Display Style:
Column Style
कोरोना संक्रमित प्यद्धः थ्यन
लहनान्युज | तछलागा चतुर्थी ११४०,जेठ २७ मंगलवाः
नेपालय् थौं तक प्यद्धः स्वयां अप्व मनूतय्त कोरोना भाइरसया संक्रमण खने दये धुकुगु दु ।
थौं स्वास्थ्य तथा जनसंख्या मन्त्रालयं नेपालय् संक्रमित पिनिगु ल्याः ४०८५म्ह थ्यंगु दु धका जानकारी बिःगु दु ।
अथेहे वंगु नीप्यघौया दुन थप ३२३म्हेसित थप संक्रमित जूगु धका धाःगु दु । मन्त्रालयया प्रवक्ता डा. जागेश्वर गौतमया कथं न्हूपिं संक्रमित जूपि मध्ये २९२म्ह मिजंपि व ३१म्ह मिसापि धका
धाःगु दु । नेपालय् थौं इलाम जिल्लाय् थप जूगु दु । थ्व नापं आ ७२गू जिल्लाय् कोरोनाया संक्रमण खने दये धुकुगु दु ।
येँया राष्ट्रिय जनस्वास्थ्य प्रयोगशालाय् याःगु परीक्षणय् धनुषाया २४म्ह, कपिलवस्तुया ७म्ह, महोत्तरीया ३म्ह, नवलपरासी पश्चिमया २२म्ह, नुवाकोटया २म्ह, रौतहटया २१, सर्लाहीया १६म्ह व सिरहाया १२म्ह यानाः १ सय २५म्हेसित संक्रमण खनेदुगु दु । देय्या थीथी थासय् याःगु परीक्षणय् थप १ सय ९८म्हेसित संक्रमणया पुष्टि जूगु खः ।
अथेहे ९६म्ह मनूत कोरोनामुक्त जुया अस्पतालं डिस्चार्ज जूगु दु ।
आः तक अस्पतालं डिस्चार्ज जूपिं ५८४म्ह थ्यंगु दु ।
गण्डकी प्रदेशका थप २४ म्हेसित कोरोना
लहनान्युज | तछलागा चतुर्थी ११४०,जेठ २७ मंगलवाः
गण्डकी प्रदेशय् थप २४ म्हेसित कोरोना भाइरस संक्रमण पुष्टि जूगु दु ।
नवलपरासी ९बर्दघाट सुस्ता पूर्वय् १२म्ह, बाग्लुङय् म्ह ११ व म्याग्दी जिल्लाय् छम्हेसित कोरोना संक्रमण पुष्टि जूगु दु ।
गण्डकी प्रदेश कोरोना नियन्त्रण तथा रोकथाम कार्यक्रमया प्रवक्ता डा. विनोद विन्दु शर्माया कथं थ्व नाप गण्डकी प्रदेशय् कोरोना संक्रमितपि १४४म्ह थ्यःगु दु ।
स्वास्थ्य निर्देशनालय रामघाट पोखराया कथं पूर्वी नवलपरासी बौदीकाली गाउँपालिकाय् १२म्ह संक्रमित जूगु दु ।
अथेहे, बाग्लुङ बरेङ गाउँपालिकाय् च्याम्ह व निसीखोला गाउँपालिकाय् प्यम्ह मिजंपिन्त कोरोना पुष्टि जूगु दु ।
म्यादीया बेनी नगरपालिकाया ४६ दँ दुम्हेसित कोरोना खने दुगु धका स्वास्थ्य निर्देशनालय पोखरां धाःगु दु ।
थौंनिसे फुटपाथ पसः चिइकेत तयारी
शोभा श्रेष्ठ | तछलागा तृतीया ११४०,जेठ २६ सोमवाः
थौं येँ महानगरया दुनेया थीथी थासय् फुटपाथ पसः चिइकेत तयारी याःगु दु । परोपकार ताँ निसें असंया जमः तक फुटपाठ पसः चिइकेगु नीति स्थानीय मनू तयेगु पुचलं आ फुटपाथ पसः चिइकेत तयारी याःगु खः ।
फुटपाथ पसः चिइकेगु लागि किलागःया स्टार क्लबया नायः चन्द्र कुमार महर्जनया संयोजकत्वय् छगु कमिति गठन याःगु खः । थौं गठन याःगु कमिटि जागरुक युवा समूह नामं गठन याःगु खः ।
उगु कमिटिं परोपकारया ताँ निसें मरु, प्याफः, न्यत, किलागः, जनबहाः, थाय्मदु, असं, त्यंगः, त्यःर, भोताहिति, जमलय् तयेगु याना वयाच्वंगु थासय् तया वयाच्वंगु फुक्क फुटपाथ पसः चिइकिगु जूइ धका २४ वडा सदस्य विनोद तुलाधरं धयादीगु दु । वडा सदस्य तुलाधरं आः थ्व लागाय् गु नं हालतय् फुटपाथ पसः तयेकेमबीगु लक्ष्य कथं न्ह्यागु दु धका धयादिगु दु ।
थुगु कमिटिं पसः चिइकिगु लागाय् लाःगु फुक्क स्थानीय क्लबया प्रतिनिधिपिं व वडा सदस्यपिं दुजः जुइगु खँ धाःगु दु । थ्व पुचलं सोमवाः हे ब्यानरसहित थुगु लागा चाःहिला फुटपाथय् पसः तयाच्वंपिंत थनेगु व लिपां निसें तः मवयेत ख्याच्वः बियाथकूगु खः ।
