Display Style:
Column Style
येँ महानगर दुनेया सामूदायिक स्कूलया छात्रायात सितिकं स्यानिटरी प्याड
नृपेन्द्रलाल श्रेष्ठ | गुंलागा पारु ११४० (श्रावण २० २०७७) मंगलबाः
येँ महानगरपालिका दुनेया सामुदायिक स्कूलय् ब्वनाच्वंपिं छात्रातय्त येँ महानगरपालिकां सितिकं स्यानिटरी प्याड इनीगु जूगु दु ।
ज्ञानोदय माध्यामिक विद्यालय, बाफलय् ब्वनाच्वंपिं छात्रायात सितिकं स्यानिटरी प्याड इनाः थौं थुगु ज्या न्ह्याकूगु खः ।
येँ महानगरपालिका वडा नम्बर–१४ या अध्यक्ष शोभा सापकोटां स्यानिटरी प्याड भेन्डिङ मेसिनय् पायम्वः कुतकाः छगू प्याड लिकयाः छात्रायात लःल्हानादिल ।
ज्याझ्वःया ब्वतिमि छात्रापिन्सं तारन्ताः स्कूलय् थ्यनेधुंकाः नं थी मज्यू जूबलय् प्याड मदयाः छेँय् लिहां वनेमाःगु अनुभव न्यंकुसें स्कूलय् सितिकं प्याड वितरणया व्यवस्था जूगुलिइ लसता प्वंकादिल ।
ज्याझ्वःयात सम्वोधन यासें येँ महानगरपालिकाया मेयर विद्यासुन्दर शाक्यं रजस्वला जूपिं मिसायात विभेद यायेमज्यूगु धयादिल ।
‘छेँय् सुं मिसाया थी मज्यू जुइबलय् उमिगु सुसाःकुसाः यायेमाः, ग्वाहालि यायेमाः धइगु स्कारात्मक पक्ष खः’ शाक्यं धयादिल । ‘तर, प्यन्हु जिगु ज्या यायेगु पाः, वं थी मज्यू धइगु थुज्वःगु विभेदं जाःगु व्यवहारय् ह्यूपाः वयेमाः ।’
स्कूलया प्रधानाध्यापक नातिकाजी महर्जनं छात्राया थी मज्यू जुइबलय् न्हापा यक्व समस्या फयेमाःगु न्यंकुसें थ्व चेतना थनेगु ज्या जूगु धयादिल ।
वय्कलं न्हापांगु चरणय् ५ निसें १२ कक्षातक्क ब्वनीपिं करीब १४सः छात्राया पिरियडयात लिधंसा नालाः १ लख २०द्वः प्याड टेण्डर प्रक्रियाय् वनाः खरिद यानागु जानकारी बियादिल ।
वय्कलं भेन्डिङ मेसिन व डिस्पोजल मेसिन नं न्यानागु जानकारी बियादिल ।
येँ महानगरपालिकाया शिक्षा विभागया शाखा अधिकृत मोती भट्टराईं महानरपालिका क्षेत्र दुनेया दक्वं सामूदायिक स्कूलयात प्रति छात्रा द्वःछि व खुतकाया दरं बजेट निकासा यानाः दक्वं स्कूलय् छ्वयेधुनागु जानकारी बियादिल ।
रुपन्देहीइ बैंक कर्मचारीयात कोरोना संक्रमण पुष्टि
लहनान्युज | गुंलागा १ ११४०,साउन २० मंगलवाः
रुपन्देहीया देवदहय् छम्ह बैंक मिसाम्ह कर्मचारीयात कोरोना संक्रमण पुष्टि जूग दु ।
लुम्बिनी प्रादेशिक अस्पताल बुटवलय् याःगु पीसीआर परीक्षणय् गरिमा विकास बैंकया देवदह खैरेनी शाखाय् ज्या याइम्ह कर्मचारीमा कोरोना संक्रमण खने दुगु दु ।
बैंकया कर्मचारीयात कोरोना संक्रमण पुष्टि जुइवं उगु बैँक शाखा कार्यालय बन्द याना कन्ट्याक्ट ट्रेसिङया ज्या सुरु याःगु दु ।
कोरोना संक्रमित कर्मचारी न्यान्हु निसे सेँय् खँ चाया ज्वरो वया बिदाय् च्वना च्वंगु खः ।
उम्ह मनून थःहे सोमवाः लुम्बिनी प्रादेशिक अस्पतालय् वना कोरोना परीक्षण या वःगु खः।
थौं येँ ४८म्हेसित कोरोना संक्रमण पुष्टि
लहनान्युज | गुंलागा १ ११४०,साउन २० मंगलवाः
वःगु २४ घण्टाय् स्वनिगलय् ६२ म्हेसित कोरोना भाइरस (कोभिड–१९) या संक्रमण पुष्टि जूगु दु ।
स्वास्थ्य तथा जनसंख्या मन्त्रालयया कथं स्वनिगलय् दकलय् अप्व येँ ४८म्हेसित संक्रमित जूगु दु ।
अथहे ख्वपय् १३म्ह व यलय् छम्हेसित संक्रमण खने दुगु धका मन्त्रालयं थौं धाःगु दु ।
थप २५९म्ह कोरोना संक्रमण
लहनान्युज | गुंलागा १ ११४०,साउन २० मंगलवाः
थौं मंगलवाः नेपालय् थप २५९म्हेसित कोरोना भाइरस संक्रमण पुष्टि जुगु दु ।
स्वास्थ्य तथा जनसंख्या मन्त्रालयया कथं आःतक संक्रमितपिनिगु ल्याः २१ द्धः व गुम्ह थ्यःगु दु ।
स्वाब संकलन यायेत स्वनिगलय् १४गु अस्पताल तोकेयात
लहनान्युज | गुंलागा १ ११४०,साउन २० मंगलवाः
कोरोना संक्रमणया शंकास्पद बिरामीया लागि स्वाब संकलन यायेत स्वनिगःया १४ गु अस्पताल तोके याःगु दु ।
स्वनिगः दुने पाटन अस्पताल, सिभिल अस्पताल, त्रिवि शिक्षण अस्पताल, टेकु अस्पताल, वीरेन्द्र अस्पताल, स्टार अस्पताल, नेपाल प्रहरी अस्पताल, भक्तपुर अस्पताल, केएमसी अस्पताल, वीर अस्पताल, सशस्त्र प्रहरी बल अस्पताल, प्रसुति गृह, ह्याम्स अस्पताल व नेपाल कोरिया मैत्री अस्पताल स्वाब संकलन थाय् या रुपय् तोके याःगु दु ।
शंकास्पद बिरामी नाप स्वापू दुुपि, जोखिमयुक्त थासं वःपिन्त अस्पतालय् सुथंया ९ निसे १ बजे तक वना स्वाब परीक्षण याये दइ धका मन्त्रालयया सहप्रवक्तां धाःगु दु ।
थ्व बाहेक सरकारं तोके याःगु दक्को हब अस्पताल, कोभिड क्लिनिक अस्पताल, लेभल १, २ व ३ या कोभिड अस्पतालय् स्वाब संकलन जुइ धका मन्त्रालयं धाःगु दु ।
