Display Style:
Column Style
एमसीसी छलफल यायेत नेकपा सचिवालय बैठक
लहनान्युज | तछलागा नवमी ११४०,जेठ ३२ आइतवाः
एमसीसी परियोजनाबारे छलफल यायेगु लागि नेकपा सचिवालयया बैठक थौं च्वने त्यःगु दु । बैठक थौं ४ बजे प्रधानमन्त्री निवास बालुवाटारय् च्वने त्यःगु खः ।
उगु बैठकय् एमसीसी कार्यदलया दुजःपि भिम रावल व प्रदीप ज्ञवालीया नाप अर्थमन्त्री डा. युवराज खतिवडायात न आमन्त्रित सदस्य कथं ब्बना तःगु दु ।
थ्व स्वया न्ह्यःया बैठकय् न रावल, ज्ञवाली व खतिवडायात सःता एमसीसीबारे नेकपां छलफल याये धुकुगु खः ।
थौंया छलफलं सम्भवतः एमसीसीबारे टुंगो लगे यायेगु नेकपां तयारी यानाच्वंगु दु ।
थुगु संसदया अधिवेशनं एमसीसी पारित यायेगु व मयागु धका नेकपायात दबाव दु ।
पार्टी दुने एमसीसी पारित याये मज्यु धका दवाव दु ।
पार्टीं गठन याःगु कार्यदलं एमसीसी गथे खः अथे पारित मयायेत सुझाव बिःगु खः ।
गुल्मीइ कोरोना संक्रमितम्ह सीत
लहनान्युज | तछलागा नवमी ११४०,जेठ ३२ आइतवाः
गुल्मीइ कोरोना संक्रमित बिरामी सीगु दु ।
रेसुङ्गा नगरपालिका वडा नम्बर–९ य् उपल्लो तम्घास आइसोलेसनय् उपचार याना च्वम्ह धुर्कोट गाउँपालिका वडा नम्बर ४ जैसिथोक च्वम्ह ३६ दँयाम्ह मिजंम्ह सीगु धका डा. कविराज भुसालं धाःगु दु ।
सीइम्हेसिगु शवयात चान्ह्य हे नेपाली सेनां व्यवस्थापन याःगु खः ।
सीम्ह मनू भारतं वया धुर्कोटया क्वारेन्टिनय् च्वःगु खःसा वयात वःगु जेठ १२ गते कोरोना संक्रमण पुष्टि जूगु खः । संक्रमण पुष्टि जूगु लिपा वयात जेठ १३ गते निसे तम्घासया आसोलेसनय् च्वना वासः याका वयाच्वंगु खः ।
उम्ह मनू वःगु निदँनिसे आन्द्राय् क्यान्सर जूया च्वम्ह खः । वयात स्वकः तक स्वाब परीक्षणय् रिपोर्ट पोजिटिभ वःगु खः ।
संसदं नेपाःया न्हूगु नक्सा संशोधन विधेयक पारित
लहनान्युज | तछलागा अष्टमी ११४०,जेठ ३१ सनिवाः
नेपाःया न्हुगु भू भाग लिम्पियाधुरा, कालापानी व लिपुलेक दुथ्याःगु न्हूगु राजनीतिक नक्सा सम्बन्धी संविधान संशोधन विधेयक थौं प्रतिनिधिसभां पारित याःगु दु ।
थौं शनिवाः संसदया बैठक न्हूगु नक्सा कथं निशान छाप ल्हिलेत हःगु संविधान संशोधन विधेयक दुई तिहाई स्वयां अप्व मतं पारित याःगु दु ।
उगु मुँज्याय् उपिस्थित २५८म्ह सांसदपि संशोधन विधेयकया पक्षय् मत तःगु खःसा विपक्षय् धाःसा सुयागु मत मवःगु खः ।
प्रतिनिधिसभा संसदय् कुल २७५म्ह दुजः दुगु खः ।
सरकारं न्हूगु नक्सा कथं संविधानया अनुसूची–३ संविधान संशोधनया निंतिं जेठ ९ गते संसद सचिवालयय् विधेयक दर्ता याकूगु खः ।
सरकारं न्हूगु नक्सा जेठ ७ गते जारि बियाःगु खः ।
थौं ४४८म्ह थप संक्रमित, कोरोना संक्रमितपि न्याद्धः थ्यन
लहनान्युज | तछलागा सप्तमी ११४०,जेठ ३० शुक्रवाः
नेपालय् कोराना भाइरसया संक्रमण जूपि न्याद्धः स्वया अप्व मनूत संक्रमित जूगु दु ।
थौं जक वंगु २४घण्टाया दुने ४४८म्ह मनूपि कोरोनाया संक्रमण जूग दु ।
स्वास्थ्य तथा जनसंख्या मन्त्रालयया प्रवक्ता डा.जागेश्वर गौतमया कथं ४२४म्ह मिजंपि व २४म्ह मिसापिन्त संक्रमण पुष्टि जूगु धका धाःगु दु ।
थौं तक संक्रमित जूपिनिगु ल्याः ५०६२म्ह थ्यंगु दु ।
उकी मध्ये ४७०९म्ह मिजंपि व ३५३म्ह मिसापि खः ।
थौंनिसे जोर बिजोर चले जुइगु
लहनान्युज | तछलागा सप्तमी ११४०,जेठ ३० शुक्रवाः
महानगरीय ट्राफिक प्रहरी महाशाखाया कथं जोर गते जोर नम्बर प्लेट दुगु गाडी व बिजोर गते बिजोर नम्बर प्लेट दुगु गाडी चले जुइगु दु ।
अथेहे, निजी गाडी बहनि ९ बजे निसे सुथय् ५ बजे तक चले याये दइ मखु । नाप थुग इलय् अत्यावश्यक वस्तु ढुवानी यायेगु गाडीयात धाःसा रोकतोक जुइ मखु ।
महानगरीय ट्राफिक प्रहरी महाशाखाया कथं स्वनिगः पिनेयाःगु गाडी चले याये दइ मखु । थौं न निसे मोटरसाइकल व साइकलय् छम्ह जक च्वना चले याये दइ ।
प्यःगु पाङग्राया निजी गाडीया हकय् चालकबाहेक निम्ह जक च्वने दइगु व्यवस्था याःगु दु । कोभिड–१९ सङ्क्रमण्यात जोखिम यायेगु लागि थीथी सेवाय् लगे याःगु दनि ।
सार्वजनिक गाडी अझ न खुले याःगु मदुनि ।