उपत्यका विकास प्राधिकरण खारेज यायेत सरकारयात ध्यानाकर्षण
नृपेन्द्रलाल श्रेष्ठ | तछलागा तृतीया ११४०,जेठ २६ सोमवाः
उपत्यका नगरपालिका फोरमं स्थानीय सरकारया ज्या, कर्तव्य व अधिकारय् हस्तक्षेप यानाच्वंगु काठमाडौं उपत्यका विकास प्राधिकरण खारेज यायेत सरकारयात इनाप याःगु दु ।
विज्ञप्ति जारी यायेगु न्ह्य फोरमका अध्यक्ष तक जुयादिम्ह येँ महानगरपालिकाया मेयर बिद्यासुन्दर शाक्य, उपाध्यक्ष एवं ललितपुर महानगरपालिकाका मेयर चिरिबाबु महर्जन व सचिव एवं मध्यपुर ठिमी नगरपालिकाया मेयर मदनसुन्दर श्रेष्ठं सहरी विकास राज्यमन्त्री मानन्धर नाप छलफल यानादिगु खः ।
२०४५ सालय् नीस्वंगु प्राधिकरण आःया नेपाःया संविधान व हिलावंगु राज्यसंरचना, विद्यमान कानून कार्यन्वयनय् तकं लिच्वः लाकीगु व समग्र संघीय संरचना कार्यान्वयनय् हे बाधा लाकीगु प्रकृतिया संस्थाया कथं दुगु खँ नं फोरमं धाःगु दु ।
२०४५ सालय् तत्कालिन जुजु वीरेन्द्रं लालमोहर तया ऐनया आधारय् न्ह्याकुगु उपत्यका विकास प्राधिकरणयात आतक संविधानं म्हमसिगु धका धाःसे नगरपालिका फोरमं पटक–पटक खारेजीया माग याना वयाच्वंगु खः । काठमाडौं उपत्यका विकास प्राधिकरण २०६८ य् न्हापागु पटक संशोधन याःगु खः ।
२०७६ साल बैशाख २५ गते फोरमया अध्यक्ष शाक्यया अध्यक्षताय् क्वचाःगु प्यक्वःगु बिस्तारित बैठकं तत्काल प्राधिकरण खारेजीया माग याःगु खः । ‘प्राधिकरण २०४५ सालय् गठन जूगु संस्था ख । थुगु संस्था जुजु विरेन्द्रं जारी याःगु पञ्चायती अवशेषया ऐनय् टेके जुया च्वंगु खः । थुकिया जग हे बः मलागु धका फोरमया सचिव श्रेष्ठ धाःगु दु ।
‘प्राधिकरणयात खारेज यायेगु निंतिं नेपाल सरकारयात इनाप यायेगु धइगु फोरमया निर्णय जूगु खँ हानं इनाप यासें प्राधिकरणयात अविलम्ब खारेज यायेगु प्रकृया न्ह्यःने यंकेत शहरी वि
कास मन्त्री व राज्यमन्त्रीयात इनाप यानाच्वना ।,’ विज्ञप्तिइ न्ह्यथनातःगु दु ।
वयकलं नगरपालिका व उपत्यका प्राधिकरणया ज्या, कर्तव्य व अधिकार ९० प्रतिशत स्वया अप्वो मिले जुगु धका धयादिसे संघीय संरचना अनुसार स्थानीय सरकारयात बाइपास याना प्राधिकरणयात न्ह्यने छु न हालतय् स्वीकार्य मजुगु धका दाबी यानादिगु खः । ‘उपत्यकाया १८ गू नगरपालिकाया मेयरया न मेयर खः धइगु भ्रम प्राधिकरणया नेतृत्वय् दु धयादिगु ।
वंगु वैशाख महिनाय् च्वंगु स्वनिगः दुनेया झिंच्यागू नगरपालिकातय् मंकाः फोरमया विस्तारिक मुँज्यां याःगु निर्णय यात हानं ध्यानकर्षण याःगु दु ।
फोरमं आइतवाः छगू विज्ञप्ति पिथना फोरमया काठमाडौं विस्तारित मुँज्यां छगूमतं प्राधिकरण खारेज यायेमाःगु ठहर याःगु खँयात याकनं कार्यान्वयन यायेत सहरी विकास मन्त्री व राज्यमन्त्री समक्ष माग याःगु दु ।
लुम्बिनी मेडिकल कलेजय् उपचाररत निम्हसित कोरोना संक्रमण
लहनान्युज | तछलागा तृतीया ११४०,जेठ २६ सोमवाः
पाल्पाया तानसेन प्रभासय् लुम्बिनी मेडिकल कलेजय् उपचारत निम्हेसित कोरोना संक्रमण पुष्टि जूगु दु ।
प्रदेश जनस्वास्थ्य प्रयोगशाला भैरहवाय् याःगु परीक्षणय् पाल्पा पूर्वखोला गाउँपालिका–१ सिलुवाया २३दँया व गुल्मीया रूरू गाउँपालिका–१ या ३२ दँया मिजंम्हेसित कोरोना पोजेटिभ खनेदुगु खः ।
संक्रमित निम्हेसिया स्वास्थ्य अवस्था सामान्य दूगु धका धाःगु दु ।
निम्ह कोरोना संक्रमण खनेदुपिन्त आइसोलेसनय् तय उपचार जुयाच्वंगु धका अस्पतालया सूचना अधिकारीं जानकारी बिःगु दु ।
