःतक २२ म्ह कोरोना संक्रमितपि भेन्टिलेटरय् तया तःगु दु ।
मन्त्रालयया प्रवक्ता जागेश्वर गौतमया कथं प्रदेश १ य् स्वम्ह, वागमती प्रदेशय् १७ म्ह व प्रदेश ५ य् निम्ह याना २२ म्ह कोरोना संक्रमितपि भेन्टिलेटरय् तयातःगु खः ।
मन्त्रालयया कथं १७५म्ह संक्रमितपि आईसीयूलय् दु । प्रदेश १ य् १५म्ह, प्रदेश २ य् ३८म्ह, वागमती प्रदेशय् ७८म्ह, गण्डकी प्रदेशय् ३म्ह, प्रदेश ५ य् १७ म्ह व कर्णाली प्रदेशय् २४म्ह संक्रमितपि आईसीयूलय् दु ।
वःगु २४ घण्टाय् ८८४ म्ह संक्रमितपि थपे जूगु दु ।
अथेहे ३१३ म्ह वासः याना छेँय् लिहा वःगु दु ।
नेपालय् थौं तक कोरोना संक्रमितपि ३७ हजार ३४० म्ह थ्यःगु दु ।
अथेहे २०७ म्ह सी धुकुगु दु ।
